Matie 6

Zezwii yɛ 'pʋäwa a 'nyɛnyʋʋ a dɛ bhïla

1A ‑kä ‑li a ‑li nʋä yii, a nɩ 'nɛmanɩ anyɩ 'wʋ, a nɩ tɩ 'yila sɛ tɛlɩ. Ɛ'ɛ ‑bhö nyɩasɛ, ‑maa a ‑kä ‑sɩbhä 'zʋ 'n wa ‑kanyɩ 'ylɩmö, wa ‑kä a 'dɩ a dɩ ‑sɛɛ, a dɩba Lagɔ ‑ɔ ‑wʋä ‑mä ghäyɩ 'wʋʋ, ɔ 'naa 'kanyɩa'a yɩ 'ylimö a ‑lu 'nyɛ. 2Zaa, ‑n ‑kä 'pʋanyɔ ‑lu 'nyɛɛ yii, tɩ legïle bhlɩ, sɛɛ 'kwlɩsɔkäwaa zʋä ‑mä Zwiiföwa a Lagɔbïdi 'mö ‑nyɛ ‑mä 'ywii 'wʋ 'sɔɔ, tɩ ‑sɩbhä zʋ. ‑Maa wa ‑kä wabhlɩ sa'a 'zʋʋ, nɩkpa 'kä wa 'dɩ a dɩ ‑sɛ a za, nza wa zʋä ‑sɩbhä. ‑Tiamö n nyanyɩɛ dɛ'ɛ 'dɩ nɩɩ: Nɩkpa ‑kä sa'a wa 'dɩ a dɩ ‑sɛɛ, wa yɛ da'a 'wa 'pɛna ghlɩ 'wë. 3‑Maa ‑nmö ‑naa, ‑n ‑kä 'pʋanyɔ ‑lu 'nyɛɛ yii, sɛɛ ‑na'a dlɩ a bheyi a'bhë 'naa 'kää sɛ ‑yi, 'nyɛ ‑sɩbhä, 4nzɩɩ yɩ 'kä yɩ 'wuë 'wimö 'wʋ 'plɩ. ‑Sɩbhä a dɔ'wʋ, ‑na dɩba Lagɔ ‑ɔ yɩlɩɛ ‑lii 'wuë ‑yɩ plɩɛ ‑mä zizolɩ 'mö 'wʋʋ, ɔ ‑yimö yɩ 'ylimö a ‑lu 'nyɛ.

Bhibhebhibhiuu

(Lwiikö 11.2-4)

5A ‑kä bhibhee yii, 'kwlɩsɔkäwaa a saa, a nɩ tɩ ‑sɩbhä 'zʋ. Wa ‑kä wabhlɩ bhibhee yii, ‑mä Zwiiföwa a Lagɔbïdi 'mö ‑nyɛ ‑mä 'ywii 'wʋ 'sɔ, dɛɛ nɩkpa suä, ‑lɛ wa möä 'nɩgböä 'n wa bhibhee, nɩkpa 'kʋäa 'ylɩmö a za. Mɩɩ nɛnuëë dlɩ yɔwʋ. ‑Tiamö n nyanyɩɛ dɛ'ɛ 'dɩ nɩɩ: Wa yɛ da'a wa 'pɛna ghlɩ 'wë. 6‑Maa ‑nmö ‑naa, ‑n ‑kä bhibhee yii, plɛ ‑mä ‑na'a ‑budumlɩ, ‑gba ‑gbëlea, ‑na dɩba Lagɔ, dɛɛ ‑bɛ 'nɩɛ 'wʋ yɩlɩ, ‑ɔ ‑pʋnɩmöä ‑lɛ 'yukwlii, ‑n 'kɔ ‑lɛ bhibhenɩ. ‑Sɩbhä a dɔ'wʋ, ‑na dɩba Lagɔ ‑ɔ yɩlɩɛ ‑lii 'wuë ‑yɩ plɩɛ ‑mä zizolɩ 'mö 'wʋʋ, ɔ ‑yimö yɩ 'ylɩmö a ‑lu 'nyɛ. 7A ‑kä Lagɔ bhibhee, a nɩ tɩ nyɩasɛ bhïla ‑këkëkë. Nɩkpaa ‑waa Lagɔ ‑yi, a nɩ tɩ 'wa saa 'zʋ. Wa ‑tɔnɩ wabhlɩ nɩɩ, wa ‑kä bhïla ‑këkëkë 'n Lagɔ 'kʋä 'yukwli ‑pʋnɩ. 8‑Maa abhʋa abhlɩ, a dɩba Lagɔ, a 'nɩ ‑bhlɛ gbʋ ‑dɩ a'bhë ‑kë, ɔ ‑yi 'saa ɔ 'kanyɩ 'nyɛɛ. Zaa, nɩkpa ‑waaa Lagɔ ‑yi, a nɩ tuë manɩ. 9A ‑kä Lagɔ bhibhee, a nɩ nʋ nɩɩ:

