Mose I, 4
4
Kain kɛ Habel
1Adam kɛ e yo Hawa na bɔmi, nɛ Hawa ba na mi nɛ e fɔ binyumu, nɛ e wo lɛ biɛ ke Kain. Hawa de ke, “I wo lɛ kikɛmɛ a biɛ nɛ ɔ, ejakaa Yawɛ ji nɔ nɛ piɛ ye he nɛ i kɛ na binyumu nɛ ɔ nɛ.” 2Kain se ɔ, Hawa fɔ binyumu ekohu nɛ e wo lɛ Habel. Habel ní tsumi ji to hyɛmi, se Kain lɛɛ ngmɔ hulɔ ji lɛ. 3Be ko ɔ, Kain ngɔ e ngmɔ mi ní ɔmɛ eko kɛ ba sã bɔ ha Yawɛ. 4#Heb 11.4 Habel hu ngɔ kekleekle bi nɛ e jijɔ ɔmɛ eko fɔ ɔ kɛ ba. E gbe lɛ, nɛ e kɛ lo ɔ hehi nɛ wo zɔ ɔ sã bɔ. Yawɛ bua jɔ Habel kɛ e bɔ ɔ he. 5Se Kain lɛɛ Yawɛ na we e he bua jɔmi; e bɔ ɔ hu Yawɛ he we. Enɛ ɔ he je ɔ, Kain mi mi fu wawɛɛ nitsɛ, nɛ e hɛ dɔ. 6Kɛkɛ nɛ Yawɛ bi Kain ke, “Mɛni he je o mi mi fu nɛ o tu o hɛ mi kikɛ nɛ ɔ? 7E ji o pee nɔ́ nɛ hi jinɛ i ko na o he bua jɔmi. Se akɛnɛ o ya pee we nɔ́ nɛ hi ɔ, yayami buu si ngɛ o sinya a nya kaa lohwe dikalɔ nɛ e miɔ nɛ e maa tu mla mo. Se, hyɛ nɛ o ye yayami ɔ nɔ.”
8 #
Mat 23.35; Luk 11.51; Yoh I, 3.12 Pee se ɔ, Kain de e senɔ Habel ke, “Ha nɛ waa ho nga nɔ ya.” Benɛ a ngɛ nga a nɔ ɔ, Kain nu e senɔ ɔ nɛ e gbe lɛ.
9Kɛkɛ nɛ Yawɛ bi Kain ke, “Jije o senɔ Habel ngɛ?”
E he nɔ ke, “I li; imi lɛ i hyɛɛ ye senɔ ɔ nɔ lo?”
10 #
Heb 12.24
Jehanɛ, Yawɛ bi lɛ ke, “Mɛni ji nɔ́ nɛ o pee nɛ ɔ?” E ya nɔ nɛ e de Kain ke, “O senɔ ɔ muɔ ɔ nɛ ngɛ zugba a mi ɔ, e hia kaa ma ye e he lue. 11Zugba a mii o senɔ ɔ nɛ o gbe ɔ e muɔ ɔ. Lɔ ɔ he ɔ, a gbiɛ mo. 12Ke o hu ɔ, zugba a be ní bae ha mo hu; o maa bɔ kó, nɛ o maa wo lalaalo ngɛ je ɔ mi.”
13Kain de Yawɛ ke, “Ye tue gblami ɔ nya wa ha mi tsɔ. 14Mwɔnɛ ɔ, o fie mi kɛ je zugba a nɔ, nɛ i be o hɛ mi bae hu. Ma bɔ kó, nɛ ma wo lalaalo ngɛ je ɔ mi; nɛ nɔ tsuaa nɔ nɛ maa na mi ɔ maa gbe mi.”
15Se Yawɛ he nɔ ke, “Dɛbi, pi ja! Ke nɔ ko gbe mo ɔ, a maa gbla nɔ ɔ tue si kpaago.” Lɔ ɔ he ɔ, Yawɛ to Kain he so, bɔ nɛ pee nɛ ke nɔ ko na lɛ nɛ e ko gbe lɛ. 16Enɛ ɔ se ɔ, Kain je Yawɛ hɛ mi nɛ e ya hi Nod zugba a nɔ, ngɛ Eden beleku je.
Kain nina
17Kain kɛ e yo ɔ na bɔmi; yo ɔ ngɔ hɔ nɛ e fɔ binyumu, nɛ a wo lɛ biɛ ke Henok. Jamɛ a be ɔ, Kain ngɛ ma ko poe, lɔ ɔ he ɔ, e ngɔ e binyumu ɔ biɛ kɛ wo ma a. 18Henok fɔ Irad, Irad fɔ Mehuyael, Mehuyael fɔ Metushael, nɛ Metushael fɔ Lamek. 19Lamek ngɔ yihi enyɔ, Ada kɛ Zila. 20Ada fɔ Yabal; e nina ji ni nɛmɛ nɛ a hii bo tsuhi a mi nɛ a lɛɛ lohwehi ɔ nɛ. 21A tsɛɛ e nyɛminyumu ke Yubal; lɛɛ e nina ji saku fiali kɛ bɛ kpali tsuo. 22Zila hu fɔ binyumu; e biɛ ji Tubal Kain. Lɛɛ e kɛ akɔblee kɛ dade sɔɔ níhi. Tubal Kain nyɛmiyo ji Naama.
23Ligbi ko ɔ, Lamek de e yi ɔmɛ ke,
“Ada kɛ Zila, nyɛɛ bu mi tue.
Lamek yihi, nyɛɛ bu nɔ́ nɛ ma de ɔ tue.
I gbe niheyo ko,
ejakaa e fia mi nɔ́, nɛ e plaa mi.
24 #
Mat 18.22
Ke a maa ye Kain he lue si kpaago ɔ,
Lamek lɛɛ a maa ye e he lue
si nyingmi kpaago kɛ kpaago.”
Set kɛ Enosh
25Adam kɛ e yo ɔ na bɔmi ekohu nɛ e fɔ binyumu, nɛ Hawa wo lɛ biɛ ke Set. Hawa de ke, “I wo lɛ kikɛmɛ a biɛ nɛ ɔ, ejakaa Mawu ha mi binyumu kɛ to Habel nɛ Kain gbe lɛ ɔ nane mi.” 26Set hu fɔ binyumu nɛ e wo lɛ biɛ ke Enosh. Jamɛ a be ɔ ji be nɛ nimli bɔni Yawɛ biɛ tsɛmi kɛ lɛ jami.
Šiuo metu pasirinkta:
Mose I, 4: Dangme
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible in Dangme © Bible Society of Ghana, 2018.