PEMUYAN 7
7
Dau tiraʹ Stepanus
1Un dau Pengebioʹ Detaʹu kuma: “Lan pekina tupe?” 2Kun Stipanus mipa ia: “Ahaʹ pui, ngan cenganak cenganak keʹ mung, tiga hem ngeringa dau heʹ. Ban Allah iaʹ un serema peniga lepa nai luhaʹ palaʹ tepun le Ibrahim dalau ue caʹ un kaʹ tanaʹ Mesuputami, kena ha ke tai paso kaʹ tanaʹ Haran cen naʹaʹ te are. 3Kun dau Allah pisiu Ibrahim: ‘Tai ne ikoʹ, mecin cen tanaʹ koʹ ne, ngan mecin diaʹ pemanak koʹ. Tai palaʹ ca tanaʹ iaʹ akeʹ ke nujoʹ mikoʹ.’ 4Penco ketai ie puke cen tanaʹ Kasdim, ngelineʹ kaʹ tanaʹ Haran. Uʹo ina pelaʹa amai Ibrahim matai, kun Allah paso Ibrahim cen ina kaʹ tanaʹ ini, iaʹ ukoʹ kem dini mudip naʹkini ne. 5Abeʹ Allah naʹ tulat tanaʹ me Ibrahim: dadoʹ ca lalat taket pe abeʹ un. Un sepuʹo Allah petuket ke naʹ tanaʹ ini mia. Un Ibrahim ne, ia ke un tanaʹ ini, pekina pe diaʹ mela ha naʹ pe ia abeʹ un anak lepe. 6Kun Allah pisiu ia pekini dau ue: ‘Un diaʹ mela hoʹ ke mudip kaʹ tanaʹ diaʹ bulen. Kaʹ ina re ketai ulaʹ ngan ke sihoʹ udip keta pa pat ato uman majan ne ʹo.’ 7Kun Allah pisiu ngan Ibrahim laʹa: ‘Akeʹ iaʹ ke ngukum lepoʹ iaʹ uyan ida ulaʹ. Uʹo ina pelaʹa, kenai re kawang cen tanaʹ ina, sulo re ke lemameʹ palaʹ akeʹ kukoʹ ini pelaʹa ʹo.’ 8Penco Allah cuk Ibrahim ngkang adet sunat, ca tedanaʹ iaʹ petawai tuket isiu ue. Moʹ pekina, dalau Isak nai musang, Ibrahim penco nyunat ia neng aya tau ue. Pekina pe Isak nyunat anak ke Yakup, pekina pe Yakup nyunat diaʹ puloʹ dua usa anak laki ie pe, iaʹ ina tepun le cen naʹaʹ.
9“Un tepun le are, miʹi re neng Yusup. Ida matu ue, ketai ie ulaʹ kaʹ lepoʹ Masir. Naʹ pe ia pekina, Allah iaʹ un ngan ne, ina ukoʹ o lebau neng mung penaru ue. 10Dalau Yusup tai nyeripa Piraun, laja tanaʹ Masir, Allah iaʹ naʹ mia peniga ngan tudi neng penisen. Kun Laja Piraun ne uyan Yusup tai paren bioʹ. Yusup ne iaʹ ngkang mung tanaʹ Masir, peging ngan mung inu kaʹ dalem amin laja ne. 11Nai kun ca lien bioʹ pa libut tanaʹ Masir ngan tanaʹ Kanaan, ca taru lien bioʹ. Un tepun le, abeʹ de senteng ke mita penguman. 12Kun Yakup kenahan ban un padai kaʹ Masir, kun ne cuk anak ke, diaʹ tepun le, tai nyahaʹ kidi te. 13Neng kedua liwai ketai re nyahaʹ, penco Yusup badaʹ ngadan ne palaʹ diaʹ cenganak ke ne. Ina le Piraun tai tisen uban cenganak Yusup ban dina. 14Kun Yusup naʹ katu tiraʹ palaʹ Yakup amai ie, mengin ia kaʹ Masir, peging ngan mung nte neng pemanak de, tujoʹ puloʹ lema usa kadoʹ de. 15Nai kun Yakup kaʹ Masir nuʹo. Kina ne ia matai nuʹo, pekina lete mung tepun tepun le dina. 16Laʹa un tulang nte dulu ngkin kaʹ tanaʹ Sikim, ngan masek ida dalem liang iaʹ lepa Ibrahim ban lemeli man ligit pirak neng lepoʹ Himur kaʹ tanaʹ Sikim.”
