Mateo 21
21
Ri Jesús ndok apu pa tinamit Jerusalén
(Mr. 11:1-11; Lc. 19:28-40; Jn. 12:12-19)
1Atoq ri Jesús y ri kachibꞌilan jubꞌaꞌ chik ndirajoꞌ chin ngebꞌeqaqa pa tinamit Jerusalén, xebꞌeqaqa chunaqaj ri aldea rubꞌiniꞌan Betfagé ri kꞌo chunaqaj ri juyuꞌ rubꞌiniꞌan Olivos. Ja atoq riꞌ ri Jesús xeruteq kaꞌiꞌ discípulos, 2y kereꞌ xubꞌij e chake: Kixbꞌiyin apu chupan la jun aldea kꞌo chiqawech, y xe xkixok apu, ja ndiwil jun burra ximil y jun ral rikꞌin. Keꞌikiraꞌ y keꞌikꞌamaꞌ pe chuwa. 3Y si kꞌo jun xtibꞌiꞌin jun achike chiwa, rix kereꞌ tibꞌij chare: Ngekꞌatzin re awej reꞌ chare ri Ajaw,#Sal. 24:1 pero ngetuyoꞌox yan paqiꞌ, kixchajeꞌ.
4Nojel reꞌ xbꞌanatej, chin ndibꞌanatej ri xqꞌalajrisex kan roma ri Dios pa ruchiꞌ ri profeta atoq xubꞌij:
5Tibꞌij chake ri israelitas ekꞌo pa tinamit Sión:#Is. 62:11
Titzꞌetaꞌ chi ri i-Rey, ja pataneq,
Y loqꞌ ránima tzꞌuyul pe chirij jun burro,#Zac. 9:9
Ral jun awej chin eqaꞌ,
xchajeꞌ.
6Y ri kaꞌiꞌ discípulos xebꞌa y xkibꞌen achel xbꞌan e mandar chake roma ri Jesús. 7Xkikꞌen kꞌa pe ri burra y ri ral, xekirikꞌ ri kikꞌul kiqꞌuꞌun chokacheq ri awej, apeꞌ xtzꞌuyeꞌ e ri Jesús. 8Y ekꞌiy wineq ngekirikꞌ qa pa bꞌey ri kikꞌul kiqꞌuꞌun,#2R. 9:13 y chꞌaqa chik ngekichay chꞌuteq ruqꞌaꞌ rex teq cheꞌ#Lv. 23:40 y ngekiyaꞌ qa pa bꞌey chin ndikiweq ri bꞌey apeꞌ ndeqꞌax ri Jesús. 9Ri santienta wineq ebꞌaneq chuwech y chirij kan ri Jesús ngesikꞌiyaj chubꞌixik: ¡Nim ruqꞌij re Kolonel reꞌ ri riy-rumam kan ri rey David!#Mt. 22:42; Mr. 12:35-37; Lc. 18:38; Ro. 1:3 ¡Kin nimalej favor kꞌo pa ruwiꞌ re pataneq pa rubꞌiꞌ ri Ajaw Dios!#Sal. 118:26; Mt. 23:39 ¡Nim ruqꞌij ri Dios chikaj!
10Atoq ri Jesús xok apu pa tinamit Jerusalén, konojel ri ekꞌo chiriꞌ ma ndikil ta achike ndikibꞌen roma ri ndajin chikiwech y kereꞌ ndikibꞌilaꞌ: ¿Achike kꞌa chi achi reꞌ?
11Y ri santienta wineq ri ebꞌaneq e chirij ri Jesús ndikibꞌilaꞌ: Re jun reꞌ ja ri profeta#Jn. 6:14 Jesús, ri aj tinamit Nazaret chin ri rochꞌulew Galilea.
Ri Jesús ngeroqotaj pe ri ngekꞌayin y ri ngeloqꞌon pa rachoch ri Dios
(Mr. 11:15-19; Lc. 19:45-48; Jn. 2:13-22)
12Ri Jesús xok apu pa rachoch ri Dios#Mal. 3:1, 2; Mr. 11:11 y xeroqotaj pe konojel ri ngekꞌayin y ri ngeloqꞌon chiriꞌ, xutikmayilaꞌ ri ki-mesas ri ejaloy ruwech méra, y ri kichꞌakat ri ngekꞌayin palomas. 13Y kereꞌ xubꞌij chake: Chupan ri rutzij ri Dios tzꞌibꞌan kan ndubꞌij: Ri wachoch kin xtibꞌix chare achoch chin ndibꞌan orar.#Is. 56:7 Keriꞌ tzꞌibꞌan kan. Pero rix xa kikꞌojlibꞌel eleqꞌomaꞌ#Jer. 7:11 ibꞌanun chare, xchajeꞌ.
