Mien Bible (Thai Script) © Thailand Bible Society, 2007

ต้ง ธอ ทิน-ฮู่ง เหฒย ลู่ง เหฒย เดา. ป้าม เกน ไม้ ม่าย หาย หญู่ง โมว เฒ้ย, หย่า ไม้ ม่าย เหยียด หญู่ง กะน้าย เยียม. ววม กู้ หงว่าย มับ หฮมวัง เญย. ทิน-ฮู่ง เญย สีง ลี่ง เยียม ววม กู้ หงว่าย โย่ว มี่ง โย่ว ต้าย.
ทิน-ฮู่ง ก๊อง, “อ๋อย หฒุ ม่าย ฌัง ธ้วด ต้าย.” ฌัง ฯฒฯ ธ้วด ต้าย อ๊ะ. ทิน-ฮู่ง ปวัด ฌัง เซ หลง เญย, หย่า เฒาะ ฌัง เหธา หฮมวัง ปุน ฆอย. ฌัง นิ่น เห่ว “ลู่ง ฮนอย หฒั่น.” หฮมวัง แอ๊ะ, เห่ว “ลู่ง ม์วน หฒั่น.” ม่าย ลู่ง หฮมวัง หย่า ม่าย ลู่ง ดอม. น้าย เซ ตะเยี้ยด ฮนอย.
ทิน-ฮู่ง แอ๋ง ก๊อง, “อ๋อย หฒุ ม่าย หญู่ง กะน้าย หฒาว เจี๊ยน ปุน ฆอย กู้ หงว่าย เญย ววม เหธา กะเดี๊ย เญย ววม.” ทิน-ฮู่ง ฯฒฯ เหฒย ธ้วด วั้ว หญู่ง กะน้าย ต้าย ปุน ฆอย ววม. ม่าย เต๋ย เยียม วั้ว หญู่ง กะน้าย กู้ หงว่าย. ม่าย เต๋ย เยียม กะเดี๊ย. ฯฒฯ หฒะเก้ง ฮนั้ง หน่าย. วั้ว หญู่ง กะน้าย ทิน-ฮู่ง เห่ว “ลู่ง.” ม่าย ลู่ง หฮมวัง หย่า ม่าย ลู่ง ดอม. น้าย เซ ตะเหญ่ย ฮนอย.
ทิน-ฮู่ง แอ๋ง ก๊อง, “ลู่ง เดี๊ย เญย ววม อ๋อย หฒุ กั๊บ เจี๊ยน เยียม ฒุ้น เหยียด นอม ต๋อง ปุน เดา ธ้วด ต้าย.” ฯฒฯ หฒะเก้ง ฮนั้ง หน่าย. ไม้ ม่าย ววม เญย ต๋อง, ทิน-ฮู่ง เห่ว “เดา.” ววม กั๊บ ฒุ้น เญย ต๋อง, นิ่น เห่ว “ค้อย.” ทิน-ฮู่ง ปวัด เซ หลง เญย.
ทิน-ฮู่ง แอ๋ง ก๊อง, “เดา-เป้ย อ๋อย หฒุ ธ้วด เมี้ย ธ้วด เดี๋ยง, เซ ธ้วด ม่าย ญิม เญย ไล-เมี้ย เหธา เฒี่ยง เปี๊ยว ม่าย ญิม เญย เดี๋ยง, เหยียด หญู่ง ม่าย เหยียด หญู่ง เญย ป๊วน.” ฯฒฯ หฒะเก้ง ฮนั้ง หน่าย. เดา ธ้วด เมี้ย, เซ ธ้วด ไล-เมี้ย ม่าย ญิม หฒิว กั้น เญย ป๊วน หย่า ธ้วด เฒี่ยง เปี๊ยว เญย เดี๋ยง ม่าย ญิม หฒิว กั้น เญย ป๊วน. ทิน-ฮู่ง ปวัด เซ หลง เญย. ม่าย ลู่ง หฮมวัง หย่า ม่าย ลู่ง ดอม. น้าย เซ ตะฟาม ฮนอย.
ทิน-ฮู่ง ก๊อง, “อ๋อย หฒุ ม่าย ฌัง เยียม กู้ หงว่าย ลู่ง ปุน ฆอย ลู่ง ฮนอย หฒั่น เหธา ลู่ง ม์วน หฒั่น หย่า โหฒว จั๋ง-โห่ ปิ๋ว เม่ง ฮนอย, หฮญัง, เหธา เกว๋ย. น้าย เต๋ย ฌัง อ๋อย หฒุ เยียม กู้ หงว่าย ลู่ง หฒิว ลู่ง เดี๊ย ฌัง.” ฯฒฯ หฒะเก้ง ม่าย อ๊ะ. ทิน-ฮู่ง เหฒย ธ้วด อี นอม ต้ม ฌัง ต้าย. โฮล วั้ว นอม นิ่น ปุน กุ๊น ลู่ง ฮนอย หฒั่น. ไฝ วั้ว นอม กุ๊น ลู่ง ม์วน หฒั่น. นิ่น แอ๋ง เหฒย เหฮลย ธ้วด ต้าย. นิ่น ปุน น้าย เต๋ย ฌัง เยียม วั้ว ลู่ง หฒิว ฌัง กะเดี๊ย เดา, กุ๊น ลู่ง ฮนอย กุ๊น ลู่ง ม์วน, ปุน ฆอย ฌัง เหธา หฮมวัง. ทิน-ฮู่ง ปวัด เซ หลง เญย. ม่าย ลู่ง หฮมวัง หย่า ม่าย ลู่ง ดอม. น้าย เซ ตะเฝย ฮนอย.