17Sulo dau Stipanus pelaʹa: “Dalau ketai nyeng tuket Allah ke sihoʹ, iaʹ ia lepa petuket me Ibrahim cen kena, un lepoʹ le dina nai un pit kadoʹ de kaʹ tanaʹ Masir. 18Pabeʹ neng dalau laja diaʹ ca iaʹ are un tisen Yusup nai ngkang lepoʹ Masir. 19Kun laja ina panyi lepoʹ le, ngan peketa tepun le, pa re lemejen cuk ida pet ngan lematai anak de. 20Dalau ina, kenai Musa pempet ngan tiga laleʹ seʹ puyan usa ha. Telu bulan majan ne ia dalem amin amai ie. 21Dalau re naʹ ia tahaʹ awang, un anak leto Piraun alaʹ ia, ngan mamung ia koʹ baʹan anak usa ha lan are. 22Kun dulu pekatuk Musa neng ketoʹ tudi ngan penisen lepoʹ Masir, pa dulu mejung ia ca kelunan bioʹ, moʹ o mencam laleʹ petiraʹ, ngan mencam pekimet gayeng.
23“Lepa pat puloʹ uman udip Musa, un tekaʹ a pekimet ubaʹ ke tai naʹat diaʹ cenganak ke diaʹ kuaʹ lepoʹ Israil ngan ne. 24Kun ne taʹan ca usa Masir nyakit ca usa Israil, penco ho mepo laki iaʹ ia nyakit ina, ti laki Masir ina pa ha matai. 25Un tekaʹ kimet Musa kuma ha, apan tai te cenganak keʹ dina ke tisen ban akeʹ iaʹ Allah ke kanan, man ke sau ida neng udip iaʹ taru, ke paso ida palaʹ udip iaʹ pejo. Un sepuʹo abeʹ de tai tisen ia ʹo. 26Tegoʹ neng kenempam me laʹa, kun Musa petegoʹ ngan dua usa Israil pekenca. Kun ne mulen ida dua pekenca, ten ke uyan tiga saheʹ mida, kun dau ue: ‘Ahaʹ cenganak, pecenganak kem dua. Inu adeʹ kem pesakit tupe?’ 27Un ca mida dua diaʹ pekenca dina, kun ne nyakat Musa, un dau ue: ‘Aheʹ iaʹ uyan ikoʹ paren ngan tuʹa iaʹ pebetep tiraʹ neng ahang ameʹ tupe? 28Seʹ koʹ ubaʹ ke lematai akeʹ, koʹ baʹan ncoʹ lematai kelunan Masir iaʹ nyahap de are tupe?’ 29Moʹ kuʹun isiu ina, ina tuman Musa tai kelap, penco tai ie mudip kaʹ tanaʹ Midian. Kaʹ ina ha un dua re anak laki.
30“Sukung ne pat puloʹ uman majan Musa kina te, kun ne taʹan ca usa melikat kata ia dalau aʹang luten neng kayu jue, kaʹ tanaʹ lenga nyeng kaʹ Mudung Sinai te. 31Kun Musa taʹan puyan ina, salam tekaʹ a taʹan ne. Sulo ketai ie ngenyeng aʹang luten kaʹ kayu jue ina, moʹ o ubaʹ ke ngetisen ne. Belekaʹ a kenahan dau Tuhan pisiu: 32‘Akeʹ ini iaʹ Allah tepun ncem, iaʹ ina Allah iaʹ anun Ibrahim, ngan Allah iaʹ anun Isak, ngan Allah iaʹ anun Yakup.’ Un tekaʹ Musa takut laleʹ kaʹ a, ngan ngeregen tekaʹ a, pa ha abeʹ un makang ke naʹat te. 33Un dau Tuhan pisiu ia: ‘Sau ne sepatu hoʹ ne, moʹ kukoʹ koʹ nekejeng ina, tanaʹ iaʹ buheʹ. 34Lepa ne akeʹ taʹan diseʹ lepoʹ keʹ tuyen ngan keta kaʹ tanaʹ Masir ne. Akeʹ kenahan ne dau kerahing nte. Ina ukoʹ keʹ nai kentaʹ, moʹ keʹ ubaʹ ke paso ida. Naʹkini, tai ne ikoʹ kaʹ tanaʹ Masir te.’ Pekina dau Tuhan neng Musa.”
35Sulo dau Stipanus laʹa: “Lepoʹ Israil diaʹ nyekang Musa are. Pekini dau re neng ia are: ‘Aheʹ iaʹ uyan ikoʹ paren ngan tuʹa pebetep tiraʹ neng ameʹ tupe?’ Idi Musa ne lete iaʹ Allah cuk ke paren ngan tuʹa re, ngan laki keniga udip de, moʹ melikat ina pisiu ia dalau aʹang luten kaʹ kayu jue ina are. 36Musa ina lete iaʹ ban ngkin ida nai kawang cen tanaʹ Masir. Ngan kadoʹ puyan nyingan ngan tedanaʹ bulen kaʹ tanaʹ Masir Musa uyan, pekina pe kaʹ Banget Bala, ngan kaʹ tanaʹ lenga pe pat puloʹ uman majan ne. 37Musa ina lete iaʹ badaʹ me lepoʹ Israil ne kuma ha: ‘Allah ke cuk ca pegawa nai palaʹ ikem, koʹ baʹan Allah cuk akeʹ nai pala ikem are. Cen ahang ikem panak kenai ie ʹo.’ 38Musa ne lete iaʹ ban pemung ngan lepoʹ Israil dalau re pempun kaʹ tanaʹ lenga. Musa pe iaʹ ban pemung ngan tepun le, ngan melikat iaʹ pisiu musa neng usun Mudung Sinai. Musa pe iaʹ alaʹ tiraʹ katuk udip cen Allah, apan katuk udip ini ketai pabeʹ palaʹ ilu naʹkini.
39“Un sepuʹo, tepun le abeʹ de ubaʹ bayaʹ Musa, bang nyekang ia ne ida, mentung tekaʹ kimet de ketai kaʹ tanaʹ Masir laʹa. 40Un dau re pisiu neng Harun: ‘Uyan ne ca tepatung mameʹ, iaʹ ke mampin ameʹ, moʹ un Musa iaʹ ban ngkin ameʹ nai kawang cen Masir are, abeʹ meʹ tisen kumpin puyan ne ʹo taʹin.’ 41Dalau ina re uyan ca tepatung anak sapi, penco re mencai liwa re palaʹ tepatung sapi ina nuʹo. Bangen seʹ de pemung uman, ban kuʹun puyan ujoʹ de tengen. 42Ina ukoʹ Allah nyelikut ida. Allah pedayo ida lemameʹ palaʹ betuʹen kaʹ langit, koʹ baʹan dau iaʹ ban un dalem Kitap Pegawa ne iaʹ pekini dau ue:
‘E lepoʹ Israil, kun dau Allah:
Abeʹ e palaʹ akeʹ kenai tebek pun ncem ne,
ngan pencai liwa hem ne, dalau pat puloʹ uman
majan ncem un kaʹ tanaʹ lenga are.
43Lepau bali Muluk iaʹ ikem tekalang ngkin ina are.
Ngan Repan uyat betuʹen, bali hem ina.
Palaʹ tepatung iaʹ ikem uyan, kina ketai mung dau temameʹ kem are.
Ina ukoʹ keʹ ke paso ikem ketai tahaʹ coʹ kaʹ
lepoʹ Babil ʹo.’ Pekina dau Allah.”
