If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

तां यीशु ने अपणे बारां चेल्‍लेयां जो सद्दी करी तिन्हा जो दुष्टात्मा जो बाहर निकालणे, अते हर तरह री बीमारी ते कमजोरी जो दुर करणे रा हक दित्तेया। इन्हा बारहा खास प्रेरितां रे नां ए हिन, पैल्ला शमौन, जिस जो कि पतरस भी बोलदे अते तिसेरा भाई अन्द्रियास, जब्दी रा निक्का याकूब अते तिसेरा भाई यूहन्ना। फिलिप्पुस बरतुल्मै, थोमा, चुंगी लैणे वाला मत्ती हलफई रा पुत्तर याकूब, तद्दै शमौन जे जेलोतेस नां रे समुह रा मणू थिया अते यहूदा इस्करियोती, जिनिये यीशु जो पकड़वाई भी दित्तेया।

तिन्हा बारा जो यीशु ने ए हुकम देई करी भेजेया, गैर यहूदियां रे लोक्कां का मत जांदे, अते ना सामरिया प्रदेश बिच बड़दे। पर इस्राएल रे ‍खानदान री गुआची री भेड़ां का जायो। अते जांदे-जांदे तुसा ए प्रचार करी के बोलेयो, स्वर्ग रा राज नेड़े आई गे रा है। बिमारां जो खरा करो, मरे रेयां जो जिंदा करो, कोढ़ियां जो सुच्चा करो, दुष्टात्मा जो कड्डो तुसा जो मुफ्त बिच मिलेया है मुफ्त बिच ही देयो। अपणी कमर रे थैल्ले बिच ना तां सुन्ना, चाँदी अते ना तां तांबा रखयो, रस्ते तांइ ना झोली रख्खो, ना दो कुरते, ना जूत्ते ना सोठी, किजोकी मजदूर जो तिसेरी रोट्टी मिलणी चाएदी। जिस भी सहर या ग्रां बिच तुसा बड़गे तां पता करो कि इत्ते कुण लायक है, अते तिस जगाह् जो छडणे तक तित्ते ही रेयो। जां तुसा तिस घरे बड़गे तां तित्ते सांती री आशीष देयो। जे से घर लायक होया तां तुसा री आशीष तिन्हा पर बणी रेह्णी, पर जे नी हुन्गा तां सांती री तुसा री आशीष तुसा रे का हटी आणी। जे कोई तुसा जो नी अपणांदा अते तुसा री गल्लां नी सूणदा, तां तिस घर या तिस सहर का जांदे बेल्ले अपणे पैरां का धूल झम्मी आयो। मैं तुसा जो सच बोलदा हिसाब-किताब होणे रे रोज्जे उस सहर री हालत का सदोम अते अमोरा रे देस री हालत केई जादा ठीक होणी।

दिख्खो, जिय्यां कोई भेड़ भेड़िये रे बिच मझाटे हो तिय्यां ही मैं तुसा जो तिन्हा लोक्कां बिच भेज्जेया करदा है। इधेरे तांइ कीड़े सांई चलाक अते कबूतरां सांई भोले बणो पर मणूआं का बची करी रेयो, किजोकी तिन्हा तुसा जो पंचायता बिच देई दैणा, अते तिन्हा तुसा जो अपणी सभास्थल बिच कोड़े मारणे। तुसा जो मेरी वजह कने राज्पालां अते राज्जेयां रे सामणे लित्तेया जाणा, ताकि उन्हा पर अते गैर यहूदियां रे लोक्कां तांइ गवाह बणो। जां से तुसा जो पकड़न तां फिकर मत करदे, कि तुसा जो कै बोलणा ए अते किय्यां बोलणा ए किजोकी उस बेल्ले तुसा जो दस्सी दित्तेया जाणा कि तुसा जो कै बोलणा है। किजोकी बोलणे वाले तुसा नी हिन, पर तुसा रे परम-पिता री आत्‍मा ने तुसा रे अन्दर का बोलणा। भाई ने अपणे भाई जो पकड़वाई करी मरवाई दैणा, मां-प्यो ने अपणे बच्चे जो पकड़वाई दैणा अते बच्चेयां ने अपणे मां-प्यो रे खिलाफ होई जाणा ते तिन्हा जो मरवाई दैणा। मेरी नां री वजह कने सबने तुसा रे कने नफरत करणी, पर जे आखर तांइ सबर रखगा तिसेरा ही छुटकारा होणा। जां भी से तुसा जो इस सहर बिच तंग करो, तां दूज्जे सहर नह्स्सी जायो किजोकी मैं तुसा जो सच बोलदा इसका पैल्ले तुसा इस्राएल रे सब सहरां बिच जाणा खत्म करो मणू रे पुत्तर जे मैं ही है, ने आई जाणा।

