ᤋᤥᤗᤡᤱᤛᤥᤔᤢ 1 - 인기 성경 구절

공유

ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤔᤧᤴᤇᤠᤶ ᤕᤠᤵᤔᤡᤴ ᤀᤠᤏᤡ᤹ ᤆᤀᤡ᤺ᤳᤋᤥ. ᤜᤠᤒᤠ ᤀᤠᤏᤡ᤹ ᤆᤀᤡ᤺ᤳ ᤜᤧᤰᤋᤱᤒᤠ ᤆᤥᤃᤢᤶ॥ ᤂᤧᤱᤜᤠ᤹ᤖᤧ ᤘᤖ᤺ᤱᤅᤥᤒᤠ ᤅᤠᤜᤠ᤹. ᤋᤠᤱᤛᤠᤱᤒᤥ ᤁᤧᤒᤧᤒᤠ ᤐᤢᤜᤠ᤹. ᤜᤡᤱᤔᤏᤠᤛᤡᤒᤠ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤛᤶᤎᤠᤱ ᤕᤢᤰ ᤆᤥ᤺ᤰᤛᤢᤖ॥” ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤈᤀᤡ᤺ᤳᤋᤥ ᤔᤧᤴᤇᤠᤶ ᤕᤠᤵᤔᤡᤴ ᤆᤥᤃᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤂᤢᤏᤧ᤹ ᤜᤧᤰᤋᤱᤒᤠ ᤆᤥᤃᤢᤛᤡ. ᤂᤢᤏᤧ᤹ ᤂᤧᤱᤜᤠ᤹ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤀᤣ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤛᤡᤖᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤜᤠᤱᤘᤠᤔᤢ᤹ᤀᤡ ᤌᤠᤛᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤡᤰᤁᤡᤓᤢᤱ ᤑᤧᤰᤋᤧᤇᤧ᤹ᤖ ᤐᤣᤃᤧᤳᤇᤧ᤹. ᤐᤥ᤺ᤴᤍᤧᤳᤇᤧᤖ ᤐᤣᤃᤧᤳᤇᤧ᤹. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤡᤶᤛᤧᤳᤇᤧ᤹ ᤜᤧᤰᤁᤩᤠᤱ ᤂᤧᤴ ᤀᤠᤒᤠᤅᤣ ᤕᤢᤰᤁᤥ ᤕᤢᤰᤋᤧᤇᤧ᤹ᤖ ᤐᤣᤃᤧᤳᤇᤧ᤹॥ ᤘᤖ᤺ᤱᤅᤥᤒᤠ ᤅᤠᤜᤠ᤹. ᤁᤧᤒᤧᤒᤠ ᤐᤢᤜᤠ᤹. ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤛᤶᤎᤠᤱ ᤕᤢᤰ ᤆᤥᤃᤧᤳᤇᤧ᤹॥”

ᤁᤢᤜᤣ᤺ᤰᤛᤡᤱᤔᤥ ᤋᤠᤃᤧᤖᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤖ᤺ᤱᤃᤧᤴ ᤋᤠᤱᤛᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢ॥

ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤢᤏᤠᤘᤠᤀᤡᤒᤣᤰ ᤔᤣ᤺ᤴᤏᤣ ᤔᤢᤛᤢᤴᤏᤣ ᤂᤧᤛᤢᤴᤏᤣ ᤏᤢ ᤔᤢᤜ᤺ᤱᤗᤡᤱ ᤂᤧᤜ᤺ᤱᤗᤡᤱ ᤏᤧᤛ᤻ᤛᤧ॥ ᤘᤖ᤺ᤱ ᤛᤶᤍᤠᤱ ᤂᤠᤔᤠᤰᤗᤢᤶ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤆᤫᤠ᤺ᤳ ᤛᤶᤎᤠᤱ ᤋᤠᤰᤁᤴᤍᤧᤖ ᤘᤕᤧ॥

ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤀᤥ᤺ᤳᤗ.” ᤂᤧᤒᤩᤠᤱ ᤂᤠᤀᤥ᤺ᤳᤋᤧᤖᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤆᤥᤃᤢᤒᤠᤴ ᤁᤧᤖᤧᤰ ᤀᤥᤔᤧᤳᤋᤢ. ᤂᤧᤴ ᤛᤠ᤹ᤖᤡᤰ ᤏᤢᤒᤠ ᤆᤥᤃᤧ॥ ᤕᤢ᤺ᤴᤇᤡᤰ ᤐᤥ᤺ᤰᤛᤧ ᤜᤧᤰᤁᤩᤠᤱ ᤋᤠᤏᤠᤶ ᤐᤥ᤺ᤰᤛᤧ—ᤋᤢᤰᤛᤡᤃᤣᤰᤐᤠ ᤕᤧᤴ॥