44Sulo dau Stipanus laʹa: “Moʹ un tepun le diaʹ kaʹ tanaʹ lenga te are, ida mampin Lepau iaʹ badaʹ tugen ban Allah un ngan nte. Lepau ina nuyan bayaʹ dau Allah badaʹ a me Musa, moʹ o uyan koʹ baʹan kata iaʹ ia lepa taʹan ina. 45Majan uʹo ina pelaʹa, un tepun le, pencun ne ida mampin lepau ina neng singket sun udip de. Kun nte ngkin lepau ina serengan ngan Yusua dalau re tai pesupeʹ lepoʹ dulu diaʹ ca, diaʹ Allah muyung tahaʹ tena tepun le dina. Pa abeʹ dalau udip Daut ida mampin lepau ina. 46Daut iaʹ ban sihoʹ pengelesau Allah. Daut nyat apan ne senteng ke uyan ca amin me Allah iaʹ anun Yakup. 47Un Suliman, anak Daut ne, ia iaʹ medeng ca amin me Allah nuʹo.
48“Un Allah iaʹ Atek Mpau ina, abeʹ pe ia ngelineʹ neng amin iaʹ ban nuyan man ujoʹ kelunan. Koʹ baʹan tiraʹ pegawa iaʹ pekini dau ue:
49‘Surga ina kukoʹ ladung pengaren nceʹ, kun dau Tuhan.
Ngan usun tanaʹ ina lete nten taket ceʹ.
Kumpin diseʹ amin iaʹ ikem ubaʹ ke medeng makeʹ tupe?
Kempi kukoʹ kelineʹ keʹ baʹan ncem tupe?
50Mabeʹ e mung puyan ini nuyan kuʹun nceʹ tengen?’ Pekina dau Tuhan.”
51Sulo dau Stipanus laʹa: “Ahaʹ sematu mahing penawai hem ngan mahing kimet cem, pekuaʹ dulu diaʹ are ngelan, ngan telinga hem dengen neng tiraʹ Allah. Koʹ baʹan tepun ncem are, pekina lete ikem pe. Lemuto hem nyekang Berua Buheʹ. 52Pegawa iaʹ mpi iaʹ are sihoʹ tuyen kuʹu tepun ncem tupe? Tepun ncem lete iaʹ lematei diaʹ lawa Allah iaʹ nekena badaʹ neng puyan kenai Ulaʹ a iaʹ teneng ina. Naʹkini lepa ne ikem muau neng Laki ina, ngan lematai ia. 53Ikem te iaʹ ban lepa alaʹ Katuk Adet Allah iaʹ melikat lepa badaʹ idai. Belekaʹ ikem lete ban muau kidi puʹo.”
Dulu lemulo Stipanus
54Dalau Mpun diaʹ Lataʹ dina kenahan dau Stipanus pekina dau, buseʹ laleʹ ne tekaʹ de ngan ngetaret dau jipen nte miʹa ia. 55Un Stipanus iaʹ sangan kuʹun Berua Buheʹ, nekadaʹ a kaʹ langit, sulo ho taʹan serema peniga Allah; un pe Yesus nekejeng tahaʹ taʹu Allah. 56“Naʹat,” kun dau Stipanus. “Ini heʹ taʹan langit pesik, ngan Anak Sio nekejeng tahaʹ taʹu Allah.”
57Toʹ diaʹ lataʹ dina ngelengap ngan bioʹ dau re, mentung nte mepen telinga re. Tegoʹ ina re serengan nyudup Stipanus. 58Sulo re pet ia kaʹ awang lepoʹ, mentung nte lemulo ia. Mung diaʹ ban badaʹ tugen are, ida mahung sapai re ngan ca laki iaʹ iʹut udip, ngadan ne Saul. 59Penco re lemulo Stipanus. Mentung Stipanus ngelengap, kun dau ue: “Ahaʹ Tuhan Yesus, alaʹ ne berua heʹ.” 60Kun ne sutlep, mentung nge pisiu ngan bioʹ dau ue: “Ahaʹ Tuhan, ayen ncoʹ nawai penyalaʹ ini un neng usun ida.” Lepa ha pisiu pekina, penco matai ne ia.
Kenyah New Testament © Bible Society of Malaysia, 1984.
