Utandiko 2
2
1Avino insi ni yulu na vyonsi vyasililikile ukuumbwa. 2#Kuf 20:11 #Aye 4:4, 10 Pa wanda uwalenga cinimbali, walanga Leza watamala umulimo wakwe onsi wa kuumba, nga apuuza. 3#Kuf 20:11 Nga Leza apolelela uwanda uwalenga cinimbali, aupaatula kuti uye uiyele. Pano pa wanda uu walanga watamala umulimo wakwe onsi wa kuumba, nga apuuza. 4Vii avino iyulu ni nsi vyaumvilwe.
Mu calo ca Edeni
Lino Yawe Leza waumvile insi ni yulu na vyonsi vyayamo, 5patali cimelwa nanti cimwi pansi, pano walanga Leza atatala waponya imvula pano pansi. Nga kutali umuntu nanti umwi wa kulima musili. 6Lelo munyezi wakatukanga ukufuma pansi nu kutonsya musili. 7#1Kol 15:45 Lyene Yawe Leza atoola ivu ukufuma ku musili nga apanga umuntu. Alino aputa umupu ukapeela umi mu mpuno yakwe, nga umuntu aya nu umi.
8Lyene Yawe Leza apanza icalo ca Edeni lwaku ufumondaka, nga aikamo umuntu wino wapanzile. 9#Umb 2:7; 22:2, 14 Alino Yawe Leza alenga kuti musili umezye imiti iyembe ya misango yonsi nu kuti yaseeka iviseekwa visuma. Pa kasi ka calo pali umuti ukapeela umi nu muti ukapeela amano akumanya visuma ni viipe.
10Uluzi lutandika kukonkoloka mu Edeni, lukontelela vyamu calo, nga ukufuma papa ilwankanikana mu nguzi zini. 11Izina lya luzi lwakwe conga a Pisyoni. Lwene luli luzi ulukakonkolokela mu mpanga yonsi ya Havila, muno mukazanwa zaabu. 12Zaabu wa kweneko umuswefiwe, nga kwaya vyamununko usuma visilolekaloleka nga na mawe ya onikisi. 13Izina lya luzi lwakwe ciili a Giooni. Lwene luli luzi ulukakonkolokela mu mpanga yonsi ya Kusyi. 14Izina lya luzi lwakwe citatu a Tigilisi. Lwene luli luzi ulukakonkolokela ku ufumondaka wa musumba wa Asyuli, nga lwakwe cini a Yufulate.
15Lyene Yawe Leza atoola umuntu amwika mu calo ca Edeni kuti acilima nu kucisunga. 16Alino apeela ilamulo ku muntu ati, “Cumi kwene ungalya iviseekwa vyaku miti yonsi yamu calo, 17lelo utakalye iviseekwa vyaku muti uno ukapeela amano akumanya visuma ni viipe. Pano uwanda kwene uno ulalyako, ulafwa.”
18Lyene Yawe Leza avwanga ati, “Cisi cisuma kuti umuntu aikala wenga. Caleka namamuumbila alingine na aliwe kuti yaazwana.” 19Acino Yawe Leza atoola ivu nu kupanga inyama zyonsi nga ni vyunyi vyonsi ivikapapuka ukufuma ku musili. Lyene avileta ku muntu kuti alole vino amavitemela mazina. Vii avino cila ciumbwa catemilwe izina lyaciko. 20Caleka umuntu atemela inyama zyonsi mazina nga ni vyunyi vyonsi ivikapapuka. Lelo pali vii vyonsi patali icalingine wakwe kazwa wa muntu.
21Lyene Yawe Leza aleka umuntu kuti akasule utulo twamfwa, nga lino acikaswile Leza asisya lumbazo longa lwa monsi, asililapo nu munyefu pa ciposi. 22Leza aumba umwanaci ukufuma ku lumbazo lwa monsi nga amuleta ku monsi. 23Lyene umonsi avwanga ati,
“Ndakai, wii ifupa ukufuma ku mafupa yane
nu munyefu ukufuma ku munyefu wane.
Amaamwangwa ‘umwanaci,’
pano wapangwa ukufuma ku monsi.”
24 #
Mat 19:5; Mk 10:7, 8; 1Kol 6:16; Efe 5:1 Pamulandu ukwene umonsi akasya isi na nyina nu kuilundanya ku muci wakwe, nga iyaya umwili onga.
25Na onsi oili, umonsi nu muci wakwe yali tupu, lelo yatali ni nsonyi.
Mambwe-Lungu Bible © The Bible Society of Zambia, 2013