ทิน-ฮู่ง แอ๋ง ก๊อง, “ววม กะญั์ว อ๋อย หฒุ ธ้วด ม่าย แหม่ง เญย กะน้าย หฮยาง ต้าย ปวั๊ง ววม-เดี๊ย. หย่า อ๋อย หฒุ ม่าย เหนาะ เยียม ด๊าม-ลู่ง ได๋ มี่ง ได๋ ต้าย เดา-เป้ย กู้ หงว่าย.” ทิน-ฮู่ง ฯฒฯ เหฒย ธ้วด เยียม ค้อย โฮล ไห่ เญย ต้ม เบย์า เหธา หญู่งๆ เยียม ววม ม่าย แหม่ง เญย, ไฮ่ ต์ง เญย, เหยียด กวั้น เหยียด กวั้น เญย กะน้าย, เหยียด หญู่ง ม่าย เหยียด หญู่ง เญย ป๊วน. นิ่น หย่า เหฒย ธ้วด หญู่งๆ เหนาะ, เหยียด หญู่ง ม่าย เหยียด หญู่ง เญย ป๊วน. ทิน-ฮู่ง ปวัด เซ หลง เญย. ทิน-ฮู่ง ปวัง หว่า ปุน น้าย เต๋ย เหยียด ฒู้ง กะน้าย. นิ่น ก๊อง, “อ๋อย หฒุ หฮยาง ต้าย ปวั๊ง ค้อย. เหนาะ หย่า อ๋อย หฒุ หฮยาง ต้าย เยียม ลู่ง เดี๊ย.” ม่าย ลู่ง หฮมวัง หย่า ม่าย ลู่ง ดอม. น้าย เซ ตะฮม์ ฮนอย.
ทิน-ฮู่ง แอ๋ง ก๊อง, “เดา-เป้ย อ๋อย หฒุ ธ้วด หญู่งๆ ม่าย แหม่ง เญย กะน้าย, แซง-คู้, เฮยี่ย ฒ่อย เหธา หญู่งๆ ญอง เดา เญย กะน้าย, เหยียด หญู่ง ม่าย เหยียด หญู่ง เญย ป๊วน.” ฯฒฯ หฒะเก้ง ม่าย อ๊ะ. ทิน-ฮู่ง เหฒย ธ้วด เฮยี่ย ฒ่อย เหธา แซง-คู้, เหยียด หญู่ง ม่าย เหยียด หญู่ง เญย ป๊วน, เหธา หญู่งๆ ญอง เดา-เป้ย เญย กะน้าย, เหยียด หญู่ง หฒิว เหยียด หญู่ง เญย ป๊วน. ทิน-ฮู่ง ปวัด เซ หลง เญย.
ทิน-ฮู่ง แอ๋ง ก๊อง, “บัว อ๋อย หฒุ หฒิว บัว เญย ฝัง เฒ้ย เหฒย เมี่ยน ต้าย ฒวั้ง บัว หย่า ฮนั้ง บัว นอ, ปุน นิ่น บัว กุ๊น ค้อย กะญั์ว เญย เบย์า, เยียม ด๊าม-ลู่ง เญย เหนาะ, หญู่งๆ แซง-คู้, หย่า กุ๊น หญู่งๆ ญอง เดา-เป้ย เญย กะน้าย.”
ทิน-ฮู่ง ฯฒฯ หฒิว นิ่น กั้น เญย ฝัง เฒ้ย เหฒย ธ้วด ป้าม เมี่ยน,
เซ หฒิว ทิน-ฮู่ง กั้น เญย ฝัง เหฒย เมี่ยน ต้าย,
นิ่น เหฒย ธ้วด เป๋น มจั่ง มเซียะ.
ทิน-ฮู่ง ปวัง หว่า ปุน นิ่น บัว. นิ่น ก๊อง, “เม่ย บัว อ๋อย หฒุ ม่าย ฝุเจว๊ย หฮยาง ต้าย ปวั๊ง ลู่ง เดี๊ย หย่า กุ๊น ตุ๊ บัวะ ลู่ง เดี๊ย เญย กะน้าย. อ๋อย หฒุ กุ๊น เยียม ค้อย เญย เบย์า, เยียม ด๊าม-ลู่ง เญย เหนาะ, เหธา หญู่งๆ ม่าย แหม่ง, ญอง เดา-เป้ย เญย กะน้าย.”
ทิน-ฮู่ง แอ๋ง ก๊อง, “หมั่ง ม่าะ! เยีย เฒาะ เยียม ปวั๊ง เดา-เป้ย ไฮ่ ธ้วด ญิม เญย หญู่งๆ ไล-เมี้ย เหธา หญู่งๆ เดี๋ยง ม่าย ญิม เญย เปี๊ยว, จิว ปุน เม่ย บัว หญั่น. เยียม เดา-เป้ย เญย แซง-คู้ เฮยี่ย ฒ่อย, เยียม ด๊าม-ลู่ง เญย เหยียด ฒู้ง เหนาะ เหธา ไฮ่ ญอง เดา-เป้ย ม่าย แหม่ง เญย เหยียด ฒู้ง กะน้าย, เยีย เฒาะ หญู่งๆ เมี้ย-แมง ปุน นิ่น บัว โหฒว หญั่น เญย กะน้าย.” ฯฒฯ หฒะเก้ง ฮนั้ง หน่าย.
ทิน-ฮู่ง หมั่ง นิ่น เหฒย ต้าย เญย หญู่งๆ กะน้าย, ปวัด หฒะเก้ง หลง ไห่. ม่าย ลู่ง หฮมวัง หย่า ม่าย ลู่ง ดอม. น้าย เซ ตะหลัวะ ฮนอย.

Klausytis ทิน เต่ย โต้ว 1