Akha - 2001 Edition (NT) Drama

Akha Bible Revision (Latin Script) © Thailand Bible Society, 2011.

Baˬsaˬkaˬ Bawˬ-iˬ gʼeh-eu mehˬ hu koꞈ nah huˬ-ehˇ, aˬ yawꞈ neh bi gʼoꞈ dehꞈ laˇ-euˬ Laˬzaˬluˇ kʼoeˇ gʼaˬ jawˇ-eu Beˬtaˬniˇ meuˬ-ahˇ Yeˬsuˇ iˇ-euˬ meh. Kʼoeˇ gaˇ, aˬ yawꞈ-ahˇ hawˬ byawˇ lawˇ nehˬ-euˬ meh. Maˬta gʼaˬ hawˬ lahˬ dzaˇ lahˬ lahˬ-eu gʼaˬ geuꞈ-awˇ, Laˬzaˬluˇ gʼaˬ Yeˬsuˇ nehˬ-ehˇ hawˬ jawˬ jawˬ-euˬ meh. Maˬliˇ-aˬ, naˬduˇ lehˇ kuˇ-eu aˇ bawˇ-euˬ tsiˇ neh jahˇ taˬ-euˬ aˇ poeˬ kʼaˆ dui dui-eu tsiˇ yaw saw jeˬ smˬ kaˇ byah ni yuˇ-awˇ, Yeˬsuˇ-euˬ aˬ kuiˇ-ahˇ shehˆ daˆ-awˇ, aˬ yawꞈ-euˬ uˬ duˬ tsehˇ kahˇ neh shiˆ shawˇ nehˬ-euˬ meh. Tsiˇ yaw saw jeˬ kʼoeˇ, nymˇ nymˇ lah-ehˇ saw dui dui-eu meh. Yeˬsuˇ-euˬ zaˬ lahˇ deuˬ laꞈ kʼoeˇ, aˇ nah Yeˬsuˇ-ahˇ ahˬ dzaˬ-euˬ gʼaˬ pyeuꞈ-eu Yuˇdaˆ Iˇsaˬgaˬliˬoˆ heu loꞈ-ehˇ ehˇ-eu meh. “Aˬ jeˬ miˇ neh tsiˇ yaw saw jeˬ teu pyuˇ maˇ byaˆ smˬ yaˇ byaˆ-ehˇ neh ahˬ-awˇ, shaˬ zaˬ zahˬ zaˬ deuˬ-ahˇ maˬ biˇ nehˬ te.” Shaˬ zaˬ zahˬ zaˬ deuˬ gʼaˇ duˬ shaˇ noeˬ-awˇ aˬ yawꞈ kʼoeˇ loꞈ-ehˇ ehˇ-eu maˬ ngeuˇ-a. Aˬ yawꞈ smˇ kʼoeˬ tiˬ gʼaˬ miˇ neh, kʼoeˇ loꞈ-ehˇ gʼeh-eu dawˬ ngehˬ-eu meh. Aˬ yawꞈ-aˬ, pyuˇ pawˬ behˆ tawˬ-eu pyuˇ jeˬ hmˬ-eu gʼaˬ pyeuꞈ-awˇ, tiˬ poˆ na pyuˇ daˬ yuˇ-awˇ aˬ yawꞈ-euˬ gʼaˇ duˬ zmˬ-eu tsawˇ haˬ pyeuꞈ-eu meh.
Yeˬsuˇ ehˇ-eu, “Aˬ yawꞈ-ahˇ tiˬ jeˬ-iˬ taˬ ehˇ bahˬ nehˬ. Ngaˬ-ahˇ baꞈ pahˬ-eu aˇ nah gʼaˇ duˬ aˬ yawꞈ-euˬ tsiˇ yaw saw heu ehˬ-ehˇ zmˬ luꞈ-uˇ. Shaˬ zaˬ zahˬ zaˬ deuˬ naw maꞈ nehˬ-ehˇ aˬ myah luꞈ jawˇ meh. Ehˇ kʼawꞈ, ngaˇ naw maꞈ nehˬ-ehˇ aˬ myah luꞈ jawˇ-eu maˬ ngeuˇ.”