PEMUYAN 7
7
Dau tiraʹ Stepanus
1Un dau Pengebioʹ Detaʹu kuma: “Lan pekina tupe?” 2Kun Stipanus mipa ia: “Ahaʹ pui, ngan cenganak cenganak keʹ mung, tiga hem ngeringa dau heʹ. Ban Allah iaʹ un serema peniga lepa nai luhaʹ palaʹ tepun le Ibrahim dalau ue caʹ un kaʹ tanaʹ Mesuputami, kena ha ke tai paso kaʹ tanaʹ Haran cen naʹaʹ te are. 3Kun dau Allah pisiu Ibrahim: ‘Tai ne ikoʹ, mecin cen tanaʹ koʹ ne, ngan mecin diaʹ pemanak koʹ. Tai palaʹ ca tanaʹ iaʹ akeʹ ke nujoʹ mikoʹ.’ 4Penco ketai ie puke cen tanaʹ Kasdim, ngelineʹ kaʹ tanaʹ Haran. Uʹo ina pelaʹa amai Ibrahim matai, kun Allah paso Ibrahim cen ina kaʹ tanaʹ ini, iaʹ ukoʹ kem dini mudip naʹkini ne. 5Abeʹ Allah naʹ tulat tanaʹ me Ibrahim: dadoʹ ca lalat taket pe abeʹ un. Un sepuʹo Allah petuket ke naʹ tanaʹ ini mia. Un Ibrahim ne, ia ke un tanaʹ ini, pekina pe diaʹ mela ha naʹ pe ia abeʹ un anak lepe. 6Kun Allah pisiu ia pekini dau ue: ‘Un diaʹ mela hoʹ ke mudip kaʹ tanaʹ diaʹ bulen. Kaʹ ina re ketai ulaʹ ngan ke sihoʹ udip keta pa pat ato uman majan ne ʹo.’ 7Kun Allah pisiu ngan Ibrahim laʹa: ‘Akeʹ iaʹ ke ngukum lepoʹ iaʹ uyan ida ulaʹ. Uʹo ina pelaʹa, kenai re kawang cen tanaʹ ina, sulo re ke lemameʹ palaʹ akeʹ kukoʹ ini pelaʹa ʹo.’ 8Penco Allah cuk Ibrahim ngkang adet sunat, ca tedanaʹ iaʹ petawai tuket isiu ue. Moʹ pekina, dalau Isak nai musang, Ibrahim penco nyunat ia neng aya tau ue. Pekina pe Isak nyunat anak ke Yakup, pekina pe Yakup nyunat diaʹ puloʹ dua usa anak laki ie pe, iaʹ ina tepun le cen naʹaʹ.
9“Un tepun le are, miʹi re neng Yusup. Ida matu ue, ketai ie ulaʹ kaʹ lepoʹ Masir. Naʹ pe ia pekina, Allah iaʹ un ngan ne, ina ukoʹ o lebau neng mung penaru ue. 10Dalau Yusup tai nyeripa Piraun, laja tanaʹ Masir, Allah iaʹ naʹ mia peniga ngan tudi neng penisen. Kun Laja Piraun ne uyan Yusup tai paren bioʹ. Yusup ne iaʹ ngkang mung tanaʹ Masir, peging ngan mung inu kaʹ dalem amin laja ne. 11Nai kun ca lien bioʹ pa libut tanaʹ Masir ngan tanaʹ Kanaan, ca taru lien bioʹ. Un tepun le, abeʹ de senteng ke mita penguman. 12Kun Yakup kenahan ban un padai kaʹ Masir, kun ne cuk anak ke, diaʹ tepun le, tai nyahaʹ kidi te. 13Neng kedua liwai ketai re nyahaʹ, penco Yusup badaʹ ngadan ne palaʹ diaʹ cenganak ke ne. Ina le Piraun tai tisen uban cenganak Yusup ban dina. 14Kun Yusup naʹ katu tiraʹ palaʹ Yakup amai ie, mengin ia kaʹ Masir, peging ngan mung nte neng pemanak de, tujoʹ puloʹ lema usa kadoʹ de. 15Nai kun Yakup kaʹ Masir nuʹo. Kina ne ia matai nuʹo, pekina lete mung tepun tepun le dina. 16Laʹa un tulang nte dulu ngkin kaʹ tanaʹ Sikim, ngan masek ida dalem liang iaʹ lepa Ibrahim ban lemeli man ligit pirak neng lepoʹ Himur kaʹ tanaʹ Sikim.”
