Yohanna 6
6
Yeso yǝ nkwee ɓeta pusa pu pu wonon
1Ndiira maaso wa, Yeso yǝ tal yǝ ko aulaara Galili ya, u ǝn yarsǝ me aulaara Tibariya wa, 2ɓeta ɓǝ kwau dem me ɓǝn wǝr mbu nhiinyanhiinya yǝn tomsǝ ma ɓaa sem kwakwa ra ɓa. 3Pa Yeso yǝ taa yolo yǝ kaɗ ma emfǝɗkaa ɓǝsa. 4A fer siso, mbukamsa tadko u ɓaa Yahudawa ɓa tomon kwang.
5Pa Yeso yǝ niksǝ ɗuura yǝ wǝr ɓeta dem ɓǝn wowo a sanii wa, yǝ nkee Filibus me, “Kǝ ndǝ ko ndǝ tiri nkaadǝng nau, kǝ nda na ɓet ɓa, ɓǝ kǝweu?” 6Yǝ taa mbusa maaso me yaa pǝta, me a senda ira yǝ wee maa mbu kiya tom ɓan.
7Filibus yǝ kak me, “Hana koɓaa u ka puu antinima ya u ofe kurkurun wa, aa maa tiri nkaadǝng u hana yamni kiyaa taa ngeek wa ra!”
8Fin a ɗaaso emfǝɗkaa ɓisa wa, Andarawus, ate Siman Bitrus ya, yǝ nkee Yeso me, 9“Au ke nwa, yǝ ma nkaadǝng ngeek ngeek wonon ma nsenya ngeek ngeek raɓ. Yaa pa kǝ tomtom ni aa nkwee maa ɓeta dem ɓau?”
10Pa Yeso yǝ nkee me, “Sǝ ti ɓeta ɓǝ kaɗ ɗa.” A hansǝsǝ ka pitira kiyo ra dem, pa parata ɓǝ kaɗa, ɓeta kansǝ pusa pu puu woonon. 11Pa Yeso yǝ too nkaadǝng suwa, yǝ na himara Kaa, pa yǝ ɓaa ɓaa ɓǝ kaɗsǝ sǝɓa, hana yamni nga yǝn taasǝ wa. Yǝ tom maaso ɗǝm ma nseeya kasa.
12Pa ɓǝ kǝusǝ ɓǝ nkwee wa, Yeso yǝ nkee emfǝɗkaa ɓǝsa me, “Sǝ kwau mbu fesǝ ɓa. Sǝ lee mbuka aa tǝblǝ ra.” 13Pa ɓǝ kwau mbu fesǝ ɓa, ɓǝ kung hote pu nhaa raɓ.
14Pa ɓeta ɓǝ wǝrsǝ mbu nhiinyanhiinya Yeso yǝ tomsǝ ɓa wa, ɓǝ ntii ɓǝ nkee me, “Ɓongtǝra eɗ ɗa, ǝn sase annawanto ndǝn warsǝ me kiyaa wo a put ntaadi wa ya.” 15Pa waso Yeso yǝ maan me ɓǝn taa me ɓaa ti me yǝɓǝ tom kuɓu ɓoso ɗaɗ, pa yǝ nii yǝ taa a yolo ma nkweera ira.
Yeso yǝ siki a ɗuura mbraa ra
16Ɗikira kansǝ wa, emfǝɗkaa ɓisa ɓǝ ham ɓǝ ko a aulaara, 17a han ɓǝ kansǝ a kurnyaamo ɓa, me ɓǝ tal ɓǝ ko Kafarnahum. A fersiso ɗikira tommon, Yeso yǝ wo sundu yǝɓǝ ntee ra. 18Pa wiine yoro ke aa nyaa ma kokrokto. 19Ndiira ɓǝ sikisǝ kilometa woonon wa, pa ɓǝ wǝr Yeso yǝn wowo ma lau kurnyaamo wa, yǝn sikinsiki a ɗuura mbraa ra wa, pa kokto ɓǝ ma, ɓǝ maɗki. 20Pa yǝɓǝ nkee me, “Ən niina, sǝ kura kokto ra.” 21Pa ɓǝ yau me ɓaa too a kurnyaamo kawa, pa nok kǝnso kurnyaamo kawa yǝ kana kira a ham kama ɓǝ kosǝ ɓa.
