SENESI 22
22
Sakilifisio o Isaake
1I te hili ki ai o te u mea aia, pea nee ahiahii leva e te Atua ia Apalahamo, pea nee ina ui leva kia ia: Apalahamo! Pea nee ina tali leva: Koeni au! 2Nee ui leva e te Atua: Too tou foha, tou foha ulutokotahi, ae e ke ofa ki ai, ko Isaake; alu ki te fenua o Molisa, pea ke momoli ia ia i te kogamea aena ko he failaulau i oluga o he mouga ae e au fakaha atu anai kia koe.
3Nee tuu ake leva ia Apalahamo i te pogipogi uhu, o teuteui tana asino, pea nee ina too leva ni tagata faifekau e toko lua ke olo mo ia, pea mo tona foha ko Isaake. Nee ina fahi leva he fafie ki te sakilifisio, pea nee alu leva ia ia ki te kogamea ae nee ui ki ai e te Atua.
4I te tolu aho, nee hiki ake leva e Apalahamo ona mata, pea nee sio leva ia ia mai mamao ki te mouga. 5Pea nee ui leva e Apalahamo ki ana tagata faifekau: Kolua nonofo i heni mo te asino; ko au mo te tupulaga, e ma olo anai o kaku ki oluga o atolasio, pea hoki ma toe liliu mai anai kia kolua. 6Nee too leva e Apalahamo te fafie o te failaulau, o fakaamo ki tona foha ko Isaake, kae nee ina too leva i tona nima te afi mo te hele. Pea nee na haele fakatahi leva toko lua. 7Nee ui leva e Isaake kia Apalahamo tana tamai: Oi taku tamai! Nee ina tali leva: Koeni au, sioku foha! Nee toe ui leva e Isaake: Koeni te afi mo te fafie, kae kofea leva te akeno ki te failaulau? 8Nee tali leva e Apalahamo: Oi toku foha, e tokaga anai te Atua totonu ki te akeno o te failaulau. Pea nee na haele fakatahi leva, toko lua.
9Nee na kaku leva ki te kogamea ae nee ui ki ai e te Atua, pea nee fakatuu leva e Apalahamo he aletale, pea nee ina fakatoka leva te fafie i oluga. Nee ina hai leva tona foha ko Isaake, o hili ki te aletale, i oluga o te u fafie. 10Pea nee faoi leva e Apalahamo tona nima, o too te hele ke tamatei ai tona foha. 11Kae nee kalaga leva te aselo a te Eteleno mai te atu lagi, o ui: Apalahamo! Apalahamo! Nee ina tali leva: Koeni au! 12Nee ui leva e te aselo: Aua naa fafa tou nima ki te fanau, pea aua naa ke fai he mea kia ia; koteuhi e au iloi i te aho nei e ke mataku ki te Atua, pea nee mole ke fakafisi mai kia au tou foha, tau ulutokotahi. 13Pea nee hiki ake leva e Apalahamo ona mata, pea nee sio leva ia ia ki he ovi tagata i ona tua ae kua taofi ona tala i he ulu vao. Pea nee alu leva ia Apalahamo o too te ovi tagata, o momoli ko he sakilifisio, o fetogi ai tona foha. 14Nee foaki leva e Apalahamo ki te kogamea aia te higoa ko Sehova-Sile. Koia ae e lau ai ia aho nei: I te mouga e foaki anai e te Eteleno te mea ae e aoga.
15Nee toe paui leva te aselo a te Eteleno mai te atu lagi kia Apalahamo, ko tona tua lua aia, 16o ui: E au fakapapau ia au totonu, folafola a te Eteleno! Koteuhi nee ke fai te mea aia, pea nee mole ke fakafisi mai kia au tou foha, tau ulutokotahi. 17E au tapuaki anai kia koe, pea e au liuliuga anai tou hakoga o hage ko te u fetuu o te lagi, mo te one o te matatai; pea e mau anai e tou hakoga te matapa o ona fili. 18E tapuakina anai te u puleaga fuli o te kele i tou hakoga, koteuhi nee ke fakalogo ki toku leo. 19Nee toe liliu leva ia Apalahamo ki ana tagata faifekau, pea nee natou tutuu ake leva o toe liliu fakatahi ki Pele-Sepa. Koteuhi nee nofo ia Apalahamo i Pele-Sepa.
20I te hili o te u mea aia, nee fakaha leva kia Apalahamo, o ui: Koeni, kua fanaui foki e Milika ni tamaliki kia Nakole, tou tehina. 21Ko Usi ko tana uluaki, mo Pusi ko tona tehina, mo Kemuele ko te tamai a Alame. 22Mo Keseti, mo Aso, mo Pilitasi, mo Sitila, mo Petuele. 23Nee fakatupu leva e Petuele ia Lepeka. Ko te u foha aia e valu nee fanaui e Milika kia Nakole, ko te tehina o Apalahamo. 24Ko te lua ohoana o Nakole nee higoa ko Leuma, nee ina fanaui leva ia Tepaki, mo Kaami, mo Taasi, pea mo Maaka.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
SENESI 22
22
Sakilifisio o Isaake
1I te hili ki ai o te u mea aia, pea nee ahiahii leva e te Atua ia Apalahamo, pea nee ina ui leva kia ia: Apalahamo! Pea nee ina tali leva: Koeni au! 2Nee ui leva e te Atua: Too tou foha, tou foha ulutokotahi, ae e ke ofa ki ai, ko Isaake; alu ki te fenua o Molisa, pea ke momoli ia ia i te kogamea aena ko he failaulau i oluga o he mouga ae e au fakaha atu anai kia koe.