ना चेल्ला अपणे गुरु का अते ना नौक्कर अपणे मालक का बड्डा हुन्दा, चेल्‍ले तांइ ए काफी है कि से अपणे गुरु रे बराबर है, अते नौक्कर तांइ ए कि से अपणे मालक रे बराबर है, जे तिन्हा घरे रे मालक जो दुष्टात्मां रा सरदार बोल्ली दित्तेया तां घरे रे दूज्जेयां लोक्कां जो कै किच्‍छ नी बोलणा।

इधेरे तांइ उन्हा का डरदे मत, किजोकी जे किच्‍छ लूक्के रा है, सब सामणे आई जाणा जे मैं तुसा रे कने न्यहारे बिच बोलदा तिसजो तुसा लौ बिच बोलो अते जे मैं तुसा रे कन्ना बिच बोल्लेया है, तिसजो घरे री छत्त पर चढ़ी करी प्रचार करो। उन्हा का मत डरो जे सरीर जो मारदे हिन पर आत्‍मा जो नी मारी सकदे, बल्कि परमेश्वर का डरो जे आत्‍मा अते सरीर दोनां जो नरक बिच नास करी सकदा। कै बड़ी घट कीमत बिच दो गौरेयां चिड़ी नी बिकदी? फिरी भी तुसा रे पिता री मर्जी रे बगैर इन्हा बिच का इक्क भी जमीन पर नी पेई सकदी। तुसा रे सिर रे बाल तक भी गिणे रे हिन, इधेरे तांइ डरो मत किजोकी तुसा तदेयी मती सारी चिड़ियाँ का भी केई जादा बधी करी हिन।

जे कोई मेरे जो मणूआं रे सामणे अपनांगा, मैं भी तिसजो अपणे स्वर्ग बिच रैह्णे वाले परम-पिता रे सामणे अपणाई लैणा। पर जे मणूआं रे सामणे मेरे जो नी अपनांगा, मैं भी तिसजो अपणे पिता रे सामणे जे स्वर्ग बिच हिन, नी अपनाणा।

ए मत सोच्चो कि मैं दुनिया रे लोक्कां बिच मेल-मिलाप करवाणा आए रा है, पर लोक्कां जो इक्क-दूए रे खिलाफ करणा आए रा है, मैं मुंडे जो तिसेरे प्यो रे खिलाफ, कुड़ी जो उसेरी मां रे खिलाफ, नूह जो तिसेरी सस्सू रे खिलाफ करणे तांइ आये रा है। अते तुसा रे दुश्मण तुसा रे अपणे घरे रे ही मणू होणे। जे अपणे मां-प्यो जो मेरे का जादा प्यार करदा, से मेरा चेल्ला होणे रे लायक नी है, जे अपणे बच्चेयां जो मेरे का जादा प्यार करदा, से मेरा चेल्ला होणे रे लायक नी है, अते जे अपणे आप्पे रा इन्कार करी के अपणे दुख री सुली चुक्की करी मेरे पीच्छे नी चलदा, से मेरा चेल्ला बणने रे लायक नी है। जे अपणी जिन्दगी जो बचाणे री इच्छा रखदा तिसने तिसजो गुआई दैणा, अते जे मेरी वजह कने अपणी जिन्दगी जो गुआणा, तिन्ने तिसजो पाणा।

जे तुसा जो अपणाई लिंदा, से मेरे जो अपणाई लिंदा, अते जे मेरे जो अपणांदा से मेरे भेजणे वाले जो अपणाई लिंदा। जे कुसकी भविष्यद्वक्ता जो भविष्यद्वक्ता समजी करी अपणांदा, तिसजो से ही ईनाम मिलणा जे भविष्यद्वक्ता जो मिलणा, अते जे तुसा कुसकी धार्मिक मणू जो धार्मिक मणू मन्नी करी अपणांदे तां तुसा जो से ही ईनाम मिलणा जे धार्मिक मणू जो मिलणा चाएदा। जे कोई मेरे इन्हा भोले-भाले चेल्‍लेयां जो इक्क गलास ठण्डा पाणी पीणे जो दे कि से मेरा चेल्ला है, तां मैं तुसा रे कने सच्ची बोलदा कि तिसजो इधेरा ईनाम मिलणा ही मिलणा।

Klausytis मत्ती 10