Yeˬsuˇ Beˬtaˬniˇ meuˬ-ahˇ jawˇ-eu gaˇ kawˆ tsawˇ haˬ gʼawˬ mya ni ya gaˬ-awˇ, kʼoeˇ gaˇ iˇ-euˬ meh. Yeˬsuˇ kʼoeˇ gaˇ jawˇ-eu baˬ da neh tehꞈ-ehˇ maˬ ngeuˇ ni, Yeˬsuˇ neh bi gʼoꞈ dehꞈ laˇ-euˬ Laˬzaˬluˇ kʼoeˇ gʼaˬ-ahˇ haw mawˇ mawꞈ-eu miˇ neh kʼawꞈ, tsawˇ haˬ iˇ myaˬ-euˬ jeˬ pyeuꞈ-eu meh. Kʼoeˇ miˇ neh, piˇ ma aˬ yuiꞈ deuˬ Laˬzaˬluˇ-ahˇ gʼeh sehꞈ-eu lehˇ lehˬ hmˬ-euˬ meh. Aˬ jeˬ miˇ neh ehˇ naˇ, aˬ yawꞈ shiˇ-awˇ gʼoꞈ dehꞈ laˇ-euˬ baˬ da neh, Yuˇdaˆ tawˇ haˬ gʼawˬ mya ni aˬ yawꞈ maꞈ-ahˇ byehˇ dzeh-awˇ, Yeˬsuˇ-ahˇ jah laˇ luꞈ-eu meh.


Yawˬ nah yawˬ, Baˬsaˬkaˬ Bawˬ-iˬ gʼeh laˇ-euˬ tsawˇ haˬ aˇ maꞈ maꞈ ma kʼoeˇ deuˬ, Yeˬluˇsaˬlehˬ meuˬ-ahˇ Yeˬsuˇ laˇ luꞈ-eu gaˇ kawˆ ya gaˬ-euˬ meh. Kʼoeˇ miˇ neh, aˬ yawꞈ maꞈ daoˇ uˬ pyaˬ baꞈ-awˇ, aˬ yawꞈ-ahˇ ha laˬ-iˇ-eu lehˇ heu loꞈ-ehˇ guˇ guˇ-ehˇ doˆ-iˇ-euˬ meh. “Miˬyehˇ-ahˇ ja ceuˬ-awˬ. Sahˬpaˬ Miˬyehˇ-euˬ tsawˇ myahˇ uˬ moˆ oe-euˬ gʼaˬ-ahˇ Miˬyehˇ guiˬ lahˬ biꞈ luꞈ-uˇ. Iˇsaˬleˬlaˆ tsawˇ jeuˬ-euˬ sahˬ paˬ-ahˇ Miˬyehˇ guiˬ lahˬ biꞈ luꞈ-uˇ.”
Jaˇliꞈ laꞈ kʼoeˇ ehˇ taˬ-euˬ jaˆ-eu loꞈ-ehˇ, Yeˬsuˇ mahˬ tahˬ laˆ tiˬ mawˇ poˆ mawˇ-awˇ dziˬ-euˬ meh. Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh.
“Ziˇoˬ meuˬ-oˇ taˬ guˆ.
Nawˬ-euˬ dzoeˬ dzaˬ sahˬ paˬ,
tahˬ laˆ dziˬ-awˇ oe luꞈ meh.”

Pyeuꞈ laˇ-euˬ gaˇ kawˆ kʼoeˇ-euˬ dawˬ tsuiꞈ-ahˇ, aˇ dahˬ beh ngeh zaˬ lahˇ deuˬ maˬ siˬ nya-a. Ehˇ kʼawꞈ, Yeˬsuˇ gʼoꞈ dehꞈ laˇ-awˇ yaw shehꞈ kʼahˬ sehˇ za gʼaˬ ngeh, Jaˇliꞈ laꞈ kʼoeˇ ehˇ taˬ-euˬ kʼoeˇ aˬ yawꞈ-ahˇ ehˇ-euˬ jeˬ pyeuꞈ-awˇ, aˬ yawꞈ maꞈ Yeˬsuˇ-ahˇ ha-euˬ kʼoeˇ-aˬ, Jaˇliꞈ laꞈ kʼoeˇ ehˇ taˬ-euˬ dawˬ byah laˇ ni mˇ-euˬ jeˬ pyeuꞈ-eu gaˇ kawˆ, aˬ yawꞈ maꞈ siˬ duˬ-euˬ meh.
Yeˬsuˇ Laˬzaˬluˇ-ahˇ lmˬ bymˇ laꞈ kʼoeˇ neh kuˇ doˆ leꞈ-awˇ bi gʼoꞈ dehꞈ laˇ gaˇ mawˇ-euˬ tsawˇ haˬ deuˬ, aˬ yawꞈ maꞈ neh ya mawˇ-euˬ loꞈ-ehˇ aˬ cawˬ-ahˇ dzawˇ mehˬ-euˬ meh. Tsawˇ haˬ aˇ maꞈ kʼoeˇ maꞈ aˬ yawꞈ neh mˇ-euˬ zahˬ leˇ paˬ-ehˇ gʼeh-eu gaˇ kawˆ ya gaˬ taˬ-euˬ miˇ neh, aˬ yawꞈ-ahˇ ha laˬ le-euˬ jeˬ pyeuꞈ-eu meh. Kʼoeˇ ngeh, Paˬliˬsehˇ deuˬ tiˬ gʼaˬ tiˇ gʼaˬ ehˇ-eu, “Haw sheˇ. Aˬ dui maꞈ neh noeˬ taˬ-euˬ jeˬ maˬ paˇ mˇ pyeuꞈ nya ngaˇ. Miˇ tsaˬ zaˬ dawˬ tawˆ luꞈ aˬ yawꞈ-euˬ mehˬ nah caw teh-iˇ jiˇ-euˬ ngaˇ.”

Baˬsaˬkaˬ Bawˬ-iˬ gʼeh ngeh, Yeˬluˇsaˬlehˬ meuˬ-ahˇ uˬ duˬ tahˬ leˇ-euˬ deuˬ laꞈ kʼoeˇ, Heˬlaˬsaˇ tsawˇ haˬ kʼawꞈ keuˬ-eu meh. Heˬlaˬsaˇ tsawˇ haˬ kʼoeˇ deuˬ, Gaˬliˬlehˇ miˇ kʼahˬ Behˬdzeˇdaˬ meuˬ-ahˇ jawˇ-euˬ Piˇliˇpuˆ jawˇ gaˇ iˇ-awˇ, “Saˬ laˬ-oˇ, nga maꞈ Yeˬsuˇ-ahˇ mawˇ mawꞈ nya” lehˇ ehˇ nehˬ-euˬ meh.
Piˇliˇpuˆ Aˬdehˬlehˬ-ahˇ cawˬ-iˇ-awˇ, aˬ yawꞈ nyaꞈ-ehˇ tiˬ kawˆ loꞈ-ehˇ Yeˬsuˇ-ahˇ ehˇ nehˬ leˇ-euˬ meh. Yeˬsuˇ aˬ yawꞈ nyaꞈ-ahˇ ehˇ nehˬ-eu, “Tsawˇ haˬ-euˬ Zaˬmaˇ huiˬ dui dui-eu yaw shehꞈ kʼahˬ sehˇ za-eu aˇ yamˬ keuˆ laˇ-euˬ meh. Ngaˇ naw nyaꞈ-ahˇ maˇ jawˆ ni ehˇ-eu ma. Cehˇ cehˇ nuiˆ tiˬ nuiˆ-aˬ, miˇ tsaˬ-ahˇ ga-iˇ-awˇ maˬ shiˇ kʼoeˇ keuˆ ni, cehˇ cehˇ nuiˆ tiˬ nuiˆ tehꞈ meh. Ehˇ kʼawꞈ, cehˇ cehˇ nuiˆ kʼoeˇ nuiˆ shiˇ ngeh, cehˇ cehˇ nuiˆ gʼawˬ mya ni paˇ myaˬ laˇ-eu meh. Yawˬ ha-euˬ dehꞈ-eu jeˬ-ahˇ gaˬ-eu tsawˇ haˬ-aˬ, dehꞈ-eu jeˬ-ahˇ smˬ-iˇ tehꞈ-a. Miˇ tsaˬ kʼoeˇ taˆ dehꞈ ngeh yawˬ ha-euˬ dehꞈ-eu jeˬ-ahˇ muiˇ-eu tsawˇ haˬ-aˬ, mˬ maˬ maˬ byaˆ zaˇ ziˇ dehꞈ-eu jeˬ-ahˇ za tehꞈ-a. Ngaˬ-euˬ gaˇ mˇ mawꞈ-eu tsawˇ haˬ aˬ geuˬ gʼaˬ maˬ kaˬ, ngaˬ-euˬ mehˬ nah ya caw teh laˇ meh. Aˬ jeˬ miˇ neh ehˇ naˇ, ngaˬ-euˬ zaˬ kʼaˆ-aˬ, ngaˇ kʼaˇ jawˇ gaˇ ya jawˇ tehꞈ-a. Ngaˬ-euˬ gaˇ kʼaˇ mˇ-eu tsawˇ haˬ-ahˇ ngaˬ Da taˬ huiˬ taˬ mahˇ nehˬ tehꞈ-a.”

“Ngaˬ-euˬ nui ma shaˬ zahˬ naꞈ dui dui nya. A joˆ-ehˇ ehˇ paˬ maˬ siˬ miˇ-a. ‘Aˬ da-oˇ, aˇ yamˬ heu yamˬ ngaˬ-euˬ kʼoeˇ taˆ taˬ bi keuˆ le laꞈ’ lehˇ ehˇ naˇ muiˬ-eu maˬ siˬ. Ehˇ kʼawꞈ, heu-euˬ gʼaˇ duˬ ngaˇ oe-euˬ jeˬ pyeuꞈ-eu ma. Kʼoeˇ miˇ neh, shaˬ zahˬ heu ngaˇ ya pi meh. Aˬ da-oˇ, nawˬ-euˬ yaw shehꞈ kʼahˬ sehˇ bi mawˇ-awˬ.”
Kʼoeˇ ngeh, mˬ kʼoeˇ taˆ dawˬ ngehˬ-awˇ ehˇ gʼeh leꞈ-eu, “Ngaˬ-euˬ yaw shehꞈ kʼahˬ sehˇ bi mawˇ gʼaˬ-euˬ ma. Ehˇ kʼawꞈ, tiˬ poˆ paˇ bi mawˇ te siˬ.”
Kʼoeˇ gaˇ yawꞈ luꞈ-eu tsawˇ haˬ aˇ maꞈ teˇ saˇ kʼoeˇ saˇ-ahˇ ya gaˬ ngeh, tiˬ paˆ na deuˬ “Mˬ jeˬ jeˬ-eu nya” lehˇ ehˇ-awˇ, tiˬ paˆ na deuˬ, “Mˬ taˆ gʼaˬ kʼehˇ aˬ yawꞈ-ahˇ dawˬ ngehˬ cawˬ-eu nya” lehˇ ehˇ-eu meh.
Ehˇ kʼawꞈ, aˬ yawꞈ maꞈ-ahˇ Yeˬsuˇ ehˇ nehˬ-eu, “Dawˬ kʼoeˇ ngehˬ doˆ le-euˬ-aˬ, ngaˬ-euˬ gʼaˇ duˬ maˬ ngeuˇ-a. Naw maꞈ-euˬ gʼaˇ duˬ meh. Nymˬ-mˇ miˇ tsaˬ heu-ahˇ yaˇ kʼaˬ daˇ-eu aˇ yamˬ tsaˬ laˇ-euˬ meh. Nymˬ-mˇ miˇ tsaˬ heu-ahˇ uˆ lahˇ luꞈ-eu gʼaˬ bi teh dzeh tehꞈ-a. Miˇ tsaˬ heu kʼoeˇ taˆ ngaˬ-ahˇ kʼahˬ tuˇ ngeh, tsawˇ haˬ yawˬ gʼaˬ na luꞈ ngaˇ jawˇ gaˇ laˇ ni ngaˇ jahˇ ma.” Aˬ yawꞈ kʼoeˇ loꞈ-ehˇ ehˇ-eu kʼoeˇ-aˬ, aˬ yawꞈ aˬ jeˬ-euˬ gʼaˇ duˬ shiˇ-eu lehˇ gʼeh-eu gaˇ kawˆ ehˇ mawꞈ-eu meh.
Tsawˇ haˬ aˇ maꞈ ehˇ-eu, “Nga maꞈ-euˬ Zahˇ dawˬ kʼoꞈ dawˬ laꞈ kʼoeˇ, Meˬsiˇya mˬ maˬ maˬ byaˆ zaˇ ziˇ dehꞈ meh lehˇ ehˇ taˬ-euˬ meh. Tsawˇ haˬ-euˬ Zaˬmaˇ-ahˇ bi kʼahˬ tuˇ tehꞈ-a lehˇ nawˇ aˬ joˆ-ehˇ ehˇ nya te. Tsawˇ haˬ-euˬ Zaˬmaˇ kʼoeˇ aˬ suˇ gʼaˬ-a.”
Yeˬsuˇ ehˇ-eu, “Yaw shehꞈ-aˬ, naw maꞈ nehˬ-ehˇ tiˬ kʼehˬ jawˇ tehꞈ-a. Naw maꞈ yaw shehꞈ za luꞈ ngeh, naw maꞈ kʼoeˇ taˆ yaw zahˇ maˬ bi keuˆ le ni cah tehˇ tehˬ-awˬ. Aˬ jeˬ miˇ neh ehˇ naˇ, yaw zahˇ laꞈ kʼoeˇ cah-eu tsawˇ haˬ-aˬ, yawˬ ha aˬ geu paw iˇ luꞈ-eu maˬ siˬ nya-a. Yaw shehꞈ-ahˇ jah-awˬ. Naw maꞈ yaw shehꞈ za ngeh jawˇ, yaw shehꞈ-euˬ zaˬ pyeuꞈ laˇ tehꞈ-a.”

