Populiarios Biblijos eilutės iš Pomulanya 12

Dalintis

Wali ojo karoonya i Pue Yawe manganto’oka i Abram porenta etu, Ia magombo wo’u mamparajanjika ia, to’oNya, “Aku damampakasanang katuwu ngkorom, see naka wiyaamu kanjo’u-njo’u kaboro-boros sampe mawali bansa bae. Pasi korom danansani ntau boros pasi dana’angga nsira. Wali i sema tau to mangika matao resi korom, tau etu damangarata seja matao yako resi Aku. Pei tau to maja’a nakita korom, tau etu damangarata huku yako resi Aku. Pasi Aku mamparajanjika seja korom yako resi korom semo see naka samparia bansa nto lino damangarata anu to matao.” Etu semo parajanji i mPue Yawe resi i Abram seore.

Wali i Pue Yawe re’e manganto’oka i Abram, to’oNya, “Piyaika lipu ngkorom pasi ja’i ngkorom pasi tau to maroo ri raya banua mpa’amu. Piyaika sira pei inta njo’u lipu to daKusuduka korom.” Etu semo porenta i mPue Yawe resi i Abram.

Wali i Abram mampiyaika lipunya singkonong ewa porenta i mPue Yawe resi ia. Tempo etu ia pitu mpuyu pei lima nto’u. Wali tempo ia mayoko yako ri kota Haran etu, i Abram mangkeni indo nu ana nya, i Sarai, pasi pinuananya, i Lot. Pasi sira mangangkeni seja samparia kasuginya pasi samparia to papolaonginya to narata nsira ri rayanya sira maroo ri kota Haran etu. Wali sira mayoko dayau njo’u tana Kana’an. Wali yako etu, ojo karata nsira nja’u tana Kana’an etu

Pei tempo i Abram pasi yununya rata nja’u More etu, tempo etu i Pue Yawe rata resi i Abram pei mampogomboka ia. Ia manganto’o, “Tana si’i Aku damangawaika yau resi wiyaa ngkorom.” Etu semo parajanji i mPue Yawe resi i Abram. Wali ojo pangandonge i Abram gombo i mPue Yawe etu, ia mangawangu palampa watu nja’u ria darapake mampue mampakabae i Pue Yawe. Naka pei ia mangika ewa wetu apa nja’u ria semo i Pue Yawe rata resi ia.