ငဝ်ႈ 25
25
ၸိူဝ်ႉၶိူဝ်းဢႃႇပြႃႇႁၢမ်ႇတၢင်ႇၶိူဝ်း
(တူၺ်း၊ 1 ရႃႇၶျုၵ်ႈ 1:32-33)
1 ဢႃႇပြႃႇႁၢမ်ႇ၊ဢဝ်မေးဢၼ်လႆႈၸိုဝ်ႈၵေႇတုရႃႉ၊ထႅင်ႈဢေႃႈ။- 2မၼ်းၵိူတ်ႇလဵင်ႉလုၵ်ႈၸၢႆးၸိမ်းရမ်ႇ၊ယွၵ်ႉသၢၼ်ႇ၊မေႇတၢၼ်ႇ၊မိတျၼ်ႇ၊ဢိသၽၵ်ႉ၊ဢိၵ်ႇတင်းသုဢႃႇ၊ဢေႃႈ။- 3ယွၵ်ႉသၢၼ်ႇ၊မီးလုၵ်ႈၸၢႆး သေးပႃႉ၊ဢိၵ်ႇတင်းတေႇတၼ်ႇ၊လႄႈၸိူဝ်ႉၶိူဝ်းတေႇတၼ်ႇ၊တင်းလၢႆၸမ်ႉ၊ပဵၼ်ၵူၼ်းမဵဝ်းဢႃႇသုရိမ်ႇ၊ၵူၼ်းမဵဝ်းလေႇတုသိမ်ႇ၊ဢိၵ်ႇတင်းၵူၼ်းမဵဝ်းလေႇဢုမ်ႇမိမ်ႇ၊ဢေႃႈ။- 4လုၵ်ႈၸၢႆးမိတျၼ်ႇ၊ၸမ်ႉ၊ပဵၼ်ဢေးၽႃႇ၊ဢေးၽေႇရႃႉ၊ႁႃႇၼုၵ်ႉ၊ဢပိတႃႉ၊တင်းဢေးလတႃႇ၊ဢေႃႈ။ ၶဝ်ၸိူဝ်းၼႆႉတင်းသဵင်ႈတင်းလူင်ပဵၼ်ၸိူဝ်ႉၶိူဝ်းၵေႇတုရႃႉ၊ဢေႃႈ။
5 ဢႃႇပြႃႇႁၢမ်ႇ၊ဢဝ်ဢုၵ်ႉၸႃႇၵႃႈမီးတင်းသဵင်ႈတင်းလူင်ပၼ်တီႈဢိၸၢၵ်ႈ၊ဢေႃႈ။- 6တီႈလုၵ်ႈၸၢႆးဢၼ်လႆႈတီႈမေးၼွႆႉမၼ်းၸိူဝ်းၼၼ်ႉၵေႃႈ၊မၼ်းပၼ်လၢၵ်ႈသွင်ႇသေယဝ်ႉ၊မိူဝ်ႈဢၼ်မၼ်းယင်းဢသၢၵ်ႈလိပ်းယူႇၼၼ်ႉမၼ်းပွႆႇလုၵ်ႈၸၢႆးၸိူဝ်းၼၼ်ႉဢွၵ်ႇၵႂႃႇၸူးတီႈမိူင်းဝၼ်းဢွၵ်ႇပုၼ်ႉ ႁႂ်ႈလႆႈယူႇႁၢင်ႇၵႆၵၼ်တင်းလုၵ်ႈၸၢႆးမၼ်းဢိၸၢၵ်ႈ၊ဢေႃႈ။
လွင်ႈဢႃႇပြႃႇႁၢမ်ႇတၢႆလႄႈသၢင်းၵျူဝ်ႇ
7-8 ဢႃႇပြႃႇႁၢမ်ႇ၊ၼၼ်ႉ ၸွမ်းလူၺ်ႈဢသၢၵ်ႈၵႄႇထဝ်ႈထူၼ်ႈတဵမ်ပၢၵ်ႇၸဵတ်းသိပ်းပၢႆႁႃႈပီယဝ်ႉလႄႈ တၢႆၵႂႃႇလႆႈၶၢမ်ႇတၢင်းဢၼ်သိမ်းဢဝ်ၵႂႃႇၸူးတီႈၵူၼ်းမဵဝ်းမၼ်းဢေႃႈ။- 9လုၵ်ႈၸၢႆးမၼ်းဢိၸၢၵ်ႈ၊ဢိၵ်ႇတင်းဢိသမေႇလႃႉ၊ၸိူဝ်းၼၼ်ႉ ဢွၼ်ၵၼ်ဢဝ်မၼ်းၵႂႃႇသၢင်းၵျူဝ်ႇၵႃႈၼႂ်းႁူးထမ်ႈမၵ်ႉပေႇလႃႉ၊ဢၼ်မီးၽၢႆႇတၢင်းဝၼ်းဢွၵ်ႇတူင်ႈၼႃးမမ်ႇရေႇ၊ဢၼ်ဢွၼ်တၢင်းပဵၼ်တူင်ႈၼႃးဢေႇၽရုၼ်ႇ၊လုၵ်ႈၸၢႆးၸေႃးႁႃႇ၊ၵူၼ်းမဵဝ်းႁိတ်ႉတိ၊ၼၼ်ႉဢေႃႈ။- 10တူင်ႈၼႃးၼႆႉဢႃႇပြႃႇႁၢမ်ႇ၊သိုဝ်ႉဢဝ်တီႈၵူၼ်းမဵဝ်းႁိတ်ႉတိ၊ၶဝ်လႄႈ တီႈၼၼ်ႈလႆႈသၢင်းၵျူဝ်ႇဢႃႇပြႃႇႁၢမ်ႇ၊တင်းမေးမၼ်းၸႃႇရႃႇ၊ဢေႃႈ။- 11ဝၢႆးသေဢႃႇပြႃႇႁၢမ်ႇ၊တၢႆၵႂႃႇယဝ်ႉၼၼ်ႉၽြႃးပဵၼ်ၸဝ်ႈပၼ်တၢင်းလီတီႈလုၵ်ႈၸၢႆးမၼ်းဢိၸၢၵ်ႈ၊ၵေႃႉဢၼ်ယူႇႁိမ်းၼမ်ႉမေႃႇပေႇလႁေႇရွႆႇ၊ၼၼ်ႉဢေႃႈ။
ၸိူဝ်ႉၶိူဝ်းဢိသမေႇလႃႉ
(တူၺ်း၊ 1 ရႃႇၶျုၵ်ႈ 1:28-31)
12 ဢိသမေႇလႃႉ၊လုၵ်ႈၸၢႆးဢႃႇပြႃႇႁၢမ်ႇ၊ဢၼ်ၵိူတ်ႇလဵင်ႉမႃးတီႈႁႃႇၵရႃႉ၊ၵူၼ်းမဵဝ်းဢေးၵျိပ်ႉ၊ၶႃႈၸႃႇရႃႇ၊ၼၼ်ႉ။- 13မီးလုၵ်ႈၸၢႆးၸိူဝ်းဢၼ်ၶပ်ႉတၢမ်းၵၼ်လူင်းမႃးၼၼ်ႉပဵၼ်ၼပႃႇယုတ်ႉ၊ၵေႇတႃႇ၊ဢႃႇတပေႇလႃႉ၊မိပသမ်ႇ၊- 14မိသေႇမႃႉ၊တုမႃႇ၊မႃႇၸႃႉ၊- 15ႁႃႇတတ်ႉ၊တေႇမႃႉ၊ယေႇတုရႃႉ၊ၼႃႇၽိသႃႉ၊ဢိၵ်ႇတင်းၵေႇတမႃႇ၊ၸိူဝ်းၼၼ်ႉဢေႃႈ။- 16ၶဝ်ၸိူဝ်းၼၼ်ႉ လႆႈပဵၼ်ပူႇပဵၼ်ပေႃႈၵူၼ်းမဵဝ်းသိပ်းသွင်မဵဝ်းလႄႈ ၸိုဝ်ႈသဵင်ၶဝ်ၼၼ်ႉ ႁွင်ႉႁဵၵ်ႈၸွမ်းၸိုဝ်ႈဝဵင်းၽႂ်ဝဵင်းမၼ်း၊လမ်းတပ်ႉၽႂ်လမ်းတပ်ႉမၼ်းဢေႃႈ။- 17ဢိသမေႇလႃႉ၊ဢသၢၵ်ႈယိုၼ်းယၢဝ်းထိုင်ပၢၵ်ႇသၢမ်သိပ်းပၢႆၸဵတ်းပီၸင်ႇတၢႆၵႂႃႇသေလႄႈ၊မၼ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇၸူးတီႈၵူၼ်းမဵဝ်းမၼ်းဢေႃႈ။- 