Jn 21
21
Jesus din ngeŋ ə wen se ghon-ɛyfɛl nə wene saamba
1Nɛ̂y se lu ɛ kechii kelee Jesus gese din ngeŋ ə wen se ghon-ɛyfɛl nə wen ɛlee əbghune jio ɛyghuy yɛ Tibelias. Lɛɛ ka ke nè ghan ge: 2Ghone ɛyfɛl nə wene nè lô chinten kelik kemok nɛ lu ghine ge: Simon Bita, Ntomas (wɛ ɛ nè toŋen ge Wan se ghɛ ɛbaa), Natanael wɛ̂ Kana ɛ Galilee, ghone Zebedee, gese nɛ̀ ghon-ɛyfɛl ɛlee ɛbaa. 3Simon Bita suuy se ghene ge: Mɛ́ shik ɛykoo səəse.
Ghene suuy se wen ge: Ghɛsene shik. Ghene me lii se kenək, è shik, dî è jia koo naa kefaa ɛ ntək fo. 4Əbtəke nɛy loo yio, Jesus gwiy è teem ɛ əbghune jio, dî ghon-ɛyfɛl nə wen ghii jia keele ge lu wen. 5Əb bif se ghene ge: Sun ə some, ghɛne bɛɛy ghàà koo kefaa-a?
Ghene fise ge: Ghɛse bɛɛy ghàà koo kefaa naa se nkan.
6Əb suuy se ghene ge: Ghɛn mak felam ɛ ɛybee kenəke yɛ əbkoy əbtaa é ghɛn koo səəse. Ghene mak, è me se mome lòlò se guf bek ge səəse nè lu ɛ ten naa se ɛydio.
7Wan-ɛyfɛl vi wɛ Jesus nè koŋen se ŋaŋ me suuy se Bita ge: Lu Báàba! Simon Bita yio ge lu Báàba, è mak ndəyse wen bek ka əb nè choken ndəyse se yɛ fɛl, è me chak se jio è se nduu. 8Ghon-ɛyfɛl ghɛ ɛ́ nè goken ɛ kenək me se jumte nduu se ɛybam, gufe nduu nɛ̀ felame nɛ səəse lun se ten, bek ka ghene nè báà se lu əbtəm se shife jio. Ghene nè báksen se shif ka ntam əbviɛ dì. 9Ghene fəy se jio è yɛn əbvəs ɛ shif nɛ əb ghɛye nɛ̀ səəse ɛ ten ka ɛ́ nyoken, nɛ̀ kebane se əbghune ten. 10Jesus suuy se ghene ge: Ghɛn gwiy nɛ̀ səə selee sɛ ghɛn koon.
11Simon Bita lii ɛ məme kenək è guf felam è fəyse, nɛ səəse lun ɛ ten ghake ge, səə əbviɛ, nɛ̀ njio setale əmmtan. Chèmè lu ka səə shii nè dion di, felame nè báà teene. 12Jesus me suuy se ghene ge: Ghɛn gwiy è yiɛ əbfua-əbyíɛ́ne. Wel se ghene chèmè nè báà bif se Jesus ge: Sɛ lu wen ndɛ-a? Bek ka ghene nè keen ge lu Báàba. 13Jesus kokte è gwiy, è liɛ keban è giate se ghene, è giate sɛy səəse.
14Ke gan dì me se lu ge kaŋ ɛtal ka Jesus nè dinen ngeŋ ə wen se ghon-ɛyfɛl nə wene se kɛ̀ɛ̀tè ka əb nè loolen se ɛykuo.
Kenfiɛle Jesus ghene Bita
15Ɛ́ nɛy yiɛ è mɛyse, Jesus toŋte Simon Bita è bif ge: Simon, wan ə Joon, wɛ̀ lɛ koŋe mɛ chia ghine-a?
Əb fise ge: Ɛɛne Báàba; wɛ̀ ke ge mɛ koŋe wɛ̀.