‑Aa dɩba Lagɔ ‑ɔ ‑wʋ ‑mä ghäyɩ 'wʋ,

nɩkpa 'wuë nɩ 'ghlimanɩ ‑na 'nglɩ.

10‑Na'a 'kämanɔɔ nɩ ghlɛ glɔ.

Sɛ wa zʋä ‑mä ghäyɩ 'wʋ sɛ ‑n 'yɩbhää,

gbä wa 'kä ‑sɩbhä mä'ä dʋdʋ 'wʋ 'zʋmö.

11Nyɩanyɩ zɩ'ɛ a lile.

12Sɛ ‑a 'tatinɩ ‑a'bhɩa a 'nyinyloli gbʋ 'yii,

‑yaya, 'tatinɩ ‑sibha" ‑a'a 'nyinylolii a gbʋʋ 'yi.

13‑Tɩnyɩ 'yi 'tatinɩ ‑a nɩ tɩ 'nyinyloli 'mö bhlinɩ,

‑maa ‑sanyɩ Sataa a 'mötɛɛnɔɔ ngli.

[Dɩba, ‑na 'yize ‑nmö 'kämanɩɛ, ‑nmö 'tɛɛ 'mö,

‑nmö 'ghïliɛ 'kwädlɩkwädlɩnɩ. ‑Amɛɛ!]

14Nɩkpa ‑kaanyɩ 'nyinyloli 'wlu nʋ, 'n a ‑kä yɩ gbʋʋ 'yi 'tatinɩɩ, a dɩba Lagɔ ‑ɔ ‑wʋä ‑mä ghäyɩ 'wʋʋ, ɔ yi a ‑nɩɩ a gbʋʋ 'yi 'tatinɩmö, 15‑maa nɩkpa ‑kaanyɩ 'nyinyloli 'wlu nʋ, 'n a 'nɩ yɩ gbʋʋ 'yi 'tatinɩɩ, a dɩba Lagɔ 'naa 'kä 'a 'nyinylolii a gbʋʋ 'yi 'tatinɩmö.

Sɛ'ɛ Zezwii gbää suplɛplʋ a dɛ

16A ‑kä su 'mö ‑wʋʋ, a nɩ tɩ kwlɩɩ 'mö nyimanyimanɩ 'kwlɩsɔkäwa a saa. Nyɩasɛ n'n‑ä ‑sɩbhä gbä, ‑maa wa ‑kä wabhlɩ su plɛɛ, 'wa kwlɩɩ 'mö wa nyimanyimanɩɛ 'mö nzɩɩ nɩkpa 'wuë 'käa sɛ ‑yi nɩɩ, su 'mö wa ‑wʋä. 17‑Tiamö n nyanyɩɛ dɛ'ɛ 'dɩ nɩɩ, wa yɛ da'a 'wa 'pɛnaa ghlɩ 'wë. ‑Maa ‑n ‑kä ‑naa su plɛɛ, bido 'tɩɩ, ‑n 'kä ‑na'a nyukwëa 'mö 'fla. 18‑Lɛ a dɔ'wʋ, nɩkpɛ 'naa 'kä sɛ yɩbhlɩnɩ nɩɩ, su 'mö ‑n ‑wʋä. ‑Maa na dɩba Lagɔ, dɛɛ ‑bɛ 'nɩɛ 'wʋ yɩlɩ ‑ɔ yɩlɩɛ ‑lɛ 'wʋʋ, ɔ 'yize, mɔɔ 'kää sɛ ‑yi. ‑Sɩbhä a dɔ'wʋ, ‑na dɩba Lagɔ, ‑ɔ yɩlɩɛ lii 'wuë ‑yɩ plɩɛ ‑mä zizolɩ 'mö 'wʋʋ, ɔ ‑yimö yɩ 'ylimö a ‑lu 'nyɛ.

