Manya - 2023 SIM (OT NT Portions) Drama

Manya Bible Translation, © SIM International, 2023 

Isa ka aa keladen mɔɔ tan ni fila (12) ladɛn mingɛ, a ka fanga ni seetiiya di ai ma, fɔsa ai yi se jinajuulu gbɛnna mɔɔlu lɔ, ani ka jangalotɔlu lakɛnɛya. A do k'ai kelaya ko ai yi taa Ala ya masaya ko lase, ani ka mɔɔlu lakɛnɛya. A do vɛɛ ai yɛ: «Ài kà fen fen si ta àiya taama min nɔ. Taamabele o, bɔlɔ o, dɔnnifen o, wɔli o, ài kà wo suu suu ta. Ài do kà àiya faanibalu kɛ fila le. Ài vɛ jiyala bon suu suu la, ài yi to woja haan fɔɔ ài taa waate yi se. Ni do ai k'i ban ài lɔminala tɛɛ o tɛɛ lɔ, ài yi bɔ so wo la ka je gbangban bɔ ài sen ma, ka wo kɛ ai ban tɔɔmase le.»
Wo fɔ Isa bolo, aa keladennu vɛ siya minala ka taa so ni solu la, ai vɛ Samakan Kein lasena, ani ka jangalotɔlu lakɛnɛya fan bɛ lɔ.


Jamanakunnasiiba Helodi ka ko kɛnin minu bɛ mɛn mingɛ, a kɔnɔlɔ ka fili bubale, kamasɔlɔn a dɔlu tɛɛ a fɔla ko Yaya le wulinin ka bɔ saya lɔ. A dɔlu tɛɛ a fɔla ko Nabi Iliya la vɛ nkɛnɛmaya kɔtunun. A dɔlu fana tɛɛ a fɔla ko kela kɔlɔkɔlɔ dɔ vɛ seikɔ dunuɲa. Kɛɛ Helodi vɛɛ: «Ǹ na Yaya kun tɛɛla a la. Ǹ'i ko minu mɛnna yi ne, jene yi wo tii le?» Wo lɔ, Helodi tɛɛ Isa yenko ɲaɲininna.


Isa ya keladennu seikɔnin, ai k'ai kɛkolu bɛ dandɛɛli kɛ a yɛ. Wo kɔ, Isa ka taa ai le ai ta fan so dɔ la, ai y'a fɔla min ma ko Betisaida. Jama ka wo mɛn mingɛ, ai k'a salan. Isa do k'ai bɛ lɔmina kobɛn, ka Ala ya masaya ko lase ai ma, ani ka mɔɔlu lakɛnɛya, kɛnɛya lɔɔ tɛɛ minu la.
Teleben waate, aa keladen mɔɔ tan ni fila (12) ka na a fɔ a yɛ, ai vɛɛ: «Jama labila, fɔsa ai yi taa so ni toodalu la jan laminin nɔ, k'ai jiya ni dɔnnifen ɲinin, kamasɔlɔn m'i fuwa le lɔ jan.»
Kɛɛ Isa do vɛɛ ai yɛ: «Àilu gbu yi balo di ai ma.»
Ai do vɛɛ a yɛ: «Bulukala loolu ni jɛɛni fila le yi mɔ bolo dein. Niwotɛ, fɔ mɔ ka taa dɔnnifen san jama min bɛ yɛ.» Wo k'a talan, kɛ́ mɔɔ waa loolu (5 000) jate le tɛɛ je.
Ado Isa vɛɛ aa keladennu yɛ: «Ài yi jama lasii kpɛkpɛ mɔɔ biloolu loolu (50) le.» Keladennu k'a kɛ ten ka jama lasii. Wo kɛ, Isa ka bulukala loolu ni jɛɛni fila ta, k'a ɲa lajɛlɛ sanma ka balika bɔ Ala yɛ, ka ban ka wolu lɔkalikali k'a di a kɔbiladennu ma, ko ai y'a lɔtala jama wotɛ. Ai bɛ ka dɔnni kɛ k'ai fa kpekpe. Ai wɔlinin, Isa kɔbiladennu ka bulu ni jɛɛ kulunkulun tɔlu ladɛn, ka gbɔlɔ ɲa tan ni fila (12) lafa.


Lon dɔ, Isa kelen tɛɛ Ala dalila, k'a kɔbiladennu to a dafɛ. A do k'ai maɲininga, a vɛɛ: «Mɔɔlu yi ǹ jatela jene le?»
Ai k'a javi, ai vɛɛ: «A dɔlu y'a fɔla ko Makolikɛba Yaya le i le. A dɔlu fana y'a fɔla ko Nabi Iliya le i le. A dɔgbɛlɛlu y'a fɔla ko kela kɔlɔkɔlɔ dɔgbɛlɛ v'i wuli ka bɔ saya lɔ.»
Wo fɔ ai bolo, a k'ai maɲininga, a vɛɛ: «Àilu do? Ài yi ǹ jatela jene le?»
Piyɛli k'a javi, a vɛɛ: «Ile le Alimasihu le, Ala na min kelayala.»


