Nugunu - 2017 CABTAL (NT) Drama

Naá gobayɛga gá buimée, mɔ́ɔnyɔ bá dɔ́ŋɔnɔmɔ́ bá amɔ́ Nogálɔ, a mbaá ŋá a ná lɛ́ hɔ́ɔ; kɔ́ɔ Nogálɔ a mbaá lɛ na Asaŋa, gó gunde, Nogálɔ a mba lɛ́ Asaŋa. A mba lɛ́ go mabayɛga má buimée na Asaŋa. Gɛ́hɛ́, Asaŋa a mba ŋaáa boóma buimée, a lɛ́ kanɛ go ŋa boóma bá búmmue kanɛ mɔ́ɔ. Gɛɔyɔ gɛ́ mbaá lɛ naá mɔ́ɔ, gó gunde, gɛɔyɔ gɛ́ mbaá lɛ gise go batɔ. Gise gɛ́ noma naá mbíno, mbíno ɛ bíí inyé go gɛ́ oliminyo.
Asaŋa a mba dómá mɔtɔ ba bosɔ́mɔ, ufíno yɛ́hɛ́ Sáŋa. A mbu úlé aŋa ŋgominyo go go nco ŋa buŋgominyo go busío bá gise, goŋaá uŋkimée o oliminyo go busío bá ŋgoyáamɔ́ yɛhɛ́. Sáŋa a dɛ mbáa lɛ mɔ́ɔ moatɛ́ gise, kanɛ́ a mbuú úlé go go nco ŋa buŋgominyo go busío bá gise. Nogálɔ mɔ́ɔ a mbaá lɛ mammana ya gise; a búú úlé naá cí go go seemenye mɔtɔ uŋkimée. Nogálɔ a mba lɛ́ naá cí, Asaŋa a báá gedíe cí gɛ́hɛ́, kɔ́ɔ batɔ báaba naá cí bá mbaá lɔbɔ́ kanɛ go mo íyime. A mbu úlé naá boɛhɛ́ɛ, boɛhɛ́ɛ bá báá lɔbɔ́ kanɛ go mo gɛ́ndɛgɛna. Kanɛ́ go báaba bá mbaá mo gɛ́ndɛ́gɛ́ná, go báaba bá áganamɔ́ odɛ́má yabɔ́ naá mɔ́ɔ, a báá bó fáá bogaaga bá go ɛ́ya baaná bá Asaŋa. Bɔ́ɔbɔ moánɛ bá lɛ́ kanɛ go bébíene aŋa batɔ bá bébíenemú, akɛ́ go golɛ́ga gá nnyɔ́dɔ, ɛ́na gá mɔtɔ, kanɛ́ go golɛ́ga gá Asaŋa. Nogálɔ a mbɛɛ́ ɛ́yá mɔtɔ, a báá lɛ gó nco gɛ́ga nɛcɔ́. Dɛ mbɛ ɛ́ná nigúmi nɛ́hɛ́, nigúmi nɛ́ɛnɛ a bɛananamɔ́ naá Isée, mɔ́ɔ gimmuée gá Moɔnɔ́ na niibo niimée na mammana iŋkimée. Sáŋa a mo ŋanana buŋgominyo, o oya daŋɛ́daŋɛ go busío bɛ́hɛ́ a amɔ́: «Mɔ́ɔ mɔ́nyɔ́ɔ, mɔ́ɔnyɔ mmbaá gálɛ́dá caá, naá nnyimé yamɛ mɔtɔ u úlene mɔ́ɔnyɔ a mbaá tóánɛ́ná, goakɛ́ otóotoɛ yá goŋaá yɔmɔ́ɔ mbɛ́ɛmba, mɔ́ɔ a mbaá ŋá a ná lɛ́ hɔ́ɔ.» Ɛɛ́ɛŋ, bɛɛcɔ́ɔ biimée dɛ mba dáŋábá naá niibo nɛ́hɛ́ niimée, bɛfona tútututu. Aáŋa gá Mɔ́sɛsɛ, Asaŋa a mba có fáá bicele, niibo na mammana mó lɔ́mɔ́ úléelú gá Yésu Kilítu. Mɔtɔ a gá báasa a dɛ ɛ́ná Asaŋa; kanɛ́ Asaŋa, gimmuée gá Moɔnɔ́ mɔ́ɔnyɔ a lɔ́mɔ́ na Asaŋa, mɔ́ɔ a mbaá có mo íyímíe.

