Fêt 5
5
Ànàniyàs ghê Sàfeliyà wam yi fə̂m
1Wùt lè ndùku mô yet yi wuni mô Ànàniyàs, yet yi ywê wuni mô Sàfeliyà. Tuk lefu ghɨna bəkli luku ghɨna fu chyə wule, 2ghɨna fati hi nyama fàf à lèm bəha ka ale hi yèn nì bəha ha ghɨt a Jisòs ghɨ tuma. 3Ànàniyàs yen fo bəha ka mi ghê ni, Bità buf na, “Wò de na Satàn lye a wo yi təm kum ghə, hi nì na wò wam fəmi ha Yohnà Yulena ma wò let bəha ka ghe wò ye bəkle luk wa wu fu chyə we atɨ̂n agha? 4À ye hì kəta wi wò luk wûn shyəma wò bəkle, te ghɨ ye bəkle, à ka tɨnu yê baha kəta wi nâbi wò. Njwô ghə te wò ye kwâktè hi nè nki gha yîn? Wò tà fə̂m yîn wam ha ghɨta, wò wam kə nâ ha Yènfù.” 5Te Ànàniyàs ywo gha yîn ni kə wu yu, fen a chyə̂ kpulò. Fânì bəmani kwo ghɨt à jɨ̀m ghe ghɨ tì ywo gha mi yîn. 6Mwəlà mù kpuŋ lôtì lyi gun yi Ànàniyàs lim nì gûmà fwu yen gûmàlò.
7Ghɨ motì kə ni te bɨŋlu sù tât ywe Ànàniyàs boŋ lyi bên khə wi gha ye yi gana ha lɨm à wûn. 8Bità jis ha wun na, “Fòkti ha mu na wuna mò ka we wù jɨ̀m a ghàn à lɨm wâ che bəkle luk wu fu chyə we atɨ̂n agha?”
Wùt ywen àtɨ̂n bimî jis na, “À mò kə nâ ka tɨnu wù jɨ̀m.”
9Bità ki buf ha wun na, “Njwô ghə te ghàn à lɨm wâ che fate hi mòmhe Yohnà Bâba? Ghɨt ghe ghɨ ye beka lɨm wâ yen gûmàlò baha mô kə yi jwô ndâ chîn mô hi boŋa fwo yè gùmà wò kəbi yâ.” 10Te wù jìsa ni, Sàfeliyà boti fen a wun a shyə̂ kpulò. Mwəlà mu kpuŋ mê lyi ben yen ma wù ti kpû bêkà fwu nì wun yen gûmà a lɨm à wûn à ngwùŋ. 11Fânì chiki kwo ghɨt a bimena nâ à jɨ̀m nì ghɨt ale ghe ghɨ tì ywo gha tɨni.
Ghɨt a tuma nî gha kanana ghɨ dô kə ni
12Ghɨt a tuma Jisòs hì nê chwesu gha kanasu dô a ghɨta fùtɨ̂n hi chwùtè jyaka Fùyènà. Nâ ghɨta bimena à jɨ̀m hì nyâŋhè yûŋtè a Sòlomùn a jèm. 13Wùt hì bu wùt wù bimena, hì chîntè wi ghê ghɨna, biyani ke ghɨna, ghɨna kokne kə ni. 14Lɨmànà nì ywên ghe ghɨna bime ha Bâba hì dô kpenhe bê kə yi bên a nòn afû. 15Ghɨta yen gha kanana mɨ ghɨ̂n hì bêkà bênà nì ghɨt a ghɨna ghɨ yablena a mu khɨ̀ nì a mu ghàm, fwo lêmà a bìtu lumtu shyəma Bità nê shihi chyà nâbi lɨ̂ŋhà wuna kum ghɨt atɨ̂na. 16Ghɨt a dona fwu a tu tèk afa tu ndùku mô bakhe bê a Jèlusalèm hì bêkà bênà nì ghɨt a ghɨna ghɨ yablena nì ghe yohnù be ndùku fo ngək ha ghɨna, ghɨ chwuk ghɨna nâ à jɨ̀m.
Ghɨ fo ngə̂k ha ghɨt a tuma Jisòs
17Ngàŋ à ndâ Fùyèn yì ngaŋtena nì ghɨt a wuna à jɨ̀m a mô ghê ghɨna ndùku mô a chìntê ghɨt a Sadùsî yîmì hi tè ghə̀k a ghɨt a tuma Jisòs, lem na ghɨna nè yenalò gha, 18kwoti ghɨt a tuma atɨ̂na fa a ndâ chyâk. 19Biyani à hì mô ntuksu anjèl à Bâba bên chwok jwo nda ye ghɨ tì fa ghɨna atɨ̂n, lyi fwu nì ghɨna jis ha ghɨna na, 20“Ghàn yen a ndâ Fùyèn ma ghàn fokti nâ gha à jɨ̀m ha ghɨta kum nì chyənà yì fe ye ghɨt a bemena kəta.” 21Ghɨna yu ni tuku yu ben kə ni, ghɨna lye a ndâ Fùyèn yîmì hi tè yike à ghɨ̂t.
