Saint Luc 4
4
1Da Jésus mi mba ka Saint‐Esprit, ka ourou an mbi Jourdain, da Saint‐Esprit mi lang nè sé guè woropa, 2guèl ko̱ zabolo mi yak nè ma name bongkè‐nèng. Ka name o̱kèo̱ kè tane ga son laka ya, da, afal ko̱ name o̱kèo̱ mi ta tou, nzala mi i nè ta. 3Da zabolo mi sa hi nè: Tokoré mome ba Goune a Ouone, mo sa hi kone aïn an kème féré tèn ba mapa. 4Jésus mi féré sa hi nè: Mahana ko̱ mi dé: Yé njoukouna ma yan ba baï toula mapa ka ho̱kè ya.
5Da zabolo mi kaïn miri nè sé guè gangna guèl ka to̱ko̱ bilkaouli bon a njou‐koukoulali hi nè gata. 6Da zabolo mi sa hi nè: Mè ma hi njèran aïn bon hi mo, tèn jonafèn aklili, baï ko̱ aïn ba ami, da mè mi hi njoukou on ko̱ mème jiji. 7Mono, tokoré mome houkou an mbèli ka hiou mi, fènli bon ba amo. 8Da Jésus mi féré sa, ka sa hi nè: [Mo sé kaïn ni Satan,] mahana ko̱ mi dé: Mo ma hiou ba Nanjou, Ouone no, ka nding ba bakara hi ba kè ka ho̱kè.
9Da zabolo mi do̱li nè gui pou Jérusalem, da bi nè toul gangna toul temple, ka sa hi nè: Tokoré mome ba Goune a Ouone, mo mbame guè tiya; baï ko̱ mahana ko̱ mi dé:
10Yé kè sa bi njaka ange nèli baï no,
Baï an klime pèng mo;
11da,
Yé kli ma to̱li mo ka ndo̱ko̱ kli,
Baï an bo̱ko̱ mi nda toul kone ya.
12Da Jésus mi féré sa, ka sa hi nè: Mahana ko̱ mi sa: Mo ma baï léna Nanjou, ko̱ ba Ouone no ya.
13Da ko̱ mboro yaknafèn bon a zabolo mi o̱tou, kè yèng nè bo̱l tèn name aféké.
14Da Jésus mi féré sé guè guèl Galilée jing njèran a Saint‐Esprit, tiri baï nè on mi ti manguèl pouli bon an ndourou. 15Da kè to̱ko̱fèn an bil synagogue aklili, da njoukouli bon mi jone nè ta.
16Da kè sé guè pou nè Nazareth, an guèl on ko̱ kème hon an ndourou, da, mahana yé ba do fèn ndingna nè on, kè sé guè bil synagogue ka name sabbat. Kè ourou siya baï kèna takarata, 17da kli hi livre hi nè ko̱ prophète Ésaïe mi dé. Da kè sél livre on bo̱l tèn guèl dénakè on:
18Esprit a Nanjou makaou touli,
Baï ko̱ kème same mi baï sana mboura bèlabaï hi foïna njoukouli;
Kè pi mi baï haïna laou kli on ko̱ mi ho̱ko̱ tou,
19Da baï sana séla sal an sola koïli,
Da bourou none akli on ko̱ mi foukourou,
Da baï ikina go̱ra kli on ko̱me to̱ko̱ssé
Da sana mboura ko̱ saka ndingna mbo̱l a Nanjou mi tèn tou.
20Da kème ka livre on tou, ka féré hi njou‐bakara, da kaou. Da none a njoukouli on bon an bil synagogue mi ènrèn guè monè wongnoli.
21Da kè tissaon baï sana hi kli: Name aïn, baïnjaka a Takarata a Ouone on, ko̱ ouime la kassénaï, mi tèn kala ka babaï tou. 22Da njoukouli bon mi la bongbaï nè; da laou kli bon mi sé siya baï toul baïnjaka ndingna mbo̱l on ko̱ tèn kala ka njakè, da kli sa: Kè on mi ba goune a Joseph ya lé? 23Da Jésus sa hi kli: Babaï, oui ji sana goulébaï on gui ba moni: Médecin, haï mono fèno; fèn aïnli ko̱ na la ko̱ mome nding an pou Capernaüm, mo ndé nding on an guèl aïn an gadi pou no kéng. 24Da kè sa: Babaï, mi mè sa hi oui: Prophète hana mbéo tane mapélékè an dodok pou nè ya. 25Babaï, mi mè sa hi oui, jinguèl soko waïn soréli makaou nyèta an Israël ka name a Élie, ko̱ nonkala mi tou bilou ma saka saï ka féou difala‐mbéo, ko̱ bana mi mba nyèta an koukoula bon: 26da Ouone mi tane ga pi Élie hi kli ya, bo̱l ba waïn soré mbéo an pou Sarepta an koukoula guèl Sidon. 27Da njou‐ndo̱wèli nyèta makaou an Israël, ka name a prophète Élisée; da hana mbéo an woro kli tane ga gui tangta ya, bo̱l ba Naaman ko̱ ba njou‐Syrie.
28Da hèrè mi mba kli bon on ko̱ mi kaou an bil synagogue, ko̱ klime la baï on. 29Da kli ourou siya, ka ni nè tèn kala an bil pou, da ba nè sé bo̱l tèn gangnaguèl on ko̱ klime bi pou rou, an klime wou nè guè tiya. 30Da kè ta an woro kli da sé mboro nè.
31Da kè diri sé Capernaüm, pou mbéo a guèl Galilée. Da kè pane to̱ko̱nafèn hi kli ka name sabbat. 32Da laou kli mi sé siya baï toul to̱ko̱nafèn nè, baï ko̱ baïnjakè mi bon jing njèran.
33Da njoukou mbéo makaou jing esprit a zabolo dakame an bil synagogue, da kè wan njaka mingta, ka sa: 34Eh! fème ko̱ mbèl mo jing na lé, Jésus an pou Nazareth? Mome han gui tou baï sèkèra na lé? Mè toutou nono, kong mo ba guè: Njou‐tangna fofoto a Ouone. 35Da Jésus ba baï hi nè, ka sa: Mo tou njako̱ bi rou, ka tèn kala an bila njoukou aïn. Da ko̱ zabolo on mi wou nè bou koukoula an hanguèl kli, kè tèn kala an bil an njoukou on, da kè tane ga nding bèlya jing nè ya. 36Da go̱ro̱ kli bon mi sé siya, da kli sa jing hana ka sa: Baïnjaka on ba fèn lé? Baï ko̱ ka bina baïnjaka da njèran, kè sa bi njaka esprit dakamli, da klime tèn kala. 37Da tiribaï nè mi ti manguèl bon an ndourou.
38Da kè ourou an synagogue da sé guè voula Simon. Da ma a waïn a Simon mi na jangma, da monè mba hèlè nyèta, da kli sa jo̱jo̱ nè baï waïn on. 39Da kè o toulè, ka to jangma mbana hèlè mone on, da hèlè monè mi vo tou, da koukoulion, waïn on mi ourou siya ka nding bakara hi kli.
40Da ko̱ séssé mi ri tou, njoukouli on bon jing njou‐jangmali toutoul toutoul, kli fan kli gui monè; da kè goukou ndo̱kè an toul kli mbéo mbéo bon, ka haï mone kli. 41Da zabololi kéng mi ndé tèn kala an bila njoukouli nyèta, kli wan njaka, ka sa: Mo ba Goune a Ouone! Da kè to kli ka gna bi njaka kli an klime tane sa baï ya, baï ko̱ klime toutou ba kè ba Christ fènè.
42Ko̱ guèl mi taka tou, kè ourou ka sé guè woropa. Da ro̱kè njoukouli mi nza nè, da kli guè bèl monè; da kli ji dèna nè, baï an kème ta kli ka yèng kli bi ya. 43Da kè sa hi kli: On ba baï ni baï sana mboura bèlabaï a bilkaou a Ouone hi pou afékéli kéng; baï ko̱ nono on mi ko̱ kè pi mi. 44Da kè sa mboura an bil synagogueli an guèl Galilée.
Šiuo metu pasirinkta:
Saint Luc 4: KBN1947
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Published by the British and Foreign Bible Society in 1947.