ᤜᤧᤰᤁᤩᤠᤱ ᤋᤠᤃᤧᤖᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤃᤧᤀᤥ᤺ᤵᤐᤠᤴ ᤀᤥᤔᤧᤳᤋᤢ. ᤂᤧᤴ ᤏᤢᤒᤠ ᤆᤥᤃᤧᤒᤠ ᤏᤡᤛᤢ॥ ᤂᤢᤏᤧ᤹ ᤂᤠᤃᤧᤀᤥ᤺ᤵᤐᤠᤴ ᤔᤠᤰᤆᤡᤃᤧᤴ ᤂᤠᤍᤠᤶᤔᤥᤗᤠᤶ ᤛᤧᤴᤍᤢ॥

ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤗᤧ ᤐᤠ᤺ᤳᤋᤢ. “ᤀᤡᤰᤛᤠ ᤂᤠᤶᤒᤣ᤺ᤰᤔᤥᤒᤠ ᤕᤠ᤹ᤖᤡ᤺ᤶᤒᤠ ᤁᤧᤗᤡᤱᤒᤠ ᤁᤧᤖᤧᤰ ᤁᤢᤒᤢᤱᤜᤠ᤹ ᤜᤧᤰᤁᤩᤠᤱ ᤁᤢᤈᤠ᤹ᤀᤥᤀᤣ ᤕᤠ᤹ᤖᤡ᤺ᤶᤒᤠ ᤁᤧᤕᤠᤰᤐᤠ ᤁᤧᤖᤧᤰ ᤛᤡᤱᤛᤣ᤹ᤜᤠ᤹ ᤐᤡᤏᤧᤇᤡᤱᤅᤠᤱ ᤘᤠ᤹॥ ᤂᤧᤴᤜᤠ᤹ ᤂᤡᤴᤇᤡ᤹ ᤆᤠᤔᤠᤖᤧ ᤗᤠᤃᤡ ᤁᤢᤈᤠ ᤐᤥᤱᤗᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤃᤧᤀᤥ᤺ᤵᤐᤠᤴ “ᤗᤧᤴᤍᤡᤰ” ᤔᤧᤳᤋᤢ ᤜᤧᤰᤁᤩᤠᤱ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤴ “ᤛᤧᤴᤍᤡᤰ” ᤔᤧᤳᤋᤢ॥ ᤕᤢ᤺ᤴᤇᤡᤰ ᤐᤥ᤺ᤰᤛᤧ ᤜᤧᤰᤁᤩᤠᤱ ᤋᤠᤏᤠᤶ ᤐᤥ᤺ᤰᤛᤧ—ᤌᤡᤰᤛᤡᤃᤣᤰᤐᤠ ᤕᤧᤴ॥

ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤆᤫᤠ᤺ᤳᤋᤡᤴ ᤔᤢ ᤏᤢ ᤌᤠ᤺ᤱ ᤁᤢᤗᤢᤶᤔᤥ ᤁᤧᤛᤧᤶᤒᤠᤍᤧᤴᤎᤡᤰ ᤐᤥᤱᤗ. ᤜᤧᤰᤁᤩᤠᤱ ᤂᤧᤸᤗᤧ ᤆᤫᤠ᤺ᤳᤋᤡᤴ ᤏᤧᤳᤇᤡ ᤁᤢᤗᤰᤁᤥ ᤛᤧᤴᤍᤢᤖ॥”

ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤌᤰᤛᤠ. ᤋᤠᤱᤛᤠᤰᤁᤥᤒᤠ ᤁᤧᤖᤧᤰ ᤐᤢᤛᤠ. ᤂᤠᤶᤒᤣ᤺ᤰᤔᤥ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤁᤢᤛᤰᤔᤠ ᤁᤧᤕᤠᤰᤐᤠ ᤁᤧᤖᤧᤰ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠᤖᤧ ᤗᤠᤃᤡᤀᤠᤱ ᤛᤖᤣ᤺ᤰᤁᤩᤠ᤺ᤵᤐᤠ ᤌᤠᤒᤢ ᤛᤡᤱᤗᤡᤱᤜᤠ᤹ ᤐᤡᤖᤢᤱᤛᤡᤱ᤹॥” ᤂᤧᤒᤩᤠᤱ ᤜᤠᤒᤠᤜᤧᤰᤁᤣ ᤐᤥ᤺ᤰᤛᤧ॥

ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤗᤧᤴᤍᤡᤰ ᤏᤢ ᤛᤧᤴᤍᤡᤰ ᤛᤧᤶᤔᤠᤖᤧ ᤗᤠᤃᤡ ᤋᤠᤱᤛᤠᤱᤒᤥ ᤀᤥ᤺ᤳᤋᤡᤜᤠ᤹ ᤔᤧᤒᤳᤗ॥ ᤘᤠᤕᤧᤶᤜᤠ᤹. ᤕᤧᤴᤜᤠ᤹ ᤜᤧᤰᤁᤩᤠᤱ ᤋᤱᤒᤣᤜᤠ᤹ ᤛᤧᤶᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤔᤡᤰᤛᤣᤴ ᤔᤧᤒᤥᤱᤗ॥

ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤌᤠᤒᤢᤛᤡᤱᤛᤣ᤹ᤜᤠ᤹ ᤁᤢᤗᤡ᤺ᤴᤏᤥ ᤁᤢᤛᤣ᤹ ᤁᤧᤎᤥ᤺ᤰᤐᤠᤜᤠ᤹ ᤗᤡᤱᤗ ᤕᤠ᤺ᤴᤍᤢᤖ. ᤜᤧᤰᤁᤩᤠᤱ ᤁᤢᤒᤢᤱ ᤁᤢᤗᤡ᤺ᤴᤏᤥ ᤁᤢᤛᤣ᤹ ᤁᤧᤎᤥ᤺ᤰᤐᤠ ᤀᤠᤒᤠᤅᤣ ᤐᤖᤡᤰᤐᤖᤡᤰᤐᤠ ᤗᤡᤴ ᤁᤧᤃᤵᤐᤠ ᤁᤢᤈᤠ᤹ ᤁᤧᤎᤥ᤺ᤰᤐᤠ ᤛᤡᤱᤒᤢᤱᤜᤠ᤹ ᤂᤠᤶᤒᤣ᤺ᤰᤔᤠᤸᤗᤧ ᤗᤡᤱᤗ ᤕᤠ᤺ᤴᤍᤢᤖ॥” ᤂᤧᤒᤩᤠᤱ ᤜᤠᤒᤠᤜᤧᤰᤁᤣ ᤐᤥ᤺ᤰᤛᤧᤖᤥ॥

ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡᤃᤠᤱᤒᤠ ᤆᤫᤠ᤺ᤳᤋᤡᤴ ᤏᤢ ᤁᤢᤈᤱᤎᤠᤱᤒᤠ ᤆᤫᤠ᤺ᤳᤋᤡᤴ ᤔᤢ ᤏᤢ ᤌᤠ᤺ᤱ ᤀᤣ᤹ᤀᤣ ᤆᤥᤃᤢ॥ ᤜᤧᤰᤁᤩᤠᤱ ᤜᤠᤒᤠᤜᤧᤰᤁᤣ ᤐᤥ᤺ᤰᤛᤧᤖᤥ॥

ᤂᤠᤶᤒᤣ᤺ᤰᤔᤠᤸᤗᤧ ᤌᤠᤒᤢᤛᤡᤱᤛᤣ᤹ᤜᤠ᤹ ᤁᤢᤒᤢᤱ ᤁᤢᤗᤡ᤺ᤴᤏᤥ ᤁᤢᤛᤣ᤹ ᤁᤧᤎᤥ᤺ᤰᤐᤠ ᤜᤧᤰᤁᤩᤠᤱ ᤀᤠᤒᤠᤅᤣ ᤀᤠᤒᤠᤅᤣ ᤐᤖᤡᤰ ᤐᤖᤡᤰᤐᤠ ᤗᤡᤴ ᤁᤧᤃᤵᤐᤠ ᤁᤢᤈᤠ᤹ ᤁᤧᤎᤥ᤺ᤰᤐᤠ ᤛᤡᤱᤒᤢᤱᤜᤠ᤹ ᤗᤡᤅᤧᤖ ᤕᤠ᤺ᤴᤍᤢ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤔᤧᤳᤋᤢᤸᤗᤧ ᤂᤧᤴ ᤏᤢᤒᤠ ᤏᤡᤛᤢ॥

ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤕᤶᤒᤠ ᤏᤧᤳᤇᤡ ᤀᤥ᤺ᤳᤋᤡᤜᤠ᤹ ᤆᤥᤃᤢᤛᤡ॥ ᤕᤶᤒᤠ ᤀᤥ᤺ᤳᤋᤡ᤺ᤸᤗᤧ ᤗᤧᤴᤍᤡᤰ ᤌᤥ᤹ᤖᤢᤖ ᤜᤧᤰᤁᤩᤠᤱ ᤆᤢᤰᤐᤠ ᤀᤥ᤺ᤳᤋᤡ᤺ᤸᤗᤧ ᤛᤧᤴᤍᤡᤰ ᤌᤥ᤹ᤖᤢᤖ ᤑᤠ᤹ᤀᤠᤱ ᤆᤥᤃᤢᤛᤡ॥ ᤂᤢᤏᤧ᤹ ᤂᤣᤛᤣᤔᤡᤰᤐᤠᤜᤠ᤹ᤀᤠᤱ ᤆᤥᤃᤢᤛᤡ॥

ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤋᤠᤱᤛᤠᤱᤒᤠᤸᤗᤧ ᤁᤢᤓᤥᤛᤠᤱᤒᤠ ᤆᤫᤠ᤺ᤳᤋᤡᤴ ᤌᤡᤰ ᤋᤧᤴᤏᤥ ᤛᤢᤶᤛᤡᤱᤗ ᤜᤧᤰᤁᤩᤠᤱ ᤛᤧᤱᤛᤧᤱᤒᤠ ᤂᤠᤶ ᤏᤡᤎᤠ᤺ᤵᤗ॥” ᤂᤧᤒᤩᤠᤱ ᤜᤠᤒᤠᤜᤧᤰᤁᤣ ᤐᤥ᤺ᤰᤛᤧᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤱᤛᤧᤱᤒᤠ ᤂᤠᤶᤔᤡᤴ “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠ” ᤔᤧᤳᤋᤢ. ᤜᤧᤰᤁᤩᤠᤱ ᤁᤧᤛᤢᤶᤛᤡᤱᤒᤠ ᤆᤫᤠ᤺ᤳᤋᤡᤴ “ᤘᤖ᤺ᤱ” ᤔᤧᤳᤋᤢ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤔᤧᤳᤋᤢᤸᤗᤧ ᤂᤧᤴ ᤏᤢᤒᤠ ᤏᤡᤛᤢ॥

ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤜᤠᤱᤘᤠᤔᤢ᤹ᤀᤡ ᤐᤡᤖᤢᤛᤡ. “ᤐᤥ᤺ᤴᤍᤧᤶᤔᤧ᤹ ᤌᤧ᤹ᤖᤧᤶᤔᤧ᤹ ᤜᤧᤰᤁᤩᤠᤱ ᤘᤖ᤺ᤱᤅᤡᤴ ᤌᤡᤶᤛᤧᤶᤔᤧ᤹ᤖ ᤐᤣᤃᤧᤶᤔᤧ᤹॥ ᤜᤧᤰᤁᤩᤠᤱ ᤐᤢᤛᤠᤜᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤒᤥ᤺ᤴᤗ ᤔᤧᤒᤣ᤺ᤰᤗ॥”

ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤐᤖᤡᤰᤐᤖᤡᤰᤐᤠ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹. ᤐᤖᤡᤰᤐᤖᤡᤰᤐᤠ ᤜᤡᤶᤌᤰᤛᤠᤜᤠ᤹. ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤐᤖᤡᤰᤐᤖᤡᤰᤐᤠ ᤋᤠᤶᤓᤢᤱ ᤌᤰᤛᤠᤜᤠ᤹ ᤗ᤺ᤳᤋᤢᤛᤡᤖ॥” ᤂᤧᤒᤩᤠᤱ ᤜᤠᤒᤠᤜᤧᤰᤁᤣ ᤐᤥ᤺ᤰᤛᤧ॥

ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤘᤖ᤺ᤱᤅᤡᤴ ᤁᤢᤜᤡᤱᤘᤧᤳ ᤐᤠᤎᤢᤱ ᤗᤧ᤺ᤰᤅᤠᤜᤠ᤹ᤖᤧ ᤔᤧᤎᤡᤶᤛᤢᤖ॥ ᤜᤧᤰᤁᤩᤠᤱ ᤐᤢᤛᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤈᤱᤎᤠᤱ ᤋᤠᤱᤛᤠᤱᤅᤥ ᤔᤧᤒᤧᤖ॥”

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤖᤡᤰᤐᤖᤡᤰᤐᤠ ᤋᤠᤶᤓᤢᤱ ᤌᤰᤛᤠᤜᤠ᤹. ᤐᤖᤡᤰᤐᤖᤡᤰᤐᤠ ᤜᤡᤶᤌᤰᤛᤠᤜᤠ᤹. ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤆᤥᤃᤢᤛᤡ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤔᤧᤳᤋᤢ. ᤂᤧᤴ ᤏᤢᤒᤠ ᤆᤥᤃᤧ॥