Kucangtsi 4
4
Kayinu Wen ra Inja-wu Abila
1Adamu nae te uwa-wu Awa, ama awu tu rishwu u mbae umbae ti urom u fa rinyi-wu baa, “Kayinu.” Imbyi rinyi wu baa “Tí itindeya Yaweh, ame mbae urom.” 2Isim-yi, awu mbae inja-wu Abila. Abila si unde ti ku shi asinn, Kayinu ama si unde ti ku tom ritom. 3Isim kiye iki, Kayinu pu wuci ti awu tu risaen ufang ba nda Yaweh rinyangwae. 4Abila ama tsab uwae iken ti shi-wu ti rikem, ayi ti a mbae yi tawe, u pu yi ba na Rimam. Ama Yaweh kyangte Abila ti rinyangwae-wu, 5amaa, awu kyangte-wu ana Kayinu be. Ikyaen yine Kayinu tso rinae, utob-wu ndembeb. 6Yaweh rang Kayinu baa, “Imi ti nde afu ku ndembeb utob? Imi ti nde afu yir kyi uwe-fu? 7Á baa afu na nde iken ti pang atang, ame ú paembe-m rinyangwae-fu be a. Nung nyinyang, be ikentitibi tsi ku nwan fu, ti wu u ndembeb fu. Kwab ti fu ci rika risu-wu.”
8Ama Kayinu ri te inja-wu Abila baa, “Ba ti ti ru ka utab umae akwen.” Ama ti aba ka sang utabmae atang, Kayinu ye Abila byinn wen.
9Ama Yaweh rang Kayinu baa, “Inja-fu Abila ta aka?” Kayinu ri baa, “Ame nung-m be, ame ti si unde ti ku nungkyi inja-m a.”
10Yaweh rang wu baa, “Imi ti nde nee afu nde ira beb ahan? Fxen! Anying inja-fu ti yaen sur riben ku kunn rikwen uwe-m ta re. 11Tine, kufwag ta risu-fu. Riben u nyang-wu wuci cwucwo be, ayi riben wu ti mbubta unju, u ngwa anying inja-fu ne. 12Afu a tom riben, awu u waen-wu wuci na fu cwucwo be. Afu u kafe unde ti ku kyangfa kyangfa ku wumm, u si-fu ti uwog ti som utense be.”
13Kayinu ri te Yaweh baa, “Kimbab ti byinn-fu ne skeb pu yi ame risu! 14Tine afu rwae sha pu fu ame riben wu, ame u sae-m kutxuwe-fu cwucwo be. Ame si te-m uwog ti som utense cwucwo be. Unde ti a tu m, awu u wen ra m.”
15Ama Yaweh ri baa, “Iyee, ikyaen ti unde titini ti a wen Kayinu, awu u ngwa rikaen ti skeb ana wu atsepu itsongfaen.” Ama Rimam sur awaen rimenn Kayinu ikyaen ti unde ti a tu wu, unde wu ā wen-wu awu be. 16Ama Kayinu nwunn kutxuwe Yaweh atang, u ru ka som uten iki ti rinyi-wu si, “Nod”#4:16 Imbyi Nod si Kyangfa. uwe usir ti kiskinn na Eden.
Rishi na Kayinu ka Sang ana Lameki
17Kayinu nae te uwa-wu ama awu kyaen rishwu u mbae umbae ti urom u kunn wu baa, Enoki. Kayinu mbye uten iki, u fa rinyi-wu rukwer ana umbae-wu Enoki. 18Enoki ama mbae umbae u kunn wu baa, Iradi. Iradi si itse na Mehujayel, Mehujayel ama si itse na Metushayel, Metushayel si itse na Lameki. 19Lameki mbe anda ifaen, rinyi kinjo si Ada, ti ifaen ama si Zila. 20Ada mbae Jabal. Awu ti si itse ande ti ku nae afug u ku shi asinn. 21Rinyi inja-wu si Jubal. Awu ti si itse na ande ti ku byinn kufwa u ku kunn ripwaa. 22Zila ama mbae umbae ti urom, rinyi-wu si Tubal-Kayinu. Awu ti si kwenkufang ti ku kwen iken te bronzi#4:22 bronzi Bronzi si iken iki ti pangma ikyaeb kiser, ayi bibyaen ku jijae. ti ikyab kiser. Mbiya Tubal-Kayinu si Naama.
23Lameki kunn awa-wu, u ri baa,
“Ada ti Zila, ni fxen!
Ani awa-m,
ni fxen ira ti ame u ri.
Ame wen pu m unde iki
ti nde iken beb m uwae,
umbae ti utaen
ti kyae ribang nae m.
24Asiti aba a pae ande itsongfaen
ikyaen Kayinu,
upae ana unde ti a wen Lameki
u si ande mae ita
mbe rijwe asu itsongfaen.”
Seti ti Enoshi
25Adamu ti uwa-wu mbae kyi umbae ti urom. Uwa-wu fa rinyi umbae wu baa, Seti, ama ri baa, “Rimam nda pu wu ame umbae ti fikyi Abila ti Kayinu wen.” 26Seti ama mbae umbae, u fa rinyi-wu baa, Enoshi. Kiye wune, ande mbagta ku fen Yaweh ti rinyi ti ana-wu.
© Wycliffe Bible Translators, Inc. and
© The Nigeria Bible Translation Trust 1995, 2017