Yaheiya 5
5
38 Nien Olusan Gientui Goudaghazho
1Enense khuinashi Yutai kunyi nie jieqi kuzhewo. Ersa Yelusalende khizhi echiwo. 2Yelusalenyi Ghoni wijien shida nie bula wine. Xibolai kielienghala kieliese Bishida giene. Bula zhouwide tawun zoulan wine. 3Zoulande giemeresan kun olon kijiezho. Sugho, dogholon, beye fugusan kun olon wo. 5Hhende nie kun giemerezhi 38 nien olune. 6Ersa hhe kijiesei chujieghewo. Oloncha giemeresei mejiesenu asawo, "Chi gienne goudaghaku duran winu?" 7Giemeresan kun kieliewo, "Gujiu, usu gojiolukudei mii usude boughachen kun uwo. Bi goya boukudei kunla mase melieshida qianla boune." 8Ingiese Ersa kieliewo, "Bosizhedene ruzine agidei echi." 9Hhe kun deigo gouda ruzine agisenu yozhi echiwo.
Hhe nie udushi hhamuraku udu wo. 10Ingiese Yutai kunla hhe goudasan kunde kieliewo, "Enedushi hhamuraku udu wo. Chi ruzii bareizhi yose ese oluzho." 11Hhe kun kieliewo, "Mii goudaghasan kun ruzine bareizhi yo giezhi made kieliewo." 12Hhela asazho, "Chade ruzine agidene yo giesanshi kien wine?" 13Goudasan kun kien hhei goudaghasei ulie mejiene. Hhende kun olonshi Ersa niui widazho. 14Khuinashi Ersa mechide hhe kunyi chujieghedene kieliewo, "Chi ede goudawoma, pse zui bu fanji. Pse enense yenzhunshine." 15Hhe kun echidene Yutai kunlade kieliewo, "Mii goudaghasanshi Ersa wo."
16Ingiese Yutai kunla Ersa chan hhamuraku udude enezighan shiqinlai giese hhei heizhi qiiwo. 17Ersa hhelade kieliewo, "Adami izhi eli kutula wilie giezho, biye giezho." 18Ingiese Yutai kunla hhei alane giezhi hendawo. Hhe hhamuraku udui guijinyi ese zunjizho, da Hudashi goyai Ada wo giezho. Pse goyane Hudaghala pin wo giezho.
Hudai Kewonni Qienli
19 Ersa hhelade kieliewo, "Bi tande shuhuajia kielieye. Kewon goyane kouizhi yama gie dane. Zinie Ada giesanyi uzhedene giezho. Ada giesan wilielai Kewon ye giene. 20Ada Kewondene orezhi goya giesanlane hhende man uzheghazho. Da enense fugie shiqinlai hhende uzheghane. Ingiese tai ghaniraghane. 21Ada fugusan kunlai bosi ireghazhi amin ogiku mutun Kewonniye goya duranghalane kunlade amin ogine. 22Ada yan kunyiliuzhe ulie panjinema, panjiku qienlini Kewondene jiuizhi ogiwo. 23Ingiese kunla Adai zunjiku mutun Kewonne zunjighane giezho. Kewonni ulie zunjise hhei peizhi ireghasan Adainiye uye zunjizho. 24Bi tande shuhuajia kielieye, kien mii kielienyi chenliezhi mii peizhi ireghasan hhei xianxin giese chanqiku amin wine. Zui ulie soughane, fugukuse amitude ijin ireghawo."
25"Bi tande shuhuajia kielieye, shihou kuzhese fugusan kunla Kunnikewonni shenqii sonosune. Sonosusan kunla aminne olune. Ede hhe shihou enbene. 26Ada benshenshi aminni genzi wo. Kewonneye aminni genzi gholughawo. 27Hheshi Kunnikewon wo. Ingiese Ada hhende kunlai panjiku qienlii ogiwo. 28Ta ene shiqinde bu ghanira, shihou kuzhese mezai kunla man Kewonni shenqii sonosuse, 29fuho giedene khizhene. Gouni giesanla chanqi amiturane, huaishi giesanlade zui jinjine."
Ersade Ganzhen Beizho
30"Bi goyane kouizhi yama gie dane. Bi matui sonosuse matui panjine. Bi panjisanshi gundanni wo. Bi panjise goya isighalane ese giezho. Mii peizhi ireghasan hhei isighala giezho."
31"Bi goyadene ganzhen beise zoin ulie qiine. 32Da niekozi made ganzhen beizho. Hhe beisanshi zhenni bikui bi mejiene. 33Ta melieshidase Yaheiyai hhende kun peizhi echighase Yaheiya zhendaode ganzhen beizho. 34Bi kunse ganzhen ulie kerenema, bi ene kielienyi kieliekushi tai jiuine giezho. 35Yaheiyashi siderazhi gon faisan zhula niekielien wo. Ta zhanshi jiere hhei gonde xiqi woma, 36made Yaheiyase da fugie ganzhen wine. Hheshi Adami mii onchengie giesan wilie wo. Ede bi giesan wilie enbene. Ene wiliela Adami mii peizhi ireghasande ganzhen beizho. 37Pse mii peizhi ireghasan Adami made ganzhen beizho. Ta hhei shenqiini chenliezhi uye daozho. Yanziini ye uzhezhi uye daozho. 38Ada peizhi ireghasei ta xianxin ese giezho, ingiese hhei kielienyi ta zhughedene ese teizho."
39"Ta sumulase jinwunyi uzhezhi suruse hhe jierese chanqiku aminyi ereine giezhoma, jinwun zhen made ganzhen beizho. 40Ingieliuzhe ta aminni mii enense ereile ulie irene."
41"Kun mii kuaikui bi ulie jienliene. 42Bi tai mejiene. Tande Hudade oreku zhughe uwo. 43Bi Adane niereghala irese ta ulie jienliene. Kunla goya niereghalane irese ta jienliene. 44Ta nieniene kuaikui jienlienduzhoma, niekozi Hudase iresan kuaikui ulie ereine. Ingiese ta mii matui xianxin giene? 45Bi Adai melie tai zhane giezhi bu sumula. Tai zhakui da nie wine. Ta kouizhi xianxin giesan Musa tai zhane. 46Ta Musai xianxin giese miiye xianxin giekui wo. Hhe huaisanshi mii zhiizhi kieliezho. 47Hhe huaisanyi ta xianxin ulie giese mii kielienyi matugie xianxin giene?"
© 2020-2024 River Street Publishing.