Jesus suuy se wen ge: Yɛɛ yiɛse ghone bvəyse njiɛ nə mɛ. 16Jesus gese bif se wen kaŋ ɛbaa ge: Simon, wan ə Joon, wɛ̀ lɛ koŋe mɛ-a?
Əb fise ge: Ɛɛne Báàba, wɛ̀ ke ge mɛ koŋe wɛ̀.
Jesus suuy se wen ge: Yɛɛ toknene nɛ̀ bvəyse njiɛ nə mɛ. 17Jesus gese bif se Simon ge kaŋ ɛtal ge: Simon, wan ə Joon, wɛ̀ lɛ koŋe mɛ-a?
Bita me se soo ketuu bek ka Jesus nè bifen se wen kaŋ ɛtal ge əb sɛ koŋe yi-a? Əb me suuy se Jesus ge: Báàba, wɛ̀ ke əbnəə əbjim; wɛ̀ ke ge mɛ koŋe wɛ̀.
Jesus suuy se wen ge: Yɛɛ yiɛse bvəy ə som. 18Mɛ suuy əbluuy se wɛ̀ ge nè lu ɛ əbliy wɛ wɛ̀ nè bɛɛyen wándɛ nsum, wɛ̀ nè loo wɛ̀ kul ndəy ə shiɛ è ndu naa ghááy ghaa wɛ̀ koŋen se ndu. Dî nɛ wɛ̀ náà dən è yɛ loo wɛ̀ nase keghoo ə kiɛ wel əbchin mak ndəyse se wɛ̀ əbghun è liɛ wɛ̀ è ndu so ghaa wɛ̀ báà se koŋe. 19(Əb nè suuy kii nɛ̂ kine se din ɛynkii ɛykuo yɛ Bita nè naa se kuo se fo ɛykokse se Feyine.) Əb suuy dì, è me suuy se wen ge: Yɛɛ jumte mɛ!
Ɛ́ suŋnen kum wán-ɛyfɛl wɛ Jesus nè koŋen se ŋaŋ
20Bita benle è yɛn nɛ wan-ɛyfɛl wɛ Jesus nè koŋen se ŋaŋ gwiye ɛ ghene ɛybam; nɛ nè lu wen wɛ əb nè diom è baksen se Jesus ɛ əbliy wɛ ghene ghene nè yiɛn, è se bife se wen ge sɛ nɛ̂y se dine ndɛ wen ge ɛ́ koo-a? 21Əb nɛy yɛn wen è bif se Jesus ge: Báàba, kɛ vin wɛ wel lu gee ghɛ?
22Jesus fise ge: Mɛ kè loo è yɛ koŋ ge əb gok è yɛ chii se chin ka mɛ kase gwiy, é kii nɛ̂ kii yɛ lu ghɛ se wɛ̀? Yɛɛ jumte mɛ!
23Ghel ɛbeemene me se suuye kale ge wan-ɛyfɛl nɛ̂ vine jia yî kuo dî nɛ Jesus nè báà suuy nɛ lu ge əb jia yî kuo. Əb nè suuy kɛn ge: Mɛ kè loo è yɛ koŋ ge əb gok è yɛ chii se chin ka mɛ kase gwiy é kii nɛ̂ kine yɛ lu ghɛ se wɛ̀.
24Lu wán-ɛyfɛl nɛ̂ vin wɛ əb nè yɛnen əbnəə vin əbjim è se fekte əbghene, è gese nyak; nɛ ghɛsen ke ge kenəə kɛ əb suuyen lu əbluuy.
Kenləysen
25Əbnəə əblee lu se ɛydio wɛ Jesus nè nɛɛyen. Kè lu ge ɛ́ nyak əbghene naa əbjim ɛ ŋwaale, é ketuu ntiɛ kejime jia kiile kelik kɛ ɛ́ lɛm ŋwaalese ten ɛ ten.
©CABTAL, 2012