Currently NT is Published. OT is in progress

Bagheli

अब्राहम अउर राजा दाऊद के सन्तान यीसु मसीह के बंसाबली इआमेर से हय, अब्राहम से इसहाक पइदा भें, अउर इसहाक से याकूब पइदा भें, अउर याकूब से यहूदा अउर उनखर भाई लोग पइदा भें। अउर यहूदा अउर तामार से फिरिस, अउर जोरह पइदा भें, अउर फिरिस से हिस्रोन पइदा भें, अउर हिस्रोन से एराम पइदा भें। अउर एराम से अम्मीनादाब पइदा भें, अउर अम्मीनादाब से नहसोन पइदा भें, अउर नहसोन से सलमोन पइदा भें। अउर सलमोन अउर राहाब से बोअज पइदा भें, अउर बोअज अउर रूत से ओबेद पइदा भें; अउर ओबेद से यिसय पइदा भें। अउर यिसय से राजा दाऊद पइदा भें, अउर राजा दाऊद उरिय्याह के मेहेरिआ काहीं राख लिहिन तय, ओहिन से सुलैमान पइदा भें। अउर सुलैमान से रहबाम पइदा भें; अउर रहबाम से अबिय्याह पइदा भें; अउर अबिय्याह से आसा पइदा भें। अउर आसा से यहोसाफात पइदा भें अउर यहोसाफात से योराम पइदा भें, अउर योराम से उज्जियाह पइदा भें। अउर उज्जियाह से योताम पइदा भें, अउर योताम से आहाज पइदा भें, अउर आहाज से हिजिकिय्याह पइदा भें। अउर हिजिकिय्याह से मनस्सिह पइदा भें, अउर मनस्सिह से आमोन पइदा भें, अउर आमोन से योसिय्याह पइदा भें। अउर इजराइल के मनइन काहीं बंदी बनाइके बेबीलोन देस माहीं लइ जाँइ के समय योसिय्याह से यकुन्याह अउर उनखर भाई पइदा भें।
बन्दी बनाइके बेबीलोन माहीं पहुँचे के बाद यकुन्याह से सालतिएल पइदा भें; अउर सालतिएल से जरुब्बाबिल पइदा भें। अउर जरुब्बाबिल से अबीहूद पइदा भें, अउर अबीहूद से इलयाकीम पइदा भें; अउर इलयाकीम से अजोर पइदा भें। अउर अजोर से सदोक पइदा भें; अउर सदोक से अखीम पइदा भें; अउर अखीम से इलीहूद पइदा भें। अउर इलीहूद से इलियाजार पइदा भें; अउर इलियाजार से मत्तान पइदा भें; अउर मत्तान से याकूब पइदा भें। अउर याकूब से यूसुफ पइदा भें; जउन मरियम के मंसेरुआ आहीं, अउर मरियम से यीसु पइदा भें, जउन मसीह कहाबत हें। इआमेर से अब्राहम से राजा दाऊद तक चउदा पीढ़ी भय, अउर राजा दाऊद से बेबीलोन माहीं बंदी बनाइके पहुँचाए जाँय तक चउदा पीढ़ी भय, अउर बंदी होइके बेबीलोन माहीं पहुँचाए जाँय के समय से मसीह तक चउदा पीढ़ी भय।


यीसु मसीह के जनम इआमेर से भ, कि उनखे महतारी मरियम के सगाई यूसुफ के साथ होइगे रही हय, पय उनखे साथ काज होंइ से पहिलेन ऊँ पबित्र आत्मा के सक्ती से लड़कहाई होइ गईं तय। अउर उनखर मंसेरुआ यूसुफ जउन खुब नीक मनई रहे हँय, ऊँ मरियम काहीं बदनाम नहीं करँइ चाहत रहे आहीं, एसे ऊँ मन माहीं इआ बिचार करत रहे हँय, कि हम उनहीं चुप्पय से छोंड़ि देब। अउर जब ऊँ एखे बारे माहीं सोचतय रहे हँय, तबहिन प्रभू के दूत उनहीं सपन माहीं देखाई दिहिन, अउर उनसे कहँइ लागें, “हे यूसुफ राजा दाऊद के सन्तान, तूँ अपने मेहेरिआ मरियम काहीं अपने इहाँ लइ जाँइ से डेरा न; काहेकि जउन उनखे पेटे माहीं बच्चा हय, उआ पबित्र आत्मा के सक्ती से भ हय। अउर उनखे लड़िका पइदा होई, अउर तूँ उनखर नाम यीसु धराया; काहेकि ऊँ अपने लोगन काहीं उनखे पापन से मुक्ती देइहँय।”
इआ सब एसे भ, कि जउन बचन प्रभू अपने सँदेस बतामँइ बाले के व्दारा कहिन रहा हय; उआ पूर होय। कि “देखा एकठे कुमारी लड़कहाई होई, अउर ओखे लड़िका पइदा होई अउर ओखर नाम ‘इम्मानुएल’ धराबा जई, जेखर मतलब हय ‘परमातिमा हमरे पंचन के साथ हें’।” जब यूसुफ के नींद खुली तब प्रभू के दूत के हुकुम के मुताबिक ऊँ मरियम से काज कइके उनहीं अपने घर लइ आएँ। अउर जब तक उनखे लड़िका पइदा नहीं होइगा, तब तक यूसुफ उनखे साथ नहीं सोइन, अउर जब उनखे लड़िका पइदा भ, तब उनखर नाम यीसु धराइन।

Klausīties मत्ती 1