14Y chiriꞌ pa rachoch ri Dios apeꞌ kꞌo ri Jesús, xejel apu ri esoqꞌ y ri ngejetzꞌmaꞌy ngebꞌiyin#Hch. 3:1-10 y xerukꞌachojrisaj.#Mt. 11:5; Hch. 10:38 15Pero ri sacerdotes israelitas más kꞌo ruchuqꞌaꞌ kitzij, y ri tijonelaꞌ chin ri ley ri xyoꞌox chare ri Moisés santienta xyakatej koyowal atoq xkitzꞌet chi ri Jesús ndubꞌanalaꞌ nimalej teq achike ri ndisach kikꞌuꞌx chirij, y chi ri akꞌolaꞌ ngesikꞌin pa rachoch ri Dios chubꞌixik: ¡Nim ruqꞌij re riy-rumam kan ri rey David!#Is. 11:1; Mt. 22:42; Jn. 7:42 16Y xkibꞌij chare ri Jesús: ¿La ma ndawakꞌaxaj ta kꞌa ri ndikibꞌij re akꞌolaꞌ reꞌ?
Ri Jesús xubꞌij chake: Jaꞌn, niwakꞌaxaj. Y riyin nibꞌij chi ibꞌanun leer ri tzꞌibꞌan kan pa Salmos ri kereꞌ ndubꞌij:
Rat xayaꞌ tzij pa kichiꞌ ri akꞌolaꞌ
Y ri kꞌa ngetzꞌuman
Chin ndikiyaꞌ aqꞌij.#Sal. 8:2
17Y ri Jesús xeruyaꞌ kan ri wineq riꞌ, xel e pa tinamit Jerusalén y xbꞌeruqꞌasaj ri aqꞌaꞌ pa aldea Betania.
Ri Jesús ndubꞌij chare jun higuera chi ma jumbꞌey chik xtiwachin
(Mr. 11:12-14, 20-25)
18Chukan qꞌij kumaj saqer, atoq ri Jesús xbꞌa chi e pa tinamit Jerusalén, xchꞌumu pe rupan. 19Xutzꞌet apu jun higuera chuchiꞌ ri bꞌey, xjel apu rikꞌin, pero xaxe ruxaq xril, y kereꞌ xubꞌij chare: ¡Ma jumbꞌey chik kawachin!
Ja atoq riꞌ xchaqiꞌj qa ri higuera. 20Y atoq ri discípulos xkitzꞌet chi keriꞌ xbꞌanatej, xsach kikꞌuꞌx y kereꞌ ndikibꞌilaꞌ: ¿Achike modo chi xchaqiꞌj qa paqiꞌ la higuera?
21Y ri Jesús xubꞌij chake: Kin qetzij nibꞌij chiwa si rix kuqul ikꞌuꞌx#Mt. 17:20; Lc. 17:6; Stg. 1:6 rikꞌin ri Dios, y ma kakaꞌ ta ikꞌuꞌx ndibꞌen pa ruwiꞌ jun achike ndiwojoꞌ, ma xe ta ri achel xinbꞌen yin rikꞌin la higuera ngixtiker ndibꞌen, ngixtiker chuqaꞌ ndibꞌij chare re juyuꞌ reꞌ: Katel e chireꞌ y taꞌatorij awiꞌ pa mar. Y kin ndibꞌanatej wi. 22Nojel ri ndikꞌutuj pa oración, si rix ndikuqubꞌaꞌ ikꞌuꞌx chi ndiyoꞌox chiwa,#Mt. 7:7; Lc. 11:9 kin ndiyoꞌox wi chiwa.
Ri uchuqꞌaꞌ ri kꞌo pa ruqꞌaꞌ ri Jesús
(Mr. 11:27-33; Lc. 20:1-8)
23Atoq ri Jesús kꞌo apu pa rachoch ri Dios y ngerutijoj ri wineq, ri sacerdotes israelitas más kꞌo ruchuqꞌaꞌ kitzij, y ri intéra teq achiꞌaꞌ kꞌo kiqꞌij chin ri tinamit xejel apu rikꞌin y kereꞌ xkibꞌij chare: ¿Achike yoyon qꞌij chawa chi ndabꞌen la ngatajin rikꞌin?#Ex. 2:14; Hch. 4:7 ¿Achike yoyon re uchuqꞌaꞌ reꞌ pa aqꞌaꞌ?