3Nee tuu ake leva ia Apalahamo i te pogipogi uhu, o teuteui tana asino, pea nee ina too leva ni tagata faifekau e toko lua ke olo mo ia, pea mo tona foha ko Isaake. Nee ina fahi leva he fafie ki te sakilifisio, pea nee alu leva ia ia ki te kogamea ae nee ui ki ai e te Atua.
4I te tolu aho, nee hiki ake leva e Apalahamo ona mata, pea nee sio leva ia ia mai mamao ki te mouga. 5Pea nee ui leva e Apalahamo ki ana tagata faifekau: Kolua nonofo i heni mo te asino; ko au mo te tupulaga, e ma olo anai o kaku ki oluga o atolasio, pea hoki ma toe liliu mai anai kia kolua. 6Nee too leva e Apalahamo te fafie o te failaulau, o fakaamo ki tona foha ko Isaake, kae nee ina too leva i tona nima te afi mo te hele. Pea nee na haele fakatahi leva toko lua. 7Nee ui leva e Isaake kia Apalahamo tana tamai: Oi taku tamai! Nee ina tali leva: Koeni au, sioku foha! Nee toe ui leva e Isaake: Koeni te afi mo te fafie, kae kofea leva te akeno ki te failaulau? 8Nee tali leva e Apalahamo: Oi toku foha, e tokaga anai te Atua totonu ki te akeno o te failaulau. Pea nee na haele fakatahi leva, toko lua.
9Nee na kaku leva ki te kogamea ae nee ui ki ai e te Atua, pea nee fakatuu leva e Apalahamo he aletale, pea nee ina fakatoka leva te fafie i oluga. Nee ina hai leva tona foha ko Isaake, o hili ki te aletale, i oluga o te u fafie. 10Pea nee faoi leva e Apalahamo tona nima, o too te hele ke tamatei ai tona foha. 11Kae nee kalaga leva te aselo a te Eteleno mai te atu lagi, o ui: Apalahamo! Apalahamo! Nee ina tali leva: Koeni au! 12Nee ui leva e te aselo: Aua naa fafa tou nima ki te fanau, pea aua naa ke fai he mea kia ia; koteuhi e au iloi i te aho nei e ke mataku ki te Atua, pea nee mole ke fakafisi mai kia au tou foha, tau ulutokotahi. 13Pea nee hiki ake leva e Apalahamo ona mata, pea nee sio leva ia ia ki he ovi tagata i ona tua ae kua taofi ona tala i he ulu vao. Pea nee alu leva ia Apalahamo o too te ovi tagata, o momoli ko he sakilifisio, o fetogi ai tona foha. 14Nee foaki leva e Apalahamo ki te kogamea aia te higoa ko Sehova-Sile. Koia ae e lau ai ia aho nei: I te mouga e foaki anai e te Eteleno te mea ae e aoga.
15Nee toe paui leva te aselo a te Eteleno mai te atu lagi kia Apalahamo, ko tona tua lua aia, 16o ui: E au fakapapau ia au totonu, folafola a te Eteleno! Koteuhi nee ke fai te mea aia, pea nee mole ke fakafisi mai kia au tou foha, tau ulutokotahi. 17E au tapuaki anai kia koe, pea e au liuliuga anai tou hakoga o hage ko te u fetuu o te lagi, mo te one o te matatai; pea e mau anai e tou hakoga te matapa o ona fili. 18E tapuakina anai te u puleaga fuli o te kele i tou hakoga, koteuhi nee ke fakalogo ki toku leo. 19Nee toe liliu leva ia Apalahamo ki ana tagata faifekau, pea nee natou tutuu ake leva o toe liliu fakatahi ki Pele-Sepa. Koteuhi nee nofo ia Apalahamo i Pele-Sepa.
20I te hili o te u mea aia, nee fakaha leva kia Apalahamo, o ui: Koeni, kua fanaui foki e Milika ni tamaliki kia Nakole, tou tehina. 21Ko Usi ko tana uluaki, mo Pusi ko tona tehina, mo Kemuele ko te tamai a Alame. 22Mo Keseti, mo Aso, mo Pilitasi, mo Sitila, mo Petuele. 23Nee fakatupu leva e Petuele ia Lepeka. Ko te u foha aia e valu nee fanaui e Milika kia Nakole, ko te tehina o Apalahamo. 24Ko te lua ohoana o Nakole nee higoa ko Leuma, nee ina fanaui leva ia Tepaki, mo Kaami, mo Taasi, pea mo Maaka.
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland