Andinin-tSoratra Masina malaza indrindra nalaina tao amin'ny Deoteronomia 30

Hizara

Miantso ny lanitra sy ny tany aho anio ho vavolombelona aminareo fa efa nataoko teo anoloanao ny fiainana sy ny fahafatesana ary ny fitahiana sy ny fanozonana; koa mifidiana ny fiainana, mba ho velona ianao sy ny taranakao, dia ny ho tia NY TOMPO Andriamanitrao ianao ka hihaino ny feony sy hifikitra Aminy; fa izany no fiainanao sy fahamaroan’ny andronao, mba honenanao eo amin’ny tany izay nianianan’NY TOMPO tamin’i Abrahama sy Isaka ary i Jakoba razanao, homena azy.

Tamin’ny nandidiako anao androany dia ny ho tia NY TOMPO Andriamanitrao ka handeha amin’ny lalany ary hitandrina ny didiny sy ny lalànany mbamin’ny fitsipiny. Mba ho velona ianao sady hihamaro, ary mba hotahìn’NY TOMPO Andriamanitrao ianao any amin’ny tany izay efa hidiranao holovana.

Indro efa nataoko teo anoloanao androany ny fiainana sy ny soa ary ny fahafatesana sy ny loza.

Fa eo akaikinao indrindra ny teny, dia eo am-bavanao sy ao am-ponao, mba harahinao.

Dia hoforan’NY TOMPO Andriamanitrao ny fonao sy ny fon’ny taranakao hitiavanao NY TOMPO Andriamanitrao amin’ny fonao manontolo sy ny fanahinao manontolo, mba ho velona ianao.

Ary hataon’NY TOMPO Andriamanitrao manana amby ampy ianao amin’izay hahasoa anao, dia amin’ny asan’ny tananao sy ny ateraky ny kibonao ary ny ateraky ny biby fiompinao sy ny vokatry ny taninao. Fa ho faly aminao indray NY TOMPO ka hanasoa anao, araka izay nampifaliany ny razanao

Fa raha mivily kosa ny fonao ka tsy mihaino ianao, fa voataona hiankohoka eo anatrehan’izay andriamanitra hafa sy hanompo azy, dia lazaiko aminareo anio fa ho ringana tokoa ianareo, ary tsy ho maro andro eo amin’ny tany izay efa hidiranao holovana, rehefa tafita an’i Jordana ianareo.

Fa izao lalàna izao, izay omeko anao anio, dia tsy saro-pantarina ho anao sady tsy lavitra.

Tsy any an-danitra izany ka hitenenanao hoe: Iza no hiakatra any an-danitra haka azy ho antsika, mba hohenointsika ka harahintsika?

Ary tsy any andafin’ny ranomasina ihany koa ka hitenenanao hoe: Iza no hankany andafin’ny ranomasina haka azy ho antsika mba hohenointsika ka harahintsika?