Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so á piŋ ndé á mbū nnɔ yí ŋ́gɛ: «Mmɔʼ ŋgaŋ lewūʼ a le wɛ̄ mmɔʼ ŋiŋ yīi, a le néŋ á yí ŋ́gɛ, a a nɔŋ ncʉ̄tɛ á tsitsi yi. Mɛ́ shʉʼ njhʉ́ á zoʼ eshúŋ á yí ŋ́gɛ, ŋgaŋ afaʼ yi wɔ̄, a á si ntsēŋtɛ ŋkāp zi tseŋte. Mɔʼɔ́ afaʼ yi á tɔ́ŋ á yí, ńdé á mbū yí ŋ́gɛ: “Meŋ ke júʼ mɛ́ gɛ, o ó si ŋgāa á lɛ́? Cuŋte meŋwaʼne esaá, ńdɔk eshʉ̄ʼ. O té shʉʼ ezéŋ á tsitsi ga ecʉte ɛ́.”
Ŋgaŋ afaʼ wuɔ mɛ́t, á gʉɔ efhʉ̄te á ntē yí, tɛ ndé ŋ́gɛ: “Mɔʼɔ́ ga a á si ŋgɔ̄ á efók meŋ afaʼ. Meŋ á páʼa, éghʉ páʼ lā? Meŋ te wɛ̄ mbʉʼ á lelɔk njʉ́ʼ ŋgɔ̄ŋ ɔ́. Meŋ a piŋ ecʉ́ʼ esē gɔ́, tɛ́ lɔ́ ndɔ̄ ɔ̄?” Éfhʉ̄te épúp, tɛ ndé ŋ́gɛ: “Meŋ á zhɛ́ páʼ meŋ a ghʉ épúp, tɛ mesoó esaá pá, é ekókne á gá á ŋgyā pɔ́p, afʉʼ zīi mɔʼɔ́ afaʼ ga, a á shʉʼ njūŋ á gá.” Ńdɛ ntɔ́ŋ epuɔ pīi, pɔ́ pɔɔ́ŋ njú á mbū mɔʼɔ́ yi, á taʼ a taʼ, ńzɛ́tte á ŋgaŋ mvhɔ ŋ́gɛ: “O pɔɔ́ŋ akɔ̄ zīi, o o yá á mbū mɔʼɔ́ ga ā?” Á pwɛt ŋ́gɛ: “Mévɛ̄t ekūm ŋkhʉ.” Ŋgaŋ afaʼ á lé á mbū yí ŋ́gɛ: “Aŋwaʼne zīi o le tíī, a ajʉɔ. Náŋ á esī, ŋ́kúmne ntí ŋ́gɛ, ekūm megēm táa.” Ńzɛ́tte mmɔʼ ŋgaŋ ŋ́gɛ: “O pɔɔ́ŋ akɔ̄ zīi, o o yá á mbū mɔʼɔ́ ga ā?” Á tsɔ́ʼ ŋ́gɛ: “Ŋ́gesáŋ epa ŋkhʉ.” Á lé á mbū yí ŋ́gɛ: “Aŋwaʼne zīi o le tíī, a ajʉɔ. Kɔ, ŋ́kúmne ntí ŋ́gɛ, epa megēm lefaá.” Mɔʼɔ́ afaʼ á shʉʼ njʉ́ɔ páʼ ŋgaŋ afaʼ a á jʉ á yí épúp, ńdé ŋ́gɛ: «Ndʉɛ wuɔ, a yiīk tɛʼ. »
Yɛɛ́so á ge ezoko, ńdé ŋ́gɛ: «Anuúnē, wɔ néŋ‑ntē ánɛ tsitsi ŋgɔŋ wuɔ, é zhɛɛ́ á letē njhʉ̄ ncūŋte menu mɔ́p á nnɔ pɔ́p, ńtɔ́k epuɔ pīi, pɔ́ é nzem Ndém. »
Yɛɛ́so á zéŋ ndé ŋ́gɛ: «Ŋkāp é páʼā ŋgɔ́ yīi, e gɔ eghʉ̄ʉ menu tepɔŋ ntií ntiī. Meŋ ké eshúŋɔ á wɛ́ ŋ́gɛ, pɛ elɔ̄k ezɛ ŋkāp, ŋ́ghʉ̄ áa mefaʼ membɔŋ á mvhɔ Ndém. Ńzhɛ́ á légɛ, e shʉʼɛ nnáŋ tɛ mmī á mbū pɛ á ndo esī atsetsáʼ, mɛ́ lɔk á wɛ́ mé lephū, pɛ a Ndém mé cʉ́ʼɛ nnáŋa. Ŋiŋ a gɔ́ɔ ndeŋ ndeŋ ánɛ mezízí menu, mbɔ a a shʉʼ ezéŋ egɔ́ ndeŋ ndeŋ ánɛ memía. Ŋiŋ a piŋɛ ŋgwɛ̄ mekɛ̄t ánɛ mezízí menu, mbɔ a ezéŋ ewɛ mekɛ̄t ánɛ memía. A gɔ éyi, pɛ kɛ te ndeŋ ndeŋ ánɛ ŋkāp zīi, é gɔ ezéŋ ŋghʉ̄ mefaʼ tepɔŋ ɔ́, mbɔ Ndém a gɔ eghʉ̄ʉ páʼ lā, tɛ́ ŋgyá á kwaʼ lewūʼ á mbū pɛ ɛ̄? A gɔ éyi, pɛ kɛ te ndeŋ ndeŋ, ánɛ ecū mīi, ŋiŋ ndɛʼɛ a á ntsékne á mbū pɛ tsékne ɛ́, mbɔ awɔ́ a gɔ eshʉ̄ʉʼ ńzéŋ ŋgyá á amɔ̄ʼ azō á mbū pɛ, ŋ́gɛ, a ecʉ́ʼ azɛ́ ɛ́?
