Madiu 2
2
Tosinasinapuyao 'idi ayausa gwama Yesu 'enaya
1Tuta nina Yesu 'itubuwa Bedileema 'enaya, Elodi tauna 'iloiloina Yudia solanaya. Ta tuta nina 'enaya 'aidi tosinasinapuyao sena bomatuyega simai ga me Yelusalema 'ediya sienaida, 2sigwae, “Mwa'o me Yudia 'idi kini auwauna nina? 'Amwalatonina ni'atu 'itubuwa, manuna 'ina kwadima 'a'itenaya sena bomatuyega 'isaetu'ema, 'enega 'amai sabi bwagobwago 'enaya.”
3'Idi ona gete Kini Elodi 'inonona ga 'i'atesa'ala ta wate me Yelusalema yaudi si'atesa'ala ona gete manuna. 4'Enega Elodi me Yudia 'idi totaliyao sinabwadi be loina 'ana toe'itao 'ibwau egogonedima ga 'ediya 'ienaida, 'igwae, “Mane 'ena To'etoseyana nina 'itubuwa?”
5 #
Yo 7:42
Ga sigwae, “Bedileema 'enaya, nate Yudia solanaya. Nadigega palopita 'ina simana Buki Tabu solanaya, 'igwae,
6 #
Mai 5:2
‘Bedileema solanega ma'etamo me Isileli 'idi toloina 'ida apwesama. Gete manuna Bedileema 'asa esaesa ta sinabwana Yudia 'asanao maibo'adi 'ediyega.’”
7'Enega Elodi tosinasinapuyao nidi 'ibwau ma'uledi, ga 'enega 'ienaidedi to tutaya kwadima nina 'iapwesa'unu. 8'Enega Elodi 'idi e'isa 'inonona ga 'iloinedi, 'igwae, “Watauya Bedileema 'enaya be gwama nina wa'ebesa 'ai'aili, be 'enega 'abo walobenaya wailama be waemataluwegu, be 'enega 'abo'agu wate yada tauya be yada bwagobwago 'enaya.”
9Gote 'enega siapwesa ga sitauya, ta kwadima nina lowa sena bomatu 'ena si'ite'itena matadiya 'isaeya, tauna simuliyena ga sena nina kwadima 'isaemasinaya 'ena sitauya ga gwama nina silobena 'imiyami, 10ta kwadima nina manuna sigwausowala sinabwa wawasae. 11#Ais 60:6'Enega silugu anuwaya ga gwama sinana Meli ma'iyana si'itedi, ta sibwagobwago gwama nina 'enaya. 'Enega oboboma nidi sime'ediya si'ewedi gace gwama nina 'ena sisa'udi, nate goula be inisenisi be wate mulo.
12Ta muliyega madawalega Yaubada 'iemataluwedi be 'aene geya'abo Elodi 'enaya siilaila, 'enega sitoolo ga mali 'edega sitauya 'idi 'asaya.
Yosepa be gwama nina masinana sidena Itipita 'ena
13Tuta muliyega 'ebweu anilose madawalega Yosepa 'enaya 'iapwesa ga 'iemataluwena, 'igwae, “'Utoolo be gwama masinana 'u'au'ewadi be wadedena sena Itipita 'ena be nada wamimi be 'ana laba yaemataluweyo, ta 'enega waila limanama. 'Imi dena gete 'alena, manuna Elodi 'iabe gwama nate 'i'ebese be 'aene 'iloemwawasi.”
14'Enega boiboi nina 'enaya Yosepa 'itoolo ga gwama masinana 'i'au'ewedi ga sitauya Itipita. 15#Osi 11:1Ta 'enega Itipita 'ena simiyami ga 'ana laba Elodi 'imwawasa. 'Idi miya sugalagala nina be 'aene Yaubada 'ina ona 'ida apwesa, tauna 'ebweu palopita 'igimisimanena, 'igwae,
“Itipita 'enega natugu yabwauyenama.”
16Ta tuta nina Elodi tosinasinapuyao 'iyamwa yogenediya, manuna nigeya siilailama. 'Idi kabo manuna 'igamwasowala sinabwana, 'enega 'ina loina 'isa'una be tolosaiyao 'ietunedi Bedileema be 'asanao 'ediya, be 'aene gogama me'olotodi taudi 'adi yakwala 'eluwa 'enega 'imwa'utama sida loemwawasidi. Gogama nidi gete nadigega 'adi loina Elodi 'isa'una, manuna tosinasinapuyao 'idi ona 'enega ni'atu 'isinapuna to tutaya gwama nina 'itutubuwa.
17'Enega tuta nina 'iapwesa to'ase palopita Yelemaiya lowa 'igimisimanena, 'igwae,
18 #
Yel 31:15; Nug 35:19 “Doonaona Lama'a 'enega tanonono.
'Elouya ta mataselu sidoonaonaedi.
Letiyeli ma ina susuyao sidedoi,
ta 'idi dedoi 'enega geya'abo sigwaugwausowala,
natudiyao 'idi mwawasa manuna.”
Siila Nasaleta 'enaya
19'Enega Elodi 'ina mwawasa mulinaya Yaubada 'ina anilose 'iapwesa Yosepa 'ena, tuta nina Itipita 'ena ma'etamo 'imiyami, ta madawalega 'ieonena, 20'igwae, “Yosepa 'utoolo be gwama masinana 'u'au'ewadi be waila Isileli 'enaya, manuna gwama 'ana talauwala ni'atu 'imwawasa.”
21'Enega Yosepa 'itoolo ga gwama masinana 'i'au'ewedi ga siila Isileli.
22Ta tuta nina siilama ga Yosepa ale 'inonona 'aene Elodi natuna Alekeleo 'ielopa'eluna ga 'ietoloina sena Yudia 'enaya, 'enega Yosepa 'imatauta ga geya nuwana be 'itatauya Yudia 'enaya, ta madawalega mwalatoi Yaubada 'i'ebwa'ena ga 'isakowasi ga 'itauya sena Galili 'enaya. 23#Lu 2:39; Yo 1:45-46'Enega Nasaleta 'ena 'ilo'asa. Gete 'enega palopitao 'idi gimisimana 'iapwesa, sigwae,
“Tauna sida eese goma Nasaleta.”
© 2013, Wycliffe Bible Translators, Inc. All rights reserved.