Yohanes 1
1
Eve Wene andi, Ap-at agagi wene
1O muk endak erogo wen-mbogot ogagetek hegek At Eve Wene akoat welagagi.
Eve Wene ako andi, Ala inimat welagagi.
Eke, Eve Wene andi, eyave Ala-at welagagi.
2At ako o muk endak erogo wen-mbogot ogagetek hegek Ala inimat welagagi.
3Ala en yi menda ndi menda ovok erogo ogagagi andi, At Eve Wene enat ogagagi.
Yi menda ndi menda ogagagi ako, ambiat ogo At Eve Wene en ambi ogagetek andi mondok dek o.
Ovok erogo Aren adigat ogagagi.
4Iniluk oginivisiga menda adem Eve Wene Arat welagagi.
Eke, iniluk oginivisiga menda adem akoen avakwa enendawima awiya okbisaliga.
5Awiya akoen o hwiserekma awiya ogasiga.
Eke, o hwiserek akoen o awiya ako o hwis erogo bagetek-at agarik.
6-7Avakwa enendawima awiya oginivisiga menda ako, ap ilup menda ambien vagalogo yugirigya dogopwak yiluk, Ala en ap ambi inis Yohanes lakba wagagi. At Yohanes yugirigya vaga yi avakwa ndi avakwa ovok erogo enendawi awiya ako ovaga vanggabaluk, avyarat ombarupwak yiluk, vagalogo yugeragiluk wagagi. 8Avakwa enendawima awiya oginivisiga menda ako andi, at Yohanes dek. At dek ovara, At awiya oginivisiga menda ako avok adigat vagalogo yugirigya dogogiluk wagagi. 9Awiya eyave itok agarik menda o wen vaga yoma nunggu wigya dogomindik, yi ap ndi ap enendawima awiya oginipu dogop ako Arat wambu wagagi.
10At o wen vaga yoma wambu wagya lagagirik, welagagi. O wen-mbogot yi, Arat ogagagi ovara, it avakwa wen vaga yoma agarwik ako At yedok hegetek-at welagagwa. 11At amwa awerek-at wambu wagagi ovara, it ap At owa-asin akoen At eyave wegetek-at welagagwa. 12At eyave wegetek-at welagagwa ovara, it nin enendawi At ovaga vanggabaluk, avyarat umbutu lagagwarik, wagagwa. It nin enendawi At ovaga vanggabaluk, avyarat umbutu lagagwa ako At Eve Wene akoen yugirigya dugwit, “Hit Ala aburi-at dogogup o,” yiluk, it ovok erogo At Ala aburi okbigigi. 13It avakwa Ala aburi okbigigi ako, avakwa enaburi endaginivisagwi hak endaginipitek. Eke, avakwa wen vaga menda en, “An nabut endarisogon,” umbutu dugwit, endaginivisagwi hak endaginipitek. Ata, Ala enat endaginipigi.
14At Eve Wene ako, Ap-At agya lagagirik, ninimat welagagi. Ninim dugwit, At mondok siyalek-at hagagup. At Ala Abut adik ambengga atma, Asin en siyabagya hagagup. Eke At ninim dugwit, endawi hunik en okbininggu, wene mondok des erogo yuknirigya, ombok erogoat ogagya hagagup.
15At Yohanes en ane ombok vaga At Ala Abut ako avok vagalogo yugirigya lagagi. Vagalogo yugirigya dugwit, “‘Ap ambi nambetaga warisogon o,’ yiluk, yukhirigya lagagis ako, At yi aro. At yi an nambetaga waga ovara, an endaklagatek neyagek, At endak erogo welagagi atma, an andi maduk. Eke, At mondok ombok aro,” yiluk, vagalogo yugirigya lagagi. 16Nit ovok erogo At Ala mondok nenabwa imbita dugwit endawi hunik en okbininggik, okbininggik adigat ogasiga. 17Ala en wene “Yerogo ogarup, nderogo ogarup,” Musa yugugu halok, Musa en yukneragagi ovara, Ala endawi hunik en okbininaliga ako, At Yesus Keretus vaga enat, okbininaliga. Eke, avyarat wene des erogo vagalogo yukneraliga andi ogo, At Yesus Keretus enat yukneraliga. 18Avakwa en andi, Ala mondok inil helagudek ovara, Ala Abut adik ambengga ako, At eve Ala-at, Asin inim mondok hunik dugwit, Ala avok vagalogo yukneragagi.