22Pa handa nweesǝ wa, ɓaa kaɓǝsǝ a kira aulaara sǝɓa, ɓǝ ɗim me ura kurnyaamo ka wo fin, ɗǝm Yeso yǝ ɓǝɗ emfǝɗkaa ɓǝsa ra, ɓǝ ko seɗe ɓoɓɓǝsa. 23Pa ɓǝ wǝr kurnyaamo u fiɗsǝ Tibariya wa, ɓǝ wo ɓǝ nǝɗ kwang ma ham ɓeta kaɓǝ kǝusǝ nkaadǝng a ndiira Ankundi yǝ nasǝ himara asi wa. 24Pa ɓet kaɓa ɓǝ wǝrsǝ Yeso ma emfǝɗkaa ɓǝsa ɓǝ sem kǝnso ra wa, pa ɓǝ kana kurnyaamo ɓǝ faɗ Kafarnahum me ko ɓaa kǝrǝ.
Yeso yǝn nkaadǝng huurtu wa
25Pa ɓǝ wǝrsǝsǝ aa tale aulaara ya wa, pa ɓaa taa me, “Mallǝm, ngǝ wo kauni a ham ɓau?”
26Yeso yǝɓǝ kak yǝ nkee me, “Ɓongtǝra nǝn nkeesǝ, sǝn kǝrnǝ sem me mbu nhiinyanhiinya nǝn tomsǝ ɓa ra, pa me sǝn kǝrnǝ me nkaadǝng sǝ kǝusǝ sǝ nkwee wa. 27Sǝ kǝr mbuseya ka tǝblǝ ɓa ra, pa sǝ kǝr mbuseya kǝsa taa huurtu pakarese wa, u Au Ete ya kiyǝ sǝn na wa. Me ǝn sase u Kaa Papa weesǝ weɗɗa me yǝ yau ma sasen ya wa.”
28Pa ɓaa taa me, “Kǝtǝ tom tinima mbi u Kaa yǝn taasǝ wau?”
29Yeso yǝ kak me, “Tinima Kaa ma, ǝn siso nwa, aa yau ma yaa yǝ timisǝsǝ ya.”
30Pa ɓaa taa me, “Ən mbi nhiinyanhiinya naɓa kǝnga tom me tǝ na ɓongtǝra ma ngaseu? Kǝngǝ tom mbiu? 31Sirta ɓǝta ɓǝ kǝu manna ɗaan a sanglo, nga ɓaa nyorsǝ a likarkar wa me, ‘Yǝ na ɓǝ nkaadǝng u fiɗsǝ a liura wa, ɓǝ kǝuwǝ.’ ”
32Yeso yǝɓǝ nkee me, “Nǝn nkeesǝ ɓongtǝra, sem Musa yǝ nasǝsǝ nkaadǝng fiɗsǝ a liura siso wa ra, pa ǝn paane, sase yǝ nasǝsǝ nkaadǝng u ɓongtǝra fiɗsǝ a liura wa. 33Me nkaadǝng u Kaa wa, ǝn sase yaa yǝ fiɗsǝ a liura yǝ ham ya, pa me yǝ na huurtu ɓet put ntaadi wa ɓa.”
34Ɓǝ nkee me, “Yaa kwang ya, ngaa waso ǝtǝ na nkaadǝng siso.”