Sɛ'ɛ Zezwii gbää ‑tiamö a lɩɩ a dɛ

(Lwiikö 12.33-34)

19Mä'ä 'pɩwʋ a wʋlʋnɔɔ, a nɩ tu 'wlu 'yɩbha. ‑Maa mä'ä 'pɩwʋ a wʋlʋnɔɔ 'wuë wa 'yɩbhaa 'wluu, ngɔnʋʋ ‑nyɛ gogoliea 'sɔ mɩɩ nyimuä. 'Wiwa dɩ ‑lɛ ‑gbïli, wa ghlu 'wi. 20‑Maa ‑mä Lagɔ yɔwʋ ‑mä a nɩ kwïlanɩ 'a wʋlʋnɔɔ. Ngɔnʋ ‑nyɛ gogolie 'sɔ 'nɩɛ ‑mä ‑wʋ, ‑wa 'kää ‑lɛ ‑gbïli ‑dɩ wa 'kʋ 'wi ghlii, wa'aa ‑mä ‑wʋ. 21Ɛ'ɛ ‑bhö nyɩasɛ, ‑maa dɛɛ ‑na'a wʋlʋnɔɔ ‑wʋä, ‑lɛ ‑na'a dlɩɩ ‑wʋä.

Zezwii yɛ nɩkpɛ 'a 'yila 'napɛ 'wʋ pälɩ

(Lwiikö 11.34-36)

22Nɩkpɛ a 'yila, yɩ 'kä ‑bhɩɛ 'napɛ. ‑Na'a yilaa ‑kä sasɛ lɩɩ, ‑na 'wuë lɩlɛ mö ‑n ‑wʋä. 23‑Maa 'n yɩ ‑kä 'klʋ yuluu, ‑na 'wuë, 'yuylukwë mö ‑n ‑wʋä. Lɩlɛ ‑ɛ ‑wʋmöä 'mö 'n ɛ ‑kä 'wʋ 'ngïma‑a, ‑na 'wuë, guylukwë mö ‑n ‑wʋä.

A nɩ tɩ moni a ‑lagɔ 'wʋ 'zʋa

(Lwiikö 16.13)

24Nɩkpɛ 'nɩɛ bhɛnɩ ɔ 'kä 'bhidɩbawa 'sɔ 'yli ‑wʋ. ‑Bhlʋ ɔ 'kää ‑wa ɔ 'kä ‑bhlʋ ‑gblɩ. ‑Bhlʋ ɔ 'kää 'klʋkpamö 'zʋ, ɔ 'kä ‑bhlʋ 'ylimö fälanɩ. Sɛ ‑bhʋlʋ ‑kpɔ 'la ‑sɩbhä a'aa bhɛnɩ a 'kä Lagɔ ‑nyɛ moni 'sɔ 'yli ‑wʋ.

A nɩ 'tɛɛnɩ Lagɔ dlɩ

(Lwiikö 12.22-31)

