If you have would like a copy of this version please contact info@davarpartners.org

Text: Rana Tharu New Testament, CC-BY-SA-4.0, The Love Fellowship. -- Audio: Rana Tharu New Testament Audio Bible, CC-BY-SA-4.0, Davar Partners International, The Love Fellowship, 2023

Rana Tharu New Testament

Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.

येशू डँगासे उतरो तओ बणी भिड येशूके पिच्छु लागी। और एक कोढ रोगसे पिणित आदमी येशूके ठिन आएके घुँटो टेकके अइसे बिन्ती करी, “हे प्रभु, तुमर इच्छा हए, तओ मोके अच्छो कर सकत हओ।” येशू अपन हात फैलाएके कोढ रोग लागो भओके छुइ और कही, “मए चाँहत हओं, कि तए अच्छो हुइजा।” तओ तुरन्त बोको कोढ रोग अच्छो हुइगओ। तओ येशू बोसे कही, “कोइसे मत् कहिए, कि मए तोके अच्छो करो। तए जा और अपनएके यहूदी पुजारी ठिन दिखा, और मोशा आज्ञा करीअनुसार भेँटी चढा, और सब आदमी पता पामएं कि तए शुद्ध भओ हए।”


तओ जब येशू कफर्नहुम सहरमे आओ तओ एक रोमी कप्तान (जौन सओ सैनिकके उपर अधिकार करत रहए) येशूके ठिन आएके येशूसे बिन्ती करी। “हे प्रभु, मिर नोकर घरमे नेंग नाए पातहए, जहेमारे बो बहुत दु:खमे पणो हए।” येशू कप्तानसे कही, “मए तुमर घरमे आएके तुमर नोकरके अच्छो करंगो।” तओ कप्तान कही, “हे प्रभु, तुमके मेरे घरमे हटकना करनको लायक मए नाए हओ। बल्कि बचन इकल्लो बोलदेओ और मिर कमैया अच्छो हुइजएहए। मए जाके सम्झत हओं, काहेकी मए फिर आधिकारीक आदमी हओं, और मिर अधीनमे सिपाही हएं। मए एकसे जा कहात हओं, तओ बो जातहए और दुस्रेसे आएजा कहात हओं तओ बो आत हए। मिर कमैयासे अइसो कर कहात हओं, तओ बो उइसी करत हए।”
जा बात सुनके येशू अचम्मो मानी, और कप्तानके पिच्छु आन बारेनसे कही, “नेहात्तओ, मए तुमसे कहात हओं, कि मोके पुरो इस्राएल देशमे एकफिर अइसो आदमी नाए मिलो, जो जा गैर-यहूदी आदमी हानी मिर उपर बिश्वास करत होए। मए तुमसे कहात हओं, कि बहुत आदमी गैर-यहूदी अगार और पछारसे आमंगे, और अब्राहाम, इसहाक और याकूबके सँग स्वर्गके राज्यको भोजमे बैठंगे। पर इस्राएली आदमी जौन राज्यके सन्तान हएं। बे बाहिर अन्धकारमे खेपे जएहएं। हुवाँ आदमी रोमंगे और दाँत किटकिटए हएं।” तओ येशू कप्तानसे कही, “घरे जाओ, और जैसो तुम बिश्वास करेहओ, उइसी तुमके होबए।” तओ बो नोकर बहेबेरा अच्छो हुइगओ।


जब येशू सिमोन पत्रुसके घरमे आओ। तओ पिच्छु येशू सिमोन पत्रुसकी सासके जाणोसे भरी देखी। येशू पत्रुसकी सासके ढिँगै आएके बोको हात पकणी, और जाणो बोके तुरन्त छोड दइ, तओ बो उठके येशूको सेवा करी। जब संझा हुइगओ रहए, तओ आदमी येशूके जौँणे बहुत बिमारीन्के और भुत लगे भएनके लियाइं। और येशू अपने बचनसे भुतनके निकारी, और जितनो बिमार रहएं, सबके अच्छो करी। यशैया अगमबक्तनको बोलो अगमबाणी पुरा होनके रहए, जहेमारे अइसो भओ रहए।
“येशू अपनए हमर दुर्बलता लइ, और हमर रोग उठाए लैगओ।”


जब येशू अपन आसपिस बणी भिड देखी, येशू चेलनके आज्ञा दइके कही, “आओ हम गालील समुन्दरके बोपार जामएं।” जैसी बे जानके ताहीं तयार होत रहएं। तओ मोशाको नियम कानुन सिखान बारो येशूके ठिन आओ, और येशूसे कही, “गुरु, तए जहाँ जएहए मए तुमर चेला बननके ताहीं तुमर पिच्छु-पिच्छु जामंगो।”
येशू बोसे कही, “सेरनके भार और बादरमे उणन बारे चिरैंचिरगुनीके घरघुस्ला होत हएं। पर मए, आदमीको लौंणाके ताहीं त एक घर फिर नाएहए, जहाँ मए सोए सिकओं।”
एक औ चेला बासे कही, “हे प्रभु, मोके पहिले घरमे घुमके जान देओ, जब मिर दौवा मरैगो, तओ मए अपन दौवाके दफन करके आएके तुमर चेला बनंगो।” तओ येशू बोसे कही, “मिर चेला बननके ताहीं मिर पिच्छु आओ; और जौन आदमी आत्मिक रुपसे मरे भए हएं, बिनके अपने मुर्दाके गाडनके देओ।”


जब येशू नैयाँमे चढो तओ बाके चेला बक पिच्छु लागे। अचानक समुन्दरमे बहुत बणी आँधी आएगइ, और लणुरासे नैयाँ तुपनलागी। तओ येशू मिठी निँधमे सोनडटो रहए। तओ चेला आएके येशूसे अइसे कहात जगाइं, “बचाओ प्रभु! हम मरन लागे।” येशू बिनसे कही, “कमजोर बिश्वासके आदमी, तुम काहे डरात हओ?” तओ बा उठके आँधी और समुन्दरको लणुराके डाँटी, और आँधी बिलकुल शान्त हुइगै।
और आदमी अचम्मो मानके कहान लागे, “जा कैसो आदमी हए, काहेकी आँधी और समुन्दरको लणुरा फिर जाकी आज्ञा मानत हएं।”


जब येशू समुन्दरके बोपार गदरिनीके इलाकामे आओ, तओ भुत लागे दुई आदमी मरघटसे निकरके येशूके भेँटीं। बे इतनो डरौने रहएं, कि कोइ फिर हुवाँसे आन-जान नाए करपात रहए। बे भुत लागे आदमी अइसे करके चिल्लाइं, “हे परमेश्वरको लौंणा, तुमसे हमर का मतलब हए? हमर बेरा नाए पुगतए तुम हियाँ हमके कष्ट देन आए हओ?”
बिनसे कुछ दुर सोराको एक बगाल चुगत रहए।
भुत येशूसे बिन्ती करी, “अगर तुम हमके निकारत हओ कहेसे, हमके बो सोराके बगालमे पठाए देओ।” और येशू शैतानसे कही, “जाओ!” तओ शैतान निकारके सोरामे घुसिगए, और सोराको जम्मए बगाल समुन्दर घेन हुरत गए, और पानीमे डुबके मरिगए। सोरा चुगान बारे भाजे और गाउँ-गाउँमे जाएके बो बात बताइं, कि का भओ रहए। तओ पुरे सहरके आदमी येशूके भेँट करनके आए, और बे बिन्ती करके कहीं, “हमर इलाकासे चलो जा!”

Klausytis मत्ती 8