Ин 6
6
6 ГЛАВА
1 Вӹц тӹжем эдемӹм теммеш пукшымаш. 16 Иисус вӹд вӹлец кеӓ. 22 Ӹлӹмӓшӹн киндӹжӹ. 60 Иисус дорц шукы тыменьшӹжӹ карангеш.
1Иисус тӹлец вара Галилей тангыжын, Тивериадан, вес сирӹшкӹжӹ ванжен. 2Тӹдӹн церлӹ эдемвлӓлӓн ӹштӹмӹ цӱдӓвлӓжӹм йӓл ужыныт, седӹндон Тӹдӹн паштек шукы эдем кен. 3Иисус кырыкыш кузен дӓ тӹштӹ тыменьшӹвлӓжӹ доно шӹнзен. 4Иудейвлӓн Когечӹ празныкышты лишемӹн.
5Иисус анжалын, Ӹшке докыжы толшы шукы халыкым ужын, Филипплӓн келесен: «Нинӹм пукшаш мӓлӓннӓ кышты сыкырым нӓлмӹлӓ?» 6Мам ӹштӹшӓшлыкшым Тӹдӹ пӓлен. Тыменьшӹжӹм тергӓш манын веле ядын. 7Филипп Тӹдӹлӓн келесен: «Нӹнӹлӓн каждыйлан хоть изиш вӓрештшӹ манын, кокшӱдӹ динариӓш сыкырат ак ситӹ». 8Тыменьшӹвлӓжӹ логӹц иктӹжӹ, Симон-Петрӹн Андрей шоляжы, Иисуслан попен: 9«Тӹштӹ ик ӹрвезӹн вӹц шож сыкыржы дӓ кок изи колжы улы, но тинӓр халыклан тидӹжӹ манярак?» 10Иисус келесен: «Эдемвлӓлӓн шӹнзӓш шӱдӹдӓ». Тӹштӹ ныгыды шудан вӓр ылын. Вӹц тӹжем нӓрӹ пӱэргӹ тӹшкӹ шӹнзӹн. 11Тӹнӓм Иисус сыкырвлӓм нӓлӹн, Йымылан таум ӹштен, тыменьшӹвлӓлӓн пайылен пуэн, нӹнӹ шӹнзӹшӹвлӓлӓн пайылен пуэнӹт. Кол донат тенгеок ӹштен. Цилӓн, маняры шаненӹт, тӹнӓрӹм нӓлӹнӹт. 12Кынам эдемвлӓ качкын темӹнӹт, Иисус тыменьшӹвлӓжӹлӓн келесен: «Нимат ӹнжӹ ям манын, кодшы лаштыквлӓм поген нӓлдӓ». 13Нӹнӹ погенӹт дӓ вӹц шож сыкырым качшывлӓ паштек кодшы лаштыквлӓ доно луаткок корзинӹм теменӹт.
14Тӹнӓм, Иисусын ӹштӹмӹ пӓлӹкӹм ужын, халык попен: «Лачокок Тидӹ сӓндӓлӹкӹш толшашлык Пророк ылеш!» 15Эдемвлӓн толаш, Тӹдӹм роалтен кычаш дӓ кугижӓэш шӹндӓш шанымыштым пӓлен, Иисус угӹцӹн кырыкыш ӹшкетӹн кен.
16Вады лимӹкӹ, Тӹдӹн тыменьшӹвлӓжӹ тангыж тӹрӹш валенӹт 17дӓ, пышыш шӹнзӹн, тангыж вес сирӹшкӹ, Капернаумышкы, кеӓш лӓктӹнӹт. Пӹцкемӹшӓлтӹн, а Иисус нӹнӹ докы толде. 18Силан мардеж ӹфӹлен, тангыж когон коэштӓлтӹн. 19Иктӓ коклы вӹц-кымлы стади#6:19 Стади – грек йӹлмӹштӹ ик стади 185 м нӓрӹ. «Коклы вӹц-кымлы стади» вӹц-куд километр лиэш. нӓрӹ пыш доно кемӹкӹштӹ, нӹнӹ тангыж вӹлец ашкедшӹ Иисусым ужыныт, Тӹдӹ пыш докы лишемӹн. Цилӓн лӱдӹн колтенӹт. 20Но Иисус келесен: «Идӓ лӱд, тидӹ Мӹнь ылам!» 21Тӹдӹм пышышкы шӹндӹнештӹ ылын, но кышкы кенештӹ ылын, пышышты выртышток тӹ сирӹшкӹ шон.