17Sulo dau Stipanus pelaʹa: “Dalau ketai nyeng tuket Allah ke sihoʹ, iaʹ ia lepa petuket me Ibrahim cen kena, un lepoʹ le dina nai un pit kadoʹ de kaʹ tanaʹ Masir. 18Pabeʹ neng dalau laja diaʹ ca iaʹ are un tisen Yusup nai ngkang lepoʹ Masir. 19Kun laja ina panyi lepoʹ le, ngan peketa tepun le, pa re lemejen cuk ida pet ngan lematai anak de. 20Dalau ina, kenai Musa pempet ngan tiga laleʹ seʹ puyan usa ha. Telu bulan majan ne ia dalem amin amai ie. 21Dalau re naʹ ia tahaʹ awang, un anak leto Piraun alaʹ ia, ngan mamung ia koʹ baʹan anak usa ha lan are. 22Kun dulu pekatuk Musa neng ketoʹ tudi ngan penisen lepoʹ Masir, pa dulu mejung ia ca kelunan bioʹ, moʹ o mencam laleʹ petiraʹ, ngan mencam pekimet gayeng.
23“Lepa pat puloʹ uman udip Musa, un tekaʹ a pekimet ubaʹ ke tai naʹat diaʹ cenganak ke diaʹ kuaʹ lepoʹ Israil ngan ne. 24Kun ne taʹan ca usa Masir nyakit ca usa Israil, penco ho mepo laki iaʹ ia nyakit ina, ti laki Masir ina pa ha matai. 25Un tekaʹ kimet Musa kuma ha, apan tai te cenganak keʹ dina ke tisen ban akeʹ iaʹ Allah ke kanan, man ke sau ida neng udip iaʹ taru, ke paso ida palaʹ udip iaʹ pejo. Un sepuʹo abeʹ de tai tisen ia ʹo. 26Tegoʹ neng kenempam me laʹa, kun Musa petegoʹ ngan dua usa Israil pekenca. Kun ne mulen ida dua pekenca, ten ke uyan tiga saheʹ mida, kun dau ue: ‘Ahaʹ cenganak, pecenganak kem dua. Inu adeʹ kem pesakit tupe?’ 27Un ca mida dua diaʹ pekenca dina, kun ne nyakat Musa, un dau ue: ‘Aheʹ iaʹ uyan ikoʹ paren ngan tuʹa iaʹ pebetep tiraʹ neng ahang ameʹ tupe? 28Seʹ koʹ ubaʹ ke lematai akeʹ, koʹ baʹan ncoʹ lematai kelunan Masir iaʹ nyahap de are tupe?’ 29Moʹ kuʹun isiu ina, ina tuman Musa tai kelap, penco tai ie mudip kaʹ tanaʹ Midian. Kaʹ ina ha un dua re anak laki.
30“Sukung ne pat puloʹ uman majan Musa kina te, kun ne taʹan ca usa melikat kata ia dalau aʹang luten neng kayu jue, kaʹ tanaʹ lenga nyeng kaʹ Mudung Sinai te. 31Kun Musa taʹan puyan ina, salam tekaʹ a taʹan ne. Sulo ketai ie ngenyeng aʹang luten kaʹ kayu jue ina, moʹ o ubaʹ ke ngetisen ne. Belekaʹ a kenahan dau Tuhan pisiu: 32‘Akeʹ ini iaʹ Allah tepun ncem, iaʹ ina Allah iaʹ anun Ibrahim, ngan Allah iaʹ anun Isak, ngan Allah iaʹ anun Yakup.’ Un tekaʹ Musa takut laleʹ kaʹ a, ngan ngeregen tekaʹ a, pa ha abeʹ un makang ke naʹat te. 33Un dau Tuhan pisiu ia: ‘Sau ne sepatu hoʹ ne, moʹ kukoʹ koʹ nekejeng ina, tanaʹ iaʹ buheʹ. 34Lepa ne akeʹ taʹan diseʹ lepoʹ keʹ tuyen ngan keta kaʹ tanaʹ Masir ne. Akeʹ kenahan ne dau kerahing nte. Ina ukoʹ keʹ nai kentaʹ, moʹ keʹ ubaʹ ke paso ida. Naʹkini, tai ne ikoʹ kaʹ tanaʹ Masir te.’ Pekina dau Tuhan neng Musa.”
