غلاطية 2
2
الرسل يقبلوا بولس
1وبعد اربَعطَعشر سنة، طلعت مره ثانية الين اورشليم مع بَرْنَابَا، واخذت معايا تِيطُسَ كمان۔ 2وأنا رحت ليها استجابة للوحي؛ وحطيت قدامهم الانجيل اللي ابشر فيه بين الأمم، بس على انفراد قدام البارزين مِنَّهُم ، عشان ما يكون تعبي دحين ومن الأوَّل على الفاضي۔ 3بس حتى تِيطُس اللي كان جاي معايا وهوا يوناني، ما أضطرّ انو ينختن. 4بس الهرجه أتشَعللت بسبب الإخوان الكذابين اللي اتسرسبوو ودخلو بيننا، واندسو عشان يِتجسسو على حُرِّيَّتْنا اللي هي حقتنا في المسيح يسوع، عشان يرجِّعونا للعبوديَّة ؛ 5بس ما استسلمنا لهم ولا حتَّى ساعة وحده، عشان يِفضَل حقَّ الانجيل ثابت عندكم۔ 6أما اللي كانو يُعتبر انهم مهمين ولهم مكانة، ولا يفرق عندي لو ايش كانت مكانتهم مادام الله ما يجامل إنسان، لأنهم ما زادو شيْ على اللي بأبشَّر فيه۔ 7بس بالعكس، همَّ شافو إنو أتعهد ليَّ بالإنجيل عشان اللي ما هم مختونين ، زي ما أتعهد بيه لبُطْرُسَ لأهل الختان اللي همَّ اليهود ۔ 8لِأنو اللي أستخدم بُطرس في رسوليته لأهل الخِتان، أستخدمني كمان بالنسبة للي همَّ غير اليهود۔ 9ولماَّ وضحت النعمة اللي أنا أملكها لي يَعْقُوبَ وَبُطْرُسَ وَيُوحَنَّا، وهمَّ اللي كانوا من البارزين بإعتبارهم أعمدة، مدوُّ ليا ولبَرْنَابَا أياديهم اليمين إشارة منهم للمشاركة، وبكده نروح إحنا لغير اليهود وهمَّ لأهل الختان، 10وكمان مولازم نطنش أو ننسى موضوع الفقرا، مادام تعبت في عمل ذا الشي۔
مواجهة بولس لبطرس
11بس لما جا بطرس لمدينة انطاكية، قاومتو وجهًا لوجه لإنو كان يستاهل انويتعاتب و ينلام۔ 12لإنُّو قبل ما جو بعض النَّاس من عِند يعقوب، كان بطرس بياكل مع الاخوة اللي هم َّ من الأمم؛ بس لما جو دولاك، انسحب وعزل نفسو، لإنُّو كان خايف من أهل الختان۔ 13ومشي معاه في النفاق بقيَّة الأخوان اللي من اليهود۔ وحتَّى بَرْنَابَا أنجر وراح معاهم لِنِفاقَهُمْ۔ 14فلمَّن شفت انهم مو سالكين بإستقامة بحسب الإنجيل ، قلت لبطرس قدام الموجودين كُلَّهُم: «اذا كنت، وانت يهودي، عايش زي الأمم مو زي اليهود، فكيف تجبر الأمم انو يعيشو زي اليهود؟»
15إحنا يهود بالولادة ، ومو من الأمم المذنبين ۔ 16بس إحنا، ما دام عرفنا انو الانسان ما يتبرر على اساس الاعمال المطلوبة في الشريعة لكن بس الإيمان في يسوع المسيح، آمنا إحنا كمان بالمسيح يسوع، عشان نتبرَّر على اساس الايمان به ، ومو على اساس أعمال الشريعة، لأنو على اعمال الشريعة ما رح يتبرَّر اي أحد. 17بس، واذا كنا و نحن يهود نبغى نتبرر في المسيح زي بقية الأمم لأننا مذنبين كمان، طيِّب هل يعني هذا إنو يكون المسيح خادم للخطيَّة؟ لا حاشا! 18لإنِّي لو رجعت أبني اللي هدمتو، كده رح أخلِّي نفسي مخالف۔ 19لكني، بالشريعة، مت عن الشريعة، عشان أحيا لِله۔ 20مع المسيح إنصلبت، فأحيا بس مو انا لكن المسيح هو اللي يحيا فيَّا۔ بس الحياة اللي أحياها دحِّين في الجسد، أعيشها بالإيمان في ابن الله، اللي حبني وضحَّى بنفسو عني. 21انا ما أوقّف عمل نعمة الله، لإنو لو كانَ البر بالشريعة، لكان موت المسيح عمل مالو داعي۔
Currently Selected:
غلاطية 2: HNAV
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Hijazi New Arabic Version © 2024 Strategic Resource Group