Luuka 23
23
No Pilaatu lamndorii Iisaa
1Caggal ɗum, waalde Saahiiɓe ndee fuu immii, naɓi Iisaa to Pilaatu goforneer oo. 2Ɓe ndarii eɓe ngullanoo mo, eɓe mbiya:
—Min tawii oo ana jirkita leɲol amen, ana haɗa ɗum yoɓude kaananke Roma oo lampo, ana wiya hoore mum yo Almasiihu, ɗum woni kaananke.
3Pilaatu lamndii mo, wii:
—Aan woni kaananke Yahuudiyankooɓe oo naa?
O jaabii, o wii:
—No mbii-ɗaa nii.
4Pilaatu jaɓɓitii, wii hooreeɓe yottinooɓe sadaka e jamaa oo fuu:
—Mi yiyaali e makko daliili fuu ko jukkata mo.
5Kaa ɓe cattini e haala maɓɓe faa sanne, eɓe mbiya:
—Ko o waajotoo koo ana murtina yimɓe ley leydi Yahuudiya fuu, gila Galili to o fuɗɗiri too faa ɗoo.
6Nde Pilaatu nanunoo ɗum ndee, lamndii yalla o Galilinke naa? 7O faami Iisaa e laamu Hirudus iwata, o neldi ɗum Hirudus. Sabi e ley ɗen ɲalaaɗe tawi Hirudus ana Urusaliima. 8Nde Hirudus yii Iisaa ndee, weltii hen sanne, sabi ɓooyii omo yiɗi yiide ɗum saabe ko mo nannoo e mum koo. Kasen duu omo yeloo yiide ɗum ana waɗa kaayɗe. 9O lamndii ɗum lamndi keewɗi, kaa Iisaa jaabaaki fay huunde. 10Hooreeɓe yottinooɓe sadaka e dunkee'en Sariya ndarii ɗon, ana ngullanoo mo ko mbaawi fuu. 11Hirudus duu hoyni mo, jaayri mo, kaɲum e sordaasi'en mum, ɓoorni mo saaya lobba, neltiri mo Pilaatu. 12Ɲannde mum Pilaatu e Hirudus laatii giɗiraaɓe, arannde ɓe honnondirnooɓe.
No Iisaa sariraa yo bareteeɗo
13Pilaatu noddi hooreeɓe yottinooɓe sadaka e mawɓe ɓee e yimɓe fuu, 14wii ɗum'en:
—On ngaddanii kam oo neɗɗo jirkitoowo yimɓe. Mi lamndike mo yeeso mon, kaa ko ngullaniri-ɗon mo koo fuu, mi yiyaali hen daliili ko jukkata mo. 15Hirudus duu yiyaali e makko fay huunde, sabi o neltirii en mo. Anndee, oo gorko waɗaali fay huunde ko warata ɗum. 16Ndennoo, mi fiyan mo, mi yoppita mo. [ 17#23.17 E ɗereeji ɓooyɗi ɗii, yoga ana ɓeyda aaya 17: Nde wonnoo ana tilsi e Pilaatu iidi Paska fuu yoppitana ɓe kasunke gooto.]
18Ɓe fuu ɓe ngullidi daande wootere, ɓe mbii:
—War mo, njoppitanaa min Barabas!
19Barabas nee yo uddiranooɗo kasu saabe murtere waɗunoonde e ngeenndi ndii, e saabe war-hoore. 20Pilaatu haaldi e maɓɓe cilol ɗiɗaɓol dow yiɗude yoppitinde Iisaa, 21kaa ɓe ndarii eɓe ngulla, eɓe mbiya:
—Tontu mo! Tontu mo e leggal bardugal!
22Pilaatu wii ɓe tataɓol:
—Koɗum o waɗi ko boni? Mi yiyaali e makko daliili fuu ko haani warde mo! Ndennoo, mi fiyan mo, mi yoppita mo.
23Kaa ɓe ɓeydii wullude gullaali mawɗi, eɓe mbiya o tontee. Gullaali maɓɓe ɗii njaalii Pilaatu, 24o fellisi waɗande ɓe ko ɓe ɲaagii koo. 25O yoppitani ɓe mo ɓe ɲaagii yoppitee oo, oon yo uddiranooɗo kasu saabe murtere e war-hoore. Kaa Iisaa, o waɗi ɗum e juuɗe maɓɓe, faa ɓe ngaɗa ɗum ko weli ɓe.
