Joani 10
10
1Chalala chalala, nukuyileja nami, muntu wukubula kwiŋilila mwiyinda dawanyikoku kuchisu, ilaŋa hakukandamina hacheŋi, diyi ikombi, diyi mukwakubuwa. 2Ilaŋa muntu wukwiŋilila kuchisu, diyi kabiŋa kawanyikoku. 3Mukwakuhemba chisu wukumwenzulwila; anyikoku atiyaloŋa izu dindi, niyena watambikaŋa anyikoku indi yomweni hejina hejina, hakuyilombolaŋa hanzi. 4Chakwidishayi anyikoku indi ejima, hakutwaminaku; anyikoku hiyakumulonda, muloŋa eluka izu dindi. 5Ilaŋa muntu wacheŋi hiyakumulondaku, akumutemuka; muloŋahiyeluka izu dawantu acheŋuku. 6Yesu hakuyileja chishimu ochu, ilaŋa wena kwiluka mwayilejeliyi nehi.
7Dichi Yesu hakuyila nindi, Chalala chalala, nukuyileja nami, yami chisu chawanyikoku. 8Antu ejima ansambilili hiyamakombi, hiyakwakubuwa; ilaŋa anyikoku hiyayitiyiluku. 9Yami chisu; neyi muntu wukwiŋilila mudami wukuhanda, wukwijila ŋa wukwidikaŋa, wukuwanaŋa kuwudiilu. 10Ikombi wenjilaŋa chiŋa yowu kwiya nakujaha nakukisaŋana. Ami nenjili kulonda akamoni wumi, akawumoni wakubadika kuvula.
11Ami yami kabiŋa walala; kabiŋa walala wukutula wumi windi hadi anyikoku. 12Mukwakukoŋela wufwetu hohu hikabiŋa wukweti nyikoku yinduku; chakumonayi kaŋwidi hakwinza, hakushiya nyikoku, hakutemuka; kaŋwidi hakuyikwata nakuyipalaŋesha, 13muloŋa wakoŋelaŋa kwawufwetu hohu, haakamaŋa nyikokuku. 14Ami yami kabiŋa walala, neluka amami aweni, niwena aŋiluka. 15Chaŋilukayi Tata, ninami namwiluka Tata. Ami nukutula wumi wami hadi anyikoku. 16Ni kweti anyikoku acheŋi, hiyamwiyinda dinuku; chiŋa nakayileta niwena; wena akatiya izu dami; akekali mukanka wumu nikabiŋa wumu. 17Dichi chankeŋelayi Tata muloŋa nukutula wumi wami kulonda nakawutambuli cheŋi. 18Kwosi wawuntambulaŋaku, nawutulaŋa ami aweni. Ni kweti Ŋovu yakuwutula, ni kweti nawa Ŋovu yakuwutambula cheŋi. Dimu mwananlejuwu kudi Tata yami.
19Dichi aYudeya hiyakudambula cheŋi hamazu owu. 20Amavulu nawu, Wudi nademoni, nikuzaluka wazaluka. Mukabaŋa tuhu nakumutiyilila? 21Amakwawu nawu, Wenawa himazu ahoshaŋa muntu wukweti demonuku. Demoni atweshi kutonesha mesu amputamesu?
22Henohu kuYerusalema kwadiŋi chawija chakujilika, hachila aka chachishika. 23Yesu wadiŋi nakwenda mutembeli mwikeki dakuchisu chaSolomoni. 24Dichi aYudeya hiyakumupompela kwi-ndo, hiyakumwila nawu, Wukutushakamisha mafuku aŋahi nakululuta nakujinoka? Neyi yeyi Kristu, lumbululaku chikupu. 25Yesu hakuyakula nindi, Nayilejeli, enu kwitiya nehi. Nyidimu yinelaŋa mwijina daTata yami, diyi yanshimunaŋa wunsahu. 26Chimunabuli kwitiya chinafumi hákubula kwikala anyikoku ami. 27Anyikoku ami atiyaloŋa izu dami, ami nayiluka, niwena anlondaŋa. 28Hinukuyinka wumi wahaya nyaka, hiyamba kanoŋaku; kwosi wakayihukula muchikasa chamuku. 29Tata yami wanyinkeluwu wabadika ejima; kwosi wukutwesha kuyihukula muchikasa chaTataku. 30Ninami niTata twekala wumu.
