These audio recordings contain books of the Rvwàng New Testament, in the GvrayShànshér Mòngkà(GSM) translation.

Gvray Shànshér Mòngkà Kagvp Àngshv́r (Rvwàng) &#8471; SIL Global and Rvcv́ngcè Kàru Gomidi Kristu Shvngø̀mré 2026.
© 2025Rvcv́ngcè Kàru Gomidi Kristu Shvngø̀mré.

Gvray Shànshér Mòngkà Kagvp Àngshv́r

Mòngkà nø nv̀mlat nv̀mpv́ngø àv́lshaq íe. Vrá, Mòngkà nø Gvray nv̀ng tiqdø àv́lshaq í nø̀, Mòngkà nø Gvray ni íe. Mòngkà nø nv̀mlat nv̀mpv́ngø Gvray nv̀ng tiqdø àv́lshaq íe. Vl dv́ngte shvngbe nø Àng taqkèní pv́n yàngà. Pá:nò dv́ngte nø Àng taqkèní mø̀í dø pá:nò we tiqpv̀n gø màvl. Àng vdòng taq nø gø̀nshaq vle. Vrá, gø̀nshaq yalòng nø vsv̀ng shvngbe dvpvt gálòng íe. Gálòng nø dø vdòngø svr daqì. Dø lù:ngí gálòng sv̀ng mvdv́ngkéò.
Gvrayí dvzv́r daqà we vsv̀ng tiqpè vle. Àng bø̀ng nø Yohan íe. Vsv̀ng shvngbe nø àng taqkèní lvkv́m ra dø gálòng dvpvt shvkse wáshìlv́m dì daqì. Àng vdè nø gálòng mø̀í. Gálòng dvpvt shvkse wáshìlv́m rvt wa dì daqì we íe.
Vsv̀ng í dv́ngte sv̀ng vwanalv́m gálòng mvdø̀ng nø rvgaqtø̀m sv̀ng dì daqì. Àng nø rvgaq taq v̀l daqì. Rvgaq nø Àng taqkèní Gvrayí pv́n yà:ngà we ínìgø rvgaqí Àng sv̀ng màmvshá:lò. Àng nø Àng rvgaq sv̀ng dì daqì nìgø, Àng vsv̀ngrìí Àng kaq màtoò. Íwe Àng bø̀ng kaq kv́m nø̀, Àng kaq vtoò dv́ngte sv̀ng nø Gvray àngcè ílv́m vko vkv́ng À:ngí zíòe. Gvray àngcè ílv́m nø, vsà:ngí gà:lò yv́ngkèní mø̀í. Vsv̀ng shvrúngnøt nv̀ng gvcvtnøt kèní gø mø̀í, Gvrayí gà:lò yv́ngkèní wa íe.

Mòngkà nø shagóng í daqì nø̀, nøngmaq nv̀ng tiqdø v̀l daqì. Àng ngø̀rdvgùng sv̀ng gø nøngmaqí yv̀ng yv̀ngshà. Welòng nø jejú nv̀ng dìnglòng dv̀nzø̀ng we Vpè Gvray Àngcè Lòngzàpèò ngø̀rdvgùng íe.
Yohan nø Àng dangø shvkse wáshì nø̀ yadø vkiqe. “‘Ngà mèpvng di daq pè Àng nø, ngà mvdv̀m té ring pè íe, kadø íe wani ngà shini màvl dvgvp kèní Àng nø àv́lshaq íe,’ wvng nø̀ vzv̀ng kèní shø̀nò pè nø yapè íe,” wae.
Àng dv̀nshóng we jejú taqkèní nøngmaq shvngbeí nø, jejú mvdv̀m jejú lún bǿshà. Kadø íe wani Dvrá lèga nø Moshi taqkèní èzí yv̀ngshà. Íwe, jejú nv̀ng dìnglòng nø Yesu Kristu taqkèní tuq daqì. Gvray kaq yv̀ng dá:rò vsv̀ng nø kagǿ gø màvl. Vpè pøtpúmø vl nø̀ Gvray gø í pè, Gvray Lòngzàpèí mv̀ng Gvray sv̀ng chaqdap dètan daqshà.

