Jn 13

Jesus suu ɛvəə ə ghon-ɛyfɛl nə wen

1Nɛy se lu ɛ kechii kɛ ke nè fóon se kechii kɛ ɛ́ nè yiɛn Kechii Ɛyboyse, nɛ Jesus keelemen ge əbliy wɛ yi vəse mbi yin è kase fiile se ba ə vi kwɛnmen. Əb nè se koŋe ghel ghɛ luun ghɛ́ wene ɛ mbi fɛn, əb ko me koŋ ghene dî è ndu è mɛyse.

2Nɛ̂y se lu əbliy wɛ ɛ́ yiɛ əbfua-əbyíɛ́ne ɛ likfəəy nɛ Satane liimen se Judas wɛ wán ə Simon Iskaliot ɛytem ge əb feene Jesus. 3Nè lu dî nɛ Jesus ko nè se ke ge Bay nè viimen əbnəə əbjim ɛ yi keghoo, gese ke ge yi nè lòò se Feyine nɛ yi kase fiile se Feyine; 4Ka ɛ́ yiɛn əbfua-əbyíɛ́ne dî əb me loole è chok ndəyse wene sɛ́ bɛye è liɛ kenfikse əbghun è chəŋ se wene əmkeŋkeŋ, 5è me bààtè moo se kekaŋ ɛysuu əbghun è me kɛɛte se suu ɛvəə ə ghon-ɛyfɛl nə wen, fikse nɛ̀ kenfikse əbghun kɛ ke nè luun ɛ wen əmkeŋkeŋ ki. 6Ka əb suun è gwiy chin ɛ Simon Bita ɛybee, əb bif se wen ge: Báàba, wɛ̀ kɛŋe se suu ɛvəə ə ghom-a?

7Jesus fise ge: Wɛ̀ báà se ke kenəə kɛ mɛ nɛɛyen kin ɛ leenen. Wɛ̀ nɛ̂y keele nɛ lu se ɛybam.

8Bita lek se Jesus ge: Lòó wɛ̀ jia suu ɛvəə ə wom naa se nkan!

Jesus fise ge: Mɛ loo lu è jia suu ɛvəə ə ghiɛ, fene ghɛsoo bo ki wiy kenəə.

9Simon Bita fise ge: Báàba, ghàà suu kɛn nɛ lu ɛvəə ə wom! Suu sɛy ɛghoo ə wom ghene ketuu ə kome!

10Jesus fise ge: Wel wɛ əb suunmen əbghun shi əblanen, bo shii wiy ge ɛ́ suu əbghun ə wen əbjim, buu kɛn ɛvəə ə wen. Ghɛn ghel ɛjim shi ɛlanen, buu kɛn wel əbmok. 11Jesus nè se ke wel wɛ əb nɛy feene wen; ghɛy kenəə kɛ əb nè suuyen ge: Báà se lu ghɛn ɛjim ghɛ ɛ́ luun ɛlanen.

12Jesus suu ɛvəə ə ghon-ɛyfɛl nə wen è mɛyse è me kase mak ndəyse wen è fiile se wene kelik bene fɛ ɛ́ nè yiɛn, è bif se ghene ge: Ghɛn lɛ ke kenəə kɛ mɛ nɛɛyen se ghɛn kin-a? 13Ghɛne toŋte mɛ ge ndinte gese toŋte ge Báàba, nɛ ke lu ɛ titiy di, bek ge ghɛy kefaa kɛ mɛ luun keghene. 14Ka mɛ wɛ Báàba ə wɛn nɛ̀ ndinte yɛn suunmen ɛvəə ə ghɛn lɛ, lu sɛy ka wel se ghɛn luun se yɛ suu ɛvəə əblee. 15Mɛ din nɛ lu əbchəyte se ghɛn, nɛ ghɛn lu se yɛ nɛɛy se ghel ɛlee kɛn ka mɛ nɛɛyen se ghɛn. 16Mɛ suuy əbluuy se ghɛn ge kekose lòó ke jia chia ba-ɛyfɛl nə wen, nɛ lòó wele ntum jia chia wel wɛ əb tumen wen. 17Ka ghɛn keelemen əbluuy nɛ̂ vin, ghɛn loo nɛɛy dì é ke yɛ lu kejuŋ se ghɛn.

18Mɛ báà se suŋnen kum ghɛn ghel ɛjim. Mɛ ke ghel ghɛ mɛ choken ge ghome. Dî nɛ kenəə kɛ ɛ́ nè nyaken ɛ ŋwaale-Feyin lu se kwɛn. Ɛ́ nè nyak ge: “Wel wɛ ghɛse wene yiɛn əbfua-əbyíɛ́ne nə mɛ kasemen è se kɛŋe ɛvəə ə wom.” 19Mɛ me se suuy kine se ghɛn ɛ leenen nɛ ke geese nɛ̂y se gan, ka ke nɛ̂y gan é ghɛn bééme ge mɛ lu vi wɛ mɛ luun əbghen. 20Mɛ suuy əbluuy se ghɛn ge naa ndɛ wɛ əb fiisen vi wɛ mɛ tumen, fiisen nɛ lu mɛ, nɛ naa ndɛ wɛ əb fiisen mɛ, fiisen nɛ lu vi wɛ əb nè tumen mɛ.

