Fêt 1
1
1Bèbɨn Tìyofilòs, à ndùku mô a ŋwàklù mì yì shyə̂ ha wò, mu nyak nâ gha à jɨ̀m te Jisòs tì yìme hi tè nì fê yike à ghɨ̂t, 2hi bè tàn te Yènfù tì lye kwoka wun a nyə̂. À ndùku mô shyəma ghɨ lyê kwok nì wûn a nyə̂, Yohnà Yulena nî, wù yiki a gha ghe ghɨt a wuna ghɨ tuma ghe wù tì chwokte, mò hi tè nì. 3À hì mô te Jisòs yena ngə̂k yì chìk kpulò kaha lôtì a yi kpû, wù chwûtì ngɨŋ à wûn ha ghɨt a wuna ghɨ tuma na yi ti lôtì a yi kpû hamok. Wù ni yâ a tu lum a tu lûm nâ a ghan a dona atɨ̂n à tuk mkìk, fî jîs ha ghɨna kum fə̂n wù Fùyènù. 4Tuku yû tuk wule, wù chyâhì yi sak ha ghɨna na, “Kə ghàn lo a Jèlusalèm chîn. Ghàn yuti fo ye mu tì fòkte ha ghàn na Bom ti chwûnà hi fo ha ghàn. 5Jon ndùku fo mòlû ha ghɨta kə nâ nì mòlû mù jwò, biyani a lân wu hì mô ma faŋ kə mu tuk mù sek ni shyəma ghɨ fo mòlû ha ghàn nì Yohnà Yulena.”
Ghɨ lyi kwok Jisòs a nyə̂
6Tuk yû tuk wule, ghê ghɨna hì fê chîntè mô kə wu luk wù mòk, ghɨt a wuna ghɨ tuma shìki buf ha wun na, “Bâba, yu ti kpên shyəma wò ni ma ghɨ kahà fo fə̂nù ha ghɨt a Isalì agha?”
7Jisòs fîsì ha ghɨna na, “À wijə wu luk wanu hi tè khə wu tuk makə yu we Bom che lema kə nâ hi nè a gha ghɨ̂n nì jyak a wuna, 8biyani ghàn hi khə na ghàn nè khɨtelò jyaka, a wu yu afa Yohnà Yulena bèna ha ghàn ma ghàn bê fòkti kum mu a Jèlusalèm nì Jùdiyà yì jɨ̀m nì Sàmaliyà nì bûlà tu mbyi tu tù jɨ̀m.” 9Te wù jìsa mihe gha mɨ ghɨ̂n, Yènfù lyi kwok wun a nyə̂, ghɨna hì ke te wù kwoka. Wù kwok kə ni, lyi ləhàlò atɨ̂n à sìmbàk.
10Ghɨt a tum ghê hì baha ke kə a nyə̂ te Jisòs yènà, ghɨt a lɨmànà ale bûŋhì timi a ghɨna ngwùŋ, à bà ma ghɨna ti mak njumù, fufamù, 11buf ha ghɨna na, “Njwô ghə te ghàn time hì ke kokhe a nyə̂ ni a ghɨt a Galìlî? Jisòs wunâ a ghɨ lye a ghàn a fùtɨ̂n kwok a nyə̂ ni, bè kaha bênà kə wu lum afân a ghàn yena wu yênà atɨ̂n.”
Ghɨt a tuma chwok wut na wù lyi luk wu Judàs
12Ghɨt a Jisòs ghɨ tuma lo a kùn à mù kàk mù Olìfs kaha chwo a Jèlusalèm, lum wu tɨnu dâfà wi, wu chyâtè kə bəh a mâl fùjiti. 13Ghɨna ben tan a Jèlusalèm lyi kwok yen atɨ̂n à ndâ afa ghɨna ndùku chyə atɨ̂n a nyə̂. A mô Bità nì Jon nì Jêms nì Andùlù, a mô Filîp nì Tomòs a mô Bàtòlòmiyà nì Màtiyò nì Jêms wâ Àfeyòs, nì Samùn wùt lùmana, a fê mô Judàs wâ Jêms. 14A mô yâ ghɨna yûŋtè nê yi jə̂m ghê ywen ale nì Mèli, nè Jisòs nì wana ne wuna.
15À hì mô tuk lefu, ghɨta hì fê mô kəbi wu luk wù mòk, tanà ghɨt wu wə nì mbà, Bità lôtì timî hì jîsà ha ghɨna jyâna, 16“Wana noma gha ghɨ̂n ghɨ che gana kum Judàs ni chehì kəta hi gàn hi lunhe gha ye Yohnà Yulena tì ne Defìt jis, ghɨ fî nyak a ŋwàklù Fùyèn kum wûn we wù che chwute Jisòs chìnsù ndâ Fùyènsu che khɨtî. 17Judàs chehì mô wut a ghàhnà nòn beka Bâba chehì mô ma wù ti chwok wûn na ghàhnà ghɨna hi yûŋtè fêtà amok.”
18“À ndùku mô ma Judàs ti lyi ka we ghɨ tì làka wûn atɨ̂n a yi gha bəmani afa wù tì mòmà yun wu luk wu fu chyə atɨ̂n, yi bàm yi tɨ̂n fen kpu kə wu lùk afân, lâ wunu bûkà mwə̀ mù wûn mu là fwu kə mù jɨ̀m. 19Nâ ghɨt à jɨ̀m a Jèlusalèm yu gha ye yi gana ha Judàs hì toŋte luk wu fu chyə mu we a ghɨna yi jìs na, Akèdamà, yi chwûtè na à mò fuk à mu luŋa.
20“Ghɨ ti nyak a ŋwàklù Sù njàŋ na,
‘Ndâ wûn faŋ à kə yi yîm,
kə wùt bè chyə atɨ̂n,’
fî nyak kəbi na,
‘Wùt wù lò lyi luk wu wunu, ma wù hi fêtà.’
21-22Bità fôktì ni ki jîs na, ‘Yi chwûtè na ghàhnà kəta hi chwoka wùt ma wù chinti a ghàhnà nòn ma wù hi fôktè ha ghɨta na Jisòs ti lôtì a yi kpû. A kəta hi tè mò wut we ghàhnà ghɨna chehì gbê kwoka amok a Jisòs yi bàm, hi yìmì kə te Jon ndùku fo mòlû ha ghɨta hi kwok a tàn te Yènfù tì lye Jisòs a ghàhnà fùtɨ̂n kwok nì wûn a nyə̂.’”
23Ghɨna fo a yet à bà, a mô Josèf we wu kəta a yet à bà yile mô na Bàsabàs, yile mô Jûstùs, wùlè mô Màtiyàs. 24Ghɨna ni yâ ki jə̂m jîsà na, “Bâba, wò khəlò nâ təm a ghɨta à jɨ̀m, chwuti wùt we wò chwoka atɨ̂n à ghɨt afân à bà 25na wù lyi luk wu Judàs ma wù hi nê fêtì te wut wâ wu tum we wù che de yen hì mô a wun wù lùk wu ngəku.” 26Ghɨna jis ni de gha tɨni ha Yènfù, yet yi Màtiyàs fwu kwôk ghɨ bakhi wun a nòn a ghɨt a tuma njwò yì mòk.
© Wycliffe Bible Translators, Inc.