At Ima Wombabisaliga menda Yohanes en, “An Keretus dek o,” yiluk, yugirigya lagagi wene
(Matius 3:1-12; Markus 1:1-8; Lukas 3:1-18)
19At Yohanes en wene Ala en avakwa enagap wendarupwak yiluk ap ambi denogo lakba warisogon ako avok iri lagagi. Irisim, it ap Yakuri enasini en Yohanes hemekhapwak yiluk, ap imam-imam inim, ap Lewi menda inim, o Yerusalem en Yohanes adema lakbisa wagagwa. Lakbisa wagagwa ako, irenen, “Hat ap sa?” Yohanes hemekhapwak yiluk, lakbisa wagagwa. 20Lakbisa wagagwa ako Yohanes adema wagu lagagwarik, “Hat ap sa o?” yugugu lagagwama, Yohanes en mbikit yugirigya dugwit, “Dek. At Mesias avakwa enagap wendarupwak yiluk Ala en lakba warisogon yagagi ako, an dek,” sigam vagalogo yugeragagi.
21Yugirigya lagagimu, it akoen at Yohanes yugugu dugwit, “Andi halok hat andi sa? Hat ap Elia ako ai?”
Yugugu lagagwama, at Yohanes en, “Ap Elia ako andi ogo, an dek.”
Yugirigya lagagimu, iren, “Andi halok, ap Navi Ala en yugugu hegek yugeragiluk lakba warisogon yagagi ako, harat ai?”
Yugugu lagagwama, aren iri dugwit, “Andi ogo, an dek.”
22Yugirigya lagagimu, iren at yugugu dugwit, “Andi halok, hat andi sa? It lakbinini wagao ako wene wolok yugeralapim yukneran! Hat hadigat havok andi, nggarogo yugeraliga? Yukneran.”
23 #
Yesaya 40:3 yokhanes. Yugugu lagagwama, at Yohanes en, “Ap navi Yesaya en o endak iri dugwit:
‘Ap ambi harumu avakwa dekma yanggup yugirigya dugwit,
“At Nenasin Ala warup sup amorerogo yagu dogones o,”’
yagagi, endak Ala wene dirup warek ako andi, an aro,” yiluk, yugeragagi.
24At hemiduguluk lakbisa wagagwa ako andi, ap Varisi menda inimat lakbisa wagagwa. 25It lakbisa wagagwa Varisi menda akoen Yohanes yugugu dugwit, “Haren iri dugwit, ‘Avakwa enagap wendarupwak yiluk Ala en lakba warisogon andi, an dek. Ap Elia ako ogo an dek. Eke, ap Navi Ala en yugugu hegek yugeragiluk lakba warisogon yagagi ako ogo, an degat,’ yegen ovara, nggarogo yiluk avakwa ima wombabisilin naliga?”
26Yugugu lagagwama, at Yohanes en, “Dek o. An avakwa ima wombabisaliga ovara, ap ambi hit dibagetek hinigik, wambu wagagi henanggelekma agarik o. 27At ako andi, nambetaga wasogon ovara, At ap ombok atma, anen At aropato yirik ako ogo an nggolalup meyan,” yiluk, yugeragagi.
28Wene yugeragagi ako, at Yohanes avakwa ima wombabisaligama is Yorodan elavikit o Betania akoma dugwit, yugeragagi.
“Ndomba eyak Ala en lakba wagagi yi hanes,” yugeragagi wene
29Nogo yiluk, hutun Yesus ako, at Yohanes adema wagya il hagagi. Il higya lagagirik, it avakwa yugirigya dugwit, “Avakwa wen vaga yoma agarwik enomaduk degerogo bisagiluk Ndomba Eyak Ala en lakba wagagi ako wandiga yi hinil hanes. 30Ap ambi an nambetaga wasogon ako an ao endaklagatek neyagek, At endak welagagi atma, an andi horok maduk. Eke, ‘At mondok ombok aro,’ yiluk yukheraliga ako eyave yi aro. 31An ogo At dibagetek-at welagi ovara, it avakwa Iserali menda en At inilup arupwak yiluk, an ima wombabisilin wagi ako,” yiluk, yugeragagi.
32Yugirigya lagagirik, at Yohanes vagalogo yugirigya dugwit, “Ala Averiniki swa suwa ovagak mbogot vaga en wigak-wigak yagan wambu wagya lagagirik, Yesus ovaga horaik agarik nil higi. 33Anenen At dibagetek-at welagi. Dibagetek-at welagi ovara, an avakwa ima wombabisaup yiluk, lakbani wagagi Ala akoen, ‘Ala Averiniki At ambi ovaga hora yi wambu wagya dogomindik dogosogon hil hayogon ako andi, Araro. At ako andi, Ala Averiniki avakwa enovaga wombabisa warisogon ako aro,’ yuknogogi. 34Yuknogogi ako, an At nil higya lagirik, ‘Yi Ala Abut aro,’ yiluk, vagalogo yukheraliga o,” yiluk, yugeragagi.