25'Saa a 'kää 'kwädlɩ li a 'kä ‑bhölɩɩ, wʋ dlɩ nɩ tanyɩ libho. 'Saa a 'kää 'mö ‑pla a dɔ'wʋ, dlɩ nɩ tanyɩ'ɛ libho. Nyɩasɛ n'n‑ä ‑sɩbhä gbä, ‑maa ‑bhölɩbhölɛɛ zi lile 'wʋ. Kpökpaa kä'ɛ dɛsɛ, a zi ‑banɩ 'wʋ. Ɛ'ɛ ‑bhö ɔ mi? 26Zɩɩ ‑yɩ ‑buluä ‑mä ghäyɩ 'wʋ, a yiliiɛ ‑ka 'wʋ. Yɩ'ɩ glʋ. Yɩ'ɩ ‑dɩ. Yɩ'ɩ 'gbɩ ‑kä. ‑Sɩbhä yɩ ‑wʋ 'mö, ‑maa a dɩba Lagɔ ‑ɔ ‑wʋä ‑mä ghäyɩ 'wʋ ɔ nyɩ lile 'yize. A'a bhä sɛ ‑yi nɩɩ, Lagɔ a dɔ'wʋ a kä dɛsɛ tenyii, a zi zɩɩ 'wʋ ‑a? 27A gla'mö nɩkpɛɛ ‑mɔ, ‑mä 'ɔ 'yʋyʋayʋyʋʋ 'mö, ‑ɔ bhɛnɩ bhä ylɩɩ ɔ 'kää mä'ä 'pɩwʋ ‑sɛ ‑gömö, ɔ 'kä ‑lɛ 'ylɩ ‑bhlʋ a'bhë 'zʋ? 28Zaa, sɛ yɩ ‑wʋ ɔ 'mö, 'n dlɩ libhëanyɩ bhä 'möpälabanɩ a za 'nɩ? ‑Titii ‑yɩnyɩ böö nɛnɩɛ 'ylimö tenyii, sɛ yɩ wlʋä, a yɩlɩɛ ‑ka ‑sɩbhä 'wʋ. Yɩ'ɩ nʋ libho, yɩ'ɩ 'kplɛ yɩnyɩ ‑banɩ 'wʋ. 29‑Maa n nyanyɩ 'dɩ nɩɩ, 'bhlɩlowli Salomɔɔ a'bhë, ‑mä 'ɔ wʋlʋnɩbanɩɩ 'wuë gla'mö, ‑bäna a ‑maa 'kä 'ylimö nɛnɩ, ‑a 'kä ‑titi 'la a böö a gla'mö a ‑bhlʋ 'wʋ zii, a'aa ‑bhölɩ. 30Zaa, ‑titii ‑yɩ ‑wʋä zɩ'ɛ ‑mä 'lagblɛ 'mö, wa 'kää 'zɩgblɛ sia, 'n Lagɔ ‑kɩɩ sa'a 'yli 'zʋnɩɩ, 'saa 'kä bhä 'nglɩ ‑kä, 'n ɔ 'naa 'kanyɩ bhä abhlɩ 'yli 'zʋnɩmö, ɔ 'kanyɩ 'wua 'nɩ? 'A Lagɔ a dlɩtɛɛnɩtɛnɛɛ 'nɩɛ ‑zu lɛɛ! 31Nza n gbää nɩɩ, dlɩ nɩ tanyɩ libho a nɩ tɩ nɩɩ, sɛ ‑a 'kä bhä 'mözʋmözʋmö ‑a 'kä li, ‑a 'kä 'nɩmä, ‑a 'kä'ɛ 'wua nɩ? 32Mä'ä 'pɩwʋ a nɩkpaa ‑waaa Lagɔ ‑yii, mʋa zʋä ‑sɩbhä, 'mö ‑li 'la a 'yize a gbʋ plɛnɩɛ. ‑Maa abhʋa abhlɩ, ‑li 'la 'wuë a dɔ'wʋ, a dɩba Lagɔ ɔ ‑wʋä ‑mä ghäyɩ 'wʋʋ, ɔ ‑yi 'saa ɔ 'kanyɩ 'nyɛ a 'kä ‑bhölɩ. 33A'bhï, 'pɩwʋ mää Lagɔ 'kämanɩɛ 'n 'saa zlɔnɩɛ ɔ 'yila 'klʋ a dɔ'wʋ 'mö a gbʋʋ, mʋʋ nɩ plɛnanyɩ tɛɛ, ‑lɛ a dɔ'wʋ, ɔ'bhë ‑li 'la 'wuë ‑yɩ tʋʋä ‑mä, ɔ yeanyi 'nyɛ. 34‑Sɩbhä a za 'zɩgblɛ a dlɩ nɩ tanyɩ nyɩasɛ libho. Zlɩ ‑mɛɛ zɩɛ, mɛɛ ‑suä 'ɛ yɔlɔylʋ.

Šiuo metu pasirinkta:

Matie 6: bet

Paryškinti

Dalintis

Kopijuoti

Norite, kad paryškinimai būtų įrašyti visuose jūsų įrenginiuose? Prisijunkite arba registruokitės

Sužinoti daugiau apie BdG2

Matie 6

Populiarios Biblijos eilutės iš
Matie 6

Klausytis Matie 6

Biblija:

Bété, Guiberoua

Versija: BdG2 - bet

Matie 6

Matie 6

Populiarios Biblijos eilutės iš Matie 6

Klausytis Matie 6

Biblija:

Bété, Guiberoua

Versija: BdG2 - bet

Matie 6

Populiarios Biblijos eilutės iš
Matie 6