OHÚTU 12
12
Igwú nɛ̄ Ɔwɔicō hī Ébram ā
1 #
Ācot 7.2,3; Uhíb 11.8 Anɔ́ɔ Óndú ā da Ébram kahíníī, “Nyɛ̄ɛ̄ ŋmá ajɛ kú ɔlɛ́ uwɔ, mɛ́mla ipú aɔ́máapú uwɔ mɛ́mla ɔlɛ́ ádā uwɔ, cɛ́ɛ́ ká ā ga ajɛ nɛ̄ n géē mafú gā uwɔ ā. 2N géē je uwɔ pīya ádā kú éwo nɛ̄hi. N géē hɔ́hā ce uwɔ. N géē yá kú iyē kú uwɔ kóō lóofu nɛ̄hi, cɛ́ɛ́ ká ā wɛ ɔ̄cɛ nōo wɛ ɔhā lɛ ācɛ ɔhá. 3#Ugal 3.8N géē hɔ́hā ce ācɛ nēe hɔ́hā ce uwɔ ā, n kē géē tókónu lɛ ācɛ nēe tókónu gā uwɔ ā. O bū ipú uwɔ ā, nɛ̄ n géē hɔ́hā ce odúúdú aéwo kú ɛcɛ á.”
4Anɔ́ɔ Ébram gbɔɔ́ ō nyɔ̄, ɛ́gɛ́nɛ̄ Óndú ā da ɔ́ ā á. Ulɔ́tu, ɔyí kú ɔyínɛ̄ nū nyɔ̄ mɛ́mla anú dúú. Ébram wɛ iháyí ofɛtá ce igwɛ́ɛhɔ̄, eko nōó nyɛ̄ɛ̄ ŋmá ajɛ kú Uháran āa. 5Ébram kwú Usárāyi, ɔnyā nū, mɛ́mla Ulɔ́tu, ɔyí kú ɔyínɛ́ nū ā, mɛ́mla ācɛ mɛ́mla ɔdā dóódu nēé lɛ Uháran ā ú kpó, anɔ́ɔ uwā gbɔɔ́ ō nyɔ̄ ga ajɛ kú Ukénan á. Eko nēé gā ajɛ kú Ukénan ā, 6Ébram yɛ ipú ajɛ le tá ajɛ kú Ussɛ́kɛm, ɛgiyí ɔcí nēé hī ka óokú kú Umɔ́re ā. Eko ɔ́ɔmā ācɛ Ukénan bá ipú ajɛ ā kpɔ́ ɛ́ɛ́. 7#Ācot 7.5; Ugal 3.16Anɔ́ɔ Óndú ā wā ɛgiyí Ébram, anɔ́ɔ ó kahíníī, “N géē je ajɛ nyā lɛ ipɔ́ɔma kú uwɔ.” Anɔ́ɔ Ébram le ede gwó abɔ́ɔ lɛ Óndú ā á. 8Igbīhi ɛ̄nyā ā, ó lɛ áklɔ̄kpɛ kú nū fu lɛyíkwu ɛháajɛ ga ɛyí ɛfu, ɛnɔ̄ɔ̄cī kú Ubɛ́tɛlu. Ubɛ́tɛlu yɔ̄ ɛnɔ̄ɔ̄nɛ̄, Ái kē yɔ̄ ɛnɔ̄ɔ̄cī kú ɔlɛ́ nū. Abɔ́ɔ ā, ó le ede gwó lɛ Óndú ā. Ó hī Óndú ā igwu, yɔ̄ ī gbā ɔ́ ɛ̄gbā abɔ́ɔ. 9Anɔ́ɔ Ébram yɔ̄ ī yɛ ga iyɔ̄bū, nyɔ̄ ga ɛháajɛ kú Ukénan, lɛyíkwu ɛga nēé gē hī ka Unégēbu ā á.
10Ɔkpɛtā yɔ̄ ī ŋmó ajɛ kú Ukénan. Anɔ́ɔ Ébram le tá Íjīpiti gaá lā abɔ́ɔ á, ohígbū ka ɔkpɛtā nōo yɔ̄ Ukénan ā nwuné nɛ̄hi. 11Eko nōó gáā gā ipú ajɛ kú Íjīpiti ā, ó da Usárāyi, ɔnyā nū ā, kahíníī, “N jé ka a wɛ ɔnyā nōo lɔhi o má eyī nɛ̄hi. 12Eko nɛ̄ ācɛ Íjīpiti lɛ uwɔ má, é géē ka, ɛ̄nyā wɛ ɔnyā nū á, cɛ́ɛ́ é kwú um ŋmó. Amáŋ é géē cɛ̄ gā uwɔ yēeyī. 13#Ohút 20.2; 26.7Da uwá ka anúɔ wɛ ɔyínɛ́ um nɔ̄nyā, cɛ́ɛ́ ohígbū uwɔ ā, é géē cɛ̄ ga um yēeyī klla í yá alɔ lɔhi.” 14Eko nɛ̄ Ébram le tá Íjīpiti ā, ācɛ Íjīpiti le má ka ɔnyā ā ɔ́ɔ lɔhi o má eyī nɛ̄hi. 15Eko nɛ̄ aígabɔ̄ kú Uféro lɛ ɔ́ má ā, é cɛ̄tra anú ka ɔ́ɔ cíkā ō wɛ ɔnyā kú Uféro. Anɔ́ɔ é kwú ɔnyā ā ú wā ipɔ́nū kú ɔlɛ́ Uféro á. 16Ohígbū ɔnyā ā, Uféro yá ɔdā olɔhi lɛ Ébram. Ó kpó aálá alɛwa mɛ́mla aɛ́na mɛ́mla aíjakī mɛ́mla aɔ́fiyɛ nɔ̄nyīlɔ mɛ́mla aɔ́fiyɛ nɔ̄nyā mɛ́mla aínyānkwūlūmī alɛwa lɛ ɔ́.
17Amáŋ Ɔwɔicō le italā yá Uféro mɛ́mla ācɛ ɔlɛ́ nū ohígbū Usárāyi, ɔnyā kú Ébram. 18Uféro le Ébram hīīgwú, anɔ́ɔ ó da ɔ́ kahíníī, “Ɔdí nɛ̄ a yá um yɔ̄ ā? Ɔdíyá nɛ̄ á da um ka ɔ́ɔ wɛ ɔnyā anúɔ ŋ́ mā ā? 19Ɔdīyá, nɛ̄ ā ka ka ɔ́ɔ wɛ ɔyínɛ́ anúɔ nɔ̄nyā āa? Ɛ́ɛ́ nɛ̄ n gē je ɔ́ ɔnyā um ā? Abālɔbányā ā, ɔnyā uwɔ yɔ̄ á, kwú ɔ̄ ú kú aá nyɛ̄ɛ̄.” 20Anɔ́ɔ Uféro le ɔ́da je lɛ ācɛ ɔlɛ́ nū ohígbū uwā á. É le ɔ́ bītá ga ɔwɛ, mɛ́mla ɔnyā nū mɛ́mla ɔdā dóódu nɛ̄ é lɛ ā, anɔ́ɔ é nyɛ̄ á.
Voafantina amin'izao fotoana izao:
OHÚTU 12: IFBCL
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra