Lûk 8
8
Ywên ale ndùku jûmtè Jisòs
1Yi bàm atɨ̂n Jisòs hì gbê fôktè tum yì jùŋ kum nì fə̂n wù Fùyènù a tu tèk tu chiktu nì tu tetatu. A mô ni wu mô ghê jùmtìsùbàmsù wunsu ìwûm njwòsù bà, 2Bakhe nì ywen ale ghe Jisòs ndùku mô ma wù ti chwuk yaftu ghɨna tu nì ghɨt ghe wù tì jùma fihe yohnù wu be a ghɨna fùtɨ̂n. A mô Mèli wù Màgdalà a we Jisòs tì jùma fihe yohnù be we wu ndùku fo ngə̂k ha wûn, sàmba, 3a mô Jùwanà a ywê wùt we wù ndùku fêtà ha Helòd ghɨ toŋte na Chusà, nì Sùsanà bakhe nì ywen a dona ale. Ghɨna hì gâmtè tôknè kwoka nì Jisòs nì jùmtìbàmsù wunsu nì mwə̀ mù ghɨna.
Ngàn kum ngwìk yê bè fùk tì shika hi mù
(Mat 13.1-9; Mâk 4.1-9)
4À ndùku mô te ghɨta fwo bena a tu tèk, a tu tèk, yûŋtì dô kə ni. Jisòs ki mâ ngàn yîn ha ghɨna na:
5“Wùt tì shik hi mò ngwìk à wûn, yîmì hi mù yìlè chemli a sùbelâ, ghɨta jelì, nyɨ̀mû ben chupli kut kə yì jɨ̀m. 6Yìlè chemlî a to mù chyə̂, woli mô a yi dèt yîmì hi ləmâ biyani kaha yimlò beka chyəfu yute fu ndùku wi. 7Yìlè chemlî a lùk wu tù tùŋù, yîmì hì ləmâ nì sònjoŋsu, sònjoŋsu tɨnsu ləma solì. 8Yìlè chemlî kə nâ chyəfu jûŋ fù, saŋ atɨna kwôk bwuslò, bilò ghɨ hi sama nâbi ghɨ̀ni to saŋa, se saŋa fwo atɨ̂n dô chema wu wə.”
Jisòs jis ni kahi fî jis a jyə̂ yì tâ na, “Nâbi nde wù kəta tofu ma wù yu.”
Yi kwâktì kum ngànsù
(Mat 13.10-17; Mâk 4.10-12)
9Jùmtìbàmsu Jisòs sù hì bufa ha wûn nâ, “Ngàn yina fòktè na ghə agha?” 10Jisòs fîsì na, “Yènfù ti fô tofu ha ghàn na ghàn hi ywo khɨle gha letena ghe ghɨ mô kum fə̂n wù Fùyènù, biyani ha ghɨt ale mu nè hì jîsà a sù ngàn shyəma ghɨna nê hi ke luktu yena wi shyə ale, ywo ghâ khɨle wi na ghɨ jis na ghə agha.”
Jisòs jis banhi ngàn kum bè fùk
11“Ngàn yina yike gha ghɨ̂n ni, ngwìk atɨ̂n mò yi gha Fùyènì.” 12Ngwìk yê yì tì chemle wu lûm yi mò te ghɨt ghe ghɨ ywo gha Fùyènì, deblì ben fihi a ghɨna təm na kə ghɨna bimi ma ghɨ bon. 13Ye yì tì chemle yi wo yì mò te ghɨt ghe ghɨ ywo gha Fùyènì nyâŋhì bimî nì saŋlînì, biyani yi faŋ hi tòkà lye a ghɨna təm. Ghɨna bimi kə afu yulâ mômhìnì ben, ghɨna fen kə yi fên. 14Ngwìk yìlè ye yì tì chemle a tutùŋ yâ, mò te ghɨt ghe ghɨ ywo gha Fùyènì, chyəti yen kə ni, fuma mbye, ghɨna khɨŋa yi ghak, nyɨŋa kə yi bàm yi mwə̀ mù mbyî, gha ghɨ̂n tàhì na kə ghɨna ləma a ghɨna àtɨ̂n yi bimî. 15Ye yì tì chemle a chyəfu jûŋ fù mò te ghɨt ghe ghɨ ywo gha Fùyènì ghɨ khɨti kə hamok nì təm a ghɨna a jûŋà hì wunhê yi mo wu tam a ghɨna chyənà.
Yi bân a yi dèt yi kà
(Mâk 4.21-25)
16“Wùt wi hi dàn a lâm hi baŋ nì shyə ale, bu hi lèt yi dèt wu khɨ̀, biyani wù kəta hi dàn à tom a lùk wu ngaŋtenu, a lùk afa à lyi nâbi nde ma wù yen ban yi tɨni.”
17Ghàn hi khə na ghɨ let kat chya nâbi nì ghə, ghɨ bè yenalò, ghɨ leti nâbi yìni gha, yi bè faŋa wi hi fwo a ndan.