No Iisaa tontiraa dow leggal bardugal
26Nde ɓe naɓata mo ndee, ɓe nanngi gorko Sireenanke biyeteeɗo Simon, iwruɗo ley ladde. Ɓe mbakkini ɗum leggal bardugal ngal faa jokka e caggal Iisaa. 27Yimɓe heewɓe njokki hen. Rewɓe duu ana hakkunde maɓɓe, ana mboya no ɗum foti mettude ɗum'en. 28Iisaa yeeccitii rewɓe ɓee, wii ɗum'en:
—Rewɓe Urusaliima, pati mboyee kam, mboyee ko'e mon e ɓiɓɓe mon! 29Sabi ɲalaaɗe ngaran nde yimɓe mbiyata: «Rewɓe rimarɓe e deeɗi ɗi caawaali abada e enɗi ɗi muyninaali, mbelii hoore!» 30Nden, yimɓe mbiyan baamle kaaƴe caama dow mum'en, mbiya tule cudda ɗum'en. 31Sabi so ɓe ngaɗii nii gila caɓal ngal keccal, hono laatotoo so ngal yoorii?
32Ɓe naɓidi e Iisaa yimɓe ɗiɗon yanooɓe. Ɓeen duu yo wareteeɓe. 33Nde ɓe njottinoo nokku biyeteeɗo Laalagal Hoore ndee, ɓe tonti mo e leggal bardugal, kanko e yanooɓe ɗiɗon ɓee, gooto ɲaamo makko, goɗɗo oo nano makko. 34O wii:
—Baaba, yaafa ɓe sabi ɓe anndaa ko ɓe ngaɗata.
Nii ɓe pecciri kaddule makko urwa. 35Yimɓe ndarii ɗon ana ƴeewa. Hooreeɓe ɓee duu ndarii ana njaayra mo, ana mbiya:
—O biltii woɓɓe, o bilta hoore makko so o Almasiihu, Cuɓaaɗo Laamɗo oo!
36Sordaasi'en ɓee duu njaayri mo, ngaddani mo biineegiri, 37ana mbiya:
—So aan woni kaananke Yahuudiyankooɓe oo, biltu hoore maa!
38Tawi ana winndii e tiimde hoore makko: oo yo kaananke yahuudiyankooɓe.
39Gooto e yanooɓe ɗiɗon tontidaaɓe e makko ɓee ana ɲiŋa mo, ana wiya:
—Wanaa aan woni Almasiihu naa? Biltu hoore maa, mbiltaa min minen duu!
40Kaa goɗɗo oo jahii e oo too, wii:
—A hulataa Laamɗo naa? Aan e makko fuu, on potu jukkungo. 41Enen, en keɓii ko kaandu-ɗen, jukkeede men yo goonga jaati, sabi ko ngollu-ɗen tan njoɓete-ɗen. Kaa kanko, o waɗaali fay huunde ko dagaaki.
42Caggal ɗum, o wii:
—Iisaa, miccito-ɗaa kam so a laatitike kaananke.
43Iisaa wii mo:
—Miɗo haalane goonga: hannde jaati a wondoyan e am ley alijenne.
Haala maayde Iisaa
44Wakkati hakkunde naange, nimre waɗi e leydi ndii fuu faa wakkati yamnde tati kiikiiɗe, 45naange niɓɓi, heedoode faliinde ley Suudu Dewal Mawndu ndee seekii, laatii taƴe ɗiɗi. 46Iisaa wulli wullaango manngo, wii:
—Baaba, mi tummbii yonki am kii e junngo maa.
O haali ɗum tan, o ɗali aduna. 47Nde hooreejo sordaasi'en oo yii ko waɗi koo ndee, yetti Laamɗo, wii:
—So goonga nii, oo neɗɗo yo pooccitiiɗo!
48Jamaa garnooɗo ƴeewde oo fuu, nde yiinoo ko waɗi koo ndee, wirfitii terɗe mum ana mbaati. 49Kaa annduɓe mo ɓee fuu, ndarii to toowti ana ƴeewa. Rewɓe jokkunooɓe e makko gila leydi Galili ɓee ana e maɓɓe.
No tew Iisaa waɗiraa e yanaande
50-51Gorko gooto ana jeyaa e waalde Saahiiɓe ndee, ana wiyee Yuusufu. Omo iwa Arimatiya, ngootiri e geelle leydi Yahuudiya. O gorko moƴƴo, pooccitiiɗo, omo doomunoo ɓanngugol Laamu Laamɗo oo. O tawdaaka e waalde Saahiiɓe ndee haala e golle. 52O yehi to Pilaatu, o ndaardi ɗum tew Iisaa, 53o jippini ɗum leggal bardugal ngal, o fiili ɗum e kasanke, o watti ɗum e yanaande asaande ley haayre, ɗo fay gooto meeɗaali watteede. 54Ɗum hawri e ɲannde lanndinal tawi ɲalaande fowteteende ɓadike fuɗɗude.
55Rewɓe wondunooɓe e Iisaa gila Galili ɓee njokki e Yuusufu, njii yanaande ndee e no o wattiraa ley mayre, 56kooti, moƴƴinoyi nebameeji uurooji.
Caggal ɗum, ɓe powti ɲalaande fowteteende no yamiroore ndee wiiri nii.
Šiuo metu pasirinkta:
Luuka 23: ffm
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2005, Wycliffe Bible Translators, Inc. All rights reserved.