It enendak Yesus ane wagagwa wene
35Nogo yiluk, hutun Yohanes it at ane welagwi menda mberen inim akoma welagagwa. 36Inim dugwit, Yesus lagya il higya lagagirik, “Ap yoma wai! Ndomba eyak Ala en lakba waga andi, hinil yokhanes!”
37Yugeragagi at ane welagwi menda mberen ako enaruk hunggu lagagwarik, Yesus amusek wagagwa. 38Amusek wagwi ako Yesus elose endenogo biginigu dugwit, “Hit nano belalit wagep?”
Yugirigya lagagimu, iren, “Rabi wai! Hat hamwa o nggoma agindik?” yiluk, yugogogwa. (“Rabi wai,” yugogogwa andi, nit nenane vaga, “Ngguru wai,” yiluk yugogogwa.)
39Yugugu lagagwama, Yesus en, “Bikhelaguluk, omanes,” yugeragagi. Yugirigya lagagimu, inim lagu lagagwarik, o howam-howam mo il jam 4 vage ari lagya lagagimu, At amwa inil hugu lagagwarik, inimat welagagwa.
40Ap mberen Yohanes en yugeragagi ako hobaluk, Yesus musek lagagwa ako ambi andi, inis Andereas. At Andereas ako, Simon Peterus aot akoat. 41At Andereas akoen owa Simon Peterus belalit lagya lagagimu mbikit il heyakbagya lagagirik, yugugu dugwit, “Simon wai! Mesias ako vage waga ninil higyo,” yiluk, yugogogi. (Mesias, yugogogi ako andi, nit nenane vaga Ala en denogo mondok okbagagi Keretus aro, yiluk yugogogi.)
42Yugugu lagagirik, Andereas en at Simon ako wolok Yesus adema lagya lagagimu, Yesus il higya lagagirik, at yugugu dugwit, “Yohanes abut hat Simon ovara, hinis Kepas-at yukhugu dogosogom o,” yiluk, yugogogi. (Inis Kepas it Aram enane vaga yugogogi ako andi, it ap Yunani enane vaga, “Peterus o,” yugogogi.#1:42: Inis Kepas andi, eke inis Peterus andi, nit nenane vaga andi helep modo hak yiluk, yugogogi.)
Yesus en Pilipus Nataniel iperen yanggup yugeragagi wene
43Nogo yiluk, hutun At Yesus o Galilea laup endawi wenggenggu lagagirik, lagya dugwit, ap Pilipus heyakbagya lagagirik, yugugu dugwit, “Ninim laguluk, oma,” yiluk, yugogogi.
44At Pilipus amwa andi, Andereas, Peterus iperen inim enawi ambekma o kota Mbesaida andoma-at welagagwa.
45“Ninim laguluk, oma,” Pilipus ako yugugu lagagimu, Pilipus en ap Nataniel belalit lagya lagagimu, il heyakbagya lagagirik, yugugu dugwit, “Nataniel wai! ‘At ambi warisogon o,’ yiluk, Musa en Ala wene dirup watya, eke, it ap navi-navi en ogo, dirup watwis, ogagagwa eyave ako, vage waga ninil higyo. At andi, inis Yesus, awi Nasaret menda, Yusup abut araro.”
46Yugugu lagagimu, at Nataniel en, “Avyak! Sek menda ambi o Nasaret andoma en warup atma yiluk yagaliga yi?”
Yugugu lagagimu, at Pilipus en, “Anderogo ovara, hat hil bikhanok yiluk oma.”
47Yugugu lagagimu, Yesus en ap Nataniel At adema wagya il higya lagagirik, at avok iri dugwit, “Ap yi avyarat Iserali menda, at ane mberen mondok yagaligadek yi hanes o.”
48Iri lagagimu, at Nataniel en, “Hat nggarogonggan an neyave hilup agen?”
Yugugu lagagimu, At Yesus en, “Pilipus ao yanggup yukhigitek hegek, hat o yo widis adema vage nil heyagi.”
49Yugugu lagagimu, at Nataniel en, “Ngguru wai. Ala abut avakwa Iserali Enowa Inis Ombok Harat heyagi o.”
50Yugugu lagagimu, At Yesus en, “‘Hat yo widis adema heyagi o,’ yiluk, yukhigis vaga hendawi novaga vanggabaluk, avyarat nembeten yi? Hat ogagya hegen yi andi, maduk ogagya hegen ovara, hivis andi, ombogat ogagya hayogon.” 51Yugugu lagagirik, ambi yugugu dugwit, “Hivis mbogot heyakbaluk, it Ala yonggo lakbisa wendagwi malaikat akoen An Ap-At Endaklagagis novaga wambu wagwi, mbogot vaga unggwi, ogagwi inugu dogogun o, yiluk, avyarat yukhisiga o,” yiluk, yugogogi.