18“Ghàn hi tôknè wu lum afa ghàn yute atɨ̂n. À hì kəta nâbi nde ma ghɨ fo kpenhi ha wûn, à hì gha nâbi nde ma ghɨ fyi nâbi fu teta fe wù khə na yi kətalò.”
Jisòs fôktì nè wûn nì wana ne wuna
(Mat 12.46-50; Mâk 3.31-35)
19Kə yu mefû nè Jisòs nì wana ne wuna ben hi yena wûn, lumu hì bu kum nôn à ghɨt ghe a ghɨ ndùku mô afû. 20Wùt lè fôktì ha wun na, “Nìni wâ, nì wana na mò a bɨn khɨŋa hi yen a wò.”
21Jisòs jis ha ghɨna na, “Nìni mù nì wana noma mò ghɨt ghe ghɨ ywo gha Fùyènì nê te yi jîsà.”
Jisòs kântì fufa tenâ
(Mat 8.23-27; Mâk 4.35-41)
22À ndùku mô tuk lefu, Jisòs lyi a ngwùk ghê jùmtìbàmsù wunsu jis ha ghɨna na, “Ghàhnà daŋ à yen yi jin yi lwi fokô.” Ghɨna lô hì yênà. 23Te ghɨna ndùku daŋà yênà, Jisòs hì bwunê. Fufa ta yîmì hi chyà shikà mòlû mu lye a ngwùk. Ngwùk atɨ̂n hi khɨŋa hi sàŋà. 24Ghɨna yen shik yemhì wûn jis na, “Bèbɨn, Bèbɨn, yemâ, ghàh te kputelò!”
Wù yemà kântì fuf atɨna nì jwò ghɨ tenâ luktu china kə ni moŋ. 25Jisòs buf ha ghɨna na, “Kum ghə te ghàn kəta wi bimînì agha?”
Ghɨna hì mô nì kani fê fânà, buf ha ngɨŋsu ghɨna su nâ, “Wùna mò nâ nde wù kàntè fufa nì jwò ghɨ ywo wûn.”
Jisòs jum yohnù bê
(Mat 8.28-34; Mâk 5.1-20)
26Yi bàm yi tɨ̂n, Jisòs nì jùmtìbàmsù wunsu daŋ yen yi lak yi Gelàsèn yi jin yi lwi yi ke dâŋhè Galìlî. 27À hì mô kə te Jisòs fwo toma bê nì wula yi bi jwolì tɨni ni, kwônà nì wùt ma wù lo yi tèk yile afû. Wùt àtɨ̂n kəta yohnù be a wun a fùtɨ̂n, ma wu ti chyə̂ nâ hadà, wu mâkà wi shyə ale a wun wu wùn, chyə wi a ndâ, chyə kə sù gùma. 28Te wù yena bena nì Jisòs ni, khək yi jî fen a wun ashyə̂ bwat nâ a jyə̂ yì tâ jis na, “Wò khɨŋa ghə ha mu a Jisòs, Wâ Yènfù ngaŋte fu? Mu chyate wò kə fo ngək ha mu.” 29Wù ndùku jîsà ni, beka Jisòs tì kànte na yohnù be we fwu a wun wu wùn. Yohnù tɨnu ndùku fo ngə̂k ha wûn a mu yu, a mu yu. Ghɨ hì mô hi fo ngə̂k ha wûn nâbi wùni yu, ghɨ kwut khəni wuni nì fwəni wuni nì chyaksu ghɨ lem wûn wu lùk. Ghɨ lem ni, wu tenti kə yi tentî chyaksu tɨnsu, yohnù be tɨnu lyi yen nì wun a yi lak yi sùsi.
30Jisòs ki buf ha wùt àtɨ̂n nâ, “Yet ya mò nde?”
Wù fîsì na, “Yet yi mi mò ‘A nôn’” beka yohnù be tì lye a wun wu wùn dô kə nì. 31Yohnù be tɨnu chyati Jisòs na kə wù jum à fihi wunu hi tum a lihi yi be afa yi lye gokhe wi yâ. 32À ndùku mô ni, nôn à kùnduku a chika ale bakhe afû, yə a wùn wu kunu, yohnù be we chyati Jisòs na wù de ghɨna ma ghɨna yê lyi a kùnduku we fùtɨ̂n, Jisòs dê. 33Yohnù tɨnu fwu a wùt we wùn yen lye a kùnduku we fùtɨ̂n, wu shɨ̂ŋ nì nyiŋi yen fen a ba yìlè a yi bi lwi, chemli a jwô kputilò.