35Pa Yeso yǝɓǝ nkee me, “Nǝn nkaadǝng ǝn nasǝ huurtu wa. Yaa yǝ wosǝ a nani ya, ɗoora aa si ɗǝm ra, ɗǝm yaa yǝ nasǝ ɓongtǝra ma niina ya, mbraa aa si ɗǝm ra. 36Pa nga nǝ weesǝsǝ nkee wa, sǝ wǝr nǝn, pa nding waso sǝ na ɓongtǝra ra. 37Ɓaa nsaad paane yǝ nanǝsǝ ɓa, ɓǝkǝ wo a nani, ɗǝm nsaad yaa yǝ wosǝ a nani ya, naa pǝta pǝǝ wo ra. 38Nǝ fiɗ a liura me nǝ wo, sem me nǝ tom mbu nǝn yausǝ ɓa ra, pa me nǝ tom mbu yaa yǝ timinǝsǝ ya, yǝn taasǝ ɓa. 39Pa nwa ǝn mbu yaa yǝ timinǝsǝ ya, yǝn taasǝ ɓa, me nǝ lee yaake fin aa ɗaaso nsaad ɓaa yǝ nanǝsǝ ɓa, yǝ leetǝ ra, pa me nǝɓǝ niki a kaa feɗefeɗe ɓa. 40Me paane yǝn taa me, nsaad yaa yǝ sengesǝ Auwesi ya, yǝ ɗǝm na ɓongtǝra ma sase ya, kiya taa huurtu pakarese wa, ɗǝm ka niki a kaa feɗefeɗe ɓa.”
41Pa ɓaa Yahudawa ɓa ɓǝ ntii nhurunhuru a ɗuura ira, me yǝ nkeesǝ me, “Niina nǝ nkaadǝng u fiɗsǝ a liura wa.” 42Pa ɓǝ nkee me, “U nwa sem Yeso au Yusufu ya, u ndǝ maasǝ papisi ma maasi wa rau? Pa tomtomni yǝn nkeesǝ me, ‘Nǝ fiɗ a liurau’?”
43Pa Yeso yǝɓǝ kak me, “Sǝ lee nhurunhuru aa ɗaaso waaso.” 44“Yaake sem kǝn kiya wo a nani wa ra, me sem yaa Kaa yǝ tungsǝsǝ ya ra, ǝn sase kǝnǝ sa nik a kaa peɗepeɗe ɓa. 45Me ɓaa nyorsǝ a likarkaraa ɓan nawanto ɓa me, ‘Nsaad ɓosa, Kaa kiyǝ ɓǝ fǝɗkǝ.’ Hanan yamni yaa yǝ kurasǝ Paane ya, yǝ ɗǝm fǝɗkǝ a sani ya, yǝ kǝ wo a nani. 46Yaake sem kǝn yǝ pǝtasǝ wǝr Papa kaya wa ra, men sem sase yaa yǝ fiɗsǝ a Kaa ni ya ra, ǝn sase fin mbusa yǝ wǝrsǝ Papa ya. 47Nǝn nkeesǝ ɓongtǝra, yaa yǝ nasǝ ɓongtǝra ya, yǝ ma huurtu pakarese wa. 48Nǝn nkaadǝng ǝn nasǝ huurtu wa. 49Sirta ɓǝsaa ɓǝ se manna ɗaan a sanglo, pa nding siso ɓǝ woɗɗon. 50Pa nwa sǝ sengge nkaadǝng u fiɗsǝ a liura wa, u ete kiyaa kǝu yǝ woɗ ɗa wa. 51Nǝn nkaadǝng ǝn nasǝ huurtu u fiɗsǝ a liura wa. Me yaake yǝ kǝu nkaadǝng siso, kiyǝ taa huurtu pakarese wa. Nkaadǝng kawa ǝn maabiri yaane, u kǝna na wa, me ɓet put ntaadi wa ɓa, ɓǝ taa huurtu.”
52Pa ɓaa Yahudawa ɓa ɓǝ ntii rǝnǝta aa ɗaaso ɓosa me, “Kǝ tomtomni eɗ ɗa kiyǝ ndǝ na maabiri isi, ndǝ kǝuwǝu?”
