Maariko 9
9
1Yeesu ˆnaagenderera okubhabhwira ati, “Kimari enibhabhwira ati, mu-bhanu bhayambaaye anu, bhariwo abhandi bhanu bhatarifwa, bhakyari kurora obhukama bhwa Nyamuwanga mbuuja na amanaga.”
Yeesu kaayinduka obhusu
(Mataayo 17:1-13; Ruuka 9:28-36)
2Bhunu ꞉gyaturire nsiku sansabha, Yeesu ˆnaagega Peetero, Yakobho na Yowana, ˆnaariinya nabho ku-kiima ekireera enu abhaanu bhatari. Bhakyari ku-kiima eyo, Yeesu ˆnaayinduka obhusu mbamuroraga. 3Gingibho gyaye ngingʼarabhya muno. Ngibha nyeru pee okukira kutyo omufusi woonewoone mu-kyaro anu kutyo kaatura okugyesha. 4Mbataka era mbarora Musa na Eriya mbaromaga na Yeesu.
5Peetero ˆnaabhwira Yeesu ati, “Ee Mwiyigisha, ni kujomu ati kiri anu. Kyumbake bhiwuuna bhitooto bhisatu, ekimwi kibhe kyawo, ekimwi kibhe kya Musa na ekindi kibhe kya Eriya.” 6꞉Aaikire kutyo, kwa okubha ꞉aariga atakumenya erya okwaika, kwa okubha omwene na abheejaabho ꞉bhaariga bhayayire muno.
7Niwe eriire ndiija, ndibhasibhiirisha ndibhatuura agati. Obhuraka mbusooka mu-riire riyo, mbwaika ati, “Unu ni mwana waani omwende. Mumwitegeereshe.” 8Abheeyigira mbataka era Yeesu aasigaaye omwene, mbaringira enu na enu, nawe ꞉bhataarorere muunu wundi.
9Bhunu ꞉bheekaga okusooka ku-kiima kiyo, Yeesu ˆnaabhagaanya ati bhaasiga okubhwira omuunu woonewoone ganu ꞉bhaariga bharorere, tari bharinde okwamba, okuyikira anu Omwana wa Adaamu aribha asuukire okusooka mu-bhafuuye. 10Abheeyigira bhayo mbagwatira riingʼana riyo, mbabhuushaanya abheene na abheene ati, “Insonga ya okwaika ati, ‘Okusuuka okusooka mu-bhafuuye’ ni kiinuki?”
11Mbabhuusha Yeesu ati, “Kubhaki woori abheeyigisha bha ebhiraagiro bhya Musa abhaaika ati, Nyamuwanga keenda Eriya aaje okwamba Kiriisitu akyari kuuja?”#9:11 Ringira Maraaki 4:5-6. 12Omwene woone ˆnaabhasubhya ati, “Nikwo kutyo iri, Eriya niwe kaaja okwamba insonga arooshe kujomu amangʼana goone kutyo. Ukasiga gayo, kubhaki Omwana wa Adaamu akaamiiywe mu-Makaamo Amataakatiifu ati arinyansibhwa muno na okujeerwa? 13Nawe enibhabhwira ekimari ati, Eriya#9:13a Eriya. Yeesu kaariingʼaanya Eriya na Yowana Omubhatiisha. Yowana ꞉eemisiishe Yeesu injira, emirimu ginu Bhayawudi ꞉bhaariga mbeesiga ati, Eriya arikora. Ringira Mataayo 11:13-14, 17:10-13; Maariko 1:2-4. aramarire okuuja, mbamukorera amabhiibhi goone kutyo ganu bheendaga,#9:13b Ringira Maariko 6:14-29. rwa kutyo ꞉aakaamiiywe mu-Makaamo Amataakatiifu.”
Yeesu kaawosha omwana unu ari na ekiwi
(Mataayo 17:14-21; Ruuka 9:37-43)
14Bhunu Yeesu na abheeyigira abhasatu bharya ꞉bhaayikire ku-bheeyigira abhandi, mbarora riisangi rya abhaanu ribheeyindire. Abheeyigisha bha ebhiraagiro bhya Musa ꞉bhaariga mbabhambashaanya nabho. 15Bhunu abhaanu ꞉bhaarorere Yeesu, bhoone kutyo mbaruguura muno. Ayoayo mbamubhirimira, mbamukeesha.
16Yeesu ˆnaabhuusha abhaanu ati, “Omubhambashaanyaki nabho?”
17Omuunu owumwi mw-isangi rya abhaanu ˆnaasubhya ati, “Mwiyigisha, naareeta omwana waani ku-awe, awungirwe ekiwi, kimuyaaye obhujibhi. 18Akaafu kikamuwunga, ekimugwisha ansi, ˆnaasooka riifiro mu-kanwa, ˆnaaruma gimba ˆnaayangarara. Naabhwira abheeyigira bhaawo ati bhakisooshe-ko, nawe bhaatamwa.”
19Yeesu ˆnaaika ati, “Emwe orwibhuro runu rutari na bhwikirisha, niriikara na emwe okuyikira rusukuki? Niribharindirira kuyikira rusukuki? Mumureete anu.”
20Mbareeta omwana uyo ku-Yeesu. Nawe bhunu ekiwi ꞉kyarorere Yeesu, ayoayo nkigwisha omwana uyo ansi. ˆNaasarabhana, enu ˆnaasookaga riifiro mu-kanwa. 21Yeesu ˆnaabhuusha esemwene mwana ati, “Obhurwaye bhunu ꞉bhwamwambireri?” ˆNaamusubhya ati, “꞉Bhwamwambire akyari mwana. 22Akaafu ekiwi kiyo ekimugwisha mu-muriro na mu-manji insonga kimwite. Woori raabhe owutura okukora ryoneryone, nuukifwire ekigongo, ukisakire.”
23Yeesu ˆnaamusubhya ati, “Kubhaki owaaika ati, ‘Raabhe owutura’? Goone kutyo agatura okubha-wo, ku-muunu unu keekirisha.” 24Ayoayo esemwene omwana uyo ˆnaamura obhuraka ˆnaaika ati, “Eniikirisha! Nawe obhwikirisha bhwani ni bhutooto, nsakira nibhe nabhwo bhwafu.”
25Bhunu Yeesu ꞉aarorere ati esangi enene rya abhaanu ryamusangira, ˆnaagonya ekiwi kiyo, ˆnaakibhwira ati, “Awe! Ekiwi kya obhujibhi na obhusibhya bhwa amatwi, enikusiiga ati, sooka ku-mwana unu, na waasiga okumusubha-ko kweki.” 26Niwe ekiwi kiyo nkirira, nkigwisha omwana uyo ekitwe, nkigenda. Omwana uyo ˆnaasigara ayangaraaye rwa omufuuye. Abhaanu abhaafu mbaaika ati, “Aafwa!” 27Nawe, Yeesu ˆnaagwata omwana uyo okubhoko, ˆnaamwimusha, omwana uyo ˆnaayambaara.
28Bhunu Yeesu ꞉eengiiye mu-nyumba, abheeyigira bhaaye mbamubhuusha bhari abheene era ati, “Kubhaki eswe kyataamibhwa okubhirimya ekiwi kirya?” 29Yeesu ˆnaabhasubhya ati, “Ekiwi mbaga inu, kitakubhirimibhwa mangʼana ageene era, tari ubhe usabhire ku-Nyamuwanga.”#9:29 Tari ubhe usabhire ku-Nyamuwanga. Amakaamo agandi aga kara aga Ekiyunaani agaaika ati, ubhe usabhire ku-Nyamuwanga na okwiyima ebhyokurya.
Yeesu kaaikira orwa akabhiri okufwa na okusuuka kwaye
(Mataayo 17:22-23; Ruuka 9:43-45)
30Yeesu na abheeyigira bhaaye mbeemuka okusooka eyo, mbatura Gariraaya agati. Nawe ꞉aariga atakwenda abhaanu bhamenye ati ari eyo, 31kwa okubha ꞉aariga ˆneeyigisha abheeyigira bhaaye. ˆNaabhabhwiraga ati, Omwana wa Adaamu, kaaja okugurwa, ˆnaatuurwa mu-mabhoko ga abhaanu bhamwite, nawe bhakamara okumwita, arisuuka orusuku rwa akasatu. 32Abheeyigira bhaaye ꞉bhataasombookeeywe ryoneryone rinu ꞉aariga ˆnaaika, nawe mboobhaya okumubhuusha.
Omukuru mu-bhukama bhwa mu-rwire
(Mataayo 18:1-5; Ruuka 9:46-48)
33Yeesu na abheeyigira bhaaye mbayika mu-musi gwa Kaperinawumu. Bhunu ꞉bheengiiye mu-nyumba, Yeesu ˆnaabhabhuusha ati, “Mwamubhambashaanyaki mu-njira?” 34Abheene mbajibhira, kwa okubha ꞉bhaariga mbabhambashaanya ati ni wuuya agati weebhwe unu aribha omukuru ku-bheejaabho. 35Yeesu ˆneekara, ˆnaabhirikira abheeyigira bhaaye ekumi na bhabhiri. ˆNaabhabhwira ati, “Omuunu unu keenda atangate ku-bhandi, niwe abhe omusiiti, na abhe omujuuma wa abheejaabho bhoone kutyo.”
