Yaheiya 3
3
Ersa Nigedemu Ghuala
1Falisaini nie kunyi niereni Nigedemu giene. Yutai kunlani nie lindao wo. 2Ene kun xienidei Ersai ochirale ire hhende kieliewo, "Labi, chi Hudai hhense iresan loushi bikui bijien mejiene. Huda chighala hhantu wise chi giesan ghudureqini kiemada gie dane." 3Ersa hhende kieliewo, "Bi chade shuhuajia kielieye, kunyi erchan#3:3 jierese ulie oluse Hudai gojiai chanla dane." 4Nigedemu kieliewo, "Kun fugiedadene pse matugie olune? Anane kielide orosenu pse olunu?" 5Ersa kieliewo, "Bi chade shuhuajia kielieye, kunyi usu, Shenlinse ulie oluse Hudai gojiade oro dane. 6Beyese olusanshi beye wo, ruhherse olusanshi ruhher wo. 7Bi kieliese ta erchan olukuni wo giese ta bu ghudure. 8Kei suibien feiliekui ta sonosu shidanema, khalase iresanyi, khala echikui ulie mejiene. Ruhherse olusan kun keighala niekielien wo."
9 Nigedemu asazho. "Matugie imutu shiqin wine?"
10 Ersa kieliewo, "Chishi Isilieni fugie loushi wo. Ene shiqinyi ulie mejienu? 11Bi shuhuajia kielieye, bijien mejiesanne tande kieliezho, chujieghesanne ganzhen beizhoma, ta bijienyi kielienyi xianxin ulie giene. 12Bi zemin jieredu shiqinyi kieliese ta xianxin ulie giene, asiman jieredu shiqinyi kieliese matugie xianxin giene? 13Asiman jierese bouzhesan Kunnikewonse chugo kiemada asiman jiere khizhi ese daozho. 14Musa hontande mogheini qila qiighaku mutun Kunnikewonniye qingiezhi qila qiighane. 15Ingiese jien hhei xianxin giesan kunlade chanqiku amin ogine giezho. 16Huda duyani kunlade olon orezhi lien niekozi kewonneliuzhe ogiwo. Ingiese jien hhei xianxin giesan kunlai ulie widaghazhi chanqiku amin ogine giezho. 17Hhe kewonne peizhi duyade ireghase zui jinjile ese irezho, kunlai jiuighale irezho. 18Hhei xianxin giesan kunlade zui ulie jinjine. Xianxin ulie giesan kunlade zui ijin jinjiwo. Hhela Hudai niekozi kewonni xianxin ese giezho. 19Hhela giesan doghunnishi gon duyade irese gonde xiqi uwo, kharanide xiqi wo. Hhelai zuini jiu ingiezhi soughawo. 20Doghunni giesanla gonni henjine, gon shida ulie irene. Giesanlaini khizheghakuse ayizho. 21Zhendaode giesan kunla gon shida irene. Hudai isighala giesan shiqinlai man mejieghane giezho."
Yaheiya Ersani Kuaizho
22Enense khuinashi Ersa tujilarene Yudayani oronde echidene nietan souzhi kunlai xili gieghazho. 23Salenni kouisan Ainende usu olonshi Yaheiyaye hhende xili gieghazho. Kunla hhende xili gieghakui jienliele irezho. 24Hhe shihoude Yaheiyani da bafanzide bareizhi ese echizho. 25Yaheiyai tujila nie Yutai kunghala waghaku banfa jiere jianjindu qiiwo. 26Hhela Yaheiya shida iredene kieliewo, "Loushi, melieshida Yedanhe hhemiende chighala hhantulasan hhe kun ede kunlade xili gieghazho. Chi hhende ganzhen beizho. Kunla man hhei shida echizho." 27Yaheiya kieliewo, "Huda ulie ogise kun yama jienlie dane. 28Bishi Mexiha pusho. Mii hhense melie peizhi ireghawo giezhi bi kieliezhi daosei ta mejiene. 29Shini bierei agikushi shini khughon wo. Peikieni hhei kanzide beizhi shenqiini nie sonosuse hende bayasune. Biye qingiezhi hende bayasuzho. 30Hhe hendakuni wo, bi bixindakuni wo."
Asiman Jierese Iresan
31"Jierese iresan hhe yanseliuzhe fugie wo. Zemin jierese iresanshi zemin jieredu wo. Kieliesan kielienla yeshi zemin jieredu wo. Asiman jierese iresan hheshi yanseliuzhe fugie wo. 32Hhe chujieghesanne, chenliesanne ganzhen beizhoma, hhei ganzhenyi kiema ulie jienliene. 33Hhei ganzhenyi xianxin giesan kunla Hudashi zhenni enbene giezho. 34Huda peizhi ireghasan hhe Hudai kielienyi kieliene. Huda hhende Shenlinni shuzi witui ogizho. 35Adani kewondene orezhi man hhei khade jiuiwo. 36Kewonyini xianxin giesan kunde chanqiku amin wine. Hhei ulie shunjichen kunde amin uwo. Hudai hokuku chan hhei jiere wo."
© 2020-2024 River Street Publishing.