24Y ri Jesús xubꞌij chake: Riyin chuqaꞌ kꞌo jun achike nikꞌutuj razón chiwa. Si ndibꞌij chuwa ri nikꞌutuj razón chiwa, riyin nibꞌij chiwa achike yoyon uchuqꞌaꞌ pa nuqꞌaꞌ chin ngenbꞌen re ngitajin rikꞌin. 25Atoq ri Juan ri Bautista xerubꞌen bautizar wineq, ¿achike xyoꞌon uchuqꞌaꞌ pa ruqꞌaꞌ? ¿Ja ri Dios o xa ruyon chuwech xunojij qa?
Y rejeꞌ kereꞌ ndikibꞌilaꞌ chikiwech: Si xtiqabꞌij chi ja ri Dios, rijaꞌ ndubꞌij pe chaqe: ¿Achike kꞌa roma ma xitaqij ta? 26Pero si xtiqabꞌij chi xa ruyon chuwech xunojij qa, kꞌayew xtukꞌen pe chaqe roma ndiqayek koyowal ri wineq, porque pa kiwech ri wineq ri Juan ri Bautista kin profeta#Mt. 14:5; Mr. 6:20 chin ri Dios. 27Y kereꞌ xkibꞌij chare ri Jesús: Ma qetaman ta, xechajeꞌ.
Ri Jesús xubꞌij chake: Keriꞌ chuqaꞌ riyin ma nibꞌij ta chiwa achike yoyon uchuqꞌaꞌ pa nuqꞌaꞌ chin ngenbꞌen re ngitajin rikꞌin.
Ri parábola pa kiwiꞌ kaꞌiꞌ kꞌajolaꞌ
28Y ri Jesús xubꞌij chuqaꞌ: ¿Achike ndibꞌij rix pa ruwiꞌ re nibꞌij apu chiwa? Kꞌo jun achi ekaꞌiꞌ rukꞌajol. Ri achi riꞌ xjel apu rikꞌin ri nabꞌey rukꞌajol y kereꞌ xubꞌij chare: Nukꞌajol, kabꞌesamej re qꞌij reꞌ pa wulew apeꞌ etikon uvas. 29Pero ri kꞌajol riꞌ xubꞌij chare ri rutataꞌ: Ma niwojoꞌ ta. Pero atoq xqꞌax yan jubꞌaꞌ tiempo, xunaꞌ qa riꞌ chi ma utz ta ri xubꞌen, y xbꞌesamej pa rulew ri rutataꞌ apeꞌ etikon uvas. 30Xjel kꞌa apu ri tataꞌatz rikꞌin ri jun chik rukꞌajol y xubꞌij chare achel xubꞌij chare ri nabꞌey. Y ri rukꞌajol xubꞌij chare ri rutataꞌ: ¡Utz kꞌa! Pero xa ma xbꞌesamej ta. 31Ri Jesús xubꞌij: ¿Achike kꞌa chikiwech re ekaꞌiꞌ kꞌajolaꞌ reꞌ, ri xbꞌanun ri xrajoꞌ ri kitataꞌ? Rejeꞌ xkibꞌij: Ja ri nabꞌey.
Y ri Jesús xubꞌij chake: Kin qetzij nibꞌij chiwa, chi ri moloy teq méra pa rubꞌiꞌ ri rey y ri ixoqiꞌ#Lc. 7:37-50 ri ndikikꞌayilaꞌ kiꞌ chake achiꞌaꞌ, ngenabꞌeyaj chiwech chin ngeꞌok pa ru-reino ri Dios. 32Porque ri Juan ri Bautista xtaq pe chiꞌikajal chin xurukꞌutuꞌ chiwech rubꞌeyal ri chojmilej kꞌaslen ri ndirajoꞌ ri Dios, y rix ma xitaqij ta, pero ri moloy teq méra#Lc. 3:12 pa rubꞌiꞌ ri rey y ri ixoqiꞌ ri ndikikꞌayilaꞌ kiꞌ chake achiꞌaꞌ, kin xkitaqij ri xubꞌij. Y rix maske xitzꞌet ri xbꞌanatej, nixta keriꞌ ma xtzolij ta pe iwánima chin ta xitaqij.