«Taʼ ŋgaŋ afaʼ, a gɔ le fāʼ á mbū memɔʼɔ́ afaʼ mémpīa á taʼ legʉɔ ɔ́. A ghʉɛ épúp, mbɔ a a shʉʼ epa mmɔʼ, épiŋ ekɔŋ mmɔʼ, ŋ́gɔ́ te épúp ɔ́, á júʼ nchu mmɔʼ, ḿbiŋ ŋgwák eyi mmɔʼ. Ŋiŋ a gɔ le júʼ á mbū Ndém, ḿbiŋ nzéŋ njúʼ á mbū ŋkāp á. »
Epuɔ Falísia é júʼ ashuŋne jʉɔ mɛ́t, ńcʉ́ʼɛ nzwī á Yɛɛ́so zwi, melaʼ mīi pɔ́ tshií ntē wɔ́p ánɛ ŋkāp tɛʼ. Yɛɛ́so á lɛ mbwɛ̄t, ńdé á mbū pɔ́p ŋ́gɛ: «Pɛ pwɔ̄, pɛ kʉʼneé mbɔp menēk epuɔ, ŋ́gɛ, pɛ é megaŋ anuúnē. Táʼ, Ndém á ke nnɔ̄ŋ nzhɛ́ɛ ajū mīi, pɛ é aziɛ́. Pɛ eké nzhɛ́ á légɛ, mmɔʼ mía ajū mīi, epuɔ menɔŋ é wuʼtɛ, á mbū Ndém, ŋ́gɔ́ áa ajūɔ ŋŋyaŋne ŋyaŋne. »


Yɛɛ́so á zéŋ ndé ŋ́gɛ: «Á lɛ afʉʼ mvhɔ, mɛ́ nɔŋ njúʼɔ áa lepé Mɔɔ́sɛ, mbɔɔ anu zīi, metswi‑ŋke Ndém é le tíī. Tɛ efhó afʉʼ zīi Jáaŋ Mbaptísi a le shʉ̄ʼē, ŋ́kó tsetsɔŋɔ, mɛ́ cʉ́ʼɛ ntswī ŋke mbɔŋ ndʉ́ɛ́ ŋ́gɛ, Ndém a á si ntshíɛ lefɔ tsí. Awíɛ awíɛ á nɔŋ efóko mbʉʼ, ŋ́gɔ́ɔ á nzem yí. Mɛ́ ké te ndʉ́ɛ́ ŋ́gɛ, lepé Mɔɔ́sɛ é pí í, lephū pɔ́ esī atsetsáʼ e láʼ ege emii, méŋ azō a á le fhó ánɛ lepé mɛ́t, ŋ́ŋɛ̄nne ɛ́. Ńdɔkɔ ŋ́gɛ, ŋiŋ a juŋɔ á nzwí yi, ḿbīŋ nnéŋ mmɔʼ á ŋgyā, mbɔ a á ghʉ agā. Ŋiŋ a piŋɛ ndá ŋgyā pɔ́ menzwí yīi, ndō yi a á njūŋ á yí, mbɔ ŋgaŋ a á ghʉ agā. »

Yɛɛ́so á zéŋ mbɛ́te ashuŋne lepúʼ jʉɔ, ńdé ŋ́gɛ: «Mmɔʼ ŋgaŋ lewūʼ a lɛ éwú, ŋ́gɔ́ eleʼé etsem ncūŋte nnɛ̄t zi, ḿmāʼ menzhó mīi é teē nzwiŋ, ńnáŋ efʉʼ metsem, ŋ́ghʉ̄ lekāk, ḿpfɛ́t etsō mbɔŋ. Mmɔʼ ŋiŋ a le zéŋ ŋgɔ́ azí éwú, lezēŋ tsí é gɔ́ lɛ Lazaa, ŋ́gɔ́ á te kuʼ ánɛ azō, mbɔ meféŋ é lē mbú njhʉ́ á yí. Á shʉʼɛ nnɔ̄ŋɔ á nchu ŋgyā ŋgaŋ lewūʼ wuɔ mɛ́t efʉʼ metsem. Ńnɔŋ ntsáa ŋ́gɛ, ŋiŋ wuɔ mɛ́t a láʼa ŋgē epfɛ́t etsō, mesa é whʉte á esī, á pɛ́te mpfɛ́t lɛ́. Mbɔɔ membhʉ̄ é lɛ si eshʉ̄ʼɛ éwú, ḿbēŋtɛ meféŋ mí. Á shʉʼ nnáŋ tɛ ŋkwhʉ́, mecɔʼ Ndém é shʉʼ ndɔ̄k á yí ŋgʉ̄ɔ, ńnáŋ á lezēŋ Ablaham. Ŋgaŋ lewūʼ á shʉʼ ŋkwhʉ́ azí, mɛ́ chʉ́ nnɛ̄t ntúŋ á yí, á sóʼo mé apwɛt, ńnáŋ éwú á ntē mía ŋgʉɔ̄ʼ. Éshʉʼ nnáŋ tɛ mbwʉ́ʼɛ lezēk tsí, ńjʉ́ɔ á Ablaham tɛ éwú, Lazaa á náŋ á lezēŋ yí. Á tɔ́ŋ ndé ŋ́gɛ: “Mɔʼɔ́ ga Ablaham, lɛ ntsá mezeŋɛ má, ńtó á Lazaa, a egʉɔ ncɔ̄ʼ á thu‑apū yi, á ntē ntshi, ńdɔk eshʉ̄ʼ ńtsāpa agāk zá. Meŋ á ntē mmók ega, ḿbú njʉ́ɔ ŋgʉɔ̄ʼ tɛʼ.” Ablaham á lɛ mbwɛ̄t ŋ́gɛ: “Méŋ ga, kímte páʼ o le náŋ á ndo esī atsetsáʼ, á ntē lepɔŋ, Lazaa á nɔŋ njʉ́ɔɔ ŋgʉɔ̄ʼ. Á tsetsɔŋɔ, Lazaa á gɔ́ á ntē lepɔŋ, o gɔ́ á ntē ŋgʉɔ̄ʼ. Ńzi ŋké te épúp ɔ́, mbɔ mía mía apeŋte, a fakneē á yímpɛ, tɛ ŋgɔ́ yīi, ŋiŋ a gɔ le fhó á nzéŋ ega, ŋ́gʉ̄ɔ ejɔ̄ nzéŋ ɛ́, ḿbīŋ le fhó ejɔ̄ nzéŋ, éshʉ̄ʼ ega á.” Á zéŋ eswíŋte á yí ŋ́gɛ: “Á gɔ́ épúp, mɔ́ʼɔ, o elɛ ntó á Lazaa á mba pek, a gʉɔ eshúŋ á mbū metsiʼnzem pá métáa, ntií zīi pɔ́ gɔ eghʉ̄ʉ azɔ́p épúp, tɛ pɔ́ le fú ŋkó á ntē ŋgʉɔ̄ʼ jʉɔ zīi, meŋ á éwú la á.” Á gɛ: “Pɔ́ wɛɛ̄ meŋwaʼne mīi, Mɔɔ́sɛ pɔ́ metswi‑ŋke Ndém é le tíī, pɔ́ elɛ njúʼ ajū mīi, á ntē éwú.” Á lʉʼ ŋ́gɛ: “Ŋgáŋ me mɔ́ʼɔ Ablaham, ŋiŋ mé ké efhó á apwɛt, éshʉ̄ʼ ntswī ŋke á mbū pɔ́p, mbɔ pɔ́ e gɔ nnɛ̄t zɔp, éwáʼ atswhī tepɔŋ zɔ́p.” Á pwɛt ŋ́gɛ: “Pɔ́ nɔŋ ndʉ̄ʼɛ á lejūʼ ŋke Mɔɔ́sɛ, mbɔɔ eyi metswi‑ŋke Ndém, mbɔ pɔ́ gɔ́ le pīŋ mvéŋ eyi ŋiŋ yīi, a fhɔ́ɔ á apwɛt ɛ́.”»

Klausīties Lúkási 16