Yerusalem kèní Yuda vsv̀ng shølshúrìí shvrúngshúrì nv̀ng Lewirì sv̀ng Yohan yv́ng dvzá:rò nø̀, “Nà nø kagǿ èíe?” wa røt bǿà kvt, Yohan nø yadø shvkse wáshìe. Àng nø mvmashì, dèdè shǿnshì nø̀, “Ngà nø Kristu mvǿngà,” wae.
Wekvt àngmaqí, “Íni, kagǿ èíe? Eliya èí má?” wa rø:tnò kvt, à:ngí, “Mvǿngà,” a:lòe.
“Nøngmaqí caì pè Kàdvtutshú èí má?” wa rø:tnò kvt à:ngí, “Mvǿngà,” a:lòe.
Wekvt àngmaqí, “Nøngmaq kaq dèzv́rvtshà rì sv̀ng kà vwv́ngalv́m dvpvt, nà nø kagǿ èí má? Nà vdè nø kadø èvlshìe má?” wa rø:tnòe.
Yohaní, “Kàdvtutshú Esayaí shø̀n yà:ngà dø, ‘Kàngpè dvpvt tvrà mèdónganø̀ng,’ wa nø̀, rvgaq mvgung yv́ngø vkiq we kàshaq nø ngà ǿngàe,” a:lòe.
Vrá, Parisi mvdò kèní dvzv́rshaq tiqmaqí, àng sv̀ng, “Wedø íni, nà nø Kristu wepè gø mèí, Eliya gø mèí, Kàdvtutshú wepè gø mèí nìnø, nàí pàwálv́m tì èløpmaòe?” wa rø:tnòe.
Yohaní, “Ngàí nø tì taq løpmangòe. Nàmaqí mèshánø̀ng we tiqgǿ nø nàmaq dvhø̀ø ripme. Àng nø ngà mèpvng dì daq pè í nø̀, ngà nø Àng híshvnam svnhǿng pǿna we vshuq wáshìlv́m gø màpǿng,” wa vtá:nòe. Yadv́ng pv̀n nø Yordan tì kupa nv̀msvr lap Betani rvwá Yohaní tìløpmaò yv́ng í yà:ngì.

Mèpvng ni taq, Yesu nø àng yv́ngsv̀ng dì ráì we Yohaní yv̀ng bǿà nø̀, “Èyv̀ngnø̀ng, rvgaqtø̀m mvrà lúashú pè Gvray Vyv̀ngcè nø yapè íe! ‘Ngà mèpvng di daq pè nø ngà mvdv̀m té ringe, kadø íe wani Àng nø ngà màvl vzv̀ng kèní àv́lshaq í yà:ngì,’ wvng shø̀nò pè nø yapè ni íe. Àng kagǿ í we ngàí gø mvshángò. Íwe, ngà dø̀ng rángà nø̀ tì taq løpmangò lòng nø Àng sv̀ng Israel dvcì kaq dvtanlv́m dvpvt íe,” wae.
Vrá, Yohan yadø shvkse wáshìe. “Gvray Pvlàcè nø kaø dø muqlàng kèní lashì nø̀ Àng mvdv̀m narshì daqì we ngàí yv̀ngòe. Vzv̀ng nø Àng sv̀ng ngàí mvshángò we, ngà sv̀ng tì taq tìløp dèzv́r pèí yadø èvle. ‘Vsv̀ng tiqgǿ mvdv̀mø Pvlàcè lashì nø̀ narshì daq we nàí èyv̀ng bǿò nìnø, wegǿ nø Shànshér Pvlàcè taq løpmashúpè íe,’ èvle. Yalòng sv̀ng ngàí yv̀ngò rvtnø̀ yapè nø Gvray Àngcèpè íe, wvng shvkse wv́ngshø̀nge,” a:lòe.