Ri parábola pa kiwiꞌ ri samajelaꞌ itzel kinoꞌoj
(Mr. 12:1-12; Lc. 20:9-19)
33Ri Jesús xubꞌij: Tiwakꞌaxaj chik jun parábola: Kꞌo jun achi rajaw ulew xebꞌerutikaꞌ uvas pa rulew,#Sal. 80:8, 9; Is. 5:1, 2; Jer. 2:21 xubꞌen qejoj chirij ri ulew, xukꞌat jun jul chin ndipitzꞌ ruwech ri uva, y xutzukꞌubꞌaꞌ e chikaj jun chꞌuti achoch chin ndikꞌojeꞌ chajinel chupan. Ri achi riꞌ xuyaꞌ kan ri rulew pa qajik chake jujun samajiy ulew y xutzꞌen bꞌey xbꞌa nej.#Mt. 25:14
34Atoq xril tiempo chin ndichꞌupeꞌ ruwech ri uva, xeruteq jujun rusamajelaꞌ apeꞌ ekꞌo ri eqajayon ri ulew chukꞌutuxik ri ruwech uva rajel ruqajik ri ulew.#Cnt. 8:11 35Pero ri eqajayon ri ulew xekitzꞌen, jun xkichꞌey, jun xkikamisaj y jun xkikꞌeq chi abꞌej.#2Cr. 24:21 36Ri rajaw ri ulew xeruteq chꞌaqa chik samajelaꞌ, más ekꞌiy chikiwech ri xeruteq pa nabꞌey, pero ri eqajayon ri ulew xkibꞌen chake achel xkibꞌen chake ri xetaq pa nabꞌey.
37Pa rukꞌisibꞌel, ri rajaw ri ulew xuteq ri rukꞌajol,#Jn. 3:16; He. 1:2 porque xubꞌij pa ránima: Kin xtikinimaj wi rutzij ri nukꞌajol. 38Pero atoq ri rukꞌajol xbꞌeqaqa chikikajal, y ri eqajayon ri ulew xkitzꞌet, kereꞌ xkibꞌilaꞌ chikiwech: Jareꞌ ri ndok kan rajaw re ulew, tiqakamisaj#Jn. 11:53 chin ndiqabꞌen qichin chare re ulew ndiyoꞌox kan chare. 39Y xkitzꞌen, xkelesaj e chupan ri ulew tikon uva chuwech y xkikamisaj.#Hch. 2:23
40Atoq xtuqaqa rajaw ri ulew, ¿achike xtubꞌen chake ri eqajayon ri ulew, ndibꞌij rix?
41Y rejeꞌ xkibꞌij: Kin xtukꞌis kiqꞌij#Dt. 4:27 ri itzel teq samajelaꞌ riꞌ, y nduyaꞌ pa qajik ri ulew chake chꞌaqa, ri qetzij xkeyoꞌon ri ruwech uva rajel ruqajik ri ulew atoq ndiril ri tiempo chin ndichꞌupeꞌ.
42Ri Jesús xubꞌij chake: Riyin nibꞌij chi ibꞌanun leer ri tzꞌibꞌan kan chupan ri rutzij ri Dios, ri kereꞌ ndubꞌij:
Ri abꞌej ri pa kiwech ri bꞌanuy teq jay ma jun rikꞌaꞌtz chin ta xkikusaj,
Ja abꞌej riꞌ, ri xkꞌatzin chin xok ruchuqꞌaꞌ ruxeꞌ ri jay.
Re samaj reꞌ, ja ri Ajaw bꞌanayon,
Y pa qawech roj, kin jabꞌel wi.#Sal. 118:22; Is. 28:16; Mr. 12:10; Hch. 4:11
Keriꞌ tzꞌibꞌan kan.
43Romariꞌ, nibꞌij chiwa chi ma ndiyoꞌox chi ta qꞌij chin ngixok pa ru-reino#Mt. 8:12 ri Dios. Xa chake chꞌaqa chik wineq ri kin ndikibꞌen ri ndubꞌij ri Dios, ndiyoꞌox qꞌij chin ngeꞌok pa ru-reino ri Dios. 44Konojel ri xketzaq pariꞌ re abꞌej reꞌ,#Is. 8:14; Ro. 9:32, 33 kin ngekiran y konojel ri xtitzaq re abꞌej reꞌ chikij, kin ngemulumuꞌ,#Dn. 2:44; Zac. 12:3 xchajeꞌ ri Jesús.#21:44 Ri tzij ngeqil chupan re versículo reꞌ, ma chupan ta konojel ri ojer teq manuscritos más kꞌo keqalen ekꞌo wi.
45Atoq ri sacerdotes israelitas más kꞌo ruchuqꞌaꞌ kitzij y ri fariseos xkakꞌaxaj ri parábolas xerubꞌij ri Jesús, xkinaꞌ qa kiꞌ chi xa koma rejeꞌ xubꞌij. 46Y kin xkajoꞌ xkitzꞌen e ri Jesús, pero xa ndikixibꞌij kiꞌ chikiwech ri santienta wineq, porque pa kiwech ri wineq ri Jesús kin profeta wi.#Lc. 7:16
Šiuo metu pasirinkta:
Mateo 21: cakX
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.