Fíĉilum 3
3
Gatil arafuhow gátiar n’Aláemit
1Jiffase ni súnuhureŋ sasu so Atúla átut me, enuhunjaŋ efaŋ ró ᵽe mutuho. Funah fice néjoul ek’etoh to aare ahu neogol : « Maagen, Aláemit naagulseh jambi jitiñ hani bununuh banur ni waamme dáre ni fíreŋ fe ? » 2Naah yo : « A-a, alobut me, naagóli jújue jitiñ wo, 3bare baamme n’etut fíreŋ fafu, naagóli : “Jambi jitiñ bo, hani egor bo jatiito, mata jitiñ bo me, ᵽan jiĉet.” » 4Enuhunjaŋ yay neogol : « Múk ! Let maagen, mati jiĉet. 5Aláemit faŋaol naffas yo : Funah fo jijae bo me etiñ, gúĉilul ᵽan gúpegulo min jíni ti o, mata ᵽan júju jiffas maaro ni maarat. »
6Ñer aare ahu naluj bubugum bununuh babu, najuh búoh búariari, ᵽan búsum fitiñ, ban bújue bisen gaffas. Najow ak’atujul dó ni bubugum babu ece atiñ, naŋar may ak’asen áinol atiñ. 7Ñer to baenah gúĉilil n’gúpegulo n’gujuh búoh gusimout. Min guŋar utoj bununuh bice gajow bo bífig, guleĉ úhoi guhogo.
8Mb’uĉiga tiname, bunaa báruser, n’guun Aláemit Atúla najatore me ni fíreŋ fafu. N’gutey gukoᵽ n’ununuh waw. 9Aláemit Atúla navoh áinema naagol : « Aw umelo ? » 10Naagol : « Niuwun gaeli ni fíreŋ fafu, ñer níholi nitey ik’ikoᵽ mala min ikan me eᵽatalah. » 11Naagol : « Ay agiteni búoh eᵽatalah nukane ? Nutitiñ ᵽiaŋ bununuh babu bo nífireni me ? » 12Naagol : « Dáru aare ahu o nusenom me, o abajulo bo asenom, nitiñ. » 13Aláemit Atúla naah aare ahu : « Wa uĉile nukan me ? » Naagol : « Dáru enuhunjaŋ yay ekelo ebutom min itiñ. »
14Ñer Aláemit Atúla naah enuhunjaŋ yay :
« Nemme mamu nukane, ni sihaj sasu ni súnuhureŋ sasu ᵽe aw nevoni mb’itab me !
Ᵽan núh’úfulor ni fari,
ban aw m’buroŋi, ᵽan núh’úmer gaᵽor gunah émit ᵽe !
15Ñer maer, maa nijoge bi n’aw ni aare ahu :
Ᵽan ikanul n’jilator, ban ubugorul ᵽoᵽ ᵽan ikan wo nulator.
Gabulaken aare ahu ᵽan gumapul fuhoi,
aw ᵽan urum gola ni futoñ. »
16Mbiban, naah aare ahu :
« Ᵽan ikan gafareti gútañi,
min nuh’ubuh guñoli ni buyoh.
Ᵽan nuh’umaŋ bilihor n’áini#3.16 ᵽan nuh’umaŋ bilihor n’áini : báfaculer bice buoge : biinumi ᵽan biteb mbal áini. ,
bare aĉila ᵽan áni afani. »
17Naban nábaho mbal áinema naagol : « Nemme firim aari núttune min utiñ bununuh babu bo nífireni me :
Aw mb’uĉil me min itab ettam yay.
Ᵽan urok yo táñi gunah émit ᵽe min mb’úju ubaj ró fitiñi.
18N’ettam yay yíya, mafos mánoman maa sijeŋ ᵽan miil dó,
ᵽan nuh’utiñ waileul me n’ulah waw.
19N’ejeni ᵽan útiñum bi funah fal eĉeli
no mb’ubbañ me mbal ettam dó núᵽullo me.
Maagen aw mof nom,
ban ᵽan ubbañ úbaho mof. »
20Mbiban, áinema Adam nakan aarol gajow gagu gaa Eva (dóemme "aroŋ me"), mata aĉila ajae me éni jaw bugan bugagu ᵽe. 21Ñer Aláemit Atúla naŋar ubaŋ waa súnuhureŋ min acokor wañ asim Adam ni aarol. 22Naban naah : « Nemme maer arafuhow nánini ti ace ni wolal, min affas me wáari me ni waarat me, jambi atiñ me maer bununuh babu baa buroŋ ; mata ihalol me natiñ bo, ᵽan aroŋ bi nánonan. » 23Ñer Aláemit Atúla náᵽunnil ni fíreŋ fafu fal Eden gujow guke burok ettam yay dó naŋar me nateᵽil. 24No nahamil me aban, naŋar báuwener émit guce bugo guvoge me ĉerubeŋ, abaŋ m’butum gánonum fíreŋ fafu. N’guogen ufoje wajege sambun nihi gúvit wo bi emin bulago babu bajow me bi ni bununuh babu baa buroŋ.
Wycliffe Bible Translators, Inc. All rights reserved.