Yowana 2
2
Obhwenga mu-musi gwa Kana
1Mmbe, orusuku rwa akasatu mbubha-wo obhwenga mu-musi gwa Kana, Gariraaya eyo. Mu-bhwenga bhuyo, nyiramwene Yeesu woone ꞉aariga ariwo. 2Yeesu na abheeyigira bhaaye bhoone ꞉bhaariga bharaarikirwe mu-bhwenga bhuyo. 3Anu bhagenyi ꞉bhaanyweye iidivaayi#2:3a Iidivaayi. Ringira riingʼana rinu mu-Mangʼana Amakomeeye. niiwa-mo, nyiramwene Yeesu ˆnaamubhwira ati, “Abhagenyi bhaamara-mo iidivaayi yoone kutyo.”#2:3b Bhaamara-mo iidivaayi yoone kutyo. Mu-nsiku giyo, ꞉gyariga giri nswaro muno iidivaayi okuwa obhwenga bhukyagenderera. 4Yeesu ˆnaamusubhya ati, “Maayi, owunyaagara-koki? Akabhaga kaani kakyari okuyika.” 5Niwe nyiramwene ˆnaabhwira abhaanu bhanu ꞉bhaariga mbagabha iidivaayi ati, “Ryoneryone rinu araabhabhwire, mukore.”
6Mmbe, mu-bhwenga ayo ꞉gaariga gariwo amatuumo gasansabha garoosiibhwe na amagina, garimo amanji. Abhayawudi ꞉bhaariga mbatuura-mo amanji aga okwiyesisha. Na riituumo erimwi ꞉ryariga ndigega muna madumu gataanu aga amanji. 7Yeesu ˆnaabhwira abhaanu bhanu ꞉bhaariga mbagabha iidivaayi ati, “Mwijushe amanji mu-matuumo gayo.” Bhoone mbeejusha amanji mu-matuumo gayo mbeejusha jabhi. 8Kimwi Yeesu ˆnaabhabhwira ati, “Woori, mutaye-ko amanji gayo, musirire omufuuyisha.” Bhoone mbakora kutyo. 9Omufuuyisha uyo ꞉eejire aagarabha, ˆnaanyoora amanji gayo gaayindukire gaabheeye divaayi. Omwene ꞉ataamenyere enu iidivaayi iyo ꞉yaariga isookere, nawe abhagabhi bhayo, bhanu ꞉bhaariga bhatayire amanji mu-matuumo ꞉bhaariga bhamenyere. Niwe omufuuyisha ˆnaabhirikira omugabhusi, 10ˆnaamubhwira ati, “Unu kaakora insikukuru kaayaanaga abhagenyi iidivaayi injomu okwamba. Bhakamara okukorwa, niwe ˆnaayaana abhagenyi iidivaayi inu itari njomu. Nawe awe waabhiika iidivaayi injomu okukira eya okwamba, okuyikira woori!”
11Yeesu ꞉aambire okukora ekimenyegesho, bhunu ꞉aariga ari Kana mu-kyaro kya Gariraaya. Ekimenyegesho kiyo ꞉kyariga kiri ekya okwamba ekya okweresha obhugungyo bhwaye, na abheeyigira bhaaye mbamwikirisha. 12Bhunu obhwenga ꞉bhwawooye, Yeesu ˆnaatebhera okuja mu-musi gwa Kaperinawumu bhari amwi na nyiramwene, bhaawaamuwaabho abhatooto, na abheeyigira bhaaye. Mbeekara eyo nsiku ntooto era.