53Pa Yeso yǝɓǝ nkee me, “Nǝn nkeesǝ ɓongtǝra, ndub me sǝ kǝu maabiri Au Ete ya wan, ɗǝm sǝ wee monma iman, me sem maaso ra, sǝ sem ma huurtu ra. 54Hana yamni yaa yǝ kǝusǝ maabiri yaane ya, ɗǝm yǝ wee monma na ya, yǝ ma huurtu pakarese wa, ɗǝm kǝnǝ nik a kaa peɗepeɗe ɓa. 55Me maabiri yaane ǝn mbuse ɓong ɓa, monma na ɗǝm ǝn mbu wee ɓong ɓa 56Hana yamni yaa yǝ kǝusǝ maabiri yaane ya, ɗǝm yǝ wee monma na ya, yǝ ke ma niina, ɗǝm niina kǝn, nǝ ke ma sase. 57Nga papa yaa ma huurtu yǝ timinǝsǝ ya, nǝn ɗanyǝ men sase, maaso ɗǝm yaa nǝ kangsǝ mbuseya ɓisa ya, kiyǝ ɗanyǝ men niina. 58Ndǝ niina nkaadǝng fiɗsǝ a liura wa. Sirta ɓǝsaa ɓǝ kǝu manna fiɗsǝ a liura ya, pa nding siso, ɓǝ woɗɗon, pa yaa nǝ kangsǝ mbuseya ɓisa ya, kiyǝ ɗanyǝ pakarese wa.” 59Yǝ nkee mbusǝsa a fer yǝn tomsǝ fǝɗkǝra Kafarnahum wa, a hit kwau ɓaa Yahudawa ɓa.
Emfǝɗkaa dem ɓǝ moon ɓǝ lee Yeso
60Ɓǝ kurasǝ maaso wa, emfǝɗkaa ɓǝsa dem ɓǝ nkee me, “Fǝɗkǝra ra lǝklǝk. Yaa kiyǝ kura niu?”
61Yeso yǝ wee maan me emfǝɗkaa ɓǝsa ɓaa nhurunhuru a fǝɗkǝra ra, pa yǝɓǝ nkee me, “Fǝɗkǝra sǝsa kwaasǝ sǝ kang ma nɗiira a naɓongtǝra waaso niu? 62Yaa kǝ tomtomni me sǝ wǝr Au Ete ya, yǝn taataa, yǝn koko a han yǝ fiɗsǝ ɓau? 63Wis nwa, ǝn sase yǝn nasǝ huurtu ya, maabiri ya, yǝ sem mbuka ra, yǝ sal. Matamse nǝ nkeesǝsǝ ta, ǝn Wiso ma ɗǝm huurtu. 64Nɗing siso ɓaata a ɗaaso waso ɓǝ na ɓongtǝra ra.” Me Yeso tǝng a ntiiri wa, yǝ wee maan ma yaa yǝ na ɓongtǝra ra ya, ɗǝm ma yaa kiyaa sa fang ya. 65Yǝ faɗ wiyo yaa nkee me, “Ən siso nǝ nkeesǝsǝ me, yaake yǝ nkaa yǝ wo a nani ra, men yaa Papa yǝ yausǝsǝ ya ra.”
66Ndiira mbusǝsǝ wa, ɓaata a ɗaaso emfǝɗkaa ɓisa ɓa dem, ɓǝ kǝrtǝ ndiira, ɓǝ yau me ɓaa ɓǝɗ ɗǝm ra.
67Pa Yeso yǝ taa ɓaa puu a nhaa raɓ sǝɓa me, “Sǝn taa me sǝ faɗ kǝnǝu?”
68Pa Siman Bitrus yaa kak, yǝ nkee me, “Ankundi, tǝ ko a yamni niu? Ngǝ ma matamse huurtu pakarese wa. 69Tǝ na ɓongtǝran ɗǝm tǝ maan me, ngǝn Yaa Ɗekɗek ya, u Kaa wa.”
70Pa Yeso yǝɓǝ kak me, “Nǝ tausǝ niina puu a haa raɓ, pa fin a ɗaaso waaso yǝn kuɓ nsaamese wa!” 71U nwa yǝn kan a ɗuura Yahuda au Siman Iskariyoti ya, sase hana ka yǝsǝ ɗaan a ɗaaso ɓaa pu nhaa raɓ sǝsa wa, pa ǝn sase kiyaa sa fang a wiiyo ya.
Šiuo metu pasirinkta:
Yohanna 6: LLA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2023 Seed Company in collaboration with Language Developers and Bible Translators Association