Ruth 4
4
4:1-12 Boaz Ruth Fifitusira.
1Boaz ira reighi ainda furo da guro teria da bekada, geka se ningari vasa aminda anumbedo kaifa usira. Anumbiriri, Elimelech da nano namendi tofo beká sisira, ava firi gido kori sisira, “Nanda eni, eminge fu anumbase!” Aminge setiri, nu ira anumbusira.
2Anumbetiri, reighi teria ainda gegenembo babojegari ghabu soveni soveni ava setiri fero, ne anumbuseri. 3Anumbetero gido, nu nunda eni tofo beká aikena sisira, “Naomi ava Moab ghedo fira buvudo, oroko nangae da eni Elimelech da enda futuse oriro ari uju erira. 4Na ava saono kasama aso dae resena. Avori, ni uju aresa, gegenembo anumbetera einda dombuda ombaresa. O ni jo uju ae aresa amo, aminge se! Ai resira amo: ombari da fakina tuturoda nimokenari, a namo ninda rogegari.”
Aminge setiri, genemboá sisira, “Nane ombarena.”
5Setiri, Boaz sisira, “Eveva bekári, Naomi kena enda da emboro mo, ni ofuse, Moab embo, rori Ruth bu fitaso, sasingu siroredo genembo ambari ainda oro sirorari enda roeraá nunda imendi gamendi da tofo arira.”
6Aminge setiri, genemboá mino sisira, “Aminge saresa amo, enda ainda ombari da fakina namokena ava mutu doyarena. Ai resira amo: amboda enda amo jo nanda sasingu imemesiri da tofo ae arira. Nine ombu, na jo ombae arena.”
7Ainda sifoda, Israel aminda enda futuse oriro ari embo ai nenda ata anoso kosughe ombari embokena mutudo ghuseri. Amingeoro budo ghusera, aimi ari avaga dambu edo ghusira. 8Ágido, genemboá nu dotutuse, Boaz ombare dae “Nine ombu!” sise, nunda ata anoso kosughe Boaz kena futusira.
9Mutiri budo, Boaz gegenembo, reighida giti jijighigari a mave aminda irisera aikena sisira, “Ne isambu oroko eminda gosevo, nenda dombuda Naomi kena roera isambu, Elimelech a nunda sasingu Kilion nengae Mahlon ghaeda tofo ava, nane ereofena. 10Ofuse, Mahlon da rori, Moab embo Ruth barago, nane tofo use, nanda evetudae ererurena. Amingaono, genembo ambari ainda enda roera nunda tofo ururari, reighi eminda nunda oro javo jo dadabae, evovodae irarira. Ari emo oroko nene gosevo, nane tofo eteni.”
11Aminge setiri, gegenembo, reighi da giti jijighigari a mave aminda irisera, aimi siseri, “Ai, ni rea etesa namane geri. Bajari nangedo esimbugari, nearo nimokena ghaguru, kau Rachel nengae Leah ghae Jacob kena sasingu ghagurugo usera, aminga ava aeti! A nune esimbugari oro Ephrath ondi jokáda Bethlehem eminda ni genembo guguade aetesi! 12Ninda mandi sasingu evetu seka bajari eikena Bajari mutarira amo, ninda ghaguru nange kau Judah nengae Tamar ghae da mandi Perez da ghagurugo iraeti!”
4:13-22 Boaz da Imendi Gamendi
13Amingedo, Boaz Ruth nunda evetudae budo, nengae era nunda natida iriari. Irise, Bajari Ruth esimbugetiri kauri edo, mandi ava fufusira. 14Fumbiri, Bethlehem evevetu aimi eredo, Naomi kena siseri, “Bajaridae sakai saore! Nu oroko ninda imendi eni, nimo kaifa are dae sedo mutira. Mandiá nangedo Israel eminda genembo binode mo, nune aeti! 15A nune, ni evetako aresa amo, nimokena irari seka bu fuse, ni kaifa e tavo arira. Ainda beká mo, ninda mandaro, ni dubo bu gogoghomberaira, aimi nu fumbira. Nunda dubo bari nimokena teria bekári. O ni vide jamena ghabu soveni sembu sovenida etoto iraetera amo, nenda dubo bari feghako aeti, jo ninda mandaro da kaveverago iraeri.”
16Naomi mandiá, nune budo unduse kaifa e tavo usira. 17Evevetu tinguda iriara aimi, mandi ainda javo Obed jijighuseri. Edo evetu genembo isambukena siseri, “Naomi da mandi siroretira.” siseri. Obed mo, Jesse da numamori. Kotugo Jesse mo, David da numamori.
18Perez da sasingu imendi gamendi eviri:
Perez mo, Hezron da numamori.
19Hezron mo, Ram da numamori.
Ram mo, Amminadab da numamori.
20Amminadab mo, Nahshon da numamori.
Nahshon mo, Salmon da numamori.
21Salmon mo, Boaz da numamori.
Boaz mo, Obed da numamori.
22Obed mo, Jesse da numamori.
Kotugo Jesse mo, David da numamori.
Šiuo metu pasirinkta:
Ruth 4: kpr
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2003, Wycliffe Bible Translators, Inc. All rights reserved.