Ngàŋ à ndâ Fùyèn yì ngaŋtena nì ghɨt a wuna toŋa chəhsu ghɨt a Jûs nâ sù jɨ̀m, na ghɨna bê khɨti yûŋtìnì, fî tum na ghɨ yê lye ben nì ghɨt a tuma Jisòs a chyâk. 22Ghɨt ghe ghɨ ndùku chînà ndâ Fùyèn yên tê yena jə̀ ghɨna afû, kaha ben fôktì ha ghɨt a sakana, 23na, “Ghàh ti yên jwo ndâ chyaki ma ghɨ ti fati fa, ghɨt a chinana mô kə nâ yi jwô ndâ biyani ghàh ti jimì te yena jə̀ ghɨt a tuma Jisòs ghê atɨ̂n.” 24Ngàŋsu ndâ Fùyèn su chiksu nì tu ghɨt ghe ghɨ ndùku chînà ndâ Fùyèn, yu ni, hì kante nâ à gan ghə ha ghɨt a tuma Jisòs ghe agha. 25Kə ni, wùt lè ben jis ha ghɨna na, “Ghɨt ghe ghàn che fa a ndâ chyâk yâ mò a ndâ Fùyèn, yike à ghɨ̂t.” 26To ghɨt ghe ghɨ tì chînà ndâ Fùyèn yu ni, ghê ghɨt a wuna lo yen lyi ghɨt a tuma atɨ̂na, kə a mbonà, beka ghɨna ndùku fânà na ghɨta làhi tumle ghɨna nì te.
27À hì mô te ghɨ be nì ghɨt a tuma ghɨ̂n, jis na ghɨna timi à ghɨta ashyə̂, ngàŋ à ndâ Fùyèn yì ngaŋtena jis ha ghɨna na, 28“Ghàh ndùku mô ma ghɨ ti chyâhì lâŋà na kə ghàn fi yiki ghɨta nì gha ye Jisòs tì jìsa na ghàn hi yikê. Biyani, ghàn ti waŋ Jèlusalèm nì yikî tɨni. Ghàn ti fah na ghàn nè nêlò ma ghɨta hi ngane ghàh na a che ni ghàh na ghɨ ywi Jisòs.”
29Bità ghê ghɨt a tuma Jisòs ale fîsì na, “Ghàh kəta hi tè yu kə ha Yènfù bu ha ghɨta. 30Ghàn che ni na ghɨ banti Jisòs a kàkfùtàfù wù kpû. Biyani Yèn fe be ghàhnà ndùku kokhe lôhì wûn a yi kpû. 31Yènfù lyi kokhi wûn a bàh à wuna ghɨ kpen wu wo ta na wù hi mô wut wu tihena fê mô bònhì shyəma wù ni ma ghɨt a Isalì khɨli lumu hi kahe təm a ghɨna a gha be, ma Yènfù lehèfo besu ghɨna su. 32Ghàh mô sù fòktì a gha afân, Yohnà Yulena ghe Yènfù fo ha ghɨt ghe ghɨ ywo ha wûn, chwùtè kəbi na gha mɨ ghɨ̂n mò nâ hamok.”
33À hì mô te ghɨt a sakana ywo gha mɨ ghɨ̂n, ghɨ yaf ghɨna na haŋaŋ, ghɨna hì khɨŋa hi ywite ghɨta tuma Jisòs. 34Biyani wùt à Falàsî wùlè yet yi wuni mô Gàmàliyà, a mô chichà yì sak, ghɨt à jɨ̀m kokhe wûn, wù lôtì timi a nyə̂ kan na ghɨ lye fwu nì ghɨt a tuma ghɨ̂n a bɨn a fu yulâ ni, 35ki jîs ha ghɨt a sakana ghe na, “Ghɨt a Isalì, ghàn hi tôknè nì gha ghe ghàn khɨŋa hi nì ha ghɨt ghɨ̂n. 36À ndùku mô kəbi wu tuk wule Tìyodàs fwu kwok ben jis na à mò kə nâ yi mu we, ghɨta jûmtì wûn kwoka chema yi ghə yì kìk. À hì mô te ghɨ ywe wûn, ghɨt ghe ghɨ tî jûmtè wûn jyâhì kə fù mòk, fù mòk. 37À hì mô yi bàm yi tɨ̂n, Judàs wùlè ma wù fwu ben yi lak yi Galìlî, fî fwu kwôk a mu tuk afa ghɨ ndùku taŋa ghɨta atɨ̂n guf a nôn à ghɨ̂tà le ghɨ jûmtì wûn. Ghɨ ywi wûn nôn à wun atɨna jyâhì kə à jɨ̀m. 38Mu wu hì jîsà ha ghàn kum nki gha yîn na kə ghàn ni gha ye ghàn kwâktè hi nì ha ghɨt ghɨ̂n, ghàn de kə ghɨna ni beka gha ghɨ̂n ghɨna fate fê nè, à hì mô na ghɨna nè a wùt à jyak ma yu nê tê dàf shyəma ghɨna de. 39Biyani fêt tɨ̂n shìki mô ma à fo Yènfù jyaka na ghɨna hi nê ma yi nê hi bone wi ha ghàn hi ta ghaka ghɨna, ma ghàn nê yen na ghàn kə̀kà te ghàn nò Fùyèn.”
Ghɨt a sakana ghê yu tobhî ye Gàmàliyà fo. 40Toŋa lihi ghɨt a tuma Jisòs a ndâ jis ha ghɨt ghe ghɨ chînà ndâ Fùyèn na ghɨ sam ghɨna fî kan na kə ghɨna nè fê jîsà gha yile wu lùk kum Jisòs, de ghɨna lô. 41Ghɨt a tuma Jisòs lo afû saŋle kə ni beka Yènfù ti chwok na ghɨna kpenelò hi yen a ngək a wun a yi yet. 42Ghɨna faŋ hì fôktè tum yì jùŋ kum Jisòs we ghɨ chwoka lema kə tuk mù jɨ̀m a ndâ Fùyèn, nì a ghɨta sù ndâ.
© Wycliffe Bible Translators, Inc.