18ၸိူဝ်ႉၶိူဝ်းဢိသမေႇလႃႉ၊ၸိူဝ်းၼၼ်ႉ၊ယူႇၼႂ်းမိူင်းဝူင်ႈၵၢင်ဝဵင်းႁႃႇဝိလႃႉ၊တင်းဝဵင်းသုရႃႉ၊ၽၢႆႇဝၼ်းဢွၵ်ႇမိူင်းဢေးၵျိပ်ႉ၊ၸွမ်းသဵၼ်ႈတၢင်းဢၼ်ၵႂႃႇၸူးမိူင်းဢႃႇသီးရီးယႃး၊ပုၼ်ႉဢေႃႈ။ ၶဝ်ယူႇၽၢတ်ႇၵၼ်တင်းၸိူဝ်ႉၶိူဝ်းဢႃႇပြႃႇႁၢမ်ႇ၊တၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉဢေႃႈ။ #25:18 “ၶဝ်ယူႇၽၢတ်ႇၵၼ် … တၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉဢေႃႈ” ၵႃႈၼႂ်းၵျၢမ်းမူႇၶူႇသျိင်ႇဝႃႈ၊ “ယူႇၸမ်ပီၸမ်ၼွင်ႉ” ၵႃႈၼႂ်းၵျၢမ်းမူႇႁေႇပြႄးၼၼ်ႉဢထိၵ်ႈပႄႇမၼ်းဢမ်ႇပေႃးသၢင်းလၢင်းလီ
ဢေးသေႃးတင်းယႃႇၵုပ်ႈၵိူတ်ႇလဵင်ႉမႃး
19ၼႆႉၸမ်ႉ၊ပဵၼ်လွင်ႈၸိူဝ်ႉၶိူဝ်းဢိၸၢၵ်ႈ၊လုၵ်ႈၸၢႆးဢႃႇပြႃႇႁၢမ်ႇ၊ဢေႃႈ။- 20ဢိၸၢၵ်ႈ၊ၼႆႉမိူဝ်ႈဢၼ်ဢသၢၵ်ႈမၼ်းမီးသီႇသိပ်းၼၼ်ႉၸိုင်၊ပဵၼ်ႁိူၼ်းႁူမ်ႈၵၼ်တင်းရေႇပႅၵ်ႉၵႃႉ၊လုၵ်ႈယိင်းပေႇသူၺ်ႇလႃႉ၊ၵူၼ်းမဵဝ်းဢႃႇရမိၼ်ႉ၊မိူင်းမေႇသူဝ်ႇပူဝ်ႇတေးမီးယႃး၊လႄႈပဵၼ်ၼွင်ႉယိင်းလႃႇပၢၼ်ႇ၊ဢေႃႈ။- 21ၵွပ်ႈပိူဝ်ႈရေႇပႅၵ်ႉၵႃႉ၊ဢမ်ႇၵိူတ်ႇလုၵ်ႈၵိူတ်ႇလၢင်းၼၼ်ႉဢိၸၢၵ်ႈ၊သူးတွင်းတီႈထႃႇဝရႃႉၽြႃး၊ပုၼ်ႈမၼ်းလႄႈ ထႃႇဝရႃႉၽြႃး၊ထွမ်ႇဢဝ်လႄႈရေႇပႅၵ်ႉၵႃႉ၊ပႃးပတိၵ်ႈသၼ်ႇထေႇသေယဝ်ႉ၊- 22ၵိူတ်ႇလဵင်ႉလုၵ်ႈၽႃၽႄမႃးဢေႃႈ။ ၸူဝ်ႈဢၼ်ဢမ်ႇပႆႇၵိူတ်ႇလဵင်ႉၼၼ်ႉ ၶဝ်သွင်ၵေႃႉၼၼ်ႉတဵၵ်းၵၼ်ႉၵၼ်ၵႃႈၼႂ်းတွင်ႉလႄႈရေႇပႅၵ်ႉၵႃႉ၊ဝႃႈ၊ “လွင်ႈဢၼ်လၢၵ်ႇလၢႆးၸိူဝ်ႉၼင်ႇၼႆၼႆႉ ႁဵတ်းသင်သမ်ႉမႃးပဵၼ်တီႈၵဝ်ၼႆႉ၊” ဝႃႈၼင်ႇၼႆလႄႈမၼ်းလဝ်ႈထၢမ်တီႈထႃႇဝရႃႉၽြႃး၊ဢေႃႈ။- 23ထႃႇဝရႃႉၽြႃး၊လၢတ်ႈတီႈမၼ်းလႄႈဝႃႈ၊
