Génesis 2
2
1Penchásexcheyk axta élánamáxche néten, tén han náxop, keñe han ma'a ekyókxoho aqsok ekhéyak 2Appenchessek axta apkelane aqsok Dios ekwokmo siete ekhem, apkellókassek axta apyampé. 3Apxénchek axta han ektaqmalma xa ekhem siete nak, apteméssessek axta ekpagkanamaxche', hakte apkellókassek axta apyampé xa ekhem nak, cham'a ekyókxoho aptamheykha apkelane nak aqsok. 4Cháxa ektémakxa axta sekxók élánamáxko néten tén han náxop.
Énxet apha yókxexma Edén
Xama axta apkelana Dios Wesse' egegkok néten tén han náxop, 5méko axta sekxók makham yenta'a tén han pa'at, hakte axta yáphassók makham Dios Wesse' egegkok ekmámeye keso náxop. Méko axta han xama énxet enxoho aptamheykha. 6Katyapok axta aqsa chá'a yegmen eñama kañe' xapop, ekyássásseyak axta chá'a ekyókxoho xapop. 7Keñe axta Dios Wesse' egegkok apkelana énxet ma'a xapop ánek, apwátekhakkassek axta apwéhek apmésa apyennaqte. Cháxa aptamhákxo axta énxet ekha apkennama.
8Tén axta natámen Dios Wesse' egegkok apkelana yókxexma ektaqmela Edén, ekpayho nak ekteyapmakxa ekhem, keñe aphésa m'a énxet ektáha axta apkelane. 9Apkelántekkessek axta nahan ekyókxoho mók ektémakxa yenta'a éltaqmalma, ekha nak ekyexna ektaqmalma nak antók. Apkeneykekxeyk axta han yámet ekyennaqtéssamo nak egnények neysekso nak aqsok apkeneykekxa', tén han ma'a yámet segyekpelchássesseyam nak aqsok ektaqmela, tén han aqsok ekmaso.
10Edén axta han keñamak ekteyapma m'a wátsam, élyásseseykegko axta chá'a aqsok yókxexma ektaqmela, kexpánchesamaxcheyk axta han cuatro aktegák. 11Pisón axta ekwesey émha amonye', haxnencheykmek axta ekyókxoho yókxexma nak Havilá, ekyetnamakxa nak sawo ekyátekto ekmomnáwa. 12Keltásek han sawo' élyátekto élmomnáwa ekheykegko xa yókxexma nak, yetneyk han yámet agye' ektaqmalma nak, tén han meteymog élmomnáwa nak. 13Guihón axta han ekwesey m'a mók wátsam, ekhaxnegcheykmo nak ekyókxoho yókxexma Cus. 14Tén axta Tigris ma'a ektáhakxa axta ántánxo wátsam, ekmallahanweykmoho nak ekteyapmakxa ekhem nak Asiria, keñe Éufrates ma'a ektáhakxa nak cuatro wátsam.
15Xama axta aphéssama Dios Wesse' egegkok énxet ma'a yókxexma ektaqmalma Edén, yaqwayam enxoho eknekxak aqsok, tén han eltaqmelchesek, 16aptáhak axta apmésa appeywa s'e: “Apwanchek etwok yámet ekyexna ekyókxoho élámha nak se'e yókxexma ektaqmalma nak, 17eyke mopwanchek etwok ekyexna m'a yámet segyekpelchássesseyam nak aqsok ektaqmela, tén han aqsok ekmaso. Aptókek sa' agkok xa, yetsapok sa'.”
18Tén axta Dios Wesse' egegkok aptáha han se'e: “Megkataqmelak exek apxakkók énxet, alanaksek sa' ko'o xama yaqwayam chá'a kapasmok.” 19-20Tén axta Dios Wesse' egegkok apkelana xapop ánek ekyókxoho aqsok nawha'ák, ekyókxoho náta, keñe axta apnaqlákxésa énxet yaqwayam etegyesagkok chá'a élwesey. Aptegyásegkek axta élwesey ekyókxoho aqsok nawha'ák megkalmeymentakcha'a m'a énxet, tén han ekyókxoho náta, tén han ma'a ekyókxoho aqsok nawha'ák élmeymentakcha'a nak, tamheykegkek axta han élwesey m'a apteméssessamakxa axta élwesey. Axta eyke ét'ak makham xama ekmowána enxoho chá'a kapasmok. 21Keñe axta natámen Dios Wesse' egegkok aptenchesa ekyentaxno agko' énxet, aplekkessek axta xama apakhák neyseksa apteyenma, tén axta apcháhakkásekxo makham. 22Apkelanak axta Dios Wesse' egegkok xama kelán'a xa apakhák nak, tén axta apyentegkásekxo énxet.
23Axta aptáhak apwet'a s'e:
“¡Cháxa ektáha ko'o
ehápetek ahagko' xa,
tén han ektáha
exchakkok ahagko'!
Atnéssesek sa'
ekwesey kelán'a,
hakte Dios axta keñamak
aplekkesso énxet xa.”
24Cháxa keñamak apyamasma nak chá'a apyáp énxet, tén han egken, yaqwayam épetchak ma'a aptáwa', xama han katnekxak xa ánet nak.
25Meyke apáw'ák axta xa ánet nak, énxet tén han kelán'a, axta eyke kalmegqaktók ektéma xa.
Enxet Lengua Sur Bible © Paraguayan Bible Society, 2015.