31AYudeya hiyakunona cheŋi malola nawu amwasi. 32Yesu hakuyakula nindi, Nayileja dehi nyidimu yayiwahi yayivulu yakudi Tata, mudimwinyi mukuŋasila malola? 33AYudeya hiyakumwakula nawu, Hitukukwasila mudimu wawuwahuku, ilaŋa hakutuka Nzambi, muloŋa eyi wumuntu wunaditeni neyi, NiNzambi. 34Yesu hakuyakula nindi, Anasoneki munshimbi jenu nawu, Ami nami enu mudi anzambi. 35Indi neyi antu atiyili mazu aNzambi wayiteneni nindi enu mudi anzambi; ochu mukanda wajila hiyatweshaŋa kuwumotokaku; 36mumwili yena ajilikawu dehi kudi Tata, atemeshayi mumpata yamunu mwishina, nenu, Wunatuki Nzambi; nanochu chineli nami, Ni mwana kaNzambi? 37Neyi nabulaŋa kwila nyidimu yaTata yami bayi muŋitiyaku. 38Ilaŋa neyi nayilaŋa, hela munabuli kuŋitiya ami aweni, itiyilenu kwanyidimu, kulonda mwakeluki mwakashinshiki nenu Tata wudi mudami, ninami nidi mudi Tata. 39Hiyakweseka cheŋi kumukwata, hakuyiwomboloka.
40Hakuya cheŋi kwishinadi daYodana, kwapapatishilaŋayi Yowanu hatachi, ashakama nikwenoku. 41Amavulu hiyakwinza kudi yena nawu, Yowanu hakoŋeli yinjikijiluku, ilaŋa mazu ejima amutenenuwu muntu iwu kudi Yowanu, komana alala. 42Kwenoku antu amavulu hiyakumwitiya.
The Bible in Lunda: Ndembu (Lunda of Kalunda) © B. F. B. S. 1962.
Joani 10
10
1Chalala chalala, nukuyileja nami, muntu wukubula kwiŋilila mwiyinda dawanyikoku kuchisu, ilaŋa hakukandamina hacheŋi, diyi ikombi, diyi mukwakubuwa. 2Ilaŋa muntu wukwiŋilila kuchisu, diyi kabiŋa kawanyikoku. 3Mukwakuhemba chisu wukumwenzulwila; anyikoku atiyaloŋa izu dindi, niyena watambikaŋa anyikoku indi yomweni hejina hejina, hakuyilombolaŋa hanzi. 4Chakwidishayi anyikoku indi ejima, hakutwaminaku; anyikoku hiyakumulonda, muloŋa eluka izu dindi. 5Ilaŋa muntu wacheŋi hiyakumulondaku, akumutemuka; muloŋahiyeluka izu dawantu acheŋuku. 6Yesu hakuyileja chishimu ochu, ilaŋa wena kwiluka mwayilejeliyi nehi.
7Dichi Yesu hakuyila nindi, Chalala chalala, nukuyileja nami, yami chisu chawanyikoku. 8Antu ejima ansambilili hiyamakombi, hiyakwakubuwa; ilaŋa anyikoku hiyayitiyiluku. 9Yami chisu; neyi muntu wukwiŋilila mudami wukuhanda, wukwijila ŋa wukwidikaŋa, wukuwanaŋa kuwudiilu. 10Ikombi wenjilaŋa chiŋa yowu kwiya nakujaha nakukisaŋana. Ami nenjili kulonda akamoni wumi, akawumoni wakubadika kuvula.