35Sulo dau Stipanus laʹa: “Lepoʹ Israil diaʹ nyekang Musa are. Pekini dau re neng ia are: ‘Aheʹ iaʹ uyan ikoʹ paren ngan tuʹa pebetep tiraʹ neng ameʹ tupe?’ Idi Musa ne lete iaʹ Allah cuk ke paren ngan tuʹa re, ngan laki keniga udip de, moʹ melikat ina pisiu ia dalau aʹang luten kaʹ kayu jue ina are. 36Musa ina lete iaʹ ban ngkin ida nai kawang cen tanaʹ Masir. Ngan kadoʹ puyan nyingan ngan tedanaʹ bulen kaʹ tanaʹ Masir Musa uyan, pekina pe kaʹ Banget Bala, ngan kaʹ tanaʹ lenga pe pat puloʹ uman majan ne. 37Musa ina lete iaʹ badaʹ me lepoʹ Israil ne kuma ha: ‘Allah ke cuk ca pegawa nai palaʹ ikem, koʹ baʹan Allah cuk akeʹ nai pala ikem are. Cen ahang ikem panak kenai ie ʹo.’ 38Musa ne lete iaʹ ban pemung ngan lepoʹ Israil dalau re pempun kaʹ tanaʹ lenga. Musa pe iaʹ ban pemung ngan tepun le, ngan melikat iaʹ pisiu musa neng usun Mudung Sinai. Musa pe iaʹ alaʹ tiraʹ katuk udip cen Allah, apan katuk udip ini ketai pabeʹ palaʹ ilu naʹkini.
39“Un sepuʹo, tepun le abeʹ de ubaʹ bayaʹ Musa, bang nyekang ia ne ida, mentung tekaʹ kimet de ketai kaʹ tanaʹ Masir laʹa. 40Un dau re pisiu neng Harun: ‘Uyan ne ca tepatung mameʹ, iaʹ ke mampin ameʹ, moʹ un Musa iaʹ ban ngkin ameʹ nai kawang cen Masir are, abeʹ meʹ tisen kumpin puyan ne ʹo taʹin.’ 41Dalau ina re uyan ca tepatung anak sapi, penco re mencai liwa re palaʹ tepatung sapi ina nuʹo. Bangen seʹ de pemung uman, ban kuʹun puyan ujoʹ de tengen. 42Ina ukoʹ Allah nyelikut ida. Allah pedayo ida lemameʹ palaʹ betuʹen kaʹ langit, koʹ baʹan dau iaʹ ban un dalem Kitap Pegawa ne iaʹ pekini dau ue:
‘E lepoʹ Israil, kun dau Allah:
Abeʹ e palaʹ akeʹ kenai tebek pun ncem ne,
ngan pencai liwa hem ne, dalau pat puloʹ uman
majan ncem un kaʹ tanaʹ lenga are.
43Lepau bali Muluk iaʹ ikem tekalang ngkin ina are.
Ngan Repan uyat betuʹen, bali hem ina.
Palaʹ tepatung iaʹ ikem uyan, kina ketai mung dau temameʹ kem are.
Ina ukoʹ keʹ ke paso ikem ketai tahaʹ coʹ kaʹ
lepoʹ Babil ʹo.’ Pekina dau Allah.”