Ɔ́bɔ́ nɔnɔ ŋgominyo yɛ́ɛyɛ Sáŋa a mbaá ŋaáa gɔ́ɔgɔ bagɔ́nɔ́ɔ bá Beyúdene naá Yolósalɛmɛ, bá mbaá fedígínyée bedúmbí bɛbáágá naá Asaŋa na batɔ bá Boya Léfi, go bó dóma naá Sáŋa go go mo úhune ŋgúhune yɛ́ɛyɛ: «O lɔ́mɔ́ ánɛ́ɛ o?» Kanɛ go ɛ́da halaháláa, Sáŋa go oyɛda daŋɛ́daŋɛ a amɔ́: «Cɛ bósó Mesíi.» Gáábɔ́ go mo úhune bá amɔ́: «O lɔ́mɔ́ ánɛ́ɛ o? O lɔ́mɔ́ Elíi lí?» Sáŋa a amɔ́: «Cɛ bósó mɔ́ɔ.» Bá amɔ́ gɛ́hɛ́ bá amɔ́: «O lɔ́mɔ́ mbúsí ya Asaŋa o?» A amɔ́: «Akɛ́ɛ.»
Gɔ́ɔ bá mo oyanamɔ́ bá amɔ́: «O lɔ́mɔ́ kanɛ́ ánɛ́ɛ o? Dɛ háanana go gundine na batɔ báaba bá báá ná có dómá na kundíemú. Maamɔ́ɔ moatɛ́ go oyamɔ́ ɛkádɛ go busío báhɔ o?» Sáŋa go bó gundie na dogálɔ dá mbúsí ya Asaŋa Iseyíi a amɔ́: «Ndɔ́mɔ́ ukelú yá mɔ́ɔnyɔ a dónogogonyomú naá giolóo gá bodɛ́agadɛ́ a amɔ́: “Yɛ́yáa nɔnɔ pɛ́ ya Daadáa bese.”» Naá olɔŋɔ yá batɔ bá bosɔ́mɔ báaba bá mbaá dómɛ́ná Sáŋa, batɔ bá giimbó gá Befelisiéŋe bá mba lɛ́ hɔ́ɔ. Bɔ́ɔbɔ kanɛ́ go ɛ́da go mo yiidenye na ŋgúhune bá amɔ́: «Aáŋa o do báá Mesíi, o do báá Elíi, o do báá mbúsí ya Asaŋa mmue, ɛkádɛ kanɛ́ o yumeninyemú o?» Sáŋa go bó gundie a amɔ́: «Yɔmɔ́ɔ nyumeninye naá miimpo. Mɔtɔ a lɛ́ hɔ́ɔ naá tɛ́mádɛ́má yɛnyɔ́ mɔ́ɔnyɔ no lɔ́mɔ́ no do mo íyíménée. U úlene naá nnyimé yamɛ, cɛ háánánáa akɛ́ naá odɛ́nɛ́ yá go fulune duelí dá nnaadɛna sɛ́hɛ́.» Buimée bɔ́ɔbɔ bó mba bádómbánáa naá Beteníi, naá cɔ́lɔ ya boayá búunú bá Yɔlɔdɛ́ŋɛ, anáa Sáŋa a mbaá lɛ a yumeninye batɔ.