22Вес кечӹнжӹ тангыж вес сирӹштӹ ылшы халык ужын: Тӹдӹн тыменьшӹвлӓжӹн шӹцмӹ пыш гӹц пасна тӹштӹ весӹ ылде, Иисус тыменьшӹвлӓжӹ сага шӹцде, а тыменьшӹвлӓжӹ ӹшкетӹшток кенӹт. 23Ти жепӹн вес пышвлӓ Тивериада гӹц тӹ вӓр лишкӹ толыныт, кышты эдемвлӓ Господьын тау ӹштӹмӹ киндӹжӹм качкыныт. 24А кынам эдемвлӓ тӹштӹ Иисусын, тыменьшӹвлӓжӹнӓт уке ылмыштым ужыныт, пышвлӓш шӹнзӹнӹт дӓ Капернаумыш Иисусым кӹчӓл кенӹт.
25Тӹдӹм тангыж вес сирӹштӹ момыкы, нӹнӹ ядыныт: «Равви, Тӹнь кынам тишкӹ толынат?» 26Иисус нӹнӹлӓн келесен: «Лачок, лачок тӓлӓндӓ попем: тӓ пӓлӹквлӓм ужмы верц агыл, а сыкырым теммеш качмыда велдӹк Мӹньӹм кӹчӓлӹдӓ. 27Пӹтӹшӓшлык качкыш верц агыл, а курымашлык ӹлӹмӓшӹш кандышы шӱн пӹтӹдӹмӹ качкыш верц пӓшӓлӹдӓ. Тӹдӹм тӓлӓндӓ Эдем Эргӹ пуа, вет Тӹдӹ вӹлӓн Йымы Ӓтя ӹшке пецӓтшӹм шӹнден». 28Нӹнӹ ядыныт: «Йымын пӓшӓжӹм ӹштӓш манын, мам ӹштӹшӓшлык ылына?» 29Иисус вӓшештен: «Йымын пӓшӓжӹ теве: кӱм Тӹдӹ колтен, Тӹдӹлӓн ӹнянӹдӓ».
30Нӹнӹ ядыныт: «Мӓлӓннӓ ужаш дӓ Тӹньӹн шамакетлӓн ӹнянӓш манын, махань пӓлӹкӹм анжыктет? Тӹнь мам ӹштет? 31Мӓмнӓн ӓтявлӓнӓ пустыньышты манным качкыныт. Сирӹмӹ: ”Нӹнӹлӓн качкаш пӹлгом гӹц Тӹдӹ киндӹм пуэн”».#6:31 Пс 77:24, 104:40. 32Иисус вӓшештен: «Лачок, лачок тӓлӓндӓ попем: Моисей агыл тӓлӓндӓ пӹлгом гӹц киндӹм пуэн, Мӹньӹн Ӓтям пӹлгом гӹц лачокшы киндӹм тӓлӓндӓ пуа. 33Пӹлгом гӹц Валышы дӓ сӓндӓлӹклӓн ӹлӹмӓшӹм Пушы – тидӹ Йымын киндӹ».
