Mose I, 12
12
Mawu tsɛ Abram
1 #
Nits 7.2-3; Heb 11.8 Yawɛ de Abram ke, “Jee o zugba a nɔ, kɛ o ma a mi, kɛ o weku li a ngɔ kɛ ya zugba nɛ ma tsɔɔ mo ɔ nɔ. 2Ma ha mo nina babauu, nɛ a maa pee je ma agbo. Ma gbaa mo, nɛ ma ha o ma he biɛ, nɛ a maa gu o nɔ kɛ gbaa nihi babauu.
3 #
Gal 3.8
Nihi nɛ gbaa mo ɔ, ma gbaa mɛ.
Se ni nɛmɛ nɛ gbiɛɛ mo ɔ,
imi hu ma gbiɛ mɛ.
O nɔ ma gu kɛ gbaa je ma amɛ tsuo.”
4Abram ye jeha nyingmi kpaago kɛ enuɔ benɛ e hia kɛ je Haran kaa bɔ nɛ Yawɛ de lɛ ke e pee ɔ, nɛ e kɛ Lot ho. 5Abram ngɔ e yo Sarai, kɛ e wɔfase Lot, kɛ weto ní, kɛ nyɔguɛhi nɛ a na ngɛ Haran ɔ, nɛ a pue nɔ kɛ ho Kanaan zugba a nɔ ya.
Benɛ a ya su Kanaan ɔ, 6Abram nyɛɛ kɛ be ngɛ zugba a nɔ kɛ ya su tso ngua a nɛ ngɛ More ngɛ Shekem ɔ he. Jamɛ a be ɔ mi ɔ, Kanaan bi ɔmɛ ngɛ zugba a nɔ kɛ mwɔɔ. 7#Nits 7.5; Gal 3.16 Yawɛ je e he kpo kɛ tsɔɔ Abram nɛ e de lɛ ke, “Zugba a nɛ ma ngɔ kɛ ha o nina a ji nɛ ɔ nɛ.” Lɔ ɔ he ɔ, Abram ma bɔ sami la tɛ ngɛ lejɛ ɔ kɛ ha Yawɛ, nɔ nɛ ba je e he kpo kɛ tsɔɔ lɛ ɔ. 8Lɔ ɔ se ɔ, e hia kɛ je lejɛ ɔ kɛ ho yoku zugba a nɛ ngɛ Betel beleku je ɔ nɔ ya. E ya ma e bo tsu ɔ ngɛ lejɛ ɔ, ngɛ Betel kɛ Ai a kpɛti; Betel ngɛ bonyoku je, nɛ Ai ngɛ beleku je. Lejɛ ɔ hu e ma bɔ sami la tɛ ha Yawɛ nɛ e ja lɛ. 9Pee se ɔ, Abram je lejɛ ɔ, nɛ e tsa e blɔ hiami ɔ nɔ kɛ gu Kanaan leneyi blɔ. Ke e nyɛɛ bɔɔ e to si bɔɔ.
Abram ngɛ Egipt
10Jamɛ a be ɔ, hwɔ ba Kanaan zugba a nɔ, nɛ lɔ ɔ he ɔ, Abram pue nɔ kɛ ho Egipt ya nɛ e ya hi lejɛ ɔ be saii. 11Benɛ e piɛ bɔɔ nɛ a maa su Egipt ɔ, e de e yo Sarai ke, “Sarai, i le kaa yo nɛ he ngɛ fɛu ji mo. 12Ke Egipt bi ɔmɛ na mo ɔ, a ma de ke, ‘E yo ji nɛ ɔ nɛ’; kɛkɛ a maa gbe mi, se moo lɛɛ a be mo nɔ́ ko pee. 13#Mose I, 20.2; 26.7 Lɔ ɔ he ɔ, de mɛ ke ye nyɛmiyo ji mo. Ke o de mɛ ja a, o he ɔ, a be mi nɔ́ ko pee, nɛ a maa hyɛ ye nɔ saminya.” 14Benɛ Abram ba su Egipt ɔ, Egipt bi ɔmɛ na kaa e yo e he ngɛ fɛu saminya. 15Egipt matsɛ ɔ he ni komɛ na yo ɔ, nɛ a ya je e yi kɛ ha Farao ɔ; lɔ ɔ he ɔ, a ba ngɔ lɛ kɛ ho matsɛ we ɔ mi ya. 16Sarai he ɔ, matsɛ ɔ hyɛ Abram nɔ saminya; Abram na jijɔhi, nahi, tejihi, nyɔguɛhi nyumuhi kɛ yihi, kɛ afukpɔngɔhi babauu.
17Abram yo Sarai he je ɔ, Yawɛ ha hiɔ nɛ nya wa ko ba sɛ Farao ɔ kɛ e we mi bi ɔmɛ a kpɛti. 18Kɛkɛ nɛ Farao ɔ tsɔ ya tsɛ Abram kɛ ba, nɛ e bi lɛ ke, “Mɛni o pee mi nɛ ɔ? Mɛni he je o de we mi ke o yo ji yo ɔ? 19Mɛni he je o de mi ke o nyɛmiyo ji lɛ, nɛ i ngɔ lɛ ngɔ pee ye yo ɔ? Hyɛ, o yo ɔ ji nɛ ɔ nɛ; ngɔɔ lɛ, nɛ o kɛ lɛ nɛ je hiɛ ɔ!” 20Matsɛ ɔ fa e we bi ɔmɛ nɛ a ha nɛ Abram, kɛ e yo ɔ, kɛ e we mi bi ɔmɛ je ma a mi kɛ a nɔ́ tsuaa nɔ́.
Šiuo metu pasirinkta:
Mose I, 12: Dangme
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible in Dangme © Bible Society of Ghana, 2018.