Mèpvng ni taq rá Yohan nø àng coqcv́n vnípè nv̀ng rip la:ngí, Yesu divm we sv̀ng yv̀ng bǿà nø̀, “Èyv̀ngshò, Gvray Vyv̀ngcè!” a:lòe.
Coqcv́n wepèníí Yohan shø̀nkà tá bǿà kvt, àngníí Yesu mèpvng cv̀n bǿà. Yesu wv́l poshì nìnø, àngní lvngàí cv̀na:tnà we sv̀ng yv̀ng bǿà kvt, “Nàníí pà èláshòe?” a:lòe.
Àngní lvngàí, “Rabiá, Nà kayv́ng èvle má?” wa rø:tnòe. (“Rabi” wa kà nø “Svra” wa kà íe).
À:ngí àngní lvngà sv̀ng, “Èdi ráshì nø̀ èyv̀ngvtshò,” a:lòe. Wervt àngní lvngàí cv̀na:tnà nø̀, Àng kayv́ng vl we yv̀ng bǿà. Wervtø̀ nø tvné nv̀mtan vbì nari íá:mì rvtnø̀, weni dø ráì høq Àng nv̀ng tiqdø v́ldv̀ng wae.
Yohan kà táò nø̀ Yesu sv̀ng cv̀n bǿà pèní kèní tiqpè nø, Simon Piter àngnvm Anderu íe. À:ngí àngnvmpè Simon sv̀ng vzv̀ng lá lún bǿà nø̀ àng sv̀ng, “Ngàní lvngàí Meshia sv̀ng yv̀ng bǿshà,” a:lòe. (“Meshia” nø “Kristu” wa kà íe). À:ngí Simon sv̀ng Yesu yv́ng shøla:tnà.
Yesuí àng sv̀ng dvjaqò sórí, “Nà nø Yohan àngcè Simon èíe. Íwe, nà sv̀ng nø Kepa tǿlv́m èí longe,” a:lòe. (“Kepa” nø “Piter” wa kà í nø̀ “lóng” wa kà íe).
Mèpvng ni taq, Yesu nø Galili móng sv̀ng búnglv́m dvdushì bǿì. Wekvt Pilip sv̀ng À:ngí yv̀ng bǿà nø̀, “Ngà mèpvng ècv̀n ra,” a:lòe.
Pilip nø, Anderu nv̀ng Piter vl we Betseda mvrìng kèní íe. Pilipmí Nataniel sv̀ng lá lún bǿà nø̀ àng sv̀ng, “Moshií gø Dvrá lèga taq vruò nø̀, Kàdvtutshúrìí gø vru yà:ngà pè sv̀ng nøngmaqí yv̀ng bǿshà. Àng nø Yosep àngcè, Nazaretpè Yesu íe,” a:lòe.
Wekvt Natanielí àng sv̀ng, “Nazaret mvrìng kèní nø shvla we kapv̀n bunge má?” a:lòe.
Pilipmí, “Có, yv̀ngv́mshò lè,” a:lòe.
Àng yv́ng Nataniel dì ráì we Yesuí yv̀ng bǿà kvt àng nv̀ng sing dø, “Ku, dvgoqnøt mvzvng we Israel vjø̀ng tiqpè,” wae.
Natanielí Àng sv̀ng, “Nàí ngà sv̀ng kadø èshángà má?” wa rø:tnòe.
“Pilipmí nà sv̀ng shini mègo dvgvp, nv̀mgwè tø̀ng lv̀ngpvngø nà èvl dvgvp ni, Ngàí nà sv̀ng yv̀ng bǿngà,” wa Yesuí vtá:nòe.
Wekvt Natanielí Àng sv̀ng, “Rabiá, Nà nø Gvray Àngcèpè, Israel Koqkv́mpè èíe,” a:lòe.
Yesuí àng sv̀ng, “Nv̀mgwè tø̀ng lv̀ngpvngø Ngàí nà sv̀ng yv̀ng bǿngà wvng kà rvtnø̀ èkv́me ó? Ya mvdv̀mø té ring pv̀nrì nàí èyv̀ng lú:ngòe,” a:lòe. Vrá Yesuí, “Ngàí kàdøng vla:tnìni, muqlàng vtánvm nø̀, Gvrayò muqlàng dvzv́rrì nø, Vsv̀ng Àngcèpè taqkèní rvlv́ng mvnshì yøt mvnshì we sv̀ng nàmaqí èyv̀ng lóngnø̀nge,” a:lòe.

듣기 Yohan 1