“ၵႃႈၼႂ်းတွင်ႉမႂ်းမီးၵူၼ်းသွင်မဵဝ်းဝႆႉဢေႃႈ။ ၵူၼ်းသွင်မဵဝ်း
ဢၼ်ၶေႉၶဵင်ႇၵၼ်တၵ်းၵိူတ်ႇလဵင်ႉမႃး
ၵႃႈတီႈမႂ်းဢေႃႈ။
ၵူၼ်းမဵဝ်းၼိုင်ႈတၵ်းႁႅင်းယႂ်ႇသေၵူၼ်းတၢင်ႇမဵဝ်းလႄႈ
ၵေႃႉယႂ်ႇၼၼ်ႉတၵ်းလႆႈပဵၼ်ၶႃႈၵူၼ်းၸႂ်ႉတီႈ
ၵေႃႉလဵၵ်ႉဢေႃႈ၊” ဝႃႈၼင်ႇၼႆဢေႃႈ။
24မိူဝ်ႈဢၼ်ၶိင်ႇမၼ်းထိုင်ၼၼ်ႉၸိုင်၊မၼ်းၵိူတ်ႇလဵင်ႉလုၵ်ႈၸၢႆးၽႃၽႄမႃးဢေႃႈ။- 25ၵေႃႉဢၼ်ၵိူတ်ႇလဵင်ႉမႃးဢွၼ်တၢင်းၼၼ်ႉ ၽိဝ်ၼိူဝ်ႉလႅင်ၸၢင်းႁၢင်းလႄႈ ၼင်မၼ်းမိူၼ်ၸိူဝ်ႉၼင်ႇသိူဝ်ႈၶူၼ်သတ်းဝႆႉဢေႃႈ။ ပိူဝ်ႈၼႆလႄႈ ၶဝ်ႁွင်ႉႁဵၵ်ႈၸိုဝ်ႈမၼ်းဝႃႈ၊ဢေးသေႃး၊ဢေႃႈ။- 26ၵေႃႉပႃႈလိုၼ်းၼၼ်ႉ ယိပ်းၵမ်သူၼ်ႈတိၼ်ဢေးသေႃး၊မၼ်ႈမၼ်ႈသေလႄႈၵိူတ်ႇလဵင်ႉမႃးဢေႃႈ။ ပိူဝ်ႈၼႆၸင်ႇၶဝ်ႁွင်ႉႁဵၵ်ႈၸိုဝ်ႈမၼ်းဝႃႈ၊ယႃႇၵုပ်ႈ၊#25:26 “ယႃႇၵုပ်ႈ” ပွင်ႇဝႃႈ၊ “ၵူၼ်းယိပ်းၵမ်သူၼ်ႈတိၼ်” ဢမ်ႇၼၼ် “ပႅတ်ႉလႅၼ်” ဢေႃႈ (တူၺ်း၊ 27:36) ဢေႃႈ။ မိူဝ်ႈဢၼ်ၶဝ်သွင်ၵေႃႉၵိူတ်ႇလဵင်ႉမႃးၼၼ်ႉဢိၸၢၵ်ႈ၊မီးဢသၢၵ်ႈႁူၵ်းသိပ်းယဝ်ႉဢေႃႈ။
ဢေးသေႃးၶၢႆဢရႃႇလုၵ်ႈတူၼ်ႈတူဝ်ၸဝ်ႈၵဝ်ႇ
27လုၵ်ႈဢွၼ်ႇသွင်ၵေႃႉၼၼ်ႉ ယႂ်ႇမႃးလႄႈဢေးသေႃး၊ပဵၼ်ၵူၼ်းလႃႈထိူၼ်ႇဢၼ်ယိုဝ်းၵၢင်ႇၵတ်ႉၶႅၼ်ႇၼႃႇလႄႈ ပဵၼ်ၵူၼ်းဢၼ်လႄႇထိူၼ်ႇလႄႇၶိူဝ်းဢေႃႈ။ ယႃႇၵုပ်ႈ၊ၸမ်ႉ၊ပဵၼ်ၵူၼ်းဢၼ်ၸႂ်ဢူၼ်ႈၸႂ်လီလႄႈ ၸၢင်ႈယူႇႁိူၼ်းယူႇယေးၵူၺ်းဢေႃႈ။- 28ဢိၸၢၵ်ႈ၊ႁၵ်ႉပႅင်းဢေးသေႃး၊ၵွပ်ႈပိူဝ်ႈယၢမ်ႈလႆႈၵိၼ်ၼိူဝ်ႉတူဝ်ထိူၼ်ႇဢၼ်ဢေးသေႃး၊ၵႆႉယိုဝ်းလႆႈမႃးပၼ်ၼၼ်ႉလႄႈ ရေႇပႅၵ်ႉၵႃႉ၊ၸမ်ႉ၊ႁၵ်ႉပႅင်းယႃႇၵုပ်ႈ၊ဢေႃႈ။-