Yeˬsuˇ kʼoeˇ loꞈ-ehˇ ehˇ gʼaˬ ngeh, aˬ yawꞈ maꞈ maˬ mawˇ gaˇ iˇ doˆ-awˇ jawˇ-iˇ-euˬ meh. Aˬ yawꞈ maꞈ-euˬ mehˬ shi zahˬ leˇ paˬ-ehˇ gʼeh-eu jeˬ kʼoeˇ naˆ ni mˇ mehˬ-euˬ kʼawꞈ, aˬ yawꞈ maꞈ aˬ yawꞈ-ahˇ maˬ jah-a. Aˬ yawꞈ maꞈ maˬ jah-eu kʼoeˇ-aˬ, Miˬyehˇ gʼaˇ duˬ ngehˬ dah-eu Iˇsaˬyaˇ neh ehˇ taˬ-euˬ dawˬ heu dawˬ byah laˇ-eu gʼaˇ duˬ pyeuꞈ-eu meh.
“Gaˇ kawˆ heu nga maꞈ ja mehˬ gaˇ,
jah nehˬ laꞈ-eu aˬ suˇ jawˇ nmˇ.
Heu-euˬ laꞈ kʼoeˇ Miˬyehˇ aˬ laꞈ,
ahˇ luꞈ meh lehˇ aˬ suˇ mawˇ nmˇ.”

Aˬ yawꞈ maꞈ aˬ diˇ maˬ jah-a. Aˬ jeˬ miˇ neh ehˇ naˇ, Iˇsaˬyaˇ neh heu loꞈ-ehˇ paˇ ehˇ taˬ-euˬ jaˆ-eu meh.
“Tsawˇ haˬ heu deuˬ nui ma gʼahˇ-awˇ,
naˬ bawˇ yaw tuˇ bi tuˇ laˇ-awˇ,
myaˆ nuiˆ myaˆ behꞈ laˆ behꞈ nehˬ-awˬ.
Kʼoeˇ loꞈ-ehˇ maˬ jahˇ nehˬ taˬ naˇ,
yawꞈ maꞈ myaˆ nuiˆ haw mawˇ nya-awˇ,
naˬ bawˇ gaˬ nya laˇ-eu uˬ taꞈ,
nui ma gʼoˆ shaw nya-eu miˇ neh,
ngaˇ jawˇ paw paˇ gʼoꞈ kʼoꞈ laˇ-awˇ,
naˇ gawˇ bi yaˇ taˬ laˇ tehꞈ-a.”

