Génesis 6
6
Runakunapa millay huchakuna ruwasqankumanta
1Kay pachapi runakuna ashkaman miraspankun, kay pachaman hunt'ayta qallariranku. Chaymi paykunapaqa warmi ususinkupas naceran. 2Hinaqtinmi Diospa wawankunaqa rikuranku runakunapa warmi ususinkuqa sumaq munay sipaskuna kasqanta. Hinaspan Diospa wawankunaqa chay sumaq sipaskunata akllarikuspanku, mayqen munasqanku sipaskunawan tiyaranku. 3Hinaqtinmi Señor Diosqa khaynata niran:
—Noqapa espirituyqa manan wiñaypaqchu runakunapiqa kanqa. Chaymi runakunaqa mana wiñaypaqchu kawsanqaku. Aswanmi runakunaqa aychalla kasqankurayku, wañuqlla kanqaku. Chayraykun runakunaqa kawsanqaku pachak ishkay chunka watallata, nispa.
4Hinaqtinmi Diospa wawankunaqa, runakunapa ususinkunawan puñuranku. Chaymi chay sipaskunaqa qari wawayoq karanku. Chay qari wawankun chay tiempopiqa hatunkaray runakuna hinallataq valiente runakuna karanku. Chayraykun paykunaqa ñawpaqmantapacha allin reqsisqa karanku.
5Ichaqa Señor Diosmi rikuran kay pachapi runakunaqa nishu millay huchasapa kasqankuta hinallataq tukuy ima piensayninkupas millay mana allinkunalla kasqanta. 6Chayta rikuspanmi Señor Diosqa anchata llakikuran kay pachapi runa ruwasqanmanta. Hinaspan sonqonta nanachikuran. 7Chaymi Señor Diosqa niran:
—Noqaqa kay pachapi runakuna unanchasqaytan mana imaman tukuchisaq. Noqaqa destruisaqmi runakunata, animalkunata, uchuy animalkunata hinallataq alton phawaq animalkunatapas. Noqaqa anchatan sonqoypi nanachikuni tukuy chaykuna unanchasqaymanta, nispa.
8Ichaqa Noeytataqmi Señor Diosqa anchata khuyapayaran.
Arcata Noé ruwasqanmanta
9Kaymi Noeymanta willakuykunaqa: Noeyqa allin justo hinallataq honrado runan karan Diospa ñawpaqninpiqa. Chayraykun payqa Diospa munasqanman hina kawsaran llaqtamasin runakuna ukhupi.
10Noeypaqa kinsan qari wawankuna karan: Sem, Cam hinallataq Jafet ima.
11Ichaqa Diosmi qawariran kay allpa pachapi wakin runakunataqa. Hinaspan rikuran chay runakunaqa tukuy millay huchallapi hinallataq ch'aqwallapi kawsasqankuta. 12Diosqa sayna huchallapi hinallataq ch'aqwallapi kawsasqankuta qawarispanmi, 13Noeyta khaynata niran:
—Kay pachapi llapallan runakunatan chinkachisaq. Runakuna huchallapi hinallataq ch'aqwallapi kawsasqankuraykun, kay allpa pachaqa nishuta ñak'arishan. Chayraykun huchallapi kawsaq runakunataqa castigaspay destruisaq, kay allpa pachatawan kushkata. 14Chayraykuyá qanqa, kunan huk hatun *arcata ruway ciprés nisqa k'aspimanta. Hinaspa chay arca ukhupi ashka cuartokunata ruway. Chaymantataq hawanta ukhunta breawan llut'iy. 15Chay arcataqa khayna medidayoqtan ruwanki: Largonmi kanan 135 metros. Anchontaq kanan 22 metros y medio. Alturantaq kanan 13 metros y medio. 16Hinaspapas chay arcataqa ruwanki kinsa altosniyoqtan. Ruwallankitaqmi huk ventanatapas. Chay ventanataqa ruwanki techomanta medio metro uranpin. Saynallataqmi punkutapas ruwanki arcapa huknin kaq waqtanpi. 17Noqaqa kay allpa pachamanmi nishu parata parachimusaq. Hinaqtinmi unu kay pachaman hunt'aqtin llapallan kawsaqkuna wañunqaku. Saynapin chay llapallan kawsaqkunaqa chinkachisqa kanqa. 18Noqan ichaqa qanwan huk *pactota ruwasaq. Qanmi chay arca ruwasqaykiman haykunki, warmiykiwan, qari wawaykikunawan hinallataq paykunapa warminkunawanpas. 19Chay arcamanqa haykuchillankitaqmi llapallan kawsaq animalkunamanta orqo chinantinta, saynapi chay animalkunapas ama wañunankupaq. 20Animalkunataqa clasenman hinan orqo chinantinta arcaman haykuchinki, phawaq animalkunamanta clasenman hina, pampapi puriq animalkunamanta clasenman hina hinallataq qasqonpallan puriq animalkunatapas clasenman hina, saynapi ama wañunankupaq. 21Saynallataqyá ashka clase mikhunakunata huñuspayki, arca ukhupi waqaychanki, saynapi qanpas hinallataq llapan animalkunapas chayta mikhuspa kawsanaykichispaq, nispa.
22Noeyqa Diospa chay kamachisqankunatan kasukuspa ruwaran.
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional