Tigidali Nai Gagalama Nigali Side 6
6
Te bidi dabego dwai kolesaga yali po
1Nosali te we bidi hauwa te tigidali tǫde pedelama, tama augwaligo wegi mani me hauwa elaluai. 2Tama te Godigo ogwa dabego te wegi mani dabe sulama, te gasa sawi yai mu yai. Tama augwali deli deligo augwa homugo digi te we dabe anoma eyu, tama augwali selama, bidali. 3Tialima, Yawego te po wai, “Eno te bidibo ula sesemane sogo bidada pomainogo sesabi gana emainu mabo mobo te momainogo me egobe, magi baso meni, augwali te osogo bidabo nai tama naga da. Megi da, te bidi bidibo ula te kibu be 120 naga usu nama bidimainu yaibao,” Godigo te po wai. 4Tama te sogo me, te nosali sogo me, te moni genuai bobobage bidi dabe meba te tǫde bidaluali. Te bidi dabe augwali te Godigo ogwa dabede sali te we dabego augwaligo ame nani bidi dabe bidali. Augwali te bomai bidi mu gagalama, tama te sogo augwali nogi genuai elaluai. #Nam 13:33
5Te Yawego te tigidali tǫ badu bidalubo we bidi dabego ebo kolesaga suali, te dwai dwai mu yali. Augwaligo homu te dwai sę ebode naga konealuali. 6Tama Yawego te polobadu bidi de we si tǫgo nigilama, te dwagi yai homu pemene yali, te homu ma koneani. Tiali goli, agai te we bidi hani dabego homu suali, te augwaligo homu te dwai naide naga konebaso, tama tede homu dene eyu, agai te polobadu dwagi yai homu pemene yali tiwai gilama ma ebeo. Te meni. 7Homu dene mu eyu, tama agai te po wali, “Te eno nigali bidi tigidali te eno ela silaibao, te augwali menade bidada pabo te mu silaibao. Te eno tigidali hasa sibi dabe tigidali me, te ba dabe me, te nai dabe me, tigidali silaibao. Magi baso meni, ena digi ena te nai dabe nigali goli, augwaligo ebo kolesagago enaba dene ilibo dao, tama wiegi yai homu pemene ma egobeo,” te po wai. 8Tiali goli, Yawego te bidi Noa dali digi dwagi yai homu pemene yalio. #Mat 24:37; Luk 17:26; 1 Pi 3:10
9-10Te Noade po da te tiwai dao. Agai ogwa sela elaluali, Siem, Ham, me Jafet. Noa da dwagi yai bidi, te sogo bidali we bidi tomode te Noa deli digi aga bilibo kolesaga te Godigo gedude dolo mu yali. Aga te God dali deli homu naga eyu, tama Godigo abagi mu dao. #2 Pi 2:5 11Tiali goli, gasa we bidi dabe augwali tigidali te God gedude dolama bidali, tama dwai kolesaga me, te hwįbo kolesaga me, te tigidali habuba pągąna sigi pai. 12Tama Godigo tǫba tonaluama, tama agai tigidali bidigo dwai kolesaga mu ebo suali. Te bidigo bilibo kolesaga te gaga pai mu pedelama, tama dwai kugumini naga yai.
Noago te moni geba sip te nigali
13Tialima, Godigo Noabolo te po wali, “Tigidali bidi augwaligo tigidali tǫde te haniani dwai hwįbo kolesaga mu ebo. Tama tibaso, eno tede homugo konea palama, tama te homu ebao, eno augwali dolai hagede ebao. Te eno tigidali we bidi mu silaibao. 14Tama nago dwagi yai ni pedai selama, tama naga moni genuai geba sip me deli nigao. Nago te tomode be habu meba nigilao, tama tomode me bulu badu mabode te agebele megego bugagia sebelao. 15Nago te tiwai sip nigao. Te sip bobage usu sabo, te 133 mita, te aga genuai ilabo usu te 22 mita dao. Tama nago ugwaba bobage usu ni sabo, te 13 mita dao. 16Nago te sip pedu nigilao. Tiali goli, te sip bulubadu paiabo ni name dabe augwali te pedu dologoba mu paigio. Menio. Te hap mita olo elalumainao, te ula tomoba asomainu. Te sip tomode be sela te tama tiwai sę yao, me deli aiyadu, me deli tomode, me deli ugwadu. Tama nago te me bogo badu te sip tomoba pabo sunumi me deli nigao. 17Te eno te tǫde wę asobo genuai mu pedalumainu elama, te tigidali bidibo ula elalubo nai dabe dola silimainu yaibao. Te tǫde tigidali nai dabe isila silaibao. 18Tiali goli, eno nage dali da, te eno bomai po dąų walaibao. Nage da, naga we dali badi, te naga ogwa dabego augwa we dabe dali, dage da te moni geba sip tomoba bula sao. 19Tama nago te tigidali haniani hasa dabego si si sao, te me omai, me so tama, si sao. Tama nago augwali te duga dali hodobo te moni sip tomoba sela pobaso da, teda augwali me isigobeo. 20Te tigidali haniani ba me, te genuai me, te dwasianu dabe me, te omai de so si si augwali te sip tomoba pelama, te augwali me isigobeo. 21Tama nago te naga tuabo haniani nai badi, te haniani hasa dabego tubo nai me, te ba dabego tubo nai me selama, te moni sip geba tomoba muao,” te po wai. 22Tialima, Noago Godigo agabolo te wali po gilama te tigidali sę ela silai. #Hib 11:7
© 2002, Wycliffe Bible Translators, Inc. All rights reserved.