34Ghɨt ghe ghɨ ndùku kine kùnduku we yen gha ye yi gana nyiŋ kolo yen fôktì gha ye yi gana a yi tèk afû, hì gbê fôktè ha ghɨta a mu fùk. 35Ghɨ yû ni, yen hi yè yên gha ye yi gana. Ghɨna ben yen Jisòs fî yen wùt we yohnù be we tì fwo a wun wu wùn, ma wù ti ndokò a Jisòs ashyə̂, ma wù ti mak njusu, mô kə nâ a wun wu tof. Ghɨt atɨna yen ni, hì fânà. 36Ghɨt ghe ghɨ ti yena te gha tɨni gana, fôktì te wùt àtɨ̂n tì gbê shyəma wù ta. 37Ni, nâ ghɨt à jɨ̀m a bètu lak tu Galìlî jis ha Jisòs na wù lo a ghɨna fùtɨ̂n, beka ghɨna ndùku fânà nâ haŋaŋ. Jisòs lye a ngwùk hì khɨŋa hi lò. 38Wùt we yohnù wu be we tì fwo a wun wu wùn yen chyati na wù lo ghê wûn.
Biyani Jisòs tunhî jis ha wun na, 39“Kahi kolô, ma ye fokti gha ye Yènfù ne ha wò.”
Wùt àtɨ̂n lô kolo hì gbê kata yi tèk yi tɨni yì jɨ̀m, fôktè kə gha ye Jisòs ne ha wûn.
Jisòs chwuk wùt ywên fî lôhì wâ Jalòs a yi kpû
(Mat 9.18-26; Mâk 5.21-43)
40À hì mô te Jisòs kaha daŋa bena a bàh a lwi afa a wù tì lo atɨ̂n, nôn à ghɨ̂tà ben fyi wûn beka ghɨna à jɨ̀m ndùku mô yute wûn. 41Kə ni, wùt lɨmà wùlè a mô wùt wù tihena a ndâ chìnti, yet yi wuni mô Jalòs, ben fen a Jisòs ashyə̂ chyati wûn na wù ben a wun a ndâ, 42beka wù ndùku kəta kə wan wù ywên wù mòk, wu mô lɨ̂m njwòsù bà wu kpo yênà.
Te Jisòs lo hì yênà ghê wûn, nôn à ghɨ̂tà hì fahe yênà kə wun a yi bàm. 43À ndùku mô atɨ̂n à nòn afû wùt ywên wùlè mô afû, motè kə ni yena yu wunu, ma yaf yi tɨni ti chyə̂ na wun wu wùn a wu lɨ̀m njwòsù bà, teka wùt a ngàŋ wùlè chwuk wûn na wu ta. 44Wùt ywên wunâ fahi yen lyi a wun a yi bàm kum soŋ yi wuni yi sùnju, kə wu yu, yu wun we mi kə yi mî. 45Jisòs shɨ̂ŋ buf nâ, “À kum nde mu agha?”
Nâbi nde tunhî na yi tà kum jə wûn. Bità ki jîs ha wûn na, “Bâ, ghɨta ti jɨŋ kat wò a mô nâbi nde kumlè kə wò?”
46Biyani Jisòs jis na, “Wùt ti kum mu beka mu ti yu te jyaka fwo a mu wùn.” 47Wùt ywen wuna yen na ghɨ ti khɨli na à kum yi wûn, fwu ben, chiŋtê, fen a Jisòs ashyə̂ fôktì gha ye yi ne na wù kum Jisòs. Ghɨt à jɨ̀m yû. Wù fî jis na yi ye kum Jisòs nâbi wùni yu ta kə yi tâ. 48Jisòs ki jîs ha wun na, “Wâ mù, bimî ya ti ni na wò ta. Kolo kə nì yutìnì.”
49Te Jisòs ndùku baha jîsà, wùt bên ma wù lô tô ndâ chintena ghê, jis ha wûn na, “Wan wâ we ti kpû. Kə wò fi fô ngə̂k ha chichà.”
50Jisòs yu ni, jis ha Jalòs na, “Kə wò fan, khɨti kə bimî ya ma wù ta.”
51Jisòs yen tan a ndâ afû, shihi lye a ndâ, kan na kə wùt lye ndâ ghê wûn, a bu kə Bità nì Jon nì Jêms kə nì bè wan nì nè wan. 52Ghɨt à jɨ̀m afû hì jyê, fê sama wu wun kum wan àtɨ̂n. Jisòs jis ha ghɨna na, “Ghàn china, kə ghàn fi ji. Wù tà kpu jə̂, wù bwune kə yi bwunî.”
53Ghɨna yu ni, hì chyəka kə yi chyə̂k wûn, beka ghɨna ndùku khə na wù ti kpû. 54Biyani, Jisòs lyi khɨti a wo wuna jis a jyə̂ yi tâ na, “Wan lòtî!” 55Yohnà wuna kaha ben kə wu yu afû, wù lôtì kə yi lôtì, Jisòs jis na ghɨ khɨŋ à fô shyə ale ma wan àtɨ̂n yə. 56Jwo yim bè wan àtɨ̂n nì nè wûn, biyani Jisòs chîhì na kə ghɨna nè fôktè ha wùt gha ye yi gana.
© Wycliffe Bible Translators, Inc.