Yeesu kaabhirimya abhasuruja mw-iyekaru rya Nyamuwanga
(Mataayo 21:12-13; Maariko 11:15-17; Ruuka 19:45-46)
13Bhunu Ipaasaka#2:13 Ipaasaka. Ringira riingʼana rinu mu-Mangʼana Amakomeeye. ya Abhayawudi ꞉yaariga irebhereeye okuyika, Yeesu ˆnaariinyagisha okuja Yerusareemu. 14Mmbe, bhunu ꞉aayikire eyo, ˆneengira mw-ibhanja rya riiyekaru#2:14a Riiyekaru. Ringira riingʼana rinu mu-Mangʼana Amakomeeye. rya Nyamuwanga, ˆnaanyoora-mo abhaanu mbagushaga giingʼombe, giingʼondi na ginguuti gya okusoosisha ebhimweso,#2:14b Ebhimweso. Ringira riingʼana Emigabho mu-Mangʼana Amakomeeye. na abhandi ꞉bhaariga bheekaaye ku-meeja gyebhwe mbafunjaga giiyera, gya okusoosha omugabho mw-iyekaru. 15Bhunu Yeesu ꞉aarorere gayo, ˆnaaruka ekikoto kya ingoye, ˆnaabhirimya abhaanu bhoone kutyo bhanu ꞉bhaariga mbagusha ebhiinu mw-ibhanja rya riiyekaru rya Nyamuwanga. ˆNaabhirimya giingʼondi na giingʼombe. ˆNaagaramura giimeeja gya abhaanu bhanu ꞉bhaariga mbafunja giiyera, giiyera gyebhwe nginyaraganira ansi. 16Niwe ˆnaabhwira bhanu ꞉bhaariga mbagusha ginguuti ati, “Musooshe anu ginguuti ginu! Musige okukora iinyumba ya Raata okubha ya kukorera-mo obhusuruja!” 17Bhunu abheeyigira bhaaye ꞉bhoonguuywe gayo, mbayiita amangʼana ganu gakaamirwe mu-Makaamo Amataakatiifu ati, “Obhwendi bhwani ku-nyumba yaawo, bhurimmara-wo.”#2:17 Ringira Ijabhuri 69:9.
18Bhunu abhatangasha bha Abhayawudi ꞉bhaarorere ganu Yeesu aakora, mbamubhuusha ati, “Woori owukora kimenyegeshoki okukyeresha ati uri na obhuturo obhwa okukora amangʼana gayo?” 19Yeesu ˆnaabhasubhya ati, “Mukambure riiyekaru rinu, anye eniija okuryumbaka nsiku esatu era.” 20Mmbe Abhayawudi mbamusubhya ati, “Riiyekaru rinu ꞉ryoombakirwe myaka makumi gana na sansabha! Awe owutura kutiki okuryumbaka nsiku esatu?” 21Nawe Yeesu ꞉aariga atakwaikira riiyekaru eryene, tari ꞉aariga ˆnaaikira omubhiri gwaye. 22Akabhaga kanu Yeesu ꞉aasuukire okusooka mu-bhafuuye, abheeyigira bhaaye mbayiita kutyo ꞉aaikire. Abheeyigira bhayo mbeekirisha Amakaamo Amataakatiifu kutyo ꞉gaaikire, na kutyo Yeesu woone ꞉aaikire.
Yeesu kaamenya ganu gari mu-mitima gya abhaanu bhoone kutyo
23Bhunu Yeesu ꞉aariga ari Yerusareemu mu-nsikukuru ya Ipaasaka, abhaanu bhaafu mbaamba okumwikirisha, kwa okubha ꞉bhaarorere ebhimenyegesho bhinu ꞉aariga ˆnaakora. 24Nawe Yeesu ꞉aariga atakwikirisha amangʼana geebhwe, kwa okubha ꞉aariga amenyere kinu ꞉kyariga kiri mu-mitima gyebhwe bhoone kutyo. 25꞉Ateendere omuunu woonewoone amubhwire ganu abhaanu abheeganiirisha, kwa okubha ꞉aariga amenyere goone kutyo ganu gari mu-mitima gya abhaanu bhoone kutyo.
© 2023, Wycliffe Bible Translators, Inc. All rights reserved