34Тӹдӹлӓн келесенӹт: «Господь! Техень киндӹм мӓлӓннӓ со пуэн шалгы!» 35Иисус нӹнӹлӓн попен: «Мӹнь ӹлӹмӓшӹн киндӹжӹ ылам. Мӹнь докем толшы эдем ак шужы, Мӹлӓнем ӹнянӹшӹн нигынамат йӱмӹжӹ ак шо. 36А тӓ Мӹньӹм ужында дӓ ада ӹнянӹ манын, Мӹнь тӓлӓндӓ попенӓм. 37Кӱм Мӹлӓм Ӓтям пуа, Мӹнь докем толеш, дӓ Мӹнь докем толшым ӧрдӹшкӹ поктен ам колты, 38вет Мӹнь ӹшке шанымем агыл, а Мӹньӹм колтышы Ӓтян шанымыжым шокташ пӹлгом гӹц толынам. 39Мӹньӹм колтышы Ӓтян шанымашыжы техеньӹ: кӱм Тӹдӹ Мӹлӓм пуэн, нӹнӹ логӹц иктӹмӓт ямдаш агыл, а остатка кечӹн цилӓм ӹлӹжтӓш. 40Мӹньӹм Колтышын шанымашыжы техень: Эргӹм ужшы дӓ Тӹдӹлӓн ӹнянӹшӹ каждый эдем курымаш ӹлӹмӓшӓн лижӹ. Остатка кечӹн Мӹнь#6:40 Тиштӹ «Мӹнь» шамакым Эргӹ манын ынгылымыла. тӹдӹм ӹлӹжтем».
41«Мӹнь пӹлгом гӹц валышы киндӹ ылам» манмыжылан иудейвлӓ Тӹдӹ ваштареш ӧпкӓлен попаш тӹнгӓлӹнӹт. 42Нӹнӹ попенӹт: «Тидӹжӹ Иосифӹн Иисус эргӹжӹ агыл ма? Мӓ Тӹдӹн ӓтяжӹмӓт, Ӓвӓжӹмӓт пӓленӓ. ”Мӹнь пӹлгом гӹц валенӓм” манын, кыце Тӹдӹ попа?» 43Нӹнӹлӓн Иисус келесен: «Ӹшке лоштыда ӧпкӓлен идӓ попы. 44Мӹньӹм колтышы Ӓтя ӱжӹн ак канды гӹнь, Мӹнь докем иктӓт толын ак керд. Остатка кечӹн Мӹнь тӹдӹм ӹлӹжтем. 45Пророквлӓн книгӓштӹ сирӹмӹ: ”Нӹнӹм цилӓштӹм Йымы тымда”.#6:45 Ис 54:13. Кӱ Ӓтям колеш дӓ Тӹдӹ гӹц тыменеш, тӹдӹ Мӹнь докем толеш. 46Тенге гӹнят Ӓтям иктӓт ужде. Кӱ Йымы дорц толын, Тӹдӹ веле Ӓтям ужын. 47Лачок, лачок тӓлӓндӓ попем: кӱ Мӹлӓнем ӹнянӓ, тӹдӹн курымашлык ӹлӹмӓшӹжӹ улы. 48Мӹнь ӹлӹмӓшӹн киндӹжӹ ылам. 49Тӓмдӓн ӓтявлӓдӓ пустыньышты манным качкыныт, но коленӹт. 50А пӹлгом гӹц валышы киндӹ техень: кӱ тӹдӹм качкеш, ак колы. 51Мӹнь пӹлгом гӹц валышы ӹлӹшӹ киндӹ ылам. Кӱ ти киндӹм качкеш, курым-курымок ӹлӓ. Мӹньӹн пушашлык киндем – Мӹньӹн Кӓпем, Мӹнь тӹдӹм сӓндӓлӹкӹн ӹлӹмӓшӹжӹ верц пуэм».
