If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

ईशु फेर हुनमन ले कहनीमन ने बोलुक मुरयालो, “सरग चो राज हुन राजा चो समान आय, जोन आपलो बेटा चो बिहा करलो। आउर हुन आपलो दासमन के पठालो कि हाग दिलो लोगमन के बिहा चो भोज ने हाग देओत; मान्तर हुनमन ऐऊक नी चाहला। फेर हुन आउर दासमन के ऐ बोलुन भाती पठालो, ‘हाग दिलो लोगमन ले बला: दका, मय भोज तिआर करले से, मोचो बयला आउर पोसलो बिती पशु मारा गेली से, आउर सपाय काई तिआर आसे; बिहा चो भोज ने ईआ।’ मान्तर हुनमन मुंह फेरून जाते गेला: कोनी आपलो बेड़ा बाटे, कोनी आपलो बेबार बाटे। दुसर लोगमन जोन बाचते रवत हुनचो दासमन के धरून भाती हुनमन चो बेईजित करला आउर मारला। तेबे राजा के रीस ईली, आउर हुन आपलो सेना पटाऊन भाती हुन हत्यारामन चो नाश करलो, आउर हुनमन चो नंगर के जला लो। तेबे हुन आपलो दासमन ले बल्लो, ‘बिहा चो भोज तिआर आसे मान्तर हाग दिलो लोग लायक नी ठेबला। ऐईकाजे जोड़ानमन थाने जाआ आउर जितरो लोग तुमके मिर दे, सपाय के बिहा चो भोज ने हाग देऊन आना।’ आउर हुन दासमन सड़कमन थाने जाऊन भाती काय खराप काय अच्छा, जितरो मिरला, सपाय के रूंड़ा करला; आउर बिहा चो घर सगामन ले भरली।
“जिदलदाय राजा सगामन के दकुक भीतरे ईलो, तेबे हुन हुता गोटक माने के दकलो, जोन बिहा चो फटीई नी पिन्दुन रलो। हुन हुनचो ले पचारलो, ‘हे मित; तुय बिहा चो फटीई पिन्दलोर बीना ऐथा केंव ईलीस?’ हुनचो मुंह बंद होऊन गेली। तेबे राजा सेवकमन ले बल्लो, ‘ऐचो हाथ पाँय बान्दुन भाती हुनके बाहरे अंधार ने पकाऊन दिआस, हुता गागतोर आउर दात कड़रतोर होये दे।’ कसनबल्लोने हाग दिलोर तो खुबे आसोत मान्तर चुनलोर खिन्डिक आसोत।”

तेबे फरीसीमन जाऊन भाती आपस ने बिचार करला कि हुनके कसन परकार गोठमन ने फसांवा। आउर हुनमन आपलो चेलामन के हेरोदीमन चो संगे हुनचो लगे ऐ बोलुक पठाला, “हे गुरू, आमी जानु कि तुय सत आस, आउर माहापुरू चो बाट सत धरम ले सिकाऊ आस, आउर काचीई फिकर नी करीस, कसनबल्लोने तुय मानेमन चो थोमना दकुन भाती गोठ नी गोठयाईस। ऐईकाजे आमके सांग कि तुय काय समज सीस? राजा के कर देतोर नगत आय कि नुआय।” ईशु हुनमन चो दुष्टता जानुन भाती बल्लो, “हे कपटीमन, मोके केंव परके सास? कर चो सिक्का मोके दकाआ।” तेबे हुनमन हुनचो लगे गोटक दीनार धरून ईला। हुन हुनमन ले पचारलो, “ऐ छाप आउर नाव काचो आय?” हुनमन हुनचो ले बल्ला, “राजा चो।” तेबे हुन हुनमन ले बल्लो, “जोन राजा चो आय, हुन राजा के; आउर जोन माहापुरू चो आय, हुन माहापुरू के दिआस।” ऐ सुनुन भाती हुनमन भक्याला, आउर हुनके छांडुन भाती गेला।

हुनी दिने सदूकी जोन बोलु आत कि मरलो बितामन चो जीव उठतोर आसे ची नाई, हुनचो लगे ईला आउर हुनचो ले पचारला, “हे गुरू, मूसा बोलु रलो कि अगर कोनी माने बिना बेटा चो मरो, तेबे हुनचो भाई हुनचो बायले ले बिहा होऊन आपलो भाई काजे बंश जनमाओ। अदायं आमचो थाने सात भाई रवत; पयला बिहा करून मरलो, आउर बेटा नी होतोर कारन आपलो बायले के आपलो भाई चो काजे छांडुन गेलो। ऐ परकार दुसर आउर तीसर बले करला, आउर सातो ले ऐई होली। सपाय चो पाचे हुन बायले लेकी बले मरली। आउर जीव उठलो ने हुन सातो झान ले काचो बायले होये दे? कसनबल्लोने हुन सपाय चो बयाले होऊ रली।” ईशु हुनमन के जबाप दिलो, “तुमी पवितर शास्त्र आउर माहापुरू चो सामरत नी जानास; ऐई कारन भुल ने पड़ला सास। कसनबल्लोने जीव उठलो ने हुनमन ना बिहा करदे आउर ना बिहा ने दिया जादे मान्तर सरग ने माहापुरू चो दूतमन चो असन होदे। मान्तर मरलोमन चो जीव उठतोर बारे ने काय तुमी ऐ बचन नी पड़लास जोन माहापुरू तुमचो ले बल्लो: ‘मय अब्राहाम चो माहापुरू, आउर इसाक चो माहापुरू, आउर याकूब चो माहापुरू आंय’? हुन मरलोमन चो नाई, मान्तर जीवतामन चो माहापुरू आय।” ऐ सुनुन भाती लोग हुनचो उपदेश ले चकित होला।

जिदलदाय फरीसीमन सुनला कि ईशु सदूकीमन चो मुंह बन्द करून दिलो, तेबे हुनमन रूंड़ा होला। हुनमन थानले गोटक नियमकारी हुनके परकतो काजे हुनचो ले पचारलो, “हे गुरू, नियम ने कोन बिती हुकुम बड़े आय?” हुन हुनचो ले बल्लो, “तुय माहापुरू आपलो परबु ले आपलो पुईतराय मन आउर आपलो पुईतराय जीव आउर आपलो पुईतराय अकल चो संगे मया संगाव। बड़े आउर मुख्य हुकुम तो ऐई आय। आउर हुनचेई असन ऐ दुसर बले आय कि तुय आपलो अड़स-पड़स चो लोग ले आपलो समान मया संगाव। ऐई ची दुय हुकुममन पुईतराय नियम आउर अगम गिआनीमन चो आधार आय।”

जिदलदाय फरीसी रूंड़ा रवत, तेबे ईशु हुनमन ले पचारलो, “मसीह चो बारे ने तुमी काय बिचारे सास? हुन काचो बेटा आय?” हुनमन हुनचो ले बल्ला, “दाऊद चो।” हुन हुनमन ले पचारलो, “तेबे दाऊद आत्मा ने होऊन भाती हुनके परबु केंव बोलु आय? ‘परबु, मोचो परबु ले बल्लो, मोचो उजा बाटे बस, जिदलदाय ले कि मय तुचो बयरीमन के तुचो पाँयमन चो खाले नी निकरून देयें।’ अच्छा, जिदलदाय दाऊद हुनके परबु बोलु आय, तेबे हुन हुनचो बेटा कसन ठेबलो?” ऐचो जबाप ने कोनी बले गोटक गोठ नी बोलुक सकला। हुन दिन ले कोकीई फेर हुनचो ले काई पचारतोर साहास नी होली।

Klausytis मत्ती 22