44Sulo dau Stipanus laʹa: “Moʹ un tepun le diaʹ kaʹ tanaʹ lenga te are, ida mampin Lepau iaʹ badaʹ tugen ban Allah un ngan nte. Lepau ina nuyan bayaʹ dau Allah badaʹ a me Musa, moʹ o uyan koʹ baʹan kata iaʹ ia lepa taʹan ina. 45Majan uʹo ina pelaʹa, un tepun le, pencun ne ida mampin lepau ina neng singket sun udip de. Kun nte ngkin lepau ina serengan ngan Yusua dalau re tai pesupeʹ lepoʹ dulu diaʹ ca, diaʹ Allah muyung tahaʹ tena tepun le dina. Pa abeʹ dalau udip Daut ida mampin lepau ina. 46Daut iaʹ ban sihoʹ pengelesau Allah. Daut nyat apan ne senteng ke uyan ca amin me Allah iaʹ anun Yakup. 47Un Suliman, anak Daut ne, ia iaʹ medeng ca amin me Allah nuʹo.
48“Un Allah iaʹ Atek Mpau ina, abeʹ pe ia ngelineʹ neng amin iaʹ ban nuyan man ujoʹ kelunan. Koʹ baʹan tiraʹ pegawa iaʹ pekini dau ue:
49‘Surga ina kukoʹ ladung pengaren nceʹ, kun dau Tuhan.
Ngan usun tanaʹ ina lete nten taket ceʹ.
Kumpin diseʹ amin iaʹ ikem ubaʹ ke medeng makeʹ tupe?
Kempi kukoʹ kelineʹ keʹ baʹan ncem tupe?
50Mabeʹ e mung puyan ini nuyan kuʹun nceʹ tengen?’ Pekina dau Tuhan.”
51Sulo dau Stipanus laʹa: “Ahaʹ sematu mahing penawai hem ngan mahing kimet cem, pekuaʹ dulu diaʹ are ngelan, ngan telinga hem dengen neng tiraʹ Allah. Koʹ baʹan tepun ncem are, pekina lete ikem pe. Lemuto hem nyekang Berua Buheʹ. 52Pegawa iaʹ mpi iaʹ are sihoʹ tuyen kuʹu tepun ncem tupe? Tepun ncem lete iaʹ lematei diaʹ lawa Allah iaʹ nekena badaʹ neng puyan kenai Ulaʹ a iaʹ teneng ina. Naʹkini lepa ne ikem muau neng Laki ina, ngan lematai ia. 53Ikem te iaʹ ban lepa alaʹ Katuk Adet Allah iaʹ melikat lepa badaʹ idai. Belekaʹ ikem lete ban muau kidi puʹo.”
Dulu lemulo Stipanus
54Dalau Mpun diaʹ Lataʹ dina kenahan dau Stipanus pekina dau, buseʹ laleʹ ne tekaʹ de ngan ngetaret dau jipen nte miʹa ia. 55Un Stipanus iaʹ sangan kuʹun Berua Buheʹ, nekadaʹ a kaʹ langit, sulo ho taʹan serema peniga Allah; un pe Yesus nekejeng tahaʹ taʹu Allah. 56“Naʹat,” kun dau Stipanus. “Ini heʹ taʹan langit pesik, ngan Anak Sio nekejeng tahaʹ taʹu Allah.”
57Toʹ diaʹ lataʹ dina ngelengap ngan bioʹ dau re, mentung nte mepen telinga re. Tegoʹ ina re serengan nyudup Stipanus. 58Sulo re pet ia kaʹ awang lepoʹ, mentung nte lemulo ia. Mung diaʹ ban badaʹ tugen are, ida mahung sapai re ngan ca laki iaʹ iʹut udip, ngadan ne Saul. 59Penco re lemulo Stipanus. Mentung Stipanus ngelengap, kun dau ue: “Ahaʹ Tuhan Yesus, alaʹ ne berua heʹ.” 60Kun ne sutlep, mentung nge pisiu ngan bioʹ dau ue: “Ahaʹ Tuhan, ayen ncoʹ nawai penyalaʹ ini un neng usun ida.” Lepa ha pisiu pekina, penco matai ne ia.
Kenyah New Testament © Bible Society of Malaysia, 1984.