Isa do k'a fɔ ai yɛ k'a magbeleya ko ai kà wo ko fɔ mɔɔ suu suu yɛ. A do vɛɛ: «Mɔɔnivin Tanin ka kan ka tɔlɔya siyama masɔlɔn. Kɛmɔbalu ni salakalase kuntiibalu ni seliya kalanmɔɔlu kɛtɔ ai banna a lɔ, k'a faa. Kɛɛ tele fila a sawana, a wulitɔ ka bɔ saya lɔ.»
Wo kɔ, a k'a fɔ jama bɛ yɛ, a vɛɛ: «Ni mɔɔ min y'a fɛ ka bila ǹ kɔ, fɔ wo tii i ban a jɛlɛ lɔ, k'a gbaankɔlɔman ta lon bɛ ka bila ǹ kɔ. Kamasɔlɔn ni mɔɔ mɔɔ si y'a fɛ ka a nii lakisi, wo tii bɔnɔtɔ a la. Ni do mɔɔ min ka bɔnɔ a nii la ka bɛn ǹe ma, wo tii kɛtɔ a nii lakisila. A yi di? Ni mɔɔ ka dunuɲa bɛ sɔlɔn ka bɔnɔ a nii la, nafa mindɛ le wo la a yɛ? Wo le kɛtɔ a kɛla, ni mɔɔ min vɛ maloyala ǹe ni ǹ kumakannu le, Mɔɔnivin Tanin yi maloyale wo tii le, a vɛ nala lon min na aa magbiliyali lɔ, ani a Fa aa magbiliyali, ani lɔhɔlɔma mɛlɛkalu ya magbiliyali. Ǹ'i tuɲa fɔ ài yɛ, dɔlu y'ài tɛma jan minu tɛnala saya masɔlɔnna, fɔ ai vɛ Ala ya masaya lankɛnɛmayatɔ yena.»


Tele sein jate timinnin kɔ, Isa ka Piyɛli ni Yohana ni Janguba ta ka taa ai le Aladaliya lɔ tini kɔkan. Isa ka to Ala dalila, a ɲakɔlɔla ka jɛlɛma, ani aa faanilu ka gbɛ pepe. Kɛ́ fila, minu taanin kɛla Nabi Musa ni Nabi Iliya le, wolu ka bɔ gbɛ la telemanin nɔɔlɔ ba lɔ, ai vɛ kumala Isa fɛ ka bɛn a sako ma, min mafatɔ a bolo Jelusalɛmu. Wo k'a talan Piyɛli ni a taamaɲɔɔlu tɛɛ vɛ sunɔɔ. Kɛɛ ai ka kunun ka Isa nɔɔlɔ ye, ani kɛ́ fila minu lɔnin tɛɛ a dafɛ. Kɛ́ fila wolu taatɔla, Piyɛli k'a fɔ Isa yɛ, a vɛɛ: «Kalanmɔɔ, a bɛnyine m'i to jan. Diɲa m'i gbaa sawa lɔ: i ta kelen, Nabi Musa ta kelen, ani Nabi Iliya ta kelen.» A do tɛɛ m'a lɔn a tɛɛ min fɔla. Piyɛli ka to kumala, sanbiliya ka na ka bilin ai kunna. Sanbiliya jiitɔla ai kunna, ai ka siyan. Wo kɛ, kumakan dɔ ka bɔ sanbiliya lɔ, a vɛɛ: «Ǹ diyanan Denkɛ le ne, ani ǹa Mɔɔ Tanin. Ài y'ài tolomalɔ a la.» Kumakan wo mɛn kɔ, ai ma mɔɔ ye fɔ Isa kelen. Ai do ka jeden ko wo ma. Ai ka min ye, ai ma wo ɲafɔ mɔɔ yɛ waate wo lɔ.


Ai ka jii tini la mingɛ wo dusagbɛlon, jama ba ka na ka Isa labɛn. Kɛ́ dɔ ka to jama tɛma k'a kan labɔ, a vɛɛ: «Kalanmɔɔ, i jaani, i ɲa lɔ ǹ denkɛ lɔ, denkɛ kelenpesa min yi m̀ bolo. Jina le yi bilala a lɔ. A do vɛ bilala a lɔ kotan, a a lagbanɔla telemanin, k'a lajaajaa, k'a dakaanvu bɔ, ani k'a lajavi bubale. A do bila gbeleyayine a bolo. Ǹ n'i kɔbiladennu madiyala ko ai yi jina gbɛn a lɔ, kɛɛ ai do pa ma se.»
Isa do vɛɛ: «Àilu limaniyabalilu ni mɔɔ filininnu! Ǹ'i to ài tɛma ka àiya ko mina m̀ ma haan fɔɔ waate mindɛ?»
Wo fɔ a bolo, a vɛɛ kɛ́ yɛ: «Na i denkɛ le jan.» Denni natɔla Isa ma, jina k'a laben duu ma k'a lajaajaa gbiligbili. Isa do ka jina majaman, ka denni lakɛnɛya, ka ban k'a lasei a fa ma. Mɔɔ bɛ ka kawakoya ka bɛn Ala ya foniseleya ma.