Iˇsaˬyaˇ neh kʼoeˇ loꞈ-ehˇ ehˇ taˬ-euˬ kʼoeˇ-aˬ, Yeˬsuˇ-euˬ yaw shehꞈ kʼahˬ sehˇ-ahˇ aˬ yawꞈ ya mawˇ-awˇ aˬ yawꞈ-euˬ gaˇ kawˆ ehˇ taˬ-euˬ jeˬ pyeuꞈ-eu meh.
Yuˇdaˆ tsawˇ haˬ aˬ yuiꞈ aˬ tsu deuˬ laꞈ kʼoeˇ kʼawꞈ, Yeˬsuˇ-ahˇ jah-eu gʼawˬ mya ni jawˇ-eu meh. Ehˇ kʼawꞈ, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ maˬ bi taꞈ ni Paˬliˬsehˇ deuˬ teh dzeh laˇ gaˇ guˆ-eu miˇneh, bya cehˆ ni maˬ ehˇ doˆ peuˬ-a. Miˬyehˇ neh ciˬ poeˬ nehˬ-euˬ jeˬ-ahˇ naˆ maˬ tseˇ, tsawˇ haˬ zaˬ neh ciˬ poeˬ nehˬ-euˬ jeˬ-ahˇ aˬ yawꞈ maꞈ geuꞈ mawꞈ-eu meh.

Yeˬsuˇ teˇ saˇ yaw kʼaˆ kʼaˆ-ehˇ ehˇ-eu, “Ngaˬ-ahˇ kʼaˇ jah-eu tsawˇ haˬ-aˬ, ngaˬ-ahˇ tehꞈ-ehˇ jah-eu maˬ ngeuˇ-a. Ngaˬ-ahˇ kʼehˇ gʼeh leꞈ-eu gʼaˬ-ahˇ kʼawꞈ jah gaˇ duˇ-eu meh. Ngaˬ-ahˇ mawˇ-eu tsawˇ haˬ-aˬ, ngaˬ-ahˇ kʼehˇ gʼeh leꞈ-euˬ gʼaˬ-ahˇ mawˇ gaˇ duˇ-eu meh. Ngaˬ-ahˇ kʼaˇ jah-eu tsawˇ haˬ yaw zahˇ laꞈ kʼoeˇ maˬ paˇ ya jawˇ ni, yaw shehꞈ loꞈ-ehˇ miˇ tsaˬ heu kʼoeˇ taˆ ngaˇ zaꞈ le-euˬ ma. Ngaˬ-euˬ dawˬ ya gaˬ-awˇ maˬ jah-eu tsawˇ haˬ-ahˇ ngaˇ yaˇ kʼaˬ maˬ daˇ. Miˇ tsaˬ-ahˇ yaˇ kʼaˬ daˇ le-eu lehˇ ngaˇ oe-euˬ maˬ ngeuˇ. Ka kʼoꞈ le-eu lehˇ oe-euˬ ma. Ngaˬ-ahˇ maˬ ha geuꞈ-ehˇ ngaˬ-euˬ dawˬ-ahˇ maˬ naˇ haˬ geuꞈ-eu tsawˇ haˬ-ahˇ yaˇ kʼaˬ daˇ-eu gʼaˬ jawˇ meh. Miˇ tsaˬ heu aˇ saˬ saˬ ngeh nah, ngaˬ neh ngehˬ dzeuˇ-euˬ dawˬ heu deuˬ aˬ yawꞈ-ahˇ yaˇ kʼaˬ daˇ tehꞈ-a. Ngaˇ ehˇ-eu heu tsaˬ ma. Aˬ jeˬ miˇ neh-ehˇ naˇ, ngaˬ-euˬ nui noeˬ nui loˆ ngehˬ-eu maˬ ngeuˇ. Ngaˬ-ahˇ kʼehˇ gʼeh leꞈ-euˬ Aˬda neh bi ngehˬ bi tmˇ laꞈ-euˬ meh. Aˬ yawꞈ-euˬ dawˬ laꞈ kʼoeˇ mˬ maˬ maˬ byaˆ zaˇ ziˇ dehꞈ-eu jeˬ ahˇ meh lehˇ ngaˇ siˬ nya ma. Ngaˬ neh ngehˬ-euˬ dawˬ-aˬ, Aˬ da Miˬ yehˇ neh ngaˬ-ahˇ bi ngehˬ laꞈ-euˬ dawˬ meh.”

Klausīties Yoˇhaˬ 12