Populiarios Biblijos eilutės iš Pomulanya 16

Dalintis

Wali i Hagar mangansani i Pue Yawe semo to mampogomboka ia etu, see naka ia ipu rayanya pei mampobuuka, “Gete, monso pu’u aku re’e mangkita i Pue Allah to mangkita aku etu!” Ewa wetu pampobuuka i Hagar, see naka ia mangansangaka i Pue Yawe to nampogomboka ia etu, “i El Roi”, batuanginya “i Pue Allah to mangkita”.

Wali roo see pomakau i mPue Yawe etu mampogomboka wo’u i Hagar, manganto’oka yami ia mangkonong palaong to damawali ri tempo to darata. Ia manganto’o, “Padongeka! Korom mayu’umo pei damampoanaka ana langkai. Wali anamu etu danusangaka i Ismael, apa batuanginya sanga Ismael etu ‘i Pue Yawe mangandonge’. Apa monso pu’u i Pue Yawe re’e mangandonge korom karai-rai ri raya ngkasusamu, pasi ewa si’i parajanjiNya resi korom. Ia manganto’oka korom, ‘Aku damampakaboros wiyaamu see naka ri tempo to darata wiyaamu etu taa rakoto mangabilang apa boros kojo.’ Etu semo parajanji i mPue Yawe resi korom.”

Wali yako etu pomakau i mPue Yawe etu manganto’oka wo’u i Hagar mangkonong ananya, ia manganto’o, “Ane baemo anamu etu, tempo etu lengko ngkatuwunya daraporapaka ewa keledai maila apa tare tau to nakoto mangkuasang ia. Wali ia damangewa samparia tau pei samparia tau damangewa ia. Pasi ia bo’onya tuwu masingkatao pei ja’inya.” Wali ewa wetu naika i mPue Yawe mampogomboka i Hagar nja’u mata nue etu.