Jama kawakoyanin ka bɛn Isa kɛkolu bɛ ma, a vɛɛ a kɔbiladennu yɛ: «Ài y'ài tolomalɔ kobɛn ǹ kumakan na. Mɔɔnivin Tanin yi don bolo le ma mɔɔlu bolo.» Kɛɛ a kɔbiladennu ma kuma wo ɲaye. A kɔlɔ doonnin tɛɛ ai ma, fɔsa ai kana a ɲaye. Ai bɛ do tɛɛ siyanna a maɲiningako lɔ kuma wo kɔlɔ la.


Waate senin, sɔsɔyali dɔ k'i wuli Isa kɔbiladennu tɛma ko jene y'ai bɛ lɔ ɲamɔɔ le. Komi Isa tɛɛ k'ai miliya lɔn, a ka denni dɔ ta k'a lalɔ a tɔɔfɛ, k'a fɔ ai yɛ, a vɛɛ: «Ni mɔɔ min k'a bolo sii denni min ɲɔɔzii kɔlɔ ka bɛn ǹa ko ma, wo tii v'a bolo sii ǹe gbu kɔlɔ. Ni mɔɔ min do k'a bolo sii ǹ kɔlɔ, wo tii v'a bolo sii ǹ kelaba fana kɔlɔ. Kamasɔlɔn mɔɔ min v'a jɛlɛ dɔɔyala ài bɛ lɔ, wo tii le buɲanin ài bɛ le.»


Yohana vɛɛ Isa yɛ: «Kalanmɔɔ, mɔ na kɛ́ dɔ yena, a tɛɛ jinalu gbɛnna mɔɔlu lɔ i tɔɔ lɔ. Mɔ k'a fɔ a yɛ a yi nɔningɛ wo ma, kamasɔlɔn a tɛ mɔ dɔ le.»
Isa do vɛɛ ai yɛ: «Ài kà a dansii wo la. Mɔɔ min tɛ ài juu le, ài dɔ le wo le.»

Isa kɔlɔta waate ka taa haijɛnɛ ma ka sulunya mingɛ, a k'a latɛɛ ko fɔ a taanin Jelusalɛmu. Wo lɔ, a ka keladen dɔlu lataa a ɲa, minu ka taa Samaliyakalu ya soni dɔ la ka kolu lɔbɛn a yɛ. Kɛɛ so wo mɔɔlu ma diɲa ka Isa jiya, kamasɔlɔn a tɛɛ taala Jelusalɛmu le. A kɔbiladen Janguba ni Yohana ka wo ye mingɛ, ai ka Isa maɲininga, ai vɛɛ: «Mɔ Kuntii, jalasa i yi diɲale m'i taa makili ka bɔ sangbolo lɔ ai halakiko lɔ?»
Isa do k'i ɲa tilimin ai la k'ai makuma. Ai ka timin woja la ka taa so gbɛlɛ la.


Ai taatɔla, mɔɔ dɔ k'a fɔ Isa yɛ, a vɛɛ: «I vɛ taala tɛɛ o tɛɛ lɔ, ǹ'i bilale i kɔ.»
Isa do vɛɛ a yɛ: «Diɲa yi jɛɛkani bolo, ɲaa yi kɔnɔni bolo, kɛɛ dingila tɛ Mɔɔnivin Tanin bolo, a a nɔningɛ tɛɛminja.»
Isa k'a fɔ kɛ́ gbɛlɛ yɛ, a vɛɛ: «Na, i yi bila ǹ kɔ.»
Wo k'a javi, a vɛɛ: «Ǹ Kuntii, diɲa ǹ'i taa ǹ fa sudoon bene.»
Isa do vɛɛ a yɛ: «Fulenilu to je, ai y'ai fuleni ɲɔɔlu sudoon. Kɛɛ fɔ ile yi taa Ala ya masaya ko lase.»
A dɔgbɛlɛ k'a fɔ a yɛ kɔtunun, a vɛɛ: «Ǹ Kuntii, ǹ'i bilale i kɔ, kɛɛ diɲa ǹ'i taa ǹ sala m̀ balamɔɔlu la bene.»
Isa k'a javi, a vɛɛ: «Mɔɔ min yi buluwali kɛla dawa la, a v'i ɲa kaana a kɔma, wo tii tɛ Ala ya masaya baale manɔ feu.»

듣기 Luka 9