52Тӹнӓм иудейвлӓ лошты кӹрмӓшӹмӓш тӹнгӓлӹн, нӹнӹ попенӹт: «Кыце ти Эдем ӹшке Кӓпшӹм мӓлӓннӓ качкаш пуэн кердеш?» 53Иисус нӹнӹлӓн келесен: «Лачок, лачок тӓлӓндӓ попем: Эдем Эргӹн Кӓпшӹм ада кач дӓ Вӹржӹм ада йӱ гӹнь, тӓмдӓн ӹлӹмӓшдӓ ак ли. 54Кӱ Мӹньӹн Кӓпем качкеш дӓ Вӹрем йӱэш, тӹдӹн курымашлык ӹлӹмӓшӹжӹ улы, дӓ остатка кечӹн Мӹнь тӹдӹм ӹлӹжтем. 55Мӹньӹн Кӓпем – лачок качкыш, Мӹньӹн Вӹрем – лачок йӱш. 56Мӹньӹн Кӓпем качшы дӓ Вӹрем йӱшӹ Мӹнь донем ушнен шалга, а Мӹнь тӹдӹн доно ушнен шалгем. 57Ӹлӹшӹ Ӓтя Мӹньӹм колтен дӓ Мӹнь Ӓтя доно ӹлем, тенгеок Мӹньӹм качшат Мӹнь донем ӹлӓш тӹнгӓлеш. 58Пӹлгом гӹц валышы киндӹжӹ тидӹ ылеш. Тӹдӹ ӓтявлӓдӓн качмы маннышты гань агыл. Нӹнӹ коленӹт, а кӱ ти киндӹм качкеш, тӹдӹ курымок ӹлӓш тӹнгӓлеш».
59Тидӹм Иисус Капернаумыштышы синагогышты тымдымыжы годым попен.
60Тидӹм колын, Тӹдӹн тыменьшӹвлӓжӹ логӹц шукынжы попенӹт: «Махань цӹтӓш лидӹмӹ шамаквлӓ! Кӱ тидӹм колышт кердеш?» 61Техень шаяжылан тыменьшӹвлӓжӹн ӧпкӓлӹмӹштӹм пӓлен, Иисус нӹнӹлӓн келесен: «Тӓ тидӹлӓн ма алталалтыда? 62Молнам ылмы вӓрӹшкӹжӹ Эдем Эргӹн кузымыжым ужыда гӹнь, ма лиэш? 63Ӹлӹмӓшӹм ӹштӹшӹ – тидӹ Йымын Шӱлӹш, эдемӹн кӓп-шӱмжӹ нимахань пайдам ак канды. Тӓлӓндӓ попымы Мӹньӹн шамакем – тидӹ Шӱлӹш дӓ ӹлӹмӓш. 64Но тӓ лоштыда кыды-тидӹжӹ ак ӹнянӹ». Вет кӱвлӓ ак ӹнянеп дӓ кӱ Тӹдӹм выжала, Иисус тӹнгӓлтӹш гӹцок пӓлен. 65Дӓ Тӹдӹ келесен: «Седӹндон Мӹнь тӓлӓндӓ попенӓм: Ӓтям гӹц ак пуалт гӹнь, иктӓт Мӹнь докем толын ак керд».
66Тӹлец вара тыменьшӹвлӓжӹ логӹц шукынжы Тӹдӹн дорц карангыныт дӓ Тӹдӹн доно иквӓреш ӹнде каштделыт. 67Тӹнӓм Иисус луаткок тыменьшӹжӹ гӹц ядын: «Тӓӓт карангаш ада шаны?» 68Симон-Петр вӓшештен: «Господь, кӱн докы мӓлӓннӓ кемӹлӓ? Курымашлык ӹлӹмӓшӹн шамакшы Тӹньӹн улы. 69Мӓ ӹняненӓ дӓ пӓленӓ: Тӹнь Христос, ӹлӹшӹ Йымын Эргӹжӹ ылат».
70Иисус нӹнӹлӓн келесен: «Мӹнь Ӹшке агыл ма тӓмдӓм луаткоктым айырен нӓлӹнӓм? Но тӓ лоштыда иктӹжӹ диавол!» 71Тидӹм Тӹдӹ Искариот манмы Симонын Иуда эргӹжӹ гишӓн попен. Иуда, луаткок тыменьшӹжӹ гӹц иктӹжӹ, вара Иисусым выжалышы лишӓшлык ылын.
Библим сӓрӹшӹ институт, Хельсинки 2014