Mateo 4
4
Yesu alweeshiwa un-nyika
(Mk 1:12-13; Lk 4:1-13)
1Nga pano Yesu watwaalwa nu Mweso uku nyika, kuti aeshiiwe na Chiwa. 2Wausilisha ukulya usiku nu nsanya, amaanda amakumi yani. Palinji walola iasala yamwaya. 3Keesha wishile, waneena, waati: “Ndi we mwana wi Leesa, nena amafiinga ya yawe iishima.” 4Nawe waneena, waati: “Chaandikwe: ‘Untu ataangi awiikalile iishima intupu, leelo ukwiswii lyooshi lino lifumile un-nnomo wi Leesa.’ ” 5Nga Chiwa wanseenda afika uku nsi nsweefu, wamwika apiyulu apa ng'anda-nkulu-iyi-Leesa, 6wannena, waati: “Ndi wewuli Mwana wi Leesa, tumpuka apaasi, kuno chaandikwe:
‘Wankutumila yamalaika yaakwe;
num-makasa yao yalukutoola.
Utiise ukumike ikulu lyako ukwifiinga.’ ”
7Yesu wannena, waati: “Chaandikwe kweene fino utachimweesha uMwene, Leesa waako.”
8Nga kaili Chiwa wanseenda uku mwaamba untali nkaani, wandaanga uweene wooshi wa nsi nu usiipe waakwe. 9Wannenile, waati: “Fyooshi fi nankupa, ndi wapona nu kufukamila.” 10Apano Yesu wannena, waati: “Pita, Shetani we, kuno chaandikwe: ‘Umufukamile uMwene Leesa wako, nu kumwombela weenga kweene.” 11Apano Chiwa wanshiile; nga lola, yiisa yamalaika yamwombela.
Yesu watangula undimo
(Mk 1:14-15; Lk 4:14-15)
12Nga pano Yesu wapulika fino Yoane wanyepwa, wapisile uku Galilea. 13Atina ku Nasaleti, aya wikala uku Kapenaumu, unsi uno uli umbali yi yeemba, um-wilaya yi Sebuloni na Naftali. 14Kuti liwe iswi lino lyalaashilwe na kalausha Isaya, ukuti:
15“Insi yi Sebuloni ni nsi yi Naftali,
isila yi yeemba imbalama yi Yodani,
Galilea yi yakulukuwa:
16Antu yaya, yano yikashile un-chaanda,
mwengelela unkulu.
Nayo yano yikashile un-nsi ni chisau cha lufu,
mwengelela wiisila.”
17Ukufuma liyo kweene Yesu watampa ukusunda angaluti: “Fipelini, kuno uweene-wa-mwiyulu uwupalamila.”
Yesu wita alondeshi
(Mk 1:16-20; Lk 5:1-11)
18Nawe pano wapitaala umbali yi yemba wi Galilea, wawine aantu yayili, Simoni wino yataangi Petlo, na Andelea unnina, angi yalusuumba isuumbo muli yeemba; kuno yelaanga. 19Wayaneena, waati: “Ndondeliini; neene ndumuchita muwe yakeela ya aantu.” 20Liyo kweene yasha amasuumbo yao, yannondela. 21Waya uku nkoleelo, waya wasaana kayili yamwi yayili, untu nunnina, Yakobo mwaana wi Sebedeo na Yoane unnina, yano yali um-wato apali poonga na Sebedeo, isi wao, aangi yalulimba masuumbo yao; wayita. 22Liyo kwene yanshauwaayo na isi wao, yannondela.
Yesu wataampa ukuposha alwaale
(Mt 8:14-17; Mk 1:29-34; Lk 6:17-19; 4:38-42)
23Nawe wapitananga um-Galilea yooshi, angalu sambilisha un-ng'aanda shaao iswii Leesa, nu kusuunda iswi-isiipe ilya weene, nu kuposha indwaala ni mboombo uku yantu. 24Amaswi yaakwe yalumbuka uku Silia yooshi. Yandeetela yooshi yano yaombokela ni mboombo sha chila mboombo na machuulo, yano yali ni fiwa na ya fifumfumi na yitenda, nga wayaposha. 25Na maumba tupu yannondela ukufuma ku Galilea nu kufuma ku Dekapoli, nu ku Yelusalemu nu ku Yudea nu ku mbalama ya ku Yodani.
Voafantina amin'izao fotoana izao:
Mateo 4: FNT1988
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
New Testament in Fipa © United Bible Societies, 1988. Bible Society of Tanzania.