36ˆNaagega omwana omutooto, ˆnaamuyambaasha agati weebhwe. ˆNaamufumbeera, ˆnaabhabhwira ati, 37“Omuunu woonewoone unu kaaramira omwana rwa unu kw-isiina ryani, kaabha andamiiye anye. Na unu kaandamira anye, atakubha andamiiye anye era, tari kaabha aramiiye Nyamuwanga, unu antumire.”
Omuunu unu atakurema Yeesu ari amwi nawe
(Ruuka 9:49-50)
38Yowana ˆnaabhwira Yeesu ati, “Mwiyigisha, kyarora omuunu ˆnaabhirimya ebhiwi mu-bhaanu kw-isiina ryawo. Eswe nkimugaanya, kwa okubha omwene atari mwiyigira weejaasu.” 39Nawe Yeesu ˆnaabhasubhya ati, “Musige kumugaanya kweki. Atariwo omuunu unu kaakora ebhiruguusho kw-isiina ryani, ˆnaamara kweki ˆnaanyaaika kubhiibhi. 40Omuunu akabha atakurema amangʼana geeswe, uyo ari ku-rubhaara rweswe. 41Omuunu woonewoone unu kaabhayaana ekikombe kya amanji ga okunywa kwa okubha muri bhaanu bha Kiriisitu, enibhabhwira ekimari ati, Nyamuwanga arimuyaana ekiyaanwa kyaye.”
Yeesu kaagonya bhanu abhayabhya abheejaabho
(Mataayo 18:6-9; Ruuka 17:1-2)
42Yeesu ˆnaagenderera okwaika ati, “Woonewoone unu kaayabhya owumwi mu-bhatooto bhanu abhanyiikirisha, nyakara omuunu uyo abhoyerwe orubhuyi mu-bhikya bhamusikye ebhusibha. 43Okubhoko kwawo kukakuyabhya, kubhuture-ko. Nyakara wingire mu-bhurame bhunu bhutakuweera uri na kubhoko kumwi, okukira okubha nago gabhiri, nuugenda nago mu-muriro gunu gutakusimá. [44Giinyende ginu giri eyo, gitakufwa, na omuriro gwenda eyo gutakusimá.] 45Okuguru kwawo kukakuyabhya, ukubhuture-ko. Nyakara wingire mu-bhurame bhunu bhutakuweera uri na kuguru kumwi, okukira okubha nago gabhiri, nuweeswa nago mu-muriro gunu gutakusimá. [46Giinyende ginu giri eyo, gitakufwa, na omuriro gwenda eyo gutakusimá.] 47Na eriiso ryawo rikakuyabhya, urisooshe-mo uryese areera eyo. Nyakara wingire mu-bhukama bhwa Nyamuwanga uri na insongo, okukira okubha na meeso gabhiri, kimwi nuweeswa mu-muriro gunu gutakusimá. 48Giinyende ginu giri eyo, gitakufwa, na omuriro gwenda eyo gutakusimá.
49“Nyamuwanga kaaja okutusha abhaanu bhoone kutyo mu-bhinyansho bhinu ebhisusanywa na omuriro,#9:49a Omuriro. Ni kirengekanyo kya ebhinyansho bhinu Abhakiriisitu bharinyoora ku-nsonga ya okukomeesha obhwikirisha bhwebhwe. rwa kutyo abhaanu abhayaka omuunyu ku-nyama ya ekimweso.#9:49b Abhayawudi ꞉bhaayakaga giinyama omuunyu okuyeesha, niwe mbayookya. Ringira Abharaawi 2:13; Ejekiyeeri 43:24. Mu-Kiyunaani ikaamirwe ati, Abhaanu bhoone kutyo bhariyakwa omuunyu kwa omuriro. 50Omuunyu ni mujomu, nawe gukabhusha omuta gwago, omutuuramoki gubhe muunyu kweki? Mmbe, mubhe rwa omuunyu gunu gwikongeerere, mwikare muri na omurembe emwe abheene na abheene.”
Currently Selected:
Maariko 9: kya
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023, Wycliffe Bible Translators, Inc. All rights reserved