Luka 4
4
Jisu í purkya
1Jisu i ĝulo gudraw yo tukoañe, yodan go kakutcho; seyo yo bye laĝüshi laĝüshi vye; 2Seyo ñegi piĝü kuw mütü na dapüñe dapüñe ho. Sé ñeto ge i haje maje matsa matuw sündamkoi sese i luhuŝüku. 3Seyo sündañe mütü ye í che, “Sünameje ba Tawgyew üsaŝomeje, he kunu ye cheha odje lyaweñe.” 4Jisu i í trutcho “Ĝidame, nüna na keje odje aka yo mashüjome.” 5Sündatchowñe mütü ye í la kaketcho sündalye lüĝañe druguw drulyiw ye shemdzoa. 6Sündalye í chetcho, “No hena hei vyew bá übraw daweñe djüjome, hado cheholye hena braw nobabi, no dju djüĝoñdama djüfijobame. 7Sündada ba nó gaga dameje, hena vyew bachi lyajo.” 8Jisu i í chetcho, “Ĝidame: ‘Ba bá nudzoĝ Tawgyew í gaga dawe; seyo í küĝüjo dabawe.’” 9Sündatchowñe i í lalye Jerusalem go küĝüw ñegru ñeltsü udru ge lalyi vye, sündalye í che, “Süname ba Tawgyew üsaŝommeje, babraw bá nudzoĝ he ayo üla ge gaawe. 10‘Hado cheme ĝidabi, i bábo í sorgomuko ná dügyejowa. 11Seyo i bábo ügzü yo lolajobame, hado chemeje bá gaañe kunu ge bashi í mapadügyejoñe.’” 12Jisu i í chetcho, “Ana je chedame; ‘Ba nudzoĝ Tawgyew í dafimsoima djudügyejo dawe.’” 13Mütü ye í dafiyima madafima da hopüñelye, i me moluñe vye itrü yo me kahatrükralyevzü.
Galil ge datunow
14Sündatchowñe Jisu i ĝulo yo tukoañe, Galili ge katcho, sünda ífo go ñu ye i ha dawma senabó üñisa üñisa yo küña ñetrü duma vyew dzühuzeĝiatsü. 15Seyo i süge tawgyew í shi-ñu truw ñe ge shi-ñu truñgudru da, sündada vyew na í trotsüküĝa.
Nasrat ge Jisu í maĝoñiw
16Sündalye i Nadjürat ge kaku, hayo sa a í dalañe shükyedama sese; seyo í nudzoĝ daw üĝü dajo ge küĝümdrü ñeto kuwñe küĝüw ñegru ge jiñe kako ngüjoñe gudzu. 17Ñihow Yasaya í ĝülyedo kako ye í djü, sünda i kako ye tahalye, sei lakülye hayo sa a ĝidama:
18“Tawgyew í ĝulo ñidra dume,
Sündada i ufobüla na shi-ñu truweñe nó lakülyedame,
Seyo nó ana daweñe kiadame, külyido ná shaaweñe,
Seyo üñi ĝew ná hofidügyeweñe shi-ñu na truñe,
Seyo dügrülyado na lahuaiweñe.
19Seyo Tawgyew ichi lüshü ĝyojo oje í shi-ñu trujo.”
20Sündalye i se kako ye pyelyealye í shürhaw ügzü ge djü, sündalye ĝyoag: seyo se ñegru yo nüna na í homdzoatsü. 21Sese i ná che, “Yow he ĝido ye djovro a umsojemme.” 22Seyo vyew na í umsolyeñe vyeatsü, seyo ha shi-ñu ye i umdzu yo zehuahima, sena djühulye vyengatsü; sünda chetsü, hawa he i Joseb ichi üsaw mowma? 23I na chetcho, “Djo nó he anabó chejobamme, ‘He mügawwa, nudzoĝ uw dalatchowe no damje ñu dzühudo ye ba Kafarnahum ge dado ná age nudzoĝ ñetrü a je dawe.’” 24Seyo i je chetcho, “No djo umsow cheime, djú ñihow ye yow kuw nudzoĝ ñetrü ge ügõ mapawme. 25No bá umsow cheime, Eliya í ñeto ge oje dzü kuw ñedzü ye pyelyeatrülye, ana lyiladjew, vyew druguw-drulyiw ge luhuŝümoatsü, sese Israyel ge ŝüpyo müjem kadã dutsü. 26Seŝo Eliya í se namko ye djuchi ge je maki, Sidon go sarfat ge müjem a ichi a aka ki. 27Seyo ñihow Elisa i shüi ñeto ge Israyel tho ŝüpyo ĝoĝo naw kadã, seŝo Siriya ñe ñido nüna ye tralye vyew na so güdraw madaw kadã.” 28He ñu ye dzühulyebi na í küña se ñegru a duma, sena vyew lusvyumdzoa. 29Sündalye gudzulyitsüñe í na se ñetrü yo lahua, sünda ha pudru tho í ñetrü ĝyoda, se pudru ulodze ge la jiku, í seyoŝü üla ge dügaajoñe. 30Seŝo Tawgyew i nalumko yo kahulalye katrükralye.
Ĝulo mauw í ñepsü ge lahuahuw
31Sündatcholye i Galili ñetrü go Kafarnahum a kaku, sünda küĝümdrü ge nüna ná shi-ñu tru. 32Se na í shi-ñu ye dzülye mavyenghuatsü hado chemeje í ñu ye dügyebyo dügyeĝowdra du. 33Ñegru ulunge nüna a duw ye, í so ge ĝulo ma uw kamyoĝyo. Se i ŝüpyo gow yo ŝogzuñe che, 34“He Nadjüri Jisua, no bá ha tsünghu? Ba ñí damtrüajoüe kakuwma? No bá danghuwŝowa ba djuma? Bá Tawgyew ichi üsaw ñe sakülyedabi!” 35Jisu i í züñe che, “Mazüda ĝyo sünda i yo kahuag!” Sündawñe se ĝulo mauw kamyodo ye ílungo mau madalyew kahuag. 36Sei holye vyew na Aniñe vyeatsüg, seyo se na naĝütchü ge zeĝi, “He i ye küna ñu bajeŝoma? I se ĝulo ye ñigudu yo maĝew dügyebyo-dügyeĝyoiwa, sündawñe se i je kuhuabai.” 37Hage je hage je ímdo í kadang ifo truĝibabi da.
Patras ichi apyeñe utro nüna na dagyow
38I ñegru yo kahuañe simon í ñe ge ji, süge se Simon ichi apye ye uso shüñe nala. Sündada i íbo i küĝütcho 39I ichi üñisa a gudzulye se so nakeĝi í züg, züwñe sese so naw ye uwaha, sünda uwabyo uwaĝyowñe i süge age da í datunotcho. 40Dru gumkoi sese dju dju sama sama yo nomñew yo so natsüdama, sena na ichi ge la jikutsü, sündawñe i ügzü ye nadru ge a a dañe vyeñe na duñe ĝyodo ná muchoatsühi. 41Sündawñe ĝulo mau na ŝogzuñe che, “Ba Tawgyew ichi üsawwa,” Ŝüpyo nachi go kuhuatsü, seŝo i sena zü, sünda ñu mazüdügye. Hado cheme je na danghudabi, i Tawgyew cheñe.
Galil ge shi-ñu truw
42Sünda dañetoahuwñe i namko yo kahuañe ĝüdzüw ge katrükralye. Sündawñe se upu na í tchüsetcho ichi a kakusetcho, sünda í dügoha, nachi dju djukatrükralyeweñe. 43Seŝo i ná chetcho, “No ñetrü utro ge je Tawgyew shi-ñu trujo dulumme, hado chemeje nó he í daweñe kiabadamme.” 44Sünda i Galili ñetrü go ñegru ge shi-ñu tru.
Šiuo metu pasirinkta:
Luka 4: HBe
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės