मर्‌कुस 12 - 인기 성경 구절

공유

येसुइ ओउकाय जवाफ बइसास्‍यावा, “जुदासय महत्‍वको आग्‍याखे इ खेना— ‘अ इस्राएलको मान्‍तालम साइनु, निको प्रभु परमेस्‍वरखे यातज्‍योले खेओ प्रभु खेसास्‍याउना। ओउतझ्‍यान्‍ते निङइ लयको प्रभु परमेस्‍वरकाय लयको जुदा ल्‍हुङतुकसय, जुदा प्रानसय, जुदा मनसय र जुदा जिःङसय राप्‍नु।’ अनि अर्‌को महत्‍वको निसम् आग्‍याखे इ खेना— ‘लयको छिमेकिकायखे लयकाय रापो लेखाले राप्‍नु।’ इ निसज्‍यो आग्‍यासय नाःतो महत्‍वको आग्‍याखे अरु नाःलेल।”

येसुइ लयको चेलालमकाय ब्रक्‍त गोताक्‍तिको तोसास्‍यावा, “दोङ्‌सिले ङाइ निङकाय तोनेनाङ्‍स, अरु जुदाइ काओ भन्‍दापाय इ गरिब राङ्‌गि मोम्‍चोइ नाःतो भेति काओ मुना। धइतिदाह्‍य्‌सा अरुइपाय लयकुस मुओ प्रसस्‍त धनलमसय मइतो काआकानि, तर इ गरिब राङ्‌गि मोम्‍चोइपाय गरिब स्‍याउतिमा लयकुस मुओ जुदाले काआकान। द्‍याह इकुसिपाय स्‍याक्‍साको लागि यातज्‍यो मयो ध्‍याकमा नाःलेल।”

येसु मन्‍दिरको आङ्‍गनहाङ गमो भेति काओ बकासहाङ मान्‍तालमइ भेति काधयमुओ योति च्‍युःङ्‌तिमुसास्‍यावो खेतो। नाःतो धनि मान्‍तालमइ ओउ बकासहाङ नाःतो थेपो काधयमुओ येसुइ च्‍यउसास्‍यावा। तर यातचाक गरिब राङ्‌गि मोम्‍चो वाङाक्‍तिको ताम्‍बको मयो निसध्‍याक काआकान, ओउ थेपोको मोलखे माहा मइतोको खेतो।

निइ परमेस्‍वरकाय लयको जुदा ल्‍हुङतुकसय, जुदा मनसय र जुदा जिःङसय राप्‍सा परनातहि, अनि लयको छिमेकिकायखे लयइ लयकाय रापो लेखाले राप्‍सा परनातहि त दाह्‍यो कुरा सत्‍यले खेना। परमेस्‍वरकाय फुःओ भोक र अरु भोकलम बयोसयखे इ निसज्‍यो आग्‍या पालन जाह्‍ङोले नाःतो महत्‍वको स्‍याउना।”

अनि येसुइ ओउमयकाय तोसास्‍यावा, “ओउतखेया, दोह रोम देसको माहाराजाको खेना, ओउ रोम देसको माहाराजाकाय बइनु, र दोह परमेस्‍वरको खेना, ओउ परमेस्‍वरकायले बइनु।” येसुको एतताह्‍ङो जवाफ साइति ओउमय माहा जोक्‍तो ग्‍याह्‍ङाकाय।