29ဝၼ်းၼိုင်ႈယၢမ်းမိူဝ်ႈဢၼ်ယႃႇၵုပ်ႈ၊ယင်းတူမ်ႈၽၵ်းၼမ်ႉထူဝ်ႇယူႇၼၼ်ႉ ဢေးသေႃး၊ၵႂႃႇလႄႇထိူၼ်ႇပွၵ်ႈမႃးဢေႃႈ။ ၵွပ်ႈပိူဝ်ႈတွင်ႉမႆႈႁႅင်းၼႃႇလႄႈ၊- 30မၼ်းလၢတ်ႈတီႈယႃႇၵုပ်ႈ၊လႄႈဝႃႈ၊ “ၵဝ်ႁိူဝ်ႉၼူၼ်းတွင်ႉမႆႈၼႃႇယဝ်ႉ။ ဢဝ်တၢင်းၵိၼ်ထူဝ်ႇလႅင်ၼၼ်ႉလဵင်ႉၵဝ်လူး၊” ဝႃႈၼင်ႇၼႆဢေႃႈ။ ၵွပ်ႈၸိူဝ်ႉၼႆလႄႈၶဝ်ႁွင်ႉႁဵၵ်ႈမၼ်းဝႃႈ၊ဢေႇတုမ်ႇ၊#25:30 “ဢေႇတုမ်ႇ” ပွင်ႇဝႃႈ၊ “ဢၼ်လႅင်” ဢေႃႈ ၼႆဢေႃႈ။
31 ယႃႇၵုပ်ႈ၊ၵေႃႈတွပ်ႇလႄႈဝႃႈ၊ “ပေႃးမႂ်းပၼ်ဢရႃႇလုၵ်ႈတူၼ်ႈၼၼ်ႉတီႈၵဝ်ၸိုင်၊ၵဝ်တၵ်းပၼ်ၵိၼ်ဢေႃႈ၊” ဝႃႈၼင်ႇၼႆလႄႈ၊
32 ဢေးသေႃး၊ၵေႃႈဝႃႈ၊ “လီယဝ်ႉ။ ၵဝ်တၵ်းတေတၢႆယဝ်ႉ။ ဢရႃႇလုၵ်ႈတူၼ်ႈၼႆႉပၼ်ဢၵျူဝ်းၵဝ်ၵႃႈသင်ၵေႃႈဢမ်ႇၸႂ်ႈ၊” ဝႃႈၼင်ႇၼႆဢေႃႈ။
33 ယႃႇၵုပ်ႈ၊သမ်ႉလၢတ်ႈလႄႈဝႃႈ၊ “ပေႃးပဵၼ်ၼႆတိူင်ႇဝႃႈၵတိဢွၼ်တၢင်းတႃႉ။” ဝႃႈၼင်ႇၼႆလႄႈ ဢေးသေႃး၊ၵေႃႈတိူင်ႇဝႃႈၵတိသေယဝ်ႉ၊ဢဝ်ဢရႃႇလုၵ်ႈတူၼ်ႈမၼ်းဢၢပ်ႈပၼ်တီႈ ယႃႇၵုပ်ႈ၊သေဢေႃႈ။- 34ၵမ်းၼၼ်ႉ၊ယႃႇၵုပ်ႈ၊ဢဝ်ၶဝ်ႈမုၼ်းၵမ်ႈၽွင်ႈ ဢိၵ်ႇတင်းၽၵ်းၼမ်ႉထူဝ်ႇၼၼ်ႉပၼ်လႄႈဢေးသေႃး၊ၵေႃႈၵိၼ်ယဝ်ႉသူတ်ႉယဝ်ႉၸင်ႇဢွၵ်ႇၵႂႃႇဢေႃႈ။ လွင်ႈတၢင်းၼႆႉ ပဵၼ်လွင်ႈဢၼ်ဢေးသေႃး၊ဝႆႉမဝ်မၢင်တီႈဢရႃႇလုၵ်ႈတူၼ်ႈမၼ်းထၼ်ႇႁိုဝ်ၼၼ်ႉဢေႃႈ။
