Mateus 2
2
Ti pesuucher fom Oriënt
1Wii Yeesus in Petleheem fon Yutëya kepoer waar, im kheenich Herootes sayn taache, khome phaar mëner woo ti xtërne xtuteyert hon fom Orient pis Yeruusalëm. 2Un waare am frooe:
— Woo is tas puupche woo kepoer is fer te kheenich fon te yute sin? Meyer hon tëm sayn xtërn im Oriënt kesiin un meyer sin khom fer em aan se peete.
3Wii te kheenich Herootes tas keheyert hot, hot er sich mechtich fiil ketanke too triwer kemach, un tas kans folek fon Yeruusalëm aach. 4Too, hot eyer ti kesets leerer un kesets mayster inkeruuf un hot tëne kefroot woo Kristus uf ti welt solt khome. 5Ti hon keantwort:
— In te xtat Petleheem, in te rechioon fon Yutëya, wayl soo is es kexrip torich em profët:
6“Tuu, Petleheem, lant fon Yutaa,
pist uf khee aart ti kleenst
unich te haupste fon Yutaa,
wayl fon tich khomt te fiirer
woo mayn folek fiire tuut, Israël.”#Mq 5.2
7Too hot Herootes ti pesuucher fom Oriënt heelich pay keruuf, hot se kenau aus kefroot iwich ti tsayt woo ti xtërn tsum foerxayn khom waar. 8Un, hot se noo Petleheem kexikt, am saan:
— Keet, informeyert aych kans richtich iwich es puupche; wan teyer en fine tuut, lost mich pexayt saan, tas ich aach em aan peete keen khan.
9Wii se te kheenich aan keheyert hate, sin se ap kehau. Ti xtërn woo se im Orient kesiin hate is tëne imer foer kang, pis se aan khom sin. Ti xtërn is xteen keplip iwich em plats woo tas puupche waar. 10Un, ti xtërn am siin, hon se sich kefrayt, mit kroose un xtarke yuupel. 11Wii se ins haus rin kang sin, hon se tas puupche kesiin mit sayn mama, Maria. Hon sich kekniit un hon em aan kepeet; un sayn xatse am uf mache, hon se sayn opfere ap kep: kolt, wayrauch un mira.
12Un Kot saat tëne in en traum tas se net tsurik solte keen fer mit Herootes xpreche. Tesweche sin se torich en anere weech noo sayn lant kereest.
Noo em Ejipt am aus rayse
13Noo Ejipt aus am rayse tëm noo wii ti pesuucher fort kang waare, is em Hër sayne ëngel tsum foerxayn khom in en traum fer Yoosef un saat:
— Xtay uf, hool tas khint un sayn mama un kee noo em Ejipt. Playpt tort pis ich noch mool pexayt saan, wayl Herootes is tas khint am suuche fer es umpringe.
14Too is Yoosef uf kextii in te mite nacht, hot tas khint un sayn moter kehool un is mit tëne noo em Ejipt kereest. 15Un tii sin tort keplip pis Herootes kextorep is. Tas is paseyert fer in se hale was te Hër kesaat hat torich em profët: “Ich hon mayne soon keruuf, woo im Ejipt lant waar.”
Herootes xikt ti khiner umpringe
16Wii Herootes kemërekt hot tas ti pesuucher fom Orient iim hinerkang hate, is er aarich pees kep un hot kexikt ti kanse puupcher woo weenicher wii tswaay yoer alt waare umpringe, in Petleheem un in te keechent. Tee hot tas kemach tëm noo was ti mëner fom Orient kesaat hate iwich ti tsayt woo ti xtërn tsum foerxayn khom waar. 17Soo hot sich in kehal was te Profët Jeremiias kesaat hat:
18“Hot sich en xtim in Ramaa heere kemach,
en xtim woo piter am prile waar.
Es waar Rakël, am prile weche sayn khiner;
sii wolt net konsoleyert kep sin,
wayl se al toot waare.”
Te tsurik weech fom Ejipt
19Wii Herootes kextorep waar, is em Hër sayne ëngel tsum foerxayn khom fer Yoosef in en traum, im Ejipt, 20un saat:
— Xtay uf, hool tas khint un sayn moter un kee tsurik noo Israël lant, wayl ti layt woo tas puupche umpringe wolte sin xon toot.
21Too is Yoosef uf kextii, hot tas khint un sayn mama kehool un is tsurik noo Israël lant kang. 22Awer, wii eyer se wise kriit hot tas Arkelau, em kheenich Herootes sayne soon, ti Yutëya am kowerneere waar uf sayne fater sayn plats, hot er pang kriit fer tort hiin woone keen. Tan, in en traum, is Yoosef orienteyert kep un is noo ti rechioon fon Kalilëya kang 23un is in te xtat Nasarëë woone keplip. Tas is paseyert fer in se hale was ti profëte kesaat hate: “Te Kristus kept Nasareeno kenënt.”
Šiuo metu pasirinkta:
Mateus 2: NTHunsrik
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
2022 Sociedade Bíblica do Brasil