11Ami yami kabiŋa walala; kabiŋa walala wukutula wumi windi hadi anyikoku. 12Mukwakukoŋela wufwetu hohu hikabiŋa wukweti nyikoku yinduku; chakumonayi kaŋwidi hakwinza, hakushiya nyikoku, hakutemuka; kaŋwidi hakuyikwata nakuyipalaŋesha, 13muloŋa wakoŋelaŋa kwawufwetu hohu, haakamaŋa nyikokuku. 14Ami yami kabiŋa walala, neluka amami aweni, niwena aŋiluka. 15Chaŋilukayi Tata, ninami namwiluka Tata. Ami nukutula wumi wami hadi anyikoku. 16Ni kweti anyikoku acheŋi, hiyamwiyinda dinuku; chiŋa nakayileta niwena; wena akatiya izu dami; akekali mukanka wumu nikabiŋa wumu. 17Dichi chankeŋelayi Tata muloŋa nukutula wumi wami kulonda nakawutambuli cheŋi. 18Kwosi wawuntambulaŋaku, nawutulaŋa ami aweni. Ni kweti Ŋovu yakuwutula, ni kweti nawa Ŋovu yakuwutambula cheŋi. Dimu mwananlejuwu kudi Tata yami.
19Dichi aYudeya hiyakudambula cheŋi hamazu owu. 20Amavulu nawu, Wudi nademoni, nikuzaluka wazaluka. Mukabaŋa tuhu nakumutiyilila? 21Amakwawu nawu, Wenawa himazu ahoshaŋa muntu wukweti demonuku. Demoni atweshi kutonesha mesu amputamesu?
22Henohu kuYerusalema kwadiŋi chawija chakujilika, hachila aka chachishika. 23Yesu wadiŋi nakwenda mutembeli mwikeki dakuchisu chaSolomoni. 24Dichi aYudeya hiyakumupompela kwi-ndo, hiyakumwila nawu, Wukutushakamisha mafuku aŋahi nakululuta nakujinoka? Neyi yeyi Kristu, lumbululaku chikupu. 25Yesu hakuyakula nindi, Nayilejeli, enu kwitiya nehi. Nyidimu yinelaŋa mwijina daTata yami, diyi yanshimunaŋa wunsahu. 26Chimunabuli kwitiya chinafumi hákubula kwikala anyikoku ami. 27Anyikoku ami atiyaloŋa izu dami, ami nayiluka, niwena anlondaŋa. 28Hinukuyinka wumi wahaya nyaka, hiyamba kanoŋaku; kwosi wakayihukula muchikasa chamuku. 29Tata yami wanyinkeluwu wabadika ejima; kwosi wukutwesha kuyihukula muchikasa chaTataku. 30Ninami niTata twekala wumu.
31AYudeya hiyakunona cheŋi malola nawu amwasi. 32Yesu hakuyakula nindi, Nayileja dehi nyidimu yayiwahi yayivulu yakudi Tata, mudimwinyi mukuŋasila malola? 33AYudeya hiyakumwakula nawu, Hitukukwasila mudimu wawuwahuku, ilaŋa hakutuka Nzambi, muloŋa eyi wumuntu wunaditeni neyi, NiNzambi. 34Yesu hakuyakula nindi, Anasoneki munshimbi jenu nawu, Ami nami enu mudi anzambi. 35Indi neyi antu atiyili mazu aNzambi wayiteneni nindi enu mudi anzambi; ochu mukanda wajila hiyatweshaŋa kuwumotokaku; 36mumwili yena ajilikawu dehi kudi Tata, atemeshayi mumpata yamunu mwishina, nenu, Wunatuki Nzambi; nanochu chineli nami, Ni mwana kaNzambi? 37Neyi nabulaŋa kwila nyidimu yaTata yami bayi muŋitiyaku. 38Ilaŋa neyi nayilaŋa, hela munabuli kuŋitiya ami aweni, itiyilenu kwanyidimu, kulonda mwakeluki mwakashinshiki nenu Tata wudi mudami, ninami nidi mudi Tata. 39Hiyakweseka cheŋi kumukwata, hakuyiwomboloka.
40Hakuya cheŋi kwishinadi daYodana, kwapapatishilaŋayi Yowanu hatachi, ashakama nikwenoku. 41Amavulu hiyakwinza kudi yena nawu, Yowanu hakoŋeli yinjikijiluku, ilaŋa mazu ejima amutenenuwu muntu iwu kudi Yowanu, komana alala. 42Kwenoku antu amavulu hiyakumwitiya.
The Bible in Lunda: Ndembu (Lunda of Kalunda) © B. F. B. S. 1962.