Gó bélenye, Sáŋa go ɛ́na Yésusu u úlene naá boayá bɛ́hɛ́, gɛ́hɛ́ go oyɛda a amɔ́: «Mɔ́ɔ mɔ́nyɔ́ɔ, Moɔnɔ́ ba gɛdómbáa ba Asaŋa, mɔ́ɔ u úlenyemú bɛlɔgɔ bá batɔ naá cí. Gɛ́hɛ́ gɔ́ɔ mmbaá gálɛ́dá caá: “Naá nnyimé yamɛ, mɔtɔ u úlene mɔ́ɔnyɔ a mbaá tóánɛ́ná, goakɛ́ otóotoɛ yá goŋaá yɔmɔ́ɔ mbɛ́ɛmba, mɔ́ɔ a mbaá ŋá a ná lɛ́ hɔ́ɔ”. Yɔmɔ́ɔ ba moatɛ́ cɛ mbáa lɛ mmo íyimene, kanɛ́ ndɔ́mɔ́ úléelú, nyumeninye naá miimpo go goŋaá boɛ́nɔ bá Ɛ́sɛlahɛ́ɛlɛ bó mo íyime.» Sáŋa kanɛ́ go ŋa ŋgominyo yɛ́ɛyɛ a amɔ́: «Ŋgɛɛ́ ɛ́ná Giliíli ba Asaŋa, a fóanɛna aŋa mmɛŋá, a siisene naá mmoɛná, a báá ncó lukumene naá mɔ́ɔ. Kɔ́ɔ yɔmɔ́ɔ, cɛ á gá lɛ mmo íyimene, kanɛ́ mɔ́ɔnyɔ a lɔ́mɔ́ tómáalú go go nco yumeninye naá miimpo, mɔ́ɔ a lɔ́mɔ́ ŋgoyánáalú a amɔ́: “Mɔtɔ mɔ́ɔnyɔ o nɛ́ ɛ́namɔ́ Giliíli a siisene a nco lukumene naá mɔ́ɔ, bendiemi mɔ́ɔ a yumeninyemú naá Gimmúmpúu gá Giliíli.” Kɔ́ɔ yɔmɔ́ɔ, ŋgɛɛ́ ɛ́ná mbáá gundé mbáá ŋaáa ŋgominyo goŋaá mɔ́ɔ a lɔ́mɔ́ Moɔnɔ́ ba Asaŋa.»

Gó bélenye, Sáŋa a mba lɛ́ gɔnɔ́ naá hoóma hémmue eé hémmue na behúúní bɛ́hɛ́ báandɛ́ naá olɔŋɔ yá behúúní bɛ́hɛ́. Ɛ ɛ́ ɛ́ná Yésusu a dómbana, go gálɛda a amɔ́: «Mɔ́ɔ mɔ́nyɔ́ɔ, Moɔnɔ́ ba gɛdómbáa ba Asaŋa.» Behúúní báandɛ́ bɔ́ɔbɔ, bɔ́ ɔ́ ɔ́bɔ́ Sáŋa a gálagala nɔ́ɔnɔ, gáábɔ́ go biene Yésusu. A á bákoɛlɛ́dá, go bó ɛ́na bá ná lɛ́ go mo bienene. Gɔ́ɔ a bó úhunemú a amɔ́: «No fúumbemú ŋkádɛ o?» Bɔ́ɔ go mo gundie bá amɔ́: «Eléébi (naá cí goŋaá Iloodio), o gɛ́gamɔ́ áhanɛ́ɛ o?» Gɛ́hɛ́ go bó oyana a amɔ́: «Úlé nɔnɔ, no gɛɛ́ ɛ́ná.» Bá báá lɛ gó ɛ́da kanɛ́, go ɛ́na anáa a mbaá lɛ a gɛ́ga. Bá báá lɛ gó dúmbie buisí moánɛ olɔŋɔ nɛhɛ́; bó mba lɛ́ boóma bá bigúlí bínni naá nnyimé ya tólóbóo.