Jesus din wel wɛ əb nɛ̂y feene wen

(Mat 26.20-25; Mak 14.17-21; Luk 22.21-23)

21Jesus suuy əbnəə vin è mɛyse, ɛytem ə wene se foo ngɛk. Əb me suuy ɛ dɛɛne ge: Mɛ suuy əbluuy se ghɛn ge wel əblee ɛ ghɛne məme nɛ̂y feene mɛ.

22Ghon-ɛyfɛl nə wene se kiynen ngeŋse ghen, lu nɛ̀ əbchíò əbyúméné ge əb sɛ suuye nɛ lu ndɛ-a! 23Nè lu dî nɛ wan-ɛyfɛl wɛ Jesus nè koŋen se ŋaŋe diom è baksen se Jesus. 24Simon Bita kwayte wán-ɛyfɛl vi, è suuy ge: Bif se wen ge əb sɛ suŋnene kum ndɛ-a?

25Wan-ɛyfɛl vi kokte ndu è baksen se Jesus è bif ge: Lu ndɛ Báàba?

26Jesus fise ge: Wel wɛ mɛ nɛ̂y bɛk keban è chək se moome mbas, è fo se wen lu wen. Əb me chək keban se moome mbas, è fo se Judas wɛ wán ə Simon Iskaliot. 27Judas fii keban ki ɛ leghɛ, Satan me lii se wen ɛytem. Jesus suuy se wen ge: Yaŋse nɛɛy kenəə kɛ wɛ̀ luun se nɛɛy chikiy chikiy. 28Ghon-ɛyfɛl nə wen ghɛ ghene ghene nè yiɛn, yio dî è jia keele ge əb sɛ suuy se wen di bek ghɛ-a? 29Ka nè lɛmen Judas kebam əbkaa nə ghene, ghon-ɛyfɛl ɛlee me se kwaate ge Jesus tume wen ge əb ndu è yun əbfua wɛ ə́b nè luun ɛ shii se yiɛ ɛ kechii keghakene, kene ge əb fo kefaa se ghɛ́ ketane.

30Judas fii keban ki è me fəy kaŋ ɛymok. Nè lu dî nɛ shi nɛ ntəke.

Nchil ɛyfɛɛ

31Judas fəy dî, Jesus me suuy ge: Lɛɛ ɛ leenen wɛ əbghaake Wanwele yɛnsen. Əbghaake ə Feyine yɛnsen ɛ wene məm. 32Ka Wanwele nɛɛyen kenəə kɛ ke koksen Feyin lu kɛn ghɛɛ-ghɛɛ ka Feyine nɛɛy kenəə kɛ ke kokse Wanwel, nɛ əb shi kɛn se nɛɛy. 33Ghon ghine, mɛ bo bɛɛy se yɛ lu ghɛsen kɛn se feleeŋese əbliy. Ghɛne nɛ̂y yese è yɛ kɛŋe mɛ, nɛ mɛ suuy se ghɛn ka mɛ nè suuyen se ghɛ́ mbiye nə ghele Juus ge: Ghaa mɛ nduun lu nɛ lòó ghɛn jia gwiy. 34Mɛ me se foo nchil ɛyfɛɛ se ghɛn ge: Ghɛn yɛ koŋe ngeŋ ə sɛn. Kɛn ka me koŋen ghɛn, lu kɛn ghɛɛ-ghɛɛ ka ghɛne yɛ koŋe ngeŋ sɛn. 35Ghɛn lòò è yɛ koŋe ngeŋ ə sɛn, é wel əbjim me yɛ ke ge ghɛn lu ghon-ɛyfɛl nə mɛ.

Jesus suuy ge Bita nɛ̂y maa yi

(Mat 26.31-35; Mak 14.27-31; Luk 22.31-34)

36Simon Bita me bif ge: Wɛ̀ nduu ghááye Báàba?

Jesus fise ge: Mɛ nduu ɛ kelik nɛ lòó wɛ̀ jia ndu fo ɛ leenen, dî nɛ wɛ̀ nɛy jumte gwiy nɛ̀ mɛ nɛ lu se ɛybam.

37Bita bif ge: Báàba, lu bek ghɛ wɛ lòó mɛ jia jumte wɛ ɛ leenen? Mɛ lu kebaaten se kuo bek wɛ̀.

38Jesus fise ge: Wɛ̀ lɛ loote lu kebaaten se kuo bek mɛ-a? Mɛ suuy əbluuy se wɛ̀ ge: Lumngvəə nɛ̂y yɛ ghan ge yi toŋ nɛ wɛ̀ maamen mɛ kaŋ ɛtal.

선택된 구절:

Jn 13: oku

하이라이트

복사

모든 기기에 하이라이트를 저장하고 싶으신가요? 회원가입 혹은 로그인하세요

©CABTAL, 2012

Ŋwaale Feyin; Kelek Kefɛɛ - 더 알아보기

Jn 13

Jn 13
- 인기 성경 구절

듣기 Jn 13

성경:

Oku

번역본: Ŋwaale Feyin; Kelek Kefɛɛ - oku

Jn 13

Jn 13

Jn 13 - 인기 성경 구절

듣기 Jn 13

성경:

Oku

번역본: Ŋwaale Feyin; Kelek Kefɛɛ - oku

Jn 13

Jn 13
- 인기 성경 구절