Andɛlɛ́ɛ, ondimóní ba Símono Píele, a mba lɛ́ ummue mɔ́ɔnyɔ a mbɔɔ́ ɔ́bɔ́ dogálɔ dá Sáŋa, a báá biené Yésusu. Gɛ́hɛ́ go manɛ go ɛ́da huenye ondimóní Símono, a amɔ́ gɛ́hɛ́ a amɔ́: «Dɛ á sɔmɔ́ Mesíi!» nɔ́ɔnɔ gó lɛ́ aá Kilítusu. Gɛ́hɛ́ go ɛ́da na Símono naá boayá bá Yésusu. Yésusu a á mo ɛ́ná, go gálɛda a amɔ́: «Maamɔ́ɔ o lɔ́mɔ́ Símono moɔnɔ́ ba Sáŋa; bá nɛ́ ɛ́da go go dɔ́ŋɔnɔ bá amɔ́ Sɛ́fasɛ», naá cí goŋaá Gɛdánɛ́dánɛ́.
Gó bélenye, Yésusu go saŋa go ɛ́da naá Gelilée. Gɛ́hɛ́ go lumene na Fílibi, a báá mo oyáná a amɔ́: «Mbienéemú.» Fílibi a mba lɛ́ ba tɛ́sɔnɔ ya Bɛ́tɛ́sayɛ́da, tɛ́sɔnɔ mmue eé mmue yɛ́ɛyɛ Andɛlɛ́ɛ na Píele bá lɔ́mɔ́ mbíényée. Gɛ́hɛ́ go ɛ́da gíde Natanayɛ́lɛ a amɔ́ gɛ́hɛ́ a amɔ́: «Dɛ ná lɛ́ na mɔtɔ mɔ́ɔnyɔ Mɔ́sɛsɛ a mbaá gálágáláa naá kálata ya bicele, mbúsí sá Asaŋa sɛ́ báá gálágáláa tɔ́nɔ go busío bɛ́hɛ́. A lɔ́mɔ́ Yésusu ba Násalɛdɛ, ohaŋa ba Yósɛbɛ.» Natanayɛ́lɛ go mo úhune a amɔ́: «Ɛkádɛ gá besé gɛ́ lɔ́mɔ́ ba go húme naá Násalɛdɛ o?» Fílibi go mo gundie a amɔ́: «Úlé o bɛ́ɛ́nɛna.» Aŋa Yésusu a mbɛɛ́ ɛ́ná Natanayɛ́lɛ a ná lɛ́ go úlene, gɛ́hɛ́ go gálɛda go busío bɛ́hɛ́ a amɔ́: «Mammana ya moɔnɔ́ ba Bɛ́ɛ́sɛlahɛ́ɛlɛ yɛ́yɛ́ɛ, a lɛ́ kanɛ cigí.» Natanayɛ́lɛ go mo úhune a amɔ́: «O ŋgíyimenemú áhanɛ́ɛ o?» Gɛ́hɛ́ go mo gundie a amɔ́: «Mbáa go ɛ́na gɛcamɛna gɛ́ɛgɛ o báá lɔmɔ́ naá cí ya bufiigíe, otóotoɛ yá ŋaá Fílibi a go dɔ́ŋɛnɔ.» Natanayɛ́lɛ go gɔnɔ gɔ́lɔ dogálɔ a amɔ́: «Eléébi, o lɛ́ Moɔnɔ́ ba Asaŋa, o lɛ́ ufuŋe yá Ɛ́sɛlahɛ́ɛlɛ.» Yésusu go mo gundie a amɔ́: «Go ó olímínyóo goakɛ́ mbáa go oyana caá mbáa go ɛ́na naá cí ya bufiigíe; o nɛ́ ɛ́nana bɛantáanta bá moóma bɛ́ɛbɛ bɛ́ dómbanamɔ́ bɔ́ɔbɔ.» Gɛ́hɛ́ go gídene a amɔ́: «Mammana mammana, ŋgaá nyó oyáná caá, no nɛ́ ɛ́na mmoɛná buunéelú, bɛɛ́ŋgɛlɛsɛ bá Asaŋa bá bólɛga, bá gɔsɔ naá mmoɛná ya Moɔnɔ́